དགུན་ཉི་ལྡོག་གི་རྗེས་སུ། གྲང་ངར་ཆེ་བའི་དགུ་གསུམ་འདྲེན་པའི་ནམ་དུས་སུ་སླེབས་པས། ཆམ་རིམས་མཆེད་དེ་ཆམ་པ་རྒྱག་མཁན་མི་གྲངས་ཧ་ཅང་མང་པོ་ཡོད། ཆམ་ནད་ཕོག་པའི་ནད་པ་འགའ་ཤས་ཀྱིས་རྒྱུན་དུ་ཆམ་པའི་སྨན་དང་ཚ་བ་གཅོག་པའི་སྨན་མཉམ་དུ་བཏང་ནས་ཆམ་ནད་གང་མགྱོགས་དྲག་སྐྱེད་ཡོང་བའི་རེ་བ་བཅངས་ཀྱི་ཡོད་མོད། འོན་ཀྱང་གསོ་རིག་རིགས་གཅིག་མཁས་ཅན་གྱིས་དེ་ལྟར་བྱས་ན་མ་འགྲིག་པ་བརྗོད་ཅིང་། ཆམ་རིམས་མཆེད་པའི་དུས་ཚིགས་སུ་གལ་ཏེ་ཆམ་པ་ཕོག་ནས་ཚ་བ་རྒྱས་པ་སོགས་མི་བདེ་བའི་ནད་རྟགས་ཐོན་ཚེ། ནད་པ་རང་ཉིད་ནས་རང་དགར་སྨན་གང་བྱུང་དུ་གཏོང་མི་རུང་བར་དུས་ཐོག་ཏུ་སྨན་ཁང་ལ་བསྐྱོད་དེ་སྨན་བཅོས་བྱེད་དགོས་པའི་དྲན་སྐུལ་གནང་འདུག

པེ་ཅིང་ཨན་ཀྲེན་སྨན་ཁང་གི་དབུགས་འབྱིན་རྔུབ་དང་ཉེན་ཆེའི་ནད་རྟགས་གསོ་རིག་ཚན་ཁག་གི་འབུམ་རམས་སྨན་པ་ལིའུ་ཙེ་ཡིང་གིས། ཆམ་པའི་སྨན་གྱི་གྲུབ་ཆ་མང་པོའི་ནང་མ་གཞི་ནས་ཚ་བ་གཅོག་པའི་སྨན་གྱི་གྲུབ་ཆ་ལྡན་ཡོད་པས། ཡང་བསྐྱར་དེའི་སྒང་ལ་ཚ་བ་གཅོག་པའི་སྨན་བཏང་ཚེ་སྨན་གྱི་སྦྱོར་ཚད་མང་དུ་ཕྱིན་ནས་མཆིན་པ་དང་མཁལ་མའི་ནུས་པ་ཇེ་ཞན་དུ་འགྲོ་སྲིད་པར་བརྗོད།

བྱིས་པ་ཚ་བ་འཇགས་པ་སྨན་གཏོང་མཚམས་འཇོག་པའི་ཚད་གཞིར་འཛིན་མི་རུང་།

ཚ་བ་རྒྱས་པ་དང་གློ་ལུ་བ་སོགས་ཆམ་པའི་ནད་རྟགས་ཆུང་དུ་སོང་རྗེས། ལམ་སེང་སྨན་གཏོང་མཚམས་བཞག་ན་ཡག་པོ་མེད། གསོ་རིག་རིགས་གཅིག་མཁས་ཅན་གྱིས་ངོ་སྤྲོད་གནང་བར་གཞིགས་ན། སྤྱིར་བཏང་གློ་ཚད་གསོ་བཅོས་བྱེད་པར་གཟའ་འཁོར་2ནས་3བར་གྱི་དུས་ཚོད་དགོས་ཀྱི་ཡོད་ཅིང་དེ་ཡང་སྨན་གྱི་ནུས་པས་ནད་གཞི་རིམ་བཞིན་དྲག་སྐྱེད་བྱུང་བ་ཞིག་ཡིན། ཆམ་རིམས་ཕོག་པའི་བྱིས་པར་མཚོན་ན་ཚ་བ་འཇགས་མ་ཐག་སྨན་གཏོང་མཚམས་བཞག་ན་ནད་ལོག་རྒྱག་སྲིད་པ་མ་ཟད། ད་དུང་སྙིང་ཤའི་གཉན་ཚད་དང་གློ་ཚད་སོགས་ནད་རིགས་གཞན་ཡང་ཐོན་སྲིད།

བྱིས་པའི་ཆམ་རིམས་དྲག་སྐྱེད་བྱུང་མིན་གྱི་བརྡར་ཤ་གཅོད་སྟངས།

ཁྱིམ་བདག་གིས་བྱིས་པའི་ཆམ་རིམས་ཚབས་ཆེན་ཡིན་མིན་དང་སྨན་ཁང་དུ་འགྲོ་དགོས་མིན་གྱི་བརྡར་ཤ་གཅོད་སྟངས་འདི་དག་མཁྱེན་ན་ལེགས།

A. བྱིས་པའི་གསོན་ཤུགས་ལ་བལྟ་དགོས།

མིག་མདངས་གསལ་པོ་ཡིན་མིན་དང་། ངུ་སྐད་ཆེ་མིན། ལྷག་པར་དུ་བྱིས་པས་རྩེད་ཆས་རྩེ་ཐུབ་མིན་བཅས་ལ་བལྟ་དགོས། ཚ་བ་ཆེན་པོ་རྒྱས་ཡོད་ནའང་ཚ་བ་38°Cལ་འཇགས་མ་ཐག་ལམ་སེང་རང་གི་རྩེད་ཆས་རྩེ་རུ་སོང་ན་སྣང་དག་མེད་པའི་རྟགས་རེད།

B བྱིས་པའི་དབུགས་འབྱིན་རྔུབ་ལ་བལྟ་དགོས།

དབུགས་འབྱིན་རྔུབ་ཇེ་མགྱོགས་སུ་སོང་ཡོད་མེད་དང་། ཡང་ན་དབུགས་འབྱིན་རྔུབ་བྱེད་སྐབས་རྒྱུན་ལྡན་མིན་པའི་སྒྲ་ཡོད་མེད་ལ་བལྟ་དགོས།

C བྱིས་པའི་ཤ་མདོག་ལ་བལྟ་དགོས།

ཤ་མདོག་དམར་མདངས་རྒྱས་པའམ་སྐྱ་བོ་ཡིན་མིན་ལ་བལྟ་དགོས།