སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ་2པའི་ཚེས་27ཉིན།སྐབས་དགུ་པའི་ཁུལ་ཨུའི་རྒྱུན་ལས་ཨུ་ལྷན་གྱིས་གྲོས་ཚོགས་ཐེངས་150པ་འཚོགས་ནས།སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན།ཀྲུང་དབྱང་དང་ཞིང་ཨུའི་འབྲེལ་ཡོད་ལས་ཀའི་བླང་བྱ་བརྒྱུད་བསྒྲགས་དང་སློབ་སྦྱོང་བྱས་ཏེ།རང་ཁུལ་གྱིས་ལས་དོན་ལག་བསྟར་དོན་འཁྱོལ་བྱེད་པར་ཞིབ་འཇུག་དང་བཀོད་སྒྲིག་བྱས།

ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་ཚོགས་འདུ་གཙོ་སྐྱོང་གནང་བ།

ཀྲང་ཝེ་ཏུང་དང་།ཞུས་སི་སི།ཀྲུའུ་པའོ་ཧྥུའུ།ལི་ཡན་ལན།མིའོ་ཡིའུ་ཧྥ་བཅས་ཚོགས་འདུར་ཞུགས།

ཚོགས་འདུའི་ཐོག་ནན་བཤད་གནང་དོན།སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཡང་དག་པའི་སྲིད་དོན་ལས་རྗེས་ལྟ་བ་འཛུགས་པ་དང་ལག་ལེན་བསྟར་བའི་སློབ་སྦྱོང་སློབ་གསོ་སྐོར་གྱི་རྣམ་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་།སློབ་སྦྱོང་དང་སློབ་གསོ་སྒྲིག་འཛུགས་ཞིབ་ཚགས་བྱེད།“སྤྱི་དོན་དུ་ཏང་འཛུགས་པ་དང་།མི་དམངས་ལ་བདེ་སྐྱིད་སྐྲུན་པ།ཚན་རིག་དང་མཐུན་པར་ཇུས་ཐག་གཅོད་པ།དམ་འཛིན་དངོས་སྒྲུབ་”བཅས་ཀྱི་སྤྱིའི་བླང་བྱར་གོ་བ་གཏིང་ཟབ་ལེན་པ་དང་།ཁོང་དུ་ཡང་དག་ཆུད་པ།ཁྱོན་ཡོངས་ནས་དོན་འཁྱོལ་བཅས་བྱེད་པ།སློབ་སྦྱོང་ཞིབ་གྲོས་དང་།གནད་དོན་བཤེར་འདོན།དག་ཐེར་བཅོས་སྐྱོང་།སྒྲིག་སྲོལ་དང་ལམ་ལུགས་འཛུགས་པ།སྒོ་ཕྱེ་ནས་སློབ་གསོ་བྱེད་པ་སོགས་ཀྱི་ལས་ཀའི་བཀོད་སྒྲིག་དམ་འཛིན་བྱས་ཏེ་ལག་ལེན་དང་།མི་དམངས།ལོ་རྒྱུས་བཅས་ཀྱི་ཞིབ་བཤེར་ཐེག་ཐུབ་པའི་གྲུབ་འབྲས་དངོས་གསར་སྐྲུན་བྱེད་དགོས།

ཚོགས་འདུའི་ཐོག་ནན་བཤད་གནང་དོན།སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཧྲུའུ་ཅི་ཁྲུའི་ཧྲུའུ་ཅི་དང་།རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་དང་།རྒྱལ་སྲིད་སྤྱི་ཁྱབ་ཁང་།རྒྱལ་ཡོངས་སྲིད་གྲོས་བཅས་ཀྱི་ཏང་ཙུའི་ཁོངས་མི།ཆེས་མཐོའི་མི་དམངས་ཁྲིམས་ཁང་དང་ཆེས་མཐོའི་མི་དམངས་ཞིབ་དཔྱོད་ཁང་གི་ཏང་ཙུའི་ཧྲུའུ་ཅི་བཅས་ཀྱིས་ཡིག་ཐོག་ནས་འགན་སྒྲུབ་གསལ་ཞུར་གཟིགས་ཞིབ་གནང་སྐབས་གནང་བའི་མཛུབ་སྟོན་གལ་ཆེན་གྱི་དགོངས་དོན་དང་ཟླ་2པའི་ཚེས་27ཉིན་གྱི་ཀྲུང་དབྱང་ཆབ་སྲིད་ཅུས་ཀྱི་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ།ལག་ལེན་དང་དོན་དངོས་གཉེར་བ།འགན་འཁུར་བ།རང་གཅུན་བཅས་ཀྱི་ཐོག་མིག་དཔེ་སྟོན་པ།“གཏན་འཁེལ་གཉིས”ལ་བརྩི་བཀུར་མཐའ་གཅིག་ཏུ་བྱེད་པ་དང་།“སྲུང་སྐྱོང་གཉིས”མཐའ་གཅིག་ཏུ་བྱེད་དེ།“ལོ་ལྔ་ཚན་བཅུ་ལྔ་པའི”འགོ་ཡག་པོ་འཛུགས་པ་དང་གོམ་སྟབས་བརྟན་པོ་སྤོ་བ་བཅས་བྱེད་དགོས།

ཚོགས་འདུའི་ཐོག་བླང་བྱ་བཏོན་དོན།སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཁབ་རང་བྱུང་ཚན་རིག་ཐེབས་རྩ་ཨུ་ལྷན་གྱི་ལས་དོན་ལ་གནང་བའི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་ལག་བསྟར་ནན་ཏན་བྱེད་པ་དང་།“ལོ་ལྔ་ཚན་བཅུ་ལྔ་པའི”རིང་གི་དམིགས་ཚད་ལས་འགན་ལ་དམ་པོར་དམིགས་པ།ས་མཐོའི་ཁྱད་ལྡན་ཐོན་ལས་ཀྱི་འགག་རྩའི་ལག་རྩལ་འགག་སྒྲོལ་དང་ཀྲུང་ལུགས་དང་བོད་ལུགས་གསོ་རིག་སྨན་རྫས་ཀྱི་ཐོན་ལས་རིམ་སྤོར་ལ་ཤུགས་སྣོན་རྒྱག་པ།ཚན་རྩལ་ལ་བརྟེན་ནས་ཐོན་ལས་ཕྱོགས་སྒྱུར་རིམ་སྤོར་དང་གྲོང་གསེབ་དར་རྒྱས་གཏོང་བ་བཅས་བྱེད་དགོས།

ཚོགས་འདུའི་ཐོག་ནན་བཤད་གནང་དོན།ཉེ་སྔོན་ཞིང་ཨུའི་འབྲེལ་ཡོད་ལས་ཀའི་བླང་བྱ་ལག་བསྟར་དོན་འཁྱོལ་ནན་ཏན་བྱས་ཏེ་གྲོང་གསེབ་ཀྱི་མཉམ་སྡེབ་“མ་དངུལ་དང་རྒྱུ་ནོར།ཐོན་ཁུངས་”ཀྱི་ལྟ་སྐུལ་དོ་དམ་ལ་ཤུགས་སྣོན་རྒྱག་པ་དང་།མཉམ་སྡེབ་དཔལ་འབྱོར་འཕེལ་རྒྱས་དང་སྟོབས་ཆེར་གཏོང་བ།ཞིང་པར་རྒྱུན་མཐུད་དང་བརྟན་པོའི་ངང་འབབ་འཕར་ཡོང་རྒྱུར་སྐུལ་ཁྲིད་བྱེད་པ།གྲོང་གསེབ་བཅོས་སྐྱོང་གི་ཆུ་ཚད་མཐོ་རུ་གཏོང་དགོས།འགལ་བ་དང་རྩོད་གཞི་གྲལ་བཤེར་དང་སེལ་རྒྱུར་ཤུགས་སྣོན་བརྒྱབ་ནས་རྒྱལ་ཡོངས་ཀྱི་ཚོགས་འདུ་གཉིས་རིང་གི་ཡིག་བསྐུར་ངོ་བཅར་དང་བརྟན་སྲུང་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་དགོས།དམངས་གཙོའི་འཚོ་བའི་ཚོགས་འདུའི་“རྩོམ་ཡིག་ཕྱི་མ”ཏན་ཏིག་ངང་ཡག་པོ་བསྒྲུབས་ཏེ་གཟེར་འདེབས་ཀྱི་སྙིང་སྟོབས་ཐོག་ནས་གནད་དོན་དག་ཐེར་ལ་དམ་འཛིན་ཡག་པོ་བྱེད་དགོས།

ཚོགས་འདུའི་ཐོག་ནན་བཤད་གནང་དོན།རིམ་ཁག་ཏང་ཨུ་ཏང་ཙུའུ་ཡིས་དགོངས་ཞུ་དང་སྙན་སེང་ཐོ་འགོད་སོགས་ཀྱི་ལམ་ལུགས་དོན་འཁྱོལ་ནན་ཏན་བྱས་ཏེ་སློབ་གསོའི་དོ་དམ་ནན་དུ་གཏོང་བ་དང་རྒྱུན་གཏན་གྱི་ལྟ་སྐུལ་ལ་ཤུགས་སྣོན་རྒྱག་དགོས།

ཚོགས་འདུའི་ཐོག་《བདེ་ཆེན་ཁུལ་གྱིས་མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་གནད་དོན་གཅིག་སྡུད་ཐོག་བཅོས་སྒྲིག་བྱེད་པའི་2026ལོའི་ལས་འགན་གསལ་ཐོར》གྲོས་ཞིབ་བྱས་ནས་རྩ་དོན་ཐོག་མོས་མཐུན་བྱས།གཅིག་སྡུད་བཅོས་སྒྲིག་དང་ཡང་དག་པའི་སྲིད་དོན་ལས་རྗེས་ལྟ་བ་འཛུགས་པ་དང་ལག་ལེན་བསྟར་བའི་སློབ་སྦྱོང་སློབ་གསོ་ཟུང་འབྲེལ་བྱས་ཏེ་ཚད་གཞི་དེ་བས་མཐོ་བ་དང་བྱ་ཐབས་དེ་བས་ཏན་ཏིག་གི་ཐོག་ནས་གཅིག་སྡུད་བཅོས་སྒྲིག་ལ་སྐུལ་འདེད་བཏང་སྟེ་ཕན་འབྲས་དེ་བས་ཆེ་བ་ཐོན་པ་བྱེད་དགོས་པའི་ནན་བཤད་གནང་བ།

ཚོགས་འདུའི་ཐོག་རང་ཁུལ་གྱི་ཏང་སྲོལ་སྲིད་གཙང་འཛུགས་སྐྱོང་གི་འགན་འཁྲིའི་ལམ་ལུགས་ཞིབ་བཤེར་དང་དཔྱད་ཞིབ་དག་ཐེར་ཇུས་གཞིར་ཞིབ་འཇུག་བྱེད་སྐབས།དག་ཐེར་ལ་དམ་འཛིན་བྱེད་པའི་ཆབ་སྲིད་ཀྱི་རང་རྟོགས་ཇེ་ཆེར་གཏོང་བ་དང་།དག་ཐེར་གྱི་ཕན་འབྲས་ལ་དོ་སྣང་བྱེད་པ།དག་ཐེར་གྱི་འགན་འཁྲི་དོན་འཁྱོལ་བཅས་བྱས་ཏེ།དག་ཐེར་ལས་ཀར་སྐུལ་འདེད་གཏོང་བའི་འགྲིལ་ཤུགས་ཆགས་པར་བྱེད་པ་དང་།དག་ཐེར་གྱི་གྲུབ་འབྲས་དངོས་ལ་བརྟེན་ནས་ཕྱོགས་ཡོངས་ནས་ཏང་ནན་སྐྱོང་བྱེད་པར་གྲུབ་འབྲས་སྔར་ལས་ཆེན་པོ་ཐོབ་པར་སྐུལ་འདེད་གཏོང་དགོས་པའི་ནན་བཤད་གནང་།

ཚོགས་འདུའི་ཐོག་ཁུལ་མི་དམངས་ཆེན་རྒྱུན་ལས་ཨུ་ལྷན་གྱི་2026ལོའི་ལོ་འཁོར་གྱི་ལས་ཀའི་གཙོ་གནད་དང་།ཁྲིམས་འཛུགས་དང་།ལྟ་སྐུལ།འཐུས་མིའི་ལས་ཀ་འཆར་གཞི།སྲིད་གྲོས་བདེ་ཆེན་ཁུལ་ཨུ་ཡོན་ལྷན་ཁང་གི་2026ལོའི་ལས་ཀའི་གཙོ་གནད་དང་གཙོ་གནད་གྲོས་མོལ་འཆར་གཞིར་གྲོས་ཞིབ་བྱས་ནས་རྩ་དོན་ཐོག་མོས་མཐུན་བྱུང་སྟེ།ལྟེ་བར་དམིགས་པ་དང་།ཁྱོན་ཡོངས་ལ་ཞབས་འདེགས་ཞུ་བར་རྒྱུན་འཁྱོངས་བྱས་ནས་“ལོ་ལྔ་ཚན་བཅུ་ལྔ་བའི”འཆར་འགོད་དང་ཁུལ་ཨུའི་ལས་ཀའི་བླང་བྱ་དོན་ཐོག་ཏུ་འཁྱོལ་བར་འགན་ལེན་ཏན་ཏིག་བྱེད་དགོས་པའི་བླང་བྱ་བཏོན།

ཚོགས་འདུའི་ཐོག་2026ལོའི་ཡུན་ནན་གྱི་ཕྱི་རོལ་ལུས་རྩལ་འགྲན་བསྡུར་ཆེ་མོའི་འབྲེལ་ཡོད་ལས་དོན་གསན་སྐབས་ནན་བཤད་གནང་དོན།ནུས་ཆེའི་གཅིག་གྱུར་འཆར་འགོད་བྱེད་པ་དང་།འགྲན་བསྡུར་གྱི་སྒྲིག་བཀོད་སྒྲིག་ཆས་འཛུགས་སྐྲུན་ལ་མགྱོགས་མྱུར་ངང་སྐུལ་འདེད་གཏོང་བ།གནམ་གཤིས་ཀྱི་གནས་ཚུལ་དང་མཐའ་འཁོར་གྱི་ཁོར་ཡུག་སྒྲིག་བཅོས་ལ་དོ་ཁུར་བཅས་བྱས་ནས་བྱེད་སྒོ་བདེ་འཇགས་དང་གོ་རིམ་ལྡན་པ་ཡོང་བའི་འགན་ལེན་བྱེད་དགོས།ལུས་རྩལ་ཡུལ་སྐོར་མཉམ་འདྲེས་འཕེལ་རྒྱས་ལ་ཤུགས་སྣོན་བརྒྱབ་ནས་“འགྲན་བསྡུར་ལ་བརྟེན་ནས་ཡུལ་སྐོར་སྐུལ་འདེད་གཏོང་བ་དང་།འགྲན་བསྡུར་ལ་བརྟེན་ནས་འཛད་སྤྱོད་སྐུལ་འདེད་གཏོང་བ།འགྲན་བསྡུར་ལ་བརྟེན་ནས་དར་རྒྱས་སྐུལ་འདེད་གཏོང་བ”བཅས་བྱེད་དགོས།

ཚོགས་འདུའི་ཐོག་ད་དུང་དོན་ཚན་གཞན་དག་ལ་ཞིབ་འཇུག་བྱས་པ་རེད།