ཟླ་12ཚེས་28ཉིན་ཉིན་ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་རུ་སྣེ་ཁྲིད་དེ་སེམས་ཀྱི་ཉི་ཟླའི་བེ་ཤ་གླིང་ཁུལ་དང་། རྡོ་མཁར་རྫོང་མེ་ཏོག་ཁྲོམ། སེམས་ཀྱི་ཉི་ཟླ་སྐྱེ་དངོས་ཐོན་ཁུངས་གསར་འདོན་ཚད་ཡོད་ཀུང་སི་སོགས་སུ་སོང་ནས་ལས་དོན་ལ་བརྟག་ཞིབ་འཇུག་གཏིང་ཟབ་བྱས། ཁོང་གིས་ཀྲུང་དབྱང་དཔལ་འབྱོར་ལས་དོན་ཚོགས་འདུ་དང་ཞིང་ཨུའི་དཔལ་འབྱོར་ལས་དོན་ཚོགས་འདུའི་དགོངས་དོན་ལག་བསྟར་གཏིང་ཟབ་དང་དོན་འཁྱོལ་བྱས་ཏེ། འཛད་སྤྱོད་ལ་སྐུལ་འདེད་གཏོང་བ་དང་ནང་ཁུལ་མཁོ་འདོན་རྒྱ་སྐྱེད་གཏོང་བའི་གནད་དོན་ལ་དམིགས་ནས། བདེ་ཆེན་གྱི་ཕུན་སུམ་ཚོགས་པའི་ཡུལ་སྐོར་ཐོན་ཁུངས་དང་འགྲུལ་སྐྱོད་ཀྱི་ལེགས་ཆར་བརྟེན་ནས། ནུས་ཤུགས་ཡོད་རྒུས་འབད་བརྩོན་བྱས་ནས་ཡུལ་སྐོར་བའི་གྲངས་ཚད་དེ་་འཛད་སྤྱོད་དུ་འཕར་སྣོན་བྱུང་རྒྱུར་འདེད་གཏོང་དགོས་ལ། འཛད་སྤྱོད་ཀྱི་རྣམ་པ་གསར་པ་དང་ལས་རིགས་གསར་པ་གསོ་སྐྱོང་བྱས་ཏེ། ཁུལ་ཡོངས་ཀྱི་དཔལ་འབྱོར་སྤུས་ཚད་མཐོ་བའི་གོང་འཕེལ་ལ་རོགས་འདེགས་བྱེད་དགོས་པ་བསྟན།

  སེམས་ཀྱི་ཉི་ཟླ་བེ་ཤ་གླིང་ཁུལ་དུ་ལུའོ་ཁྲའོ་ཧྥེང་གིས་གླིང་ཁུལ་གྱི་འཆར་འགོད་འཛུགས་སྐྲུན་དང་། བྱེད་ནུས་ཁུལ་དབྱེ། གཉེར་སྐྱོང་གསར་སྤེལ་བཅས་ཀྱི་གནས་ཚུལ་ཤེས་རྟོགས་ཞིབ་ཕྲ་བྱས་པ་རེད། ཁོང་གིས་ཚན་རིག་དང་མཐུན་པའི་སྒོ་ནས་ཉོ་འཚོང་དང་། མྱུར་འགྲེན། ཉམས་ལེན་སོགས་ནུས་པའི་ཁུལ་བཀོད་སྒྲིག་བྱས་ཏེ། བེ་ཤའི་ཐོན་ལས་ཉམས་ལེན་རྣམ་པ་དང་རྒྱུ་སྤུས་ཅན་དུ་འགྱུར་བའི་རིམ་སྤར་ལ་སྐུལ་འདེད་གཏོང་དགོས། མུ་མཐུད་དུ་“བེ་ཤ་ནས་འགོ་ཚུགས་པ་དང་བེ་ཤ་ཁོ་ན་མ་ཡིན་པའི་”འདུ་ཤེས་ལྟ་བ་གཏིང་ཟབ་ཏུ་གཏོང་དགོས། རྣམ་གྲངས་འཛུགས་སྐྲུན་གྱི་མྱུར་ཚད་མགྱོགས་སུ་གཏོང་བ་དང་། གཉེར་སྐྱོང་དོ་དམ་དང་བདེ་འཇགས་ཐོན་སྐྱེད་གཅིག་གྱུར་གྱིས་དམ་འཛིན་བྱས་ཏེ། ཉོ་ཚོང་དང་ཉམས་ལེན། རིག་གནས་བཅས་གཞི་གཅིག་ཏུ་འདུས་པའི་དེང་རབས་ཅན་གྱི་བེ་ཤའི་ཐོན་ལས་ཀྱི་སྟེགས་བུ་བསྐྲུན་ནས་ཡུལ་སྐོར་བ་རྣམས་ལ་རྒྱུ་སྤུས་མཐོ་བའི་འཛད་སྤྱོད་ཀྱི་རྣམ་པ་འདོན་སྤྲོད་བྱ་དགོས་ནན་གྱིས་བསྟན།

  རྡོ་མཁར་རྫོང་དུ་ལུའོ་ཁྲའོ་ཧྥེང་གིས་རྡོ་མཁར་རྫོང་གི་མེ་ཏོག་ཁྲོམ་གྱི་མངོན་མེད་རིག་གནས་ཤུལ་བཞག་འགྲེམས་ཁང་དང་ཟློས་གར་ཁང་འཛུགས་སྐྲུན་གནས་ཚུལ་ལ་ས་གནས་ས་ཐོག་ཏུ་ལྟ་ཞིབ་བྱས། བྱང་སྒོའི་ཐང་ཆེན་གྱི་ཚོང་འགུགས་གཉེར་སྐྱོང་དང་ས་ཁོངས་ཡོངས་ཀྱི་ལྟ་སྐོར་རྣམ་གྲངས་ས་ཚིགས་འཛུགས་སྐྲུན་གནས་ཚུལ་ཤེས་རྟོགས་ཞིབ་ཕྲ་བྱས་པ་རེད། ཁོང་གིས་རྡོ་མཁར་རྫོང་ནི་བདེ་ཆེན་ཡུལ་སྐོར་གྱི་གལ་ཆེའི་སྒེའུ་ཁུང་དང་འགྲོ་འོང་ལྟེ་གནས་ཤིག་ཡིན་པས་ཐོན་ཁུངས་ཀྱི་སྐྱེས་སྟོབས་ལ་གཞི་ཚུགས་ནས་ལས་རྣམ་ཐོན་རྫས་ཕུན་སུམ་ཚོགས་སུ་གཏོང་བ་དང་། མངོན་མེད་རིག་གནས་ཤུལ་བཞག་ལ་གསོན་ཤུགས་སྐྱེད་པ་དང་དེའི་ནང་ཞུགས་པའི་ཚོར་བ་ཆེ་རུ་གཏོང་རྒྱུར་ཤུགས་སྣོན་བརྒྱབ་སྟེ། དཔལ་འབྱོར་དང་འཛད་སྤྱོད་ཉམས་ལེན་སོགས་བཀྲག་ཆེ་ས་མངོན་པར་བཀྲ་བ་གསར་པ་གཏོད་དགོས། གནའ་གྲོང་གི་མེ་གསོད་བདེ་འཇགས་འགོག་སྲུང་འཛིང་རགས་བརྟན་པོ་འཛུགས་པ་དང་། མེ་གསོད་སྒྲིག་བཀོད་ཞིབ་བཤེར་དང་མངོན་མེད་རྐྱེན་ངན་ཞིབ་བཤེར་བྱེད་ཤུགས་ཆེ་རུ་གཏོང་བ། རྒྱུན་ལྡན་རང་བཞིན་གྱི་དྲིལ་བསྒྲགས་ནང་སྦྱོང་བྱས་ཏེ། གཉེར་སྐྱོང་གཙོ་གཟུགས་ཀྱི་བདེ་འཇགས་འགན་འཁྲི་དམ་ཟབ་བྱས་ཏེ་ཡུལ་སྐོར་བ་བདེ་འཇགས་དང་གནའ་གྲོང་བདེ་འཇགས་འགན་ལེན་བྱ་དགོས། བྱང་སྒོའི་ཐང་ཆེན་སོགས་ས་ཁོངས་ཀྱི་ལས་རྣམ་སྐྱེད་སྲིང་མགྱོགས་སུ་བཏང་ནས་སྣ་མང་ཅན་གྱི་འཛད་སྤྱོད་གདམ་ག་མཁོ་འདོན་བྱས་ཏེ། ཡུལ་སྐོར་བ་སྡོད་ཐུབ་པ་དང་འཛད་སྤྱོད་བྱེད་འདོད་པ། འགྲུལ་མང་བ་དེ་ལེགས་ཆ་དེ་དཔལ་འབྱོར་ཡོང་འབབ་མང་པའི་ཕན་འབྲས་སུ་བསྒྱུར་ཐུབ་པ་བྱེད་དགོས་པ་བསྟན།