སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། 2026ལོའི་ཟླ1པོའི་ཚེས1ཉིན་གྱི་སྔ་དྲོའི་ཆུ་ཚོད10དང་སྐར་མ་3ཐོག སེམས་ཀྱི་ཉི་ཟླ་གྲོང་ཁྱེར་ཉི་མ་དམར་པོའི་ཐང་ཆེན་སྟེང་མི་ཚོགས་ཀྱིས་ཁེངས་པ་དང་སྤྲོ་སེམས་རབ་ཏུ་འཕེལ།གསོན་ཤུགས་རྣམ་པར་རྒྱས་པའི་སྒོ་ནས་ལོ་གསར་བ་བསུ། བདེ་ཐང་དང་མཉམ་དུ་བསྐྱོད་ཅེས་པ་བརྗོད་བྱ་གཙོ་བོར་བྱས་པའི་དམངས་ཡོངས་ཀྱི་ལུས་སྦྱོང་དང་ལོ་གསར་གྱི་གྲོང་ཁྱེར་དུ་རྒྱུག་ཤར་གློད་པའི་བྱེད་སྒོ་སྐབས་44པ་དེ་གཟབ་རྒྱས་ངང་འགོ་ཚུགས་པ་རེད། དགུན་དུས་ཀྱི་མཐོ་སྒང་དུ་གྲང་ངར་ཆེ་རུང་།ཡུལ་དངོས་སུ་དྲོ་སྐྱིད་ལྡན་ལ་སེམས་ཤུགས་ཆེན་པོ་འཕེལ།གྲོང་མི་དང་ཡུལ་སྐོར་བ་བཞི་སྟོང་ལྷག་ཙམ་མཉམ་དུ་འཛོམས་ནས་རྒྱུག་ཤར་གློད་པའི་རྣམ་པའི་ཐོག་ནས་ལོ་གསར་པའི་ཞོགས་པའི་ཉི་གཞོན་བསུས་ཏེ་ས་མཐོའི་གྲོང་ཁྱེར་གསར་པའི་བདེ་ཐང་གི་ལེའུ་མཉམ་དུ་བརྩམས་པ་རེད།

   སྔ་དྲོའི་ཆུ་ཚོད་10ཐོག བྱེད་སྒོར་ཞུགས་མཁན་དག་གཅིག་རྗེས་གཉིས་མཐུད་ཀྱིས་ཐང་ཆེན་དུ་སླེབས་ནས་གྲབས་སྦྱོང་བྱེད་བཞིན་ཡོད། འདིའི་ཁྲོད་དུ་ལས་ཁུངས་ཀྱི་ལས་བྱེད་པ་དང་ཁེ་ལས་དང་བྱ་གཞག་ཚན་པའི་ལས་བཟོས་གྲུབ་པའི་དཔུང་ཁག་ཡོད་ལ་ཁྱིམ་མི་ཁྲིད་པའི་གྲོང་མི་དང་ཡུལ་སྐོར་བ་ཡང་ཡོད།བཀའ་བཏང་མེ་མདའ་གྲགས་པ་དང་བསྟུན་ནས་ལུས་ལ་ཚོན་མདོག་སྣ་ཚོགས་ཀྱིས་བརྒྱན་པའི་ལུས་རྩལ་གྱོན་ཆས་གྱོན་མཁན་རྣམས་ཚོན་ཁྲ་ཅན་གྱི་ཐགས་ལྟར་གྲོང་ཁྱེར་གྱི་ཁྲོམ་གཞུང་དུ་བསྐྱོད་ཅིང་།དགའ་སྤྲོའི་འབོད་སྒྲ་གཅིག་རྗེས་གཉིས་མཐུད་ངང་གྲགས་པ་དང་།ས་མཐོའི་དགུན་དུས་ཀྱི་དྲོད་འཇམ་གྱི་ཉི་འོད་དང་ཕན་ཚུན་བཀྲག་མདངས་འཚེར་བཞིན་ཡོད།

   སེམས་ཀྱི་ཉི་ཟླ་གྲོང་ཁྱེར་གྱི་གྲོང་མི་ལུང་ཧའེ་ཐེང་ཚང་བསྟུད་མར་ལོ་གསུམ་ལ་བྱེད་སྒོནང་ཞུགས་ཡོས། ཁོང་གིས་ཕྲུ་གུ་འཁྲིད་དེ་རྒྱུག་ཤར་གློད་པ་དེས་གཟུགས་པོ་བདེ་ཐང་ཡོང་བ་མ་ཟད།དུས་ཆེན་གྱི་རྣམ་པ་ཚོར་ཐུབ་པས་དོན་སྙིང་ཆེན་པོ་ལྡན་ཡོད་ཅེས་བཤད་བྱུང་།

   གནམ་ལོ་གསར་ཚེས་ཉིན་གྲོང་ཁྱེར་ནང་ཁུལ་དུ་རྒྱུག་ཤར་གློད་པ་ནི་སེམས་ཀྱི་ཉི་ཟླའི་དམངས་ཡོངས་ཀྱི་ལུས་སྦྱོང་གི་སྤུས་རྟགས་བྱེད་སྒོ་ཞིག་ཡིན་ལ།གྲོང་ཁྱེར་གྱི་གསོན་ཤུགས་མངོན་པའི་སྐར་ཁུང་གལ་ཆེན་ཞིག་ཀྱང་ཡིན་པ་རེད།འདས་ཟིན་པའི་ལོ་གཅིག་རིང་།སེམས་ཀྱི་ཉི་ཟླ་གྲོང་ཁྱེར་གྱི་ལུས་རྩལ་བྱ་གཞག་དབྱར་མཚོ་རྒྱས་པ་ལྟར་འཕེལ་རྒྱས་བྱུང་ནས་གཞོན་ནུ་ལོ་ཆུང་གི་ལན་ཆིའུ་སྤོ་ལོ་དང་།རྐང་རྩེད་སྤོ་ལོའི་རིམ་བཞིའི་མཉམ་འབྲེལ་འགྲན་བསྡུར་གྱི་གྲ་སྒྲིག་འགྲན་བསྡུར་དང་།ལྔ་པའི་ཚེས་ལྔའི་རྟ་རྒྱུག་འགྲན་བསྡུར།སེམས་ཀྱི་ཉི་ཟླའི་དཔོང་ཕྱིའི་རྒྱུག་འགྲན་སོགས་བདེ་བླག་ངང་གཉེར་བ་དང་།རུ་ཁག་སྒྲིག་འཛུགས་བྱས་ནས་ཧྲའན་ཤིས་ཀྱི་གྲོང་ཚོའི་ལན་ཆིའུ་སྤོ་ལོའི་གདན་ཞུའི་འགྲན་བསྡུར་སོགས་སུ་ཞུགས་ཏེ་ལུས་རྩལ་ཡུལ་སྐོར་མཉམ་འདྲེས་ཀྱི་ཐབས་ལམ་གསར་པ་གཏོད་པ་དང་།དམངས་ཡོངས་ཀྱི་ལུས་སྦྱོང་དང་སློབ་གསོ་ལུས་རྩལ་བྱ་གཞག་མཉམ་འདྲེས་གཏིང་ཟབ་ཡོང་རྒྱུར་སྐུལ་འདེད་ནུས་ལྡན་བཏང་བ་རེད།

   ལོ་40ཡི་གོང་གི་སྐབས་དང་པོའི་གྲོང་ཁྱེར་བསྐོར་བའི་རྒྱང་རྒྱུག་ནས་ད་ཆའི“དམངས་ཡོངས་ཀྱི་དུས་ཆེན”བར་བདེ་ཆེན་གྱིས་རྒྱུག་ཤར་གློད་པའི་རྐང་རྗེས་ལས་གྲོང་ཁྱེར་གྱི་འཕེལ་རྒྱས་ཚད་འཇལ་བ་དང་ལུས་རྩལ་གྱི་སྤྲོ་སེམས་ལ་བརྟེན་ནས་ལོ་གསར་གྱི་རེ་བ་གསར་བ་སྦྱིན་པ་རེད།གྲོང་མིས་བཤད་པ་ལྟར།གོམ་པ་མ་འཆད་ན་སེམས་ཀྱི་ཉི་ཟླའི་འབྱུང་འགྱུར་དེ་བས་མཛེས་སྡུག་ལྡན་པ་ཞིག་ཡོང་ངེས་རེད། འབྱུང་འགྱུར“ཕྱི་རོལ་གྱི་དག་ཞིང”དེས་མུ་མཐུད་ལུས་རྩལ་ལ་བརྟེན་ནས་ས་མཐོའི་སྤུས་ཚད་མཐོ་བའི་འཕེལ་རྒྱས་ཀྱི་གསོན་ཤུགས་ལྡན་པའི་ལེའུ་རྩོམ་ངེས་རེད།

   ཉིན་འདིར་རང་ཁུལ་གྱི་ཡིག་གཟུགས་མཁས་ཅན་མཐུན་ཚོགས་ཀྱིས་ད་དུང་ཡུལ་དངོས་སུ་གྲོང་མིར་ལོ་གསར་ཆ་ཡིག་བྲིས་ནས་སྤྲད་པ་རེད།