ཉེ་ཆར།  ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་ས་གནས་ས་ཐོག་ཏུ་འགྲིམ་འགྲུལ་གྱི་གཙོ་གནད་རྣམ་གྲངས་འཛུགས་སྐྲུན་བྱས་ཚུལ་ལ་བརྟག་ཞིབ་གནང་བ་རེད། ཁོང་གིས་བསྟན་དོན། ཁུལ་ཨུའི་སྐབས་དགུ་པའི་ཚང་འཛོམས་གྲོས་ཚོགས་ཐེངས་བཅུ་པའི་ལས་ཀའི་བླང་བྱར་སློབ་སྦྱོང་དང་གོ་བ་ནན་ཏན་ལེན་པ་དང་ལག་བསྟར་དོན་འཁྱོལ་བྱས་ཏེ་ལས་ཀའི་འགན་འཁྲི་ནན་པོར་གཏོང་བ་དང་།  རྣམ་གྲངས་ལས་དོན་ཀུན་གྱི་གཙོ་བོར་བརྩི་བ་དང་འགྲིམ་འགྲུལ་སྔོན་ལ་སྤེལ་རྒྱུ་མཐའ་འཁྱོངས་ཀྱིས་འགོ་བཙུགས་མ་ཐག་ཐག་གཅོད་དམག་འཐབ་རྒྱག་པ་དང་གོམ་གང་སྤོས་པ་ནི་མཐའ་མའི་གདོང་མཆོང་ཡིན་པའི་འབད་འཐབ་ཀྱི་རྣམ་པའི་ཐོག་ནས་སྤུས་ཚད་འགན་ལེན་དང་གྲངས་ཚད་འགན་ལེན་གྱིས་བདེ་འཇགས་འགན་ལེན་བྱེད་པ་དང་། ནུས་ཤུགས་ཡོད་རྒུས་མགྱོགས་མྱུར་ངང་འགྲིམ་འགྲུལ་གྱི་གཙོ་གནད་རྣམ་གྲངས་འཛུགས་སྐྲུན་ལ་སྐུལ་འདེད་གཏོང་དགོས། 

སེམས་ཀྱི་ཉི་ཟླ་ནས་འབའ་ལུང་བར་(ཡུལ་གསུམ་ནས་མཚམས་རྒྱབ་བར)་གྱི་རིམ་པ་གཉིས་པའི་གཞུང་ལམ་རྣམ་གྲངས་འཛུགས་སྐྲུན་བྱ་ཡུལ་དུ་ལུའོ་ཁྲའོ་ཧྥེང་གིས་རྣམ་གྲངས་ཀྱི་གཙོ་གནད་ཚོད་འཛིན་རང་བཞིན་གྱི་ལས་གྲྭ་སྟེ།  རྡོ་ལ་སྐས་རྩ་ཕུག་ལམ་འཛུགས་སྐྲུན་བྱས་ཚུལ་དང་དེ་བཞིན་རྣམ་གྲངས་ཧྲིལ་པོའི་ཨར་ལས་རྩ་འཛུགས་དང་།  ལས་གྲྭའི་མྱུར་ཚད།  སྤུས་ཚད་ཚོད་འཛིན།  བདེ་འཇགས་ཐོན་སྐྱེད་བྱ་ཐབས་དོན་འཁྱོལ་སོགས་ཀྱི་གནས་ཚུལ་ལ་གཟིགས་ཞིབ་དང་ཤེས་རྟོགས་གནང་།

ལུའོ་ཁྲའོ་ཧྥེང་གིས་འགྲིམ་འགྲུལ་གྱི་གཙོ་གནད་རྣམ་གྲངས་ནི་མ་འཇོག་ལ་སྐུལ་ཁྲིད་དང་།  འཕེལ་རྒྱས་ལ་སྐུལ་འདེད།  དམངས་འཚོར་ཕན་པ་བཅས་ཀྱི་སྒུལ་བྱེད་འཕྲུལ་འཁོར་གལ་ཆེན་ཞིག་ཡིན། ཁུལ་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་ས་ཚིགས་ཀྱི་གནས་བབ་མཐོ་རུ་ཏན་ཏིག་གཏོང་བ་དང་།  ལས་འགན་ཞིབ་ཕྲ་བཟོ་བ།  ལས་ཡུན་ལྡོག་སྒྲིག་བཅས་བྱས་ཏེ་འགྲིམ་འགྲུལ་རྣམ་གྲངས་སྣ་ཚོགས་འཛུགས་སྐྲུན་བྱེད་པར་ཕྱོགས་ཡོངས་ནས་སྐུལ་འདེད་མགྱོགས་སུ་གཏོང་བ་དང་།  དུས་འགོའི་དུས་རིམ་དུ་གནས་པའི་རྣམ་གྲངས་ལ་རང་འགུལ་གྱིས་བྱས་རྗེས་འཇོག་པ།  ལག་བསྟར་བྱས་འཐུས་རང་བཞིན་གྱི་ཞིབ་འཇུག་དང་།  ཁོར་ཡུག་དཔྱད་དཔོག་ས་ཆ་སྤྱོད་པ་སོགས་ཀྱི་ཆོག་མཆན་འགོད་པའི་ལས་ཀ་མགྱོགས་སུ་གཏོང་བ།  རྣམ་གྲངས་སྔ་ཙམ་ལས་འགོ་འཛུགས་པའི་ཆ་རྐྱེན་འཛོམས་པར་སྐུལ་འདེད་གཏོང་དགོས། ལས་འགོ་ཚུགས་ཟིན་པའི་རྣམ་གྲངས་ལ་གཅིག་གྱུར་བཀོད་གཏོང་བྱེད་ཤུགས་ཆེ་རུ་གཏོང་བ་དང་ཨར་ལས་སྒྲིག་འཛུགས་ལེགས་སུ་བཏང་ནས་སྤུས་ཚད་དང་བདེ་འཇགས་འགན་ལེན་བྱེད་པའི་སྔོན་འགྲོའི་ཆ་རྐྱེན་འོག་མགྱོགས་པོ་ཡོང་ཐུབ་ན་མགྱོགས་པོ་ཡོང་བ་བྱས་ཏེ་སྔ་ཙམ་བསྐྲུན་ཐུབ་པ་དང་། ཞབས་ཞུ་འགན་ལེན་དང་མཉམ་སྒྲུབ་མཉམ་འགུལ་ལ་ཤུགས་སྣོན་རྒྱག་པ་དང་རང་འགུལ་ངང་མདུན་ཕྱོགས་སུ་ཞབས་འདེགས་ཞུ་བ་དང་ཞིབ་མཆན་འགོད་པའི་ལྗང་མདོག་བགྲོད་ལམ་ཤར་གཏོང་ཐུབ་པ་བྱས་ཏེ། རྣམ་གྲངས་ལ་སྐུལ་འདེད་གཏོང་བའི་ཁྲོད་ཀྱི་འགག་གནད་དང་དཀའ་གནད་ཀྱི་གནད་དོན་དུས་ཐོག་ཏུ་སེལ་ནས་རྣམ་གྲངས་ནུས་ཆེ་དང་གོ་རིམ་ལྡན་པའི་ངང་སྐུལ་འདེད་གཏོང་རྒྱུའི་འགན་ལེན་བྱེད་དགོས། སྐྱེ་ཁམས་ཁོར་ཡུག་སྲུང་སྐྱོང་གི་དམར་ཐིག་དང་བདེ་འཇགས་ཐོན་སྐྱེད་ཀྱི་མཐའ་ཚད་ནན་པོ་སྲུང་ནས་རིམ་པ་བཞིན་འགན་འཁྲི་ནན་པོར་གཏོང་བ་དང་བདེ་འཇགས་ཀྱི་བྱ་ཐབས་ཁག་དོན་འཁྱོལ་བྱས་ཏེ་བརྒྱུད་རིམ་ཧྲིལ་པོར་ལྟ་སྐུལ་དོ་དམ་བྱ་རྒྱུར་ཤུགས་སྣོན་བརྒྱབ་ནས་ཡ་རབས་ཚད་ལྡན་ངང་ཨར་ལས་བྱ་རྒྱུར་སྐུལ་འདེད་གཏོང་དགོས།  ཐོག་མཐའ་བར་གསུམ་དུ་ལས་གྲྭའི་སྤུས་ཚད་ཨང་དང་པོར་འཇོག་པ་དང་ཚད་གཞི་མཐོ་པོ་དང་བླང་བྱ་ནན་པོ་མཐའ་འཁྱོངས་བྱས་ཏེ། རྣམ་གྲངས་ཚང་མ་སྤུས་ལེགས་ལས་གྲྭར་ཧུར་ཐག་གཏོད་པ་དང་། འགྲིམ་འགྲུལ་དྲ་བ་རྒྱུན་མཐུད་ངང་འཐུས་སྒོ་ཚང་དུ་གཏོང་བ་དང་ས་ཁོངས་ཕན་ཚུན་སྦྲེལ་མཐུད་ཀྱི་ནུས་པ་ཆེ་རུ་བཏང་ནས་དམངས་བདེ་དམངས་ཕན་གྱི་བདེ་སྐྱིད་ལམ་བུ་འདིང་དགོས་ཞེས་བསྟན་ཡོད།