སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ2པའི་ཚེས26ཉིན།ཁུལ་ཨུས་དཔྱིད་གསར་དུས་ཆེན་གྱི་གུང་གསེང་མཇུག་འགྲིལ་རྗེས་ཀྱི་ཆེད་དོན་ཚོགས་འདུ་ཐོག་མ་འཚོགས་ནས་དུས་ཚིགས་དང་པོའི་དཔལ་འབྱོར་བརྟན་པོའི་ངང་འགོ་འཛུགས་པའི་ལས་དོན་ལ་ཞིབ་འཇུག་དང་སྐུལ་འདེད་བཏང་བ་རེད།ཚོགས་འདུའི་ཐོག་ཁུལ་ཡོངས་ཀྱི་གོང་འོག་ཚང་མས་ཀྲུང་དབྱང་གི་ཐབས་ཇུས་བཀོད་སྒྲིག་དང་དེ་བཞིན་ཞིང་ཨུ་དང་ཞིང་ཆེན་སྲིད་གཞུང་གི་འབྲེལ་ཡོད་ལས་ཀའི་བླང་བྱ་ལག་བསྟར་དོན་འཁྱོལ་གཏིང་ཟབ་བྱས་ཏེ་དམིགས་ཚད་ལས་འགན་ལ་དམ་པོར་དམིགས་པ་དང་མགྱོགས་མྱུར་རྣམ་པར་སླེབས་པར་བྱས་ནས་སེམས་ཤུགས་ཡོད་ཚད་དཔལ་འབྱོར་དམ་འཛིན་དང་རྣམ་གྲངས་དམ་འཛིན་བྱེད་པའི་ཐོག་གཅིག་སྡུད་བྱས་ཏེ་གཟའ་འཁོར་གྱིས་ཟླ་བར་འགན་སྲུང་དང་།ཟླ་བས་དུས་ཚིགས་ལ་འགན་སྲུང་།དུས་ཚིགས་ཀྱིས་ལོ་འཁོར་ལ་འགན་སྲུང་བྱས་ཏེ།དཔའ་ངར་ཆེར་བསྐྱེད་ཀྱི་རྣམ་པའི་ཐོག་ནས་དུས་ཚིགས་དང་པོའི“སྒོ་འབྱེད་བརྟན་པོའི”མཐའ་མའི་གདོང་མཆོང་བྱེད་པ་དང་།ལོ་ཧྲིལ་བོའི་དམིགས་འབེན་དང་འོས་འགན་མངོན་འགྱུར་བྱུང་བར་རྨང་གཞི་བརྟན་པོ་བཏིང་ནས།“ལོ་ལྔ་ཚན་བཅོ་ལྔ་པ”འགོ་ཡག་པོ་འཛུགས་པར་འགན་ལེན་བྱེད་དགོས་ཞེས་ནན་བཤད་གནང་ཡོད།

ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཝེ་ཏུང་དང་ཁུལ་ཨུའི་ཧྲུའུ་ཅི་གཞོན་པ་ཞུས་སི་སི་ཚོགས་འདུར་ཕེབས་ཡོད་པ་རེད། 

ཚོགས་འདུའི་ཐོག་ཁུལ་སྲིད་གཞུང་དང་རྫོང་(གྲོང་ཁྱེར་)གསུམ་དང་དེ་བཞིན་སེམས་ཀྱི་ཉི་ཟླའི་ཐོན་ལས་གླིང་ཁུལ་དང་ཁུལ་རིམ་པའི་གཙོ་གནད་དཔལ་འབྱོར་སྡེ་ཚན་གྱི་དུས་ཚིགས་དང་པོའི་དཔལ་འབྱོར་བརྟན་པོའི་ངང་འགོ་ཚུགས་པའི་ལས་དོན་སྤེལ་ཚུལ་སྐོར་གྱི་སྙན་ཞུར་གསན་པ་རེད། 

ཚོགས་འདུའི་ཐོག་བསྟན་དོན།ད་ལོ་ནི“ལོ་ལྔ་ཚན་བཅོ་ལྔ་པ”འགོ་ཚུགས་པའི་ལོ་ཞིག་ཡིན་ལ་ཞིང་ཆེན་ཡོངས་ཀྱི“3815”འཐབ་ཇུས་འཕེལ་རྒྱས་ཀྱི་དམིགས་ཚད་ཀྱི“ལོ་བརྒྱད་འཕེལ་རྒྱས་ཆེན་པོ”སྔ་རྗེས་རྒྱུན་མཐུད་ཀྱི་གལ་ཆེའི་ལོ་ཞིག་ཀྱང་ཡིན།དུས་ཚིགས་དང་པོ་ནི་ལོ་ཧྲིལ་པོའི་དཔལ་འབྱོར་གྱི“རླུང་ཕྱོགས་སྟོན་རྟགས”ལྟ་བུ་ཡིན་པས་དུས་ཚིགས་དང་པོའི་ལས་དོན་ཡག་པོ་བསྒྲུབ་རྒྱུ་དེ་སྤྱི་ཚོགས་ཀྱི་སྔོན་དཔག་བརྟན་དུ་གཏོང་བ་དང་འཕེལ་རྒྱས་ཀྱི་ཡིད་ཆེས་འཕེལ་བ་བྱེད་པ་དང་ལོ་ཧྲིལ་པོའི་ལས་ཀའི་རྨང་གཞི་བརྟན་དུ་གཏོང་རྒྱུར་གལ་འགངས་ཤིན་ཏུ་ཆེ་བ་ཞིག་རེད།ཁུལ་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་མགྱོགས་མྱུར་ངང་སེམས་པ་ཕྱིར་བསྡུ་བ་དང་ལས་གནས་ལ་རྐང་ཚུགས་ཐུབ་པ་བྱས་ཏེ“འགོ་འཛུགས་པ་ནི་ཐག་གཅོད་དམག་འཐབ་དང་ཐོག་མའི་གོམ་པ་སྤོ་བ་ནི་མཐའ་མའི་གདོང་མཆོང”ཡིན་པའི་དཔའ་མཛངས་རྟུལ་ཕོད་ཀྱི་ཉམས་འགྱུར་ཐོག་ནས“ལོ་ལྔ་ཚན་བཅོ་ལྔ་པའི”རྒྱང་སྐྱོད་ལམ་བུ་གསར་པའི”དབྱུག་པ་དང་པོ”ཡག་པོ་རྒྱུག་དགོས། 

ཚོགས་འདུའི་ཐོག་ནན་བཤད་གནང་དོན།དམིགས་ཚད་ཕྱོགས་སྟོན་དང་།གནད་དོན་ཕྱོགས་སྟོན།མཇུག་འབྲས་ཕྱོགས་སྟོན་རྒྱུན་འཁྱོངས་བྱས་ནས།ཁུལ་ཨུའི་སྐབས་དགུ་པའི་ཚང་འཛོམས་གྲོས་ཚོགས་ཐེངས་བཅུ་པ་དང་ཁུལ་གྱི་ཚོགས་འདུ་གཉིས་ཀྱིས་གཏན་འཁེལ་བྱས་པའི་དམིགས་ཚད་ལས་འགན་ལ་དམ་པོར་དམིགས་ཏེ་ཞིང་ཆེན་སྲིད་གཞུང་གི་དཔལ་འབྱོར་འཁོར་སྐྱོད་དང་རྣམ་གྲངས་མ་འཇོག་ལས་དོན་གྱི་ཆེད་དོན་ཚོགས་འདུའི་བླང་བྱ་དང་བསྡུར་ནས་ལྷག་པའི་ཞན་ཆ་དང་ཆད་ལུས་རེ་རེ་བཞིན་གསེད་བཀྲོལ་དང་ཕྱོགས་ཡོངས་ནས་རང་བཤེར་བྱས་ཏེ་གནད་དོན་གྱི་འབྱུང་རྩར་དབྱེ་ཞིབ་གཏིང་ཟབ་བྱས་ནས་གནད་དོན་ཐག་གཅོད་བྱེད་པའི་ཕན་འབྲས་དངོས་ལ་བརྟེན་ནས་ལས་དོན་དོན་འཁྱོལ་ལ་སྐུལ་འདེད་གཏོང་དགོས།“མིག་མངས་འགྲིག་སྐོར་གཅིག”གི་བསམ་བློ་འཛུགས་པ་དང་།ཁྱོན་ཡོངས་ཀྱི་འདུ་ཤེས་དང་སྤྱི་ཡོངས་ཀྱི་འདུ་ཤེས་ཤུགས་ཆེ་རུ་གཏོང་བ།སྡེ་ཁག་གི་བཀག་རྒྱ་དང་རིམ་པའི་འགོག་རྐྱེན་མཐའ་གཅིག་ཏུ་མེད་པར་བཟོ་བ།ཁུལ་དང་རྫོང་(གྲོང་ཁྱེར་)སྲུབས་མེད་འབྲེལ་མཐུད་དང་མཉམ་སྒྲུབ་ཤུགས་འདོན་མངོན་འགྱུར་ཡོང་བ་བཅས་བྱས་ཏེ་རྣམ་གྲངས་དོན་ཐོག་ཏུ་འཁྱོལ་བར་སྐུལ་འདེད་གཏོང་བའི་འགྲིལ་ཤུགས་ཆགས་པར་བྱ་དགོས།ལས་ཀའི་གཙོ་གནད་མངོན་གསལ་དོད་པོ་ཡོང་བ་བྱས་ཏེ་རྣམ་གྲངས་ཀྱི་མ་འཇོག་ལ་དམ་འཛིན་ནན་པོ་བྱེད་པའི་ཐད་ཤུགས་བརྒྱབ་ནས་མཐུད་སྐྲུན་རྣམ་གྲངས་ཀྱི་ལས་འགོ་བསྐྱར་འཛུགས་ལ་དམ་འཛིན་ཡག་པོ་བྱེད་དགོས་ལ་གསར་སྐྲུན་རྣམ་གྲངས་ལས་འགོ་འཛུགས་རྒྱུར་ཡང་སྐུལ་འདེད་བཏང་ནས་འཛད་སྤྱོད་ཀྱིས་དཔལ་འབྱོར་ལ་སྐུལ་ཁྲིད་བྱེད་པའི་ནུས་པར་ཚད་མཐོའི་མཐོང་ཆེན་བྱས་ཏེ་འཛད་སྤྱོད་ཀྱི་མི་མངོན་པའི་སྟོབས་ཤུགས་སྔོག་འདོན་དང་འདོན་སྤེལ་གང་ལེགས་བྱེད་དགོས།ཁེ་ལས་ཀྱི་རིམ་སྤོར་གཅིག་གྱུར་ལས་དོན་ལ་དམ་འཛིན་ཏན་ཏིག་བྱས་ཏེ་གཉེར་སྐྱོང་བྱེད་པོ་སྐྱེད་སྲིང་བྱ་རྒྱུར་ཚད་མཐོའི་མཐོང་ཆེན་བྱས་ནས“གནས་སྡོད་སྨན་བཅོས”དང་།“སྐོར་སྐྱོད་སྨན་བཅོས”“སྒོ་རྩར་བསྐྱོད་ནས་སྨན་བཅོས་བྱེད་པའི”ལམ་སྲོལ་བཙུགས་ཏེ་ཁེ་ལས་ལ་སྲིད་ཇུས་ཀྱི་རྒྱབ་སྐྱོར་དང་དངུལ་རྩའི་ཞབས་ཞུ་མཁོ་འདོན་བྱེད་པ་དང་ཐབས་བརྒྱ་ཇུས་སྟོང་གིས་ཁེ་ལས་ཀྱི་དངོས་ཡོད་དཀའ་ངལ་ཐག་གཅོད་བྱེད་རོགས་བྱས་ཏེ་གཉེར་སྐྱོང་བྱེད་པོ་གསོན་ཐུབ་པ་དང་སྟོབས་ཆེར་གཏོང་ཐུབ་པ་བྱེད་དགོས།ཞིང་ཆེན་ཡོངས་ཀྱི་སྤྱོད་ཚུལ་གསར་བརྗེ་དང་ཕན་ནུས་གསར་བརྗེའི་མཐོར་འདེགས་བྱ་སྤྱོད་དམ་འཛིན་བྱེད་སར་བྱས་ཏེ།ལས་བྱེད་པའི་སྤྱོད་ཚུལ་ལེགས་སྒྱུར་ཏན་ཏིག་དང་།བློ་ཁོག་ཆེན་པོས་བསམ་ཚོད་དང་དཔང་རྟགས་འཚོལ་བར་གཟབ་གཟབ་བྱ་རྒྱུ་རྒྱུན་འཁྱོངས་བྱས་ཏེ།ལས་དོན་དེ་ཁེ་ལས་རེ་རེ་དང་བྱེ་བྲག་གི་རྣམ་གྲངས་རེ་རེའི་སྟེང་དུ་དོན་འཁྱོལ་བྱེད་པ་དང་།ཁུལ་ཡོངས་སུ་ནན་ཏན་དང་སེམས་རྣལ་དུ་ཕབ་པ།འགན་འཁུར་ཕོད་པ་བཅས་ཀྱི་སྒོ་ནས་ལས་དོན་དམ་འཛིན་བྱེད་པའི་རྣམ་པ་ཟབ་མོ་བསྐྲུན་དགོས།

དབྱང་ཞུའེ་ཝུན་དང་།ཧོང་ལུང་ཞིན།ཞུང་ཝུན་པིན།ཡུས་ཀུའེ་ཧྥུན།ཞུས་ཀོང་ཏེ།ལིན་ཧའོ།ལི་ཐའོ།མ་གོ་ཀྲུང་།ཁུལ་རིམ་པའི་འབྲེལ་ཡོད་སྡེ་ཁག་དང་། རྫོང་(གྲོང་ཁྱེར་)ཁག་དང་དེ་བཞིན་སེམས་ཀྱི་ཉི་ཟླའི་ཐོན་ལས་གླིང་ཁུལ་བཅས་ཀྱི་འགན་འཁུར་བློ་མཐུན་གཙོ་བོ་ཚོགས་འདུར་ཞུགས་ཡོད།