དགོང་མོའི་ཆུ་ཚོད་བརྒྱད་སྟེང་། འབའ་ལུང་རྫོང་གྲོང་གི་གྲུ་ཟུར་དུ་གནས་པའི་མེ་དབྱི་ཁོ་ཞེས་པའི་ཞབས་བྲོའི་ཁང་དུ་གློག་སྒྲོན་གསལ་ལེར་འཕྲོ་བ་དང་རོལ་དབྱངས་ཀྱི་འགྱུར་ཁུག་དལ་བུར་གྲགས་བཞིན་མཆིས། ཡེ་ཧྲེང་ཞན་དང་ལི་དབྱི་གཉིས་ཀྱི་མིག་ནང་ན་ལོ་མང་གི་དཀའ་སྤྱད་སྡུག་རུས་ཀྱི་འདས་དོན་ལྷང་ངེར་གསལ། ལོ་ལྔའི་སྔོན་ལ། ཁོ་མོ་གཉིས་ནི་སློབ་ཆེན་གྱི་སྦྱོང་བརྡར་ཁང་ནས་ཆེས་མཐའ་མར་ངལ་གསོ་བའི་བུ་མོ་གཉིས་ཡིན། ད་ལྟ། སེམས་ཤུགས་གཏོང་སའི་ཞབས་བྲོ་ཁང་འདི་ཁོ་མོ་ཚོའི་ཕུགས་བསམ་མུ་མཐུད་དུ་རྒྱུན་མཐུད་བྱེད་བཞིན་ཡོད།

ཞབས་བྲོ་ཁང་དེ་རྒྱས་སྤྲོས་ཅན་ཞིག་མིན་རུང་སེམས་ནུས་ཡོད་རྒུ་བཏོན་ཡོད།ཆེད་ལས་ཀྱི་འགྱིག་དང་། གྱང་ངོས་ཧྲིལ་པོར་མེ་ལོང་བཀལ་བ།གྲུ་ཟུར་དུ་སྔོ་ལྗང་རྩི་ཤིང་བཏབ་པ་སོགས་ཚང་མ་ཁོང་གཉིས་ཀྱིས་དངུལ་སིལ་མ་རེ་རེ་བཞིན་གསོག་ནས་གྲ་སྒྲིག་བྱས་པ་ཞིག་རེད།ལས་གཏོད་བྱེད་འགོ་ཚུགས་མ་ཐག་ཁོང་ཚོས་བསྒྲགས་ཡིག་ཁྱེར་ནས་སྡེ་ཁུལ་དང་།སློབ་གྲྭ  ཐང་ཆེན་བཅས་སུ་ཕར་འགྲོ་ཚུར་འོང་བྱས་ནས་རང་ཉིད་ངོ་སྤྲོད་བྱེད་ཀྱི་ཡོད།སློབ་མ་དང་པོ་དེ་མིང་ཐོ་འགོད་དུས་ངལ་བ་ཚང་མར་དོན་སྙིང་ལྡན་པར་གྱུར།

ཡུལ་དངོས་སུ་དྲིལ་བསྒྲགས་བྱེད་པ་དང་ཆབས་ཅིག་ཁོ་མོ་གཉིས་ཀྱིས་དྲ་རྒྱའི་ཐོག་རྒྱུན་གཏན་གྱི་འཚོ་བ་མཉམ་སྤྱོད་བྱེད་ཀྱི་ཡོད།ཆེད་ལས་ཀྱི་སྒྲིག་ཆས་མེད་པས་ལག་ཐོགས་ཁ་པར་ནས་པར་ལེན་པ་དང་ཕབ་སྦྱོར་མ་ཤེས་པའི་སྐབས་མཚན་སྐྱེལ་ནས་སློབ་སྦྱོང་བྱེད་ཀྱི་ཡོད།བརྙན་ལམ་དུ་ཡོད་པ་ཚང་མ་ངོ་མ་ཡིན་པ་སྟེ།སློབ་མ་ཚོ་བྱང་ཆུབ་པ་ནས་འཕེལ་རྒྱས་བྱུང་བ་དང་།སློབ་ཁྲིད་གྲ་སྒྲིག་བྱེད་སྐབས་བློ་རྩེ་གཅིག་ཏུ་གཞོལ་བ།ཐ་ན་ཞབས་བྲོ་འཁྲབ་ནོར་བྱུང་སྐབས་དགོད་སྒྲས་ཁེངས་པའི་རྣམ་པ་སོགས་མངོན་ཡོད་པས་མི་མང་པོ་ཞིག་གི་ཡིད་དབང་འཕྲོག་ཡོད།

སློབ་མ་ཇེ་མང་དུ་སོང་བ་དང་བསྟུན་ནས། ཁོ་མོ་ཚོས་བསམ་ཡུལ་ལས་འདས་པའི་ཐག་གཅོད་ཅིག་བྱས་ཏེ།སྤྱི་ཕན་ཞབས་བྲོའི་སློབ་ཁྲིད་སྤེལ་བ་རེད།སློབ་ཁྲིད་ལ་ཡོང་མཁན་ཁྲོད་དུ་ཁྱིམ་ཚང་གི་བདག་མོ་དང་ལས་ཞུགས་མི་སྣ་ཡོད་ལ། ལད་ཟློས་བྱེད་པའི་བྱིས་པ་ཡང་ཡོད། སློབ་ཡོན་མི་ལེན་པ་དང་ཆ་རྐྱེན་མི་བཟོ་བར། སློབ་ཁྲིད་ལ་ཡོང་འདོད་ཡོད་མཁན་ཡོད་ཚད་ལ་ནན་ཏན་གྱིས་སློབ་ཁྲིད་བྱེད་བཞིན་ཡོད།སློབ་མ་ཚོའི་གཟབ་ནན་གྱི་རྣམ་འགྱུར་ནས་འཛུམ་མདངས་འཕྱུར་བ་མཐོང་སྐབས་ཁོང་ཚོས་ཞབས་བྲོ་ནི་འགུལ་སྟངས་ཁོ་ན་མིན་པར།མིའི་སེམས་གསལ་བར་བྱེད་པའི་སྟོབས་ཤུགས་ཤིག་ཀྱང་ཡིན་པར་ཡིད་ཆེས་བརྟན་པོ་བྱེད་ཀྱི་ཡོད།

“ཞབས་བྲོ་ལས་ཀར་བརྩིས་པ་ནི་བསོད་ནམས་ཆེན་པོ་རེད། གྲོགས་པོ་དང་མཉམ་དུ་ལས་ཀ་བྱེད་པ་ནི་དགའ་འོས་པ་ཞིག་རེད”ཅེས་ཡེ་ཧྲེང་ཞན་གྱིས་ལས་གཏོད་ཐོག་མའི་སྐབས་ཀྱི་སྐད་ཆ་བསྐྱར་བཤད་བྱེད་བཞིན་བརྗོད་པ་དང་མིག་ཟུང་ལས་བློ་བརྟན་འགྱུར་མེད་ཀྱི་ཉམས་མངོན་ཡོད།ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་བྱས་རྗེས་མོ་ལ་སྐུལ་མ་ཆེན་པོ་ཐེབས་པ་དང་འབྲེལ་འགན་འཁྲི་ཕྲག་ཐོག་ཏུ་འཁུར་བའི་ཚོར་སྣང་ཆེན་པོ་བྱུང་ཡོད།

དཔུང་བ་མཉམ་གཤིབ་ཀྱིས་ལམ་གཅིག་ཏུ་བསྐྱོད་པའི་གྲོགས་མོ་གཉིས་ཀྱིས་རོལ་དབྱངས་རེ་རེ་དང་གར་སྟབས་རེ་རེ་བརྒྱུད་ནས། ཁོ་མོ་གཉིས་ལ་དབང་ཞིང་མི་གཞན་ལའང་དྲོ་སྐྱིད་སྦྱིན་ཐུབ་པའི་ཞབས་བྲོའི་རྨི་ལམ་རེ་རེ་བསྐྲུན་བཞིན་ཡོད།