སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།ཟླ་2པའི་ཚེས་27ཉིན་གྱི་ཕྱི་དྲོ་ཁུལ་སྲིད་གཞུང་གི་ཏང་ཙུའུ་ཡིས་ཚོགས་འདུ་ཐེངས་74པ་འཚོགས་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས《བདེན་འཚོལ》དུས་དེབ་ཐོག་སྤེལ་བའི་རྩོམ་ཡིག་གལ་ཆེན《མིག་སྔའི་དཔལ་འབྱོར་ལས་དོན་གྱི་གཙོ་གནད་ལས་འགན》བརྒྱུད་བསྒྲགས་དང་སློབ་སྦྱོང་བྱས་ཏེ་རང་ཁུལ་གྱི་ལག་བསྟར་དོན་འཁྱོལ་ལས་དོན་ལ་ཞིབ་འཇུག་བྱས་པ་རེད།

ཁུལ་སྲིད་གཞུང་ཏང་ཙུའི་ཧྲུའུ་ཅི་ཁུལ་དཔོན་ཀྲང་ཝེ་ཏུང་གིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་རེད།

གྲོས་ཚོགས་ཐོག་ནན་གསུང་གནང་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་རྩོམ་གལ་ཆེན་ནང་“རྒྱུན་འཁྱོངས་བྱ་དགོས་པ་བརྒྱད་”ཀྱི་གཙོ་གནད་ལས་འགན་རྒྱུད་རིམ་ལྡན་པའི་སྒོ་ནས་རྒྱས་བཤད་གནང་བ་དེ་ནི་ཞི་ཅིན་ཕིང་གི་དཔལ་འབྱོར་དགོངས་པའི་གྲུབ་འབྲས་གསར་ཤོས་ཡིན་ཞིང་། དེར་ཆབ་སྲིད་ཀྱི་རང་བཞིན་དང་། བསམ་བློའི་རང་བཞིན། མཛུབ་སྟོན་གྱི་རང་བཞིན་བཅས་ཧ་ཅང་ཆེན་པོ་ལྡན་པ་དང་། “ལོ་ལྔ་ཚན་བཅོ་ལྔ་པ་”འགོ་ཚུགས་པའི་ལོ་དེའི་དཔལ་འབྱོར་ལས་དོན་དང་སྤུས་ཚད་མཐོ་བའི་འཕེལ་རྒྱས་གཏོང་བར་ཚན་རིག་དང་མཐུན་པའི་ཁྲིད་སྟོན་དང་རྩ་བའི་གཞི་འཛིན་ས་མཁོ་འདོན་བྱས་ཡོད།རིམ་པ་ཁག་དང་སྡེ་ཚན་ཁག་གིས་སློབ་སྦྱོང་དང་གོ་བ་གཏིང་ཟབ་བླངས་ཏེ་བསམ་བློ་དང་བྱ་སྤྱོད་དེ་སྤྱི་ཁྱབ་ཧྲུའུ་ཅི་དང་ཏང་ཀྲུང་དབྱང་གིས་དཔལ་འབྱོར་དུས་བབ་ལ་ཚན་རིག་དང་མཐུན་པའི་བརྡར་ཤ་གཅོད་པའི་ཐོག་གཅིག་གྱུར་ཡོང་བ་བྱས་ཏེ“མཐའ་འཁྱོངས་བརྒྱད”ཀྱི་བླང་བྱ་ཁོང་དུ་ཡག་པོ་ཆུད་པ་དང་དོན་འཁྱོལ་ཡག་པོ་བྱས་ཏེ་ཁུལ་ཡོངས་ཀྱི་བྱ་གཞག་ཁག་ལ་གྲུབ་འབྲས་གསར་པ་ཐོབ་པར་སྐུལ་འདེད་ཧུར་ཐག་གཏོང་དགོས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཀྲུང་དབྱང་དང་། ཞིང་ཨུ། ཁུལ་ཨུ་བཅས་ཀྱི་དཔལ་འབྱོར་ལས་དོན་ཚོགས་འདུའི་བཀོད་སྒྲིག་བླང་བྱ་ཕྱོགས་ཡོངས་ནས་དོན་འཁྱོལ་བྱས་ཏེ། “འགོ་འཛུགས་པ་ནི་ཐག་གཅོད་དམག་འཐབ་དང་འགོ་འཛུགས་པ་ནི་མཐའ་མའི་གདོང་མཆོང་བྱེད་པའི་”དཔའ་མཛངས་རྟུལ་ཕོད་ཀྱིས་མདུན་དུ་སྐྱོད་པའི་རྣམ་པའི་ཐོག་ནས་དམ་འཛིན་དང་། མགྱོགས་མྱུར་ངང་སྒྲུབ་པ། དཀའ་སྤྱད་སྙིང་རུས་བཅས་བྱས་ཏེ་“ལོ་ལྔ་ཚན་བཅོ་ལྔ་པའི་”རིང་ལ་འགོ་ཡག་པོ་འཛུགས་པ་དང་གོམ་པ་ཡག་པོ་སྤོ་ཐུབ་པའི་འགན་ལེན་ཏན་ཏིག་བྱ་དགོས།

གྲོས་ཚོགས་ཐོག་བླང་བྱ་བཏོན་དོན། ཡུལ་བབ་དང་བསྟུན་པ་དང་། བསྡུར་གཞི་ཡོད་པའི་དགེ་མཚན་འདོན་སྤེལ་བྱེད་པ་རྒྱུན་འཁྱོངས་དང་། ཁུལ་གྱི་ཚོགས་ཆེན་གཉིས་ཀྱིས་གཏན་ལ་ཕབ་པའི་དམིགས་འབེན་ལས་འགན་ལ་དམ་པོར་དམིགས་ཏེ། ལས་གཞི་ཅན་དང་ཞིབ་ཐོ་ཅན་གྱིས་ལས་འགན་དོན་འཁྱོལ་དམ་འཛིན་བྱས་ཏེ། ལོ་འཁོར་གྱི་དམིགས་འབེན་ལས་འགན་ཁག་བདེ་བླག་ངང་འགྲུབ་པར་ཁག་ཐེག་བྱ་དགོས། “འགོ་བརྩམས་ན་མཐའ་མའི་གདོང་མཆོང་བྱེད་པའི་”ཆོད་སེམས་ཀྱིས་དུས་ཚིགས་དང་པོར་མགོ་རྩོམ་པའི་ལས་ཀ་ཁག་དམ་འཛིན་ཏན་ཏིག་དང་། དུས་ཚིགས་དང་པོར་བརྟན་བརླིང་ངང་འགོ་རྩོམ་པའི་ལས་ཀ་ཁག་དམ་འཛིན་ཏན་ཏིག་དང་། རྒྱུ་རྐྱེན་གཙོ་བོ་འགན་སྲུང་དང་། ལས་གཞི་ལས་འགོ་བསྐྱར་འཛུགས་བྱེད་པ། གཙོ་གནད་ཐོན་ལས་ཀྱི་སྤུས་ཚད་མཐོར་འདེགས་དང་ཕན་འབྲས་ཆེ་རུ་གཏོང་བ་སོགས་ཀྱི་ལས་ཀ་གཙོ་གནད་དུ་དམ་འཛིན་བྱས་ཏེ། དུས་ཚིགས་དང་པོར་“སྒོ་འབྱེད་བརྟན་བརླིང་”ཡོང་བར་ནུས་ཤུགས་ཡོད་རྒུས་ཁག་ཐེག་བྱས་ཏེ། ལོ་ཧྲིལ་པོའི་དམིགས་འབེན་ལས་འགན་མངོན་འགྱུར་བྱེད་པར་རྨང་གཞི་བརྟན་པོ་འདིང་དགོས། ཡང་དག་པའི་སྲིད་དོན་ལས་རྗེས་ཀྱི་ལྟ་བ་འཛུགས་པ་དང་ལག་ལེན་བསྟར་བ་དང་། དངོས་དོན་སྒྲུབ་འགན་འཁུར་ཕོད་པ། བྱེད་མཁས་པོ་བཅས་བྱས་ཏེ་ཡང་བར་དགའ་ཞིང་ལྗིད་པར་སྐྲག་པ་དང་། སྒུལ་མི་ཐུབ་པ། ཁག་འགན་ཕར་དཀྲི་ཚུར་དཀྲི་སོགས་ཀྱི་བྱ་སྤྱོད་ཡོ་བསྲང་མཐའ་གཅིག་ཏུ་བྱས་ཏེ་སྤྱོད་ཚུལ་བཟང་པོར་བརྟེན་ནས་དཔལ་འབྱོར་འཁོར་སྐྱོད་རྒྱུན་མཐུད་ངང་ལེགས་ཕྱོགས་སུ་འཕེལ་བར་སྐུལ་འདེད་གཏོང་དགོས།

ཚོགས་འདུའི་ཐོག་ད་དུང་དོན་ཚན་གཞན་དག་ལ་ཞིབ་འཇུག་བྱས་པ་རེད།