སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ5པའི་ཚེས16ཉིན་གྱི་ཕྱི་དྲོར།2025ལོ་ནས་2026བར་གྱི་ཧྥུ་ཏན་དངུལ་ཁང་ཡུན་ནན་ཞིང་ཆེན་གྲོང་ཁྱེར་རྐང་རྩེད་སྤོ་ལོའི་མཉམ་འགྲན་（ཡུན་ནན་ཚད་འདས་རྐང་རྩེད་སྤོ་ལོའི་མཉམ་འགྲན་）རེས་སྐོར་བཅུ་གསུམ་པའི་འགྲན་ཐེངས་98དེ་ལིན་ཚང་གྲོང་ཁྱེར་ཚང་ཡོན་དབའ་རིགས་རང་སྐྱོང་རྫོང་རིག་གནས་ལུས་རྩལ་བྱ་འགུལ་ལྟེ་གནས་སུ་འགྲན་བསྡུར་བྱས། བདེ་ཆེན་རུ་ཁག་གིས་གཞན་ཡུལ་འགྲན་ར་ནས་ལིན་ཚང་རུ་ཁག་དང་འགྲན་བསྡུར་བྱས་ལ། སྐར་མ་90རིང་གི་ཛ་དྲག་གི་འགྲན་བསྡུར་བྱས་པ་བརྒྱུད། མཐར་2:0གི་སྐར་གྲངས་ཀྱིས་ལིན་ཚང་རུ་ཁག་ལས་རྣམ་པར་རྒྱལ་བས། ཆེས་རྩ་ཆེ་བའི་སྐར་མ་3བླངས་པ་རེད།

   འགྲན་སྟོད་དུ།རང་ཡུལ་འགྲན་ར་ནས་འགྲན་བསྡུར་བྱེད་པའི་ལིན་ཚང་རུ་ཁག་གིས་འགྲན་ར་ལ་རྒྱུས་མངའ་ཆེ་བར་བརྟེན་བདེ་ཆེན་རུ་ཁག་གི་བཀག་སྡོམ་ཁུལ་ལ་ཕར་རྒོལ་བྱས་ཏེ་རྒྱུན་ཆད་མེད་པར་འཇིགས་སྐུལ་བསླངས་ཡོད།འགྲན་ཟླའི་སྟོབས་ཤུགས་ཆེ་བའི་གནོན་ཤུགས་ཀྱི་མདུན་དུ་བདེ་ཆེན་རུ་ཁག་གིས་བརྟན་པོའི་ངང་ལིན་ཚང་རུ་ཁག་གི་ཚུར་རྒོལ་ཐེངས་མང་ལ་འགོག་ནས་འགོག་སྲུང་འཛིང་རགས་བརྟན་པོ་སྲུང་ཡོད།འགྲན་སྟོད་དུ་0:0གི་སྐར་གྲངས་ཀྱིས་མཇུག་སྒྲིལ།འགྲན་སྨད་དུ།བདེ་ཆེན་རུ་ཁག་གིས་འཐབ་རྩལ་ལེགས་སྒྲིག་བྱས་ནས་མདུན་ཕྱོགས་ཀྱི་ཕར་རྒོལ་ལ་ཤུགས་སྣོན་རྒྱབ། འགྲན་བསྡུར་གྱི་སྐར་མ་69ཐོག བདེ་ཆེན་རུ་ཁག་གི་རུ་མི་ཨང་47པ་ངག་དབང་གིས་མགོ་གཞུས་ཀྱིས་སྤོ་ལོ་གཅིག་འཕངས་ནས་བདེ་ཆེན་རུ་ཁག་གིས་1:0གི་སྐར་འབྲས་བླངས། སྐར་མ་79ལ་སླེབས་སྐབས་བདེ་ཆེན་རུ་ཁག་གིས་གོ་སྐབས་དམ་འཛིན་བྱས་ནས་ཡང་བསྐྱར་སྤོ་ལོ་གཅིག་འཕངས་པས་འགྲན་བསྡུར་གྱི་སྐར་གྲངས་དེ་2:0ལ་བཏང་། འགྲན་བསྡུར་གྱི་དུས་ཚོད་ལྷག་མའི་ནང་ལིན་ཚང་རུ་ཁག་གིས་སྟོབས་ཤུགས་ཡོད་རྒུས་ཕར་རྒོལ་བྱས་ནས་སྐར་གྲངས་ལ་འགྱུར་ལྡོག་ཡོང་རེ་བྱས་ནའང་།བདེ་ཆེན་རུ་ཁག་གིས་འགོག་སྲུང་བྱས་པས། མཐར་བདེ་ཆེན་རུ་ཁག་གིས་གཞན་ཡུལ་འགྲན་ར་རུ་ལིན་ཚང་རུ་ཁག་ལས་རྒྱལ་བ་རེད།

གསར་འགོད་པའི་ཟིན་བྲིས།