ཟླ་5པའི་ཚེས་13ཉིན། ཁུལ་ཨུའི་ཧྲུའུ་ཅི་གཞོན་པ།  ཁུལ་དཔོན་ཀྲང་ཝེ་ཏུང་བདེ་ཆེན་ཁུལ་སློབ་འབྲིང་དང་པོར་བསྐྱོད་ནས་སློབ་གསོ་སློབ་ཁྲིད་ལས་དོན་ལ་བརྟག་ཞིབ་གནང་བ་མ་ཟད།  “སྒྲིག་ཁོངས་སུ་མེད་པའི་སློབ་གྲྭའི་འགོ་འཛིན་”གྱི་ཐོབ་ཐང་གིས་མཐོ་རིམ་སློབ་འབྲིང་ལོ་རིམ་གསུམ་པའི་དགེ་སློབ་ཚོར་བསམ་བློ་ཆབ་སྲིད་སློབ་ཚན་ཁྲིད། 

ཀྲང་ཝེ་ཏུང་གིས་ས་གནས་ས་ཐོག་ནས་སློབ་ཁྲིད་ཐོག་ཁང་དང་ཟ་ཁང་། ཉལ་ཁང་སོགས་སུ་ལྟ་ཞིབ་གནང་བ་དང་། སློབ་གསོ་སློབ་ཁྲིད་དང་མཐོ་རིམ་སློབ་ཞུགས་རྒྱུགས་ལེན་གྲ་སྒྲིག་བྱས་ཚུལ།  སློབ་གྲྭའི་བཟའ་བཏུང་དང་སློབ་གོས་ཉོ་སྒྲུབ།  སློབ་ཁྲིད་གཞོགས་སྣོན་དཔེ་དེབ་ཅེས་པའི་གཅིག་བསྡུས་བཅོས་སྒྲིག  སློབ་གྲྭའི་བདེ་འཇགས་དང་སློབ་གྲྭའི་དོ་དམ་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་།  ཁོང་གིས་ནན་བཤད་གནང་དོན།  སློབ་མ་ལྟེ་བར་འཛིན་པ་རྒྱུན་འཁྱོངས་བྱེད་དེ་སློབ་གྲྭའི་བཟའ་བཏུང་བདེ་འཇགས་ཀྱི་འགག་སྒོ་ནན་པོ་སྲུང་བ་དང་།  རྒྱུན་མཐུད་ངང་སློབ་མའི་འཚོ་བའི་ཆ་རྐྱེན་ལེགས་བཅོས་བྱེད་དེ་སློབ་མ་ལ་དེ་བས་སྟབས་བདེ་དང་བག་ཕེབས། སྐྱིད་པའི་སློབ་སྦྱོང་འཚོ་བའི་ཁོར་ཡུག་སྐྲུན་དགོས། 

བསམ་བློ་དང་ཆབ་སྲིད་སློབ་ཚན་ཁྲིད་སྐབས།  ཀྲང་ཝེ་ཏུང་གིས་ནན་བཤད་གནང་དོན།  དུས་རབས་གསར་པའི་མཐོ་སྒང་གི་ན་གཞོན་ཡིན་པའི་ཆ་ནས་བློ་ཐག་ཆེན་པོ་གཅོད་པ་དང་སྤྱོད་བཟང་ཡག་པོ་འཇགས་ཏེ།  བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་ཏང་གི་བཀའ་དྲིན་དྲན་པ།  ཏང་གིས་རྗེས་སུ་འབྲངས་དགོས།  ཡང་དག་པའི་འཇིག་རྟེན་ལྟ་བ་དང་མི་ཚེའི་ལྟ་བ། རིན་ཐང་ལྟ་བ་བཅས་འཛུགས་པ་དང་།  མི་སྒེར་གྱི་དམིགས་པ་དེ་མེས་རྒྱལ་གྱི་དགོས་མཁོ་དང་མི་དམངས་ཀྱི་རེ་སྒུག  ཕ་ཡུལ་གྱི་འཕེལ་རྒྱས་བཅས་སུ་འདྲེས་ནས་ཕུགས་འདུན་ཡོད་པ་དང་འཇོན་ཐང་ལྡན་པ།  འགན་འཁྲི་འཁུར་བའི་དུས་རབས་གསར་པའི་མཐོ་སྒང་གི་ན་གཞོན་འཚར་ལོངས་ཡོང་བར་བློ་ཐག་གཅོད་དེ་མཐའ་མཚམས་སྲུང་སྐྱོང་དང་ཕ་ཡུལ་འཛུགས་སྐྲུན།  མེས་རྒྱལ་ལ་ལེགས་སྐྱེས་འབུལ་བའི་རྐང་འཛིན་མི་སྣར་འགྱུར་དགོས།  དཀའ་སྤྱད་ཐེག་ཐུབ་པ་དང་འབད་འཐབ་བྱེད་ཕོད་པ་བྱེད་དེ་འབད་བརྩོན་གྱི་རྣམ་འགྱུར་ལ་བརྟེན་ནས་མཐོ་རིམ་སློབ་ཞུགས་རྒྱུགས་ལེན་གྱི་མཐའ་མའི་གདོང་མཆོང་ལས་རྒྱལ་ཁ་ཕུ་ཐག་ཆོད་པ་དང་། གསོ་རླུང་ཉུང་ཡང་སྙིང་སྟོབས་མི་ཉམས་པ་དང་དཀའ་ཚེགས་ཆེ་ཡང་དཀའ་སྡུག་མི་སྐྲག་པ། མཚོ་འཕགས་མཐོ་ཡང་བསམ་པའི་གོ་རྟོགས་དེ་བས་མཐོ་ཞེས་པའི་མཐོ་སྒང་གི་སྙིང་སྟོབས་དར་སྤེལ་གཏོང་བ།  སེམས་པ་བག་ཕེབས་དང་བློ་སེམས་འཇགས་ཐབས་བྱེད་པ།  ཤེད་ཤུགས་སྒྲིམ་ནས་བློ་རྩ་བརྟན་པོ་དང་བྱ་སྤྱོད་ངོ་མ།  སྤྱོད་ཚུལ་ཞུམ་པ་མེད་པ་བཅས་ལ་བརྟེན་ནས་མཐའ་མའི་གདོང་མཆོང་དུས་རིམ་གྱི་གོམ་པ་རེ་རེ་བཞིན་ཡག་པོ་སྤོ་དགོས།  དུས་ཚོད་ཆུད་ཟོས་མི་གཏོང་བ་དང་རང་ཉིད་སྟོང་ལོག་ཏུ་མི་འགྲོ་བ་བྱེད་དེ།  མ་འོངས་པར་རང་ཉིད་ཀྱི་སྦྱངས་པའི་ཤེས་བྱ་དང་འགན་འཁྲི་འཁུར་སེམས་ལ་བརྟེན་ནས་ཕ་ཡུལ་འཛུགས་སྐྲུན་དང་སྤྱི་ཚོགས་ལ་དྲིན་ལན་འཇལ་དགོས།  རྒྱུན་དུ་དྲིན་ཚོར་བའི་སེམས་པ་ཁྱེར་པ་དང་ཕྲག་ཐོག་གི་འགན་འཁྲི་དྲན་པ།  འབད་འཐབ་ཀྱི་བློ་རྩ་ཁྱེར་ནས་བདེ་ཆེན་གྱི་སྙིང་སྟོབས་དང་མཐོ་སྒང་གི་གཤིས་རྒྱུད་སྙིང་དུ་ཟུག་པ་དང་ཁྲག་ནང་འདྲེས་པ་བྱེད་དགོས།  སློབ་གྲྭར་སློབ་སྦྱོང་བྱེད་པའི་དུས་ཚོད་རྩ་ཆེན་གཅེས་སྤྲས་བྱེད་དེ་དཀའ་སྤྱད་སྦྱོང་བརྡར་དང་མིག་རྒྱ་སྐྱེད་པ།  འཇོན་ཐང་ཆེ་རུ་གཏོང་བ་བཅས་བྱས་ནས་དྲིན་ཚོར་ཤེས་པ་དང་ལེགས་སྐྱེས་ཧུར་འབུལ་གྱི་དུས་རབས་གསར་པའི་མཐོ་སྒང་གི་ན་གཞོན་དུ་འགྱུར་བར་འབད་དགོས། 

ཡུས་ཀུའེ་ཧྥེན་དང་ཀྲོང་ཞའོ་ཕིང་བྱེད་སྒོར་ཞུགས།