ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་1ཉིན་གློག་འཕྲིན་འབྱོར་གསལ། ཉེ་ཆར། ཀྲུང་གུང་ཀྲུང་དབྱང་གཞུང་དོན་ཐིང་གིས《“བདུན་གཅིག་བྱས་རྗེས་གཟེངས་རྟགས”ཀྱི་མིང་འདོན་དང་རྒྱལ་ཡོངས་ཀྱི“ཕུལ་བྱུང་གཉིས་དང་སྔོན་ཐོན་གཅིག”གི་འོས་སྦྱོར་ལས་དོན་ཡག་པོ་སྒྲུབ་དགོས་པའི་སྐོར་གྱི་བརྡ་ཐོ》(གཤམ་དུ《བརྡ་ཐོ》ཞེས་བསྡུ་རྒྱུ)བཀྲམ་ཞིང་། 《བརྡ་ཐོའི》ནང་བསྟན་དོན། ཏང་ཀྲུང་དབྱང་གིས་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་105འཁོར་བའི་མཚམས་སུ་ཀྲུང་གུང་ཀྲུང་དབྱང་གི་མིང་ཐོག་ནས“བདུན་གཅིག་བྱས་རྗེས་གཟེངས་རྟགས”སྤྲད་དེ་རྒྱལ་ཡོངས་ཀྱི་ཕུལ་བྱུང་གུང་ཁྲན་ཏང་ཡོན་དང་། རྒྱལ་ཡོངས་ཀྱི་ཕུལ་བྱུང་ཏང་དོན་ལས་དོན་པ། རྒྱལ་ཡོངས་ཀྱི་སྔོན་ཐོན་གཞི་རིམ་ཏང་རྩ་འཛུགས་བཅས་ལ་གཟེངས་བསྟོད་བྱེད་རྒྱུའི་གཏན་འབེབས་བྱས་པ་རེད།

《བརྡ་ཐོའི》ནང་བླང་བྱ་བཏོན་དོན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་རིམ་བྱུང་གི་དགོངས་དོན་ལག་བསྟར་གཏིང་ཟབ་དང་། ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་བཀོད་སྒྲིག་དོན་འཁྱོལ་ནན་ཏན། “བདུན་གཅིག་བྱས་རྗེས་གཟེངས་རྟགས”དཔྱད་འདེམས་དང་སྤྲོད་པ་དང་རྒྱལ་ཡོངས་ཀྱི“ཕུལ་བྱུང་གཉིས་དང་སྔོན་ཐོན་གཅིག”དཔྱད་འདེམས་དང་གཟེངས་བསྟོད་ལས་དོན་ཡག་པོ་སྒྲུབ་པ་བཅས་བྱས་ཏེ། བྱས་རྗེས་དཔེ་བཟང་དང་སྔོན་ཐོན་དཔེ་མཚོན་གྱི་བསམ་པའི་ཉམས་འགྱུར་གང་ལེགས་མངོན་པ་དང་། འཐབ་ཕྱོགས་ཁག་དང་། ཁྱབ་ཁོངས་ཁག ལས་དོན་ཁག་བཅས་ཀྱི་ཁྲོད་རྒྱ་ཆེའི་ཏང་རྩ་འཛུགས་དང་ཏང་ཡོན་ལ་ཐོབ་པའི་གཡུར་ཟའི་གྲུབ་འབྲས་གང་ལེགས་མངོན་པར་བྱེད་དགོས། དད་སེམས་བརྟན་པོ་དང་། དམིགས་ཡུལ་ལག་བསྟར། འབད་བརྩོན་ལེགས་སྐྱེས། གཞུང་ཞེན་རྣམ་དག་བཅས་ཀྱི་བླ་ན་མེད་པའི་གཤིས་རྒྱུད་དང་སྙིང་སྟོབས་དར་སྤེལ་ཤུགས་ཆེན་བཏང་སྟེ། རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལ“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ་དང་། “འདུ་ཤེས་བཞི”ཟབ་ཏུ་གཏོང་བ། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བཅས་ལ་སློབ་གསོ་ཁྲིད་སྟོན་བྱེད་པ་དང་། འགན་འཁྲི་འཁུར་ཕོད་པ་དང་དཔའ་ངར་ཆེན་པོས་སྔོན་ཐོན་བརྩོན་ལེན་བྱེད་པ། ཏང་ཡོངས་དང་སྤྱི་ཚོགས་ཡོངས་སུ་སྔོན་ཐོན་གོང་བཀུར་དང་བཟང་པོ་མཐོང་ན་མིག་ལྟོས་ཡར་འདྲེན་བྱེད་པའི་རྣམ་པ་ཟབ་མོ་ཆགས་པར་སྐུལ་འདེད་གཏོང་བ་བཅས་བྱས་ཏེ། “ལོ་ལྔ་ཚན་བཅོ་ལྔ་པའི”དུས་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་ཁག་བདེ་བླག་ངང་ལེགས་འགྲུབ་ཡོང་བ་དང་། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་བའི་རྣམ་པ་གསར་པ་རྒྱུན་ཆད་མེད་པར་གཏོད་རྒྱུར་ཐུན་མོང་ཐོག་འབད་འཐབ་བྱེད་དགོས།

《བརྡ་ཐོའི》ནང་། “བདུན་གཅིག་བྱས་རྗེས་གཟེངས་རྟགས”ཀྱི་མིང་འདོན་དང་རྒྱལ་ཡོངས་ཀྱི“ཕུལ་བྱུང་གཉིས་དང་སྔོན་ཐོན་གཅིག”གི་འོས་སྦྱོར་གྱི་གྲངས་འབོར་དང་ཆ་རྐྱེན། བྱ་ཐབས་བཅས་ཁ་གསལ་བཏོན་ཡོད། མིང་འདོན་ཚན་པ(འོས་སྦྱོར་ཚན་པ)ཁག་ལ་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། འགན་འཁྲི་འཁུར་ཤུགས་ཆེ་རུ་བཏང་ནས་སྒྲིག་འཛུགས་ལག་བསྟར་ཞིབ་ཚགས་བྱེད་དགོས་པ་དང་། ཏང་ནང་ཁུལ་གྱི་འབྲེལ་ཡོད་ཁྲིམས་སྲོལ་གཏན་འབེབས་ཀྱི་ཚད་གཞི་དང་། ཆ་རྐྱེན། གོ་རིམ་བཅས་ལ་ནན་པོར་གཞིགས་ཏེ་ཏང་ཨུད(ཏང་ཙུའུ)ཀྱི་འགོ་ཁྲིད་དང་འགག་སྒོ་སྲུང་བའི་ནུས་པ་ཏན་ཏིག་འདོན་དགོས། ཆབ་སྲིད་ཀྱི་ཚད་གཞི་ཨང་དང་པོར་འཇོག་རྒྱུ་མཐའ་འཁྱོངས་བྱས་ཏེ། མིང་འདོན་འོས་མི་དང་འོས་སྦྱོར་བྱ་ཡུལ་གྱི་རྒྱུན་ལྡན་གྱི་ལས་སྒྲུབ་ལ་ཕྱོགས་ཡོངས་ནས་རྟོག་ཞིབ་བྱས་ཏེ། ལེགས་སྐྱེས་ངོ་མ་དང་མང་ཚོགས་ཚང་མས་ཁས་ལེན་པ་དེ་ཤན་འབྱེད་ཀྱི་ཚད་གཞིར་བརྩི་དགོས། དམངས་གཙོ་དར་སྤེལ་གང་ལེགས་གཏོང་བ་དང་ཕྱོགས་ཁག་གི་བསམ་འཆར་རྒྱ་ཁྱབ་ཉན་ནས་སྔོན་ཐོན་རང་བཞིན་དང་། ཚབ་མཚོན་རང་བཞིན། དུས་རབས་རང་བཞིན་བཅས་གང་ལེགས་མངོན་པར་བྱེད་དགོས་པའི་བླང་བྱ་བཏོན་ཡོད་པ་རེད།