གྱོད་དོན།

        ལྷ་བྱམས་ཀྱིས་སློབ་མཐར་ཕྱིན་རྗེས་ཀྱི་ལོ་ངོ་འགའི་རིང་ལ་འབད་བརྩོན་བྱས་པ་བརྒྱུད།　ཉེ་ཆར་ཁང་པ་བར་སྦྱོར་ཀུང་སི་ཞིག་བརྒྱུད་དེ་གཞིས་ཁུལ་ག་གེ་མོ་ནས་ལག་བརྒྱུད་ཁང་པ་ཞིག་ཉོས་པས།　ཟིང་ལོང་གི་གྲོང་ཁྱེར་དུ་རང་ལ་དབང་བའི་ཁྱིམ་ཚང་ཆུང་ཆུང་ཞིག་ཡོད་པར་གྱུར།　ཡིན་ཡང་ཁོས་ཁང་པ་ཉོས་རྗེས།　ཁང་པ་དེའི་བདག་དབང་འཛིན་ཡིག་གི་ཐོ་འགོད་དུས་ཚོད་ནི1986ལོ་ཡིན་པ་ཤེས།　སྤྱིར་སྡོད་ཁང་གི་ཐོན་དབང་དུས་ཡུན་ལོ་ངོ70ཡིན་ལ།　དེ་ལྟར་ན་ལྷ་བྱམས་ཀྱི་ཁང་པ་དེ་ལོ་ངོ35འགོར་རྗེས་ད་གཟོད་དུས་ཡུན་ལོངས་པ་རེད།　ཁང་པའི་ཐོན་དབང་དུས་ཡུན་ལོངས་རྗེས་ཁང་པ་ཕྱིར་ལེན་སྲིད་དམ།

བཅའ་ཁྲིམས་དབྱེ་ཞིབ།

        གྱོད་དོན་འདིའི་ནང་གི་བརྟན་ནོར་ཐོ་དེབ་སྟེང་བྲིས་པའི་ལོ་ངོ70རིང་གི་སྡོད་ཁང་ཐོན་དབང་ཞེས་པ་ནི།　ཁང་ནོར་གཅིག་པུར་གོ་བ་མིན་པར།　ཁང་པ་གནས་ཡུལ་གྱི་ས་ཞིང་གི་ཁེ་དབང་སྟེ།　འཛུགས་སྐྲུན་བྱ་ཡུལ་གྱི་སྤྱོད་དབང་གི་དུས་ཡུན་ལོ་ངོ70ཡིན་པར་གོ་བ་རེད།　ཁང་པ་ནི་བརྟན་ནོར་གྱི་དངོས་དབང་ཡིན་པའི་ཆ་ནས།　དེའི་གཏོགས་ཁོངས་ལ་རྒྱུན་ཆགས་རང་བཞིན་གྱི་ཁྱད་ཆོས་ལྡན།　ཡིན་ཡང་ཐོན་འབྱེད་ཚོང་གཉེར་པས་རྒྱལ་ཁབ་ཀྱི་ས་ཞིང་ལེན་སྐབས་ཐོབ་པའི་འཛུགས་སྐྲུན་བྱ་ཡུལ་གྱི་སྤྱོད་དབང་ལ་དུས་བཀག་ཡོད་པ་དང་།　ཆབས་ཅིག་རང་རྒྱལ་གྱི་དངོས་དབང་གི་འབྲེལ་ཡོད་བཅའ་ཁྲིམས་ནང"ཁང་ས་གཞི་གཅིག་ཅན"གྱི་རྩ་དོན་གཏན་འབེབས་བྱས་ཡོད།　དེས་ན་ས་ཞིང་གི་དུས་ཡུན་ལོངས་རྗེས་ས་སྟེང་གི་ཁང་པའི་དངོས་དབང་ལ་ཤུགས་རྐྱེན་ཐེབས་སྲིད་དམ།

        སྒྲོག་སྤེལ་བྱས་ཟིན་པའི་དམངས་དོན་ཁྲིམས་གཞུང་ལ་བལྟས་ཡོང་ན།　སྡོད་ཁང་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན་ལོངས་ཚེ།　རང་ཤུགས་སུ་མཐུད་འགྱངས་བྱེད་པ་རེད།　དེ་ལྟར་བྱས་ན་ལག་བརྒྱུད་ཁང་པ་ཉོས་ཀྱང"ཁང་ལོ"ལ་སེམས་ཁྲལ་བྱེད་དགོས་པའི་གནད་དོན་ཐག་གིས་གཅོད་ཐུབ།　ཡིན་ནའང་།　མཐུད་འགྱངས་གྲོན་དངུལ་འཇལ་སྤྲོད་དང་ཆག་ཡང་དུ་གཏོང་རྒྱུ་དེ།　རྗེས་མར་གསར་དུ་བཏོན་པའི་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་གཏན་འབེབས་ལྟར་བསྒྲུབ་དགོས།

        《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང》གི་དོན་ཚན359པ།　སྡོད་ཁང་འཛུགས་སྐྲུན་བྱ་ཡུལ་བཀོལ་སྤྱོད་བྱེད་དབང་གི་དུས་ཡུན་ལོངས་ཚེ་རང་ཤུགས་སུ་མཐུད་འགྱངས་བྱེད་པ་ཡིན།　མཐུད་འགྱངས་གྲོན་དངུལ་འཇལ་སྤྲོད་དམ་ཆག་ཡང་དུ་གཏོང་ཚེ།　བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་གཏན་འབེབས་ལྟར་བསྒྲུབ་དགོས།

        སྡོད་ཁང་མིན་པའི་འཛུགས་སྐྲུན་བྱ་ཡུལ་བཀོལ་སྤྱོད་བྱེད་དབང་གི་དུས་ཡུན་ལོངས་རྗེས་མཐུད་འགྱངས་བྱས་ན།　བཅའ་ཁྲིམས་ཀྱི་གཏན་འབེབས་ལྟར་བསྒྲུབ་དགོས།　ས་ཆ་དེའི་སྟེང་གི་ཁང་པ་དང་དེ་བཞིན་བརྟན་ནོར་གཞན་དག་གི་གཏོགས་ཁོངས་ནི།　གྲོས་དན་བཞག་ཡོད་ན་གྲོས་དན་ལྟར་བྱེད་པ་དང་།　གྲོས་དན་བཞག་མེད་པའམ་གྲོས་དན་ངེས་གསལ་མིན་ན་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་གཏན་འབེབས་ལྟར་བསྒྲུབ་དགོས།

        དོན་ཚན་འདི་ནི་དམངས་དོན་ཁྲིམས་གཞུང་ལས་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན（ཁང་པའི་ཐོན་དབང་དུས་བཀག）ཐད་ཀྱི་བཅའ་ཁྲིམས་གཏན་འབེབས་རེད།　ལག་བརྒྱུད་ཁང་པའི་ཉོ་ཚོང་དེ་ཁང་པ་ཉོ་བའི་དགོས་མཁོ་ཆེ་བའི་ཉོ་བདག་ལ་མཚོན་ན་གདམ་གསེས་ཡག་པོ་ཞིག་ཡིན་མོད།　ཡིན་ཡང་ཚང་མས་རྒྱ་ཁྱབ་ཏུ་དོ་སྣང་བྱེད་བཞིན་པ་ནི་ལག་བརྒྱུད་ཁང་པའི"ཁང་ལོའི"གནད་དོན་རེད།　དཔེར་ན2016ལོའི་སྔ་གཞུག་ཏུ།　ས་གནས་འགའ་ཤས་ཏེ་དཔེར་ན་ཀྲེ་ཅང་དུ་སྡོད་ཁང་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན་ལོངས་པའི་གནད་དོན་བྱུང་མྱོང་།　དུས་ཡུན་ལོངས་པའི་སྡོད་ཁང་འཛུགས་སྐྲུན་བྱ་ཡུལ་གྱི་སྤྱོད་དབང་གི་དུས་ཡུན་ནི་ལོ་ངོ20རིང་ཡིན་པས།　དུས་ཡུན་གཅིག་རྗེས་གཉིས་མཐུད་དུ་ལོངས་པ་རེད།　འདིའི་ཐད་ལ་རྒྱ་ཆེའི་མི་དམངས་མང་ཚོགས་ཀྱིས་དོ་ཁུར་ཆེན་པོ་བྱེད་བཞིན་ཡོད།

        2016ལོའི་ཟླ11པར་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི《ཐོན་དབང་སྲུང་སྐྱོབ་ལམ་ལུགས་འཐུས་ཚང་དུ་བཏང་སྟེ་ཐོན་དབང་ཁྲིམས་ལྟར་སྲུང་སྐྱོབ་བྱེད་པའི་སྐོར་གྱི་བསམ་འཆར》དང་ལོ་དེའི་ཟླ་བཅུ་གཉིས་པའི་ཚེས་བརྒྱད་ཉིན།　རྒྱལ་སའི་ཐོན་ཁུངས་པུའུ་ཟུར་པ（ད་ལྟའི་རང་བྱུང་ཐོན་ཁུངས་པུའུ）གཞུང་སྒྲུབ་ཐིང་གིས་ཀྲེ་ཅང་ཞིང་ཆེན་རྒྱལ་སའི་ཐོན་ཁུངས་པུའུ་ལ་ཁ་གཏད་པའི《སྡོད་ཁང་ཉུང་ཤས་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན་ལོངས་པའི་གནད་དོན་ཇི་ལྟར་ཐག་གིས་གཅོད་པའི་སྐོར་གྱི་རེ་ཞུ》（ཀྲེ་ཅང་རྒྱལ་སའི་ཐོན་ཁུངས་པུའུ〔2016〕ཨང64པ）ལ《སྡོད་ཁང་ཉུང་ཤས་ཀྱི་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན་ལོངས་པའི་གནད་དོན་ལེགས་པར་ཐག་གཅོད་པའི་སྐོར་གྱི་ཡིག་ལན》（རྒྱལ་སའི་ཐོན་ཁུངས་ཐིང་གི་ཡིག་འཕྲིན〔2016〕ཨང1712པ）ཡི་ཡིག་ལན་ནང་བསྟན་དོན།　"སྡོད་ཁང་འཛུགས་སྐྲུན་བྱ་ཡུལ་སོགས་ས་ཆའི་སྤྱོད་དབང་དུས་ཡུན་ལོངས་རྗེས་མཐུད་འགྱངས་བྱེད་པའི་ཐད་བཅའ་ཁྲིམས་ཀྱི་བཀོད་སྒྲིག་མ་བྱས་སྔོན་ལ།　སྡོད་ཁང་ཉུང་ཤས་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན་ལོངས་རྗེས།　གཤམ་གྱི་བར་བརྒལ་རང་བཞིན་གྱི་བྱེད་ཐབས་སྤྱད་དེ་ཐག་གིས་བཅད་ཆོག　གཅིག　མཐུད་འགྱངས་རེ་ཞུ་བྱེད་མི་དགོས།　སྡོད་ཁང་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན་ལོངས་རྗེས།　ཁེ་དབང་མིས་ཆེད་དུ་མཐུད་འགྱངས་རེ་ཞུ་འདོན་མི་དགོས།　གཉིས།　གྲོན་དངུལ་མི་བསྡུ་པ།　གསུམ།　ཉོ་ཚོང་དང་ཐོ་འགོད་ཀྱི་འགྲོ་ལུགས་རྒྱུན་ལྡན་ལྟར་སྒྲུབ་པ།"

        རང་རྒྱལ་གྱི་དམངས་དོན་ཁྲིམས་གཞུང་གིས་ཧ་ལམ་ཡིག་ཆ་འདིའི་དགོངས་དོན་རྒྱུན་བསྲིངས་ཡོད་དེ།　སྡོད་ཁང་འཛུགས་སྐྲུན་བྱ་ཡུལ་གྱི་སྤྱོད་དབང་དུས་ཡུན་ལོངས་རྗེས་རང་ཤུགས་སུ་མཐུད་འགྱངས་བྱེད་པ་ཡིན།　མཐུད་འགྱངས་གྲོན་དངུལ་འཇལ་སྤྲོད་དམ་ཆག་ཡང་གཏོང་རྒྱུ་དེ།　བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་གཏན་འབེབས་ལྟར་བསྒྲུབ་དགོས་པ་ནན་གྱིས་བསྟན་ཡོད།　།