ཟླ་12ཚེས་29ཉིན་གྱི་ཕྱི་དྲོར། ཁུལ་ཨུ་ཧྲུའུ་ཅི་ལུའོ་ཁྲའོ་ཧྥེང་གིས་དཀའ་ངལ་ཡོད་པའི་ལས་བཟོ་བ་དང་ལས་ཡུལ་དང་པོའི་ཐོན་ལས་བཟོ་པ་ལ་འཚམས་འདྲི་གནང་བ་མ་ཟད། ཁོང་ཚོར་ཏང་དང་སྲིད་གཞུང་གི་དྲོ་སྐྱིད་དང་ཐུགས་ཁུར་གནང་།

དཀའ་ངལ་ཡོད་པའི་ལས་བཟོ་བ་ལྕམ་མོ་ཚའེ་ཡི་ཁྱིམ་དུ་ལུའོ་ཁྲའོ་ཧྥེང་དང་ཁོང་གཉིས་ཁ་བརྡ་ཡུན་རིང་བྱས་ཏེ། བྱམས་བརྩེའི་སྤེལ་རེས་ཀྱིས་ཁྱིམ་ཚང་གི་ཡོང་འབབ་དང་འཚོ་བའི་འགྲོ་སོང་། བུ་ཕྲུག་སློབ་གསོ་སོགས་ཀྱི་གནས་ཚུལ་ལ་འདྲི་རྩད་ཞིབ་ཚགས་བྱས། ལུའོ་ཁྲའོ་ཧྥེང་གིས་ཁོང་གིས་ཨ་མའི་འགན་འཁྲི་བརྟན་སྲུང་དང་ཕྲུ་གུ་གཟབ་ནན་ངང་གསོ་སྐྱོང་བྱེད་པར་ཁས་ལེན་བྱས་པ་མ་ཟད། ཁོང་ལ་ཡིད་ཆེས་བརྟན་པོ་དང་སྤྲོ་སྣང་རྒྱུན་འཁྱོངས་བྱས་ནས། མིག་སྔའི་དཀའ་ངལ་ཁྱད་བསད་བྱེད་དགོས་པའི་སྐུལ་ལྕག་གནང་། དུས་མཚམས་སུ་འབྲེལ་ཡོད་སྡེ་ཚན་ལ་རང་འགུལ་ངང་འབྲེལ་མཐུད་དང་གནད་འཕིགས་ཇུས་འདོན་བྱས་ནས། འབྲེལ་ཡོད་དཀའ་ངལ་སེལ་བའི་སྲིད་ཇུས་རེ་ཞུ་བྱས་པར་རོགས་རམ་བྱེད་དགོས། ཁོང་གི་འཚོ་བའི་དཀའ་གནད་ཐག་གཅོད་ཏན་ཏིག་བྱས་ནས། དཀའ་ངལ་ཡོད་པའི་ལས་བཟོ་བ་རྣམས་ཏང་དང་སྲིད་གཞུང་ཀྱི་དྲོ་སྐྱིད་དང་ཐུགས་ཁུར་ཚོར་དུ་འཇུག་དགོས་པའི་བཀའ་བརྡ་གནང་།

ཧྲེང་ཡུས་ཐེན་ཞང་འབྲུ་གཡག་ཐོན་ལས་གསར་སྤེལ་ཀུང་སི་རུ་ལུའོ་ཁྲའོ་ཧྥེང་གིས་ཐོན་རྫས་གསར་པ་གསར་སྤེལ་དང་ལག་རྩལ་གསར་པའི་བེད་སྤྱོད་གནས་ཚུལ་ལ་བརྟག་དཔྱད་ཞིབ་འཇུག་དང་རྒྱུས་ལོན་བྱས། ཁེ་ལས་ཀྱི་ཁྲོམ་རའི་ཕྱིར་འཚོང་དང་ཚོང་གཉེར་ཡོང་འབབ་གནས་ཚུལ་སོགས་ཀྱི་གཉེར་སྐྱོང་འཁོར་སྐྱོད་གནས་ཚུལ་ལ་འདྲི་རྩད་ཞིབ་ཚགས་བྱས་པ་མ་ཟད། ཁེ་ལས་ཀྱི་མིག་སྔར་འཕྲད་པའི་འཕེལ་རྒྱས་ཀྱི་དཀའ་གནད་ལ་ནན་ཏན་ངང་གསན་ནས། ཁེ་ལས་ཀྱི་དཀའ་ངལ་སེལ་མ་ཟད། ལས་ཡུལ་དང་པོའི་ལས་བཟོ་བ་67ལ་གཅིག་སྡུད་འཚམས་འདྲི་བྱས། ལུའོ་ཁྲའོ་ཧྥེང་གིས་འབྲུ་གཡག་ཐོན་ལས་ནི་བདེ་ཆེན་གྱི་ཁྱད་ཆོས་ལེགས་ཆ་ལྡན་པའི་ཐོན་ལས་ཡིན་ལ། ཁེ་ལས་ཀྱིས་རྒྱ་ཆེའི་ཞིང་དུད་དང་འབྲེལ་མཐུད་བྱས་པས། ཞིང་ལས་དང་དམིགས་བསལ་གྱི་ཐོན་རྫས་ཕྱིར་འཚོང་བྱས་པར་སྐུལ་འདེད་གཏོང་བ་དང་། ཞིང་པའི་ཡོང་འབབ་འཕར་བའི་སྐུལ་ཁྲིད་ནུས་པ་གལ་ཆེན་ལྡན་ཞེས་སྟོན། ཁོང་གིས་ཉེ་བའི་ལོ་ཤས་རིང་། བདེ་ཆེན་དུ་ཡུལ་སྐོར་བ་རྒྱུན་མཐུད་ངང་ཇེ་མང་ཕྱིན་ཡོད་ལ། ཐོན་ལས་འཕེལ་རྒྱས་དང་རིག་གནས་ཡུལ་སྐོར་མཉམ་འདྲེས་བྱས་ཤུགས་ཆེ་རུ་གཏོང་ནས། རང་འགུལ་ངང་ཁེ་ལས་ཁྲོམ་ར་འགྱུར་ལྡོག་དང་འཚམས་པར་རེ་བ་ཞུས། ཐོན་རྫས་ཚད་གཞི་དང་ཕྱིར་འཚོང་བྱེད་སྟངས་ལེགས་སུ་གཏོང་བ། ཁྲོམ་ར་བར་སྟོང་སྔར་ལས་རྒྱ་སྐྱེད་བཏང་ནས། བདེ་ཆེན་གྱི་བྲོ་བ་ཞེས་པར་ཁྲོམ་ར་ཕྱོགས་སུ་བསྐྱོད་པར་བྱེད་དགོས་པའི་ནན་བཤད་གནང་།

འཚམས་འདྲི་བྱེད་རིང་། ལུའོ་ཁྲའོ་ཧྥེང་གིས་དཀའ་ངལ་ཡོད་པའི་ལས་བཟོ་བ་ལ་འཚམས་འདྲི་མ་དངུལ་དང་ལས་ཡུལ་དང་པོའི་ལས་བཟོ་བ་ལ་འཚམས་འདྲི་དངོས་རྫས་སྤྲད། ཁོང་གིས་ཁེ་ལས་ཀྱི་ཐོག་མཐའ་བར་གསུམ་དུ་ལས་བཟོ་བའི་དྲོ་གྲང་སེམས་ལ་བཞག་ནས། ནུས་ཤུགས་ཡོད་རྒུས་ལས་ཀའི་ཆ་རྐྱེན་ལེགས་སུ་གཏོང་བ་དང་ལས་བཟོ་བའི་ཁེ་དབང་འགན་སྲུང་བྱས་ནས། ལས་བཟོ་བས་སེམས་བདེ་མོ་ངང་ལས་ཀ་ལས་ཐུབ་པ་དང་འཚོ་བ་སྐྱིད་པོ་ཡོང་ཐུབ་པ་བྱེད་དགོས་ཞེས་བསླབ་བྱ་གནང་། ཁོང་གིས་རྒྱ་ཆེའི་ལས་ཡུལ་དང་པོའི་ལས་བཟོ་བ་རྣམས་ལས་གནས་སུ་གཞི་ཚུགས་ནས། དཀའ་སྤྱད་འབད་བརྩོན་བྱས་ཏེ། བདེ་ཆེན་གྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་དེ་ལས་སྟོབས་ཤུགས་ཆེ་རུ་གཏོང་བར་ལེགས་སྐྱེས་སུ་འབུལ་རྒྱུ་རེ་བ་བཏོན། ཁྲེན་ཆུན་དང་སུང་ཡུང་ལི་འཚམས་འདྲི་ནང་ཞུགས།