གླེགས་བམ་གྲོང་ཚོར། ལུའོ་ཁྲའོ་ཧྥེང་གིས་ཡུལ་དངོས་སུ་མེ་འགོག་འགྲོ་ལམ་འཛུགས་སྐྲུན་དང་རྣམ་པ་དོ་དམ་ཚོད་འཛིན། བཙོག་ཆུ་གཙང་སེལ། འགྲུལ་ཞུགས་དམངས་སྲོལ་སྡོད་ཁང་གཉེར་སྐྱོང་སོགས་ཀྱི་གནས་ཚུལ་ལ་ལྟ་ཞིབ་གནང་། ཁོང་གིས་གླེགས་བམ་ལ་“ལྷ་ཡུལ་གཡོན་དུ་ཡོད་པ་དང་གླེགས་བམ་གཡས་སུ་ཡོད་”ཀྱི་མཚན་སྙན་ཡོད་པས་ཀུན་གྱིས་ཁས་ལེན་པའི་བོད་ཀྱི་སྦས་ལུང་དང་མི་ཡུལ་གྱི་ཞིང་ཁམས་ཤིག་རེད། གླེགས་བམ་ཡུལ་སྐོར་འཕེལ་རྒྱས་གཏོང་བ་དེ་མི་ཉུང་བ་དང་རྩེ་གྲ། སྤུས་ལེགས་བཅས་ཀྱི་ལམ་ཐིག་ཐོག་བསྐྱོད་དགོས་པ་དང་། ཡུལ་སྐོར་གྱི་སྤུས་ཚད་དང་ཉམས་ལེན་ལ་དམིགས་ཏེ་ཡུལ་སྐོར་བའི་སྣ་མང་ཅན་གྱི་དགོས་མཁོ་སྐོང་ཐུབ་པ་བྱས་ནས་ཡུལ་སྐོར་བ་ཚང་མར་རྨི་ལམ་ལྟ་བུའི་མཛེས་ལྗོངས་མྱོང་ཚོར་ཐུབ་པ་བྱེད་དགོས་ཞེས་བཏོན།

ལུའོ་ཁྲའོ་ཧྥེང་གིས་གླེགས་བམ་ཕྱོགས་བསྡུས་བཅོས་སྒྲིག་ཚད་ལྡན་མཐོར་གཏོང་ལས་དོན་དེ་སྐྱེ་ཁམས་ཁོར་ཡུག་སྲུང་སྐྱོང་ཡག་པོ་བྱེད་པའི་སྔོན་འགྲོའི་ཆ་རྐྱེན་འོག་“བཅོས་སྒྲིག”གི་ལས་དོན་ཏན་ཏིག་བསྒྲུབས་ནས་ཁོར་ཡུག་འཕྲོད་བསྟེན་དང་མེ་ཟོན་བདེ་འཇགས་སོགས་གཙོ་གནད་ཁྱབ་ཁོངས་བཅོས་སྒྲིག་གཏིང་ཟབ་ཏུ་གཏོང་ནས་གསོག་འབོར་དང་ཁྲིམས་འགལ་གྱི་འཛུགས་སྐྲུན་ཁྱོན་ཡོངས་ནས་གཙང་སེལ་བྱེད་པ་དང་ཁྲིམས་འགལ་གྱི་འཛུགས་སྐྲུན་གསར་པ་བཀག་འགོག་མཐའ་གཅིག་ཏུ་བྱེད་དགོས། “ཚད་ལྡན་”གྱི་ལས་དོན་ཏན་ཏིག་བསྒྲུབས་ནས་“ས་ཐོག་ལས་འགོ་བཙུགས་ན་ངེས་པར་དུ་འཆར་འགོད་དགོས་པ་དང་ཞིབ་བཤེར་ཆོག་མཆན་སྤྲོད་དགོས་”ཞེས་པའི་བླང་བྱ་དོན་འཁྱོལ་ནན་པོ་བྱས་ཏེ། ཁྲིམས་སྲོལ་ལྟར་བཙོག་ཆུ་དང་གད་སྙིགས་གཙང་སེལ་ཚད་ལྡན་དུ་གཏོང་བ་དང་། ས་ཆ་བེད་སྤྱོད་དང་གྲོང་གསེབ་འཛུགས་སྐྲུན་དོ་དམ་ལ་ཤུགས་སྣོན་རྒྱག་པ། ཁོར་ཡུག་གི་ཐེག་ནུས་ལ་ཚན་རིག་དང་མཐུན་པའི་ངང་དབྱེ་ཞིབ་བྱེད་པ། འགྲུལ་ཞུགས་དམངས་སྲོལ་སྡོད་ཁང་གི་སྤྱི་འབོར་དང་འཛུགས་སྐྲུན་གཞི་ཁྱོན། ཆོག་འཐུས་ཚད་གཞི་བཅས་དོ་དམ་ཚོད་འཛིན་ནན་པོ་བྱེད་པ་བཅས་བྱས་ནས་ཡུལ་སྐོར་གཉེར་སྐྱོང་སྒྲིག་ལམ་ཚད་གཞི་ཅན་དང་ཚད་ལྡན་ཅན་དུ་འགྱུར་བའི་ཆུ་ཚད་མཐོ་རུ་གཏོང་དགོས། “མཐོར་འདེགས་”ཀྱི་ལས་དོན་ཏན་ཏིག་བསྒྲུབས་ནས་གླེགས་བམ་གྲོང་ཚོའི་མཉེན་ཆས་དང་མཁྲེགས་ཆས་ཀྱི་ལེ་ལག་ཚང་བའི་སྒྲིག་བཀོད་ཕྱོགས་ཡོངས་ནས་རིམ་སྤོར་བྱེད་པ་དང་། ཤར་བགྲོད་ནུས་པ་དང་སྐྱེ་ཁམས་སླར་གསོ་དང་མེ་འགོག་བགྲོད་ལམ་བསྐྲུན་རྒྱུར་ལྟ་རྟོག་བྱེད་པ། རང་ས་གནས་ཀྱི་བོད་ཀྱི་རིག་གནས་ཀྱི་ནང་དོན་སྔོག་འདོན་གཏིང་ཟབ་བྱས་ནས་གྲོང་ཚོའི་འཛུགས་སྐྲུན་གྱི་རྣམ་པ་གཏོད་པ། ཆུའི་ཐོན་ཁུངས་སྲུང་སྐྱོང་དང་བེད་སྤྱོད་གཅིག་གྱུར་འཆར་འགོད་དམ་འཛིན་ཡག་པོ་བྱས་ནས་མཛེས་ལྗོངས་ཁུལ་གྱི་རིག་གནས་ཡུལ་སྐོར་གྱི་སྤུས་ཚད་རྒྱུན་མཐུད་ངང་མཐོ་རུ་གཏོང་དགོས།  “དོ་དམ་”གྱི་ལས་དོན་ཏན་ཏིག་སྒྲུབ་པ་དང་དྲིལ་བསྒྲགས་ཁྲིད་སྟོན་ལ་ཤུགས་སྣོན་རྒྱག་པ། ལྟ་སྐུལ་དོ་དམ་དང་ཁྲིམས་འཛིན་ལ་ཤུགས་སྣོན་རྒྱག་པ། གྲོང་མིའི་ཐོན་སྐྱེད་གཉེར་སྐྱོང་བྱ་སྤྱོད་ཚད་ལྡན་དུ་གཏོང་བ། ཡུལ་སྐོར་བའི་ཡ་རབས་ཡུལ་སྐོར་གྱི་འདུ་ཤེས་ཟབ་ཏུ་གཏོང་བ། ཚོང་དུད་ཀྱིས་ཁྲིམས་ལྟར་ཁ་དན་ཚིག་གནས་གཉེར་སྐྱོང་བྱེད་པར་ཁྲིད་སྟོན་བཅས་བྱས་ནས་ཕྱོགས་མང་མཉམ་འགུལ་དང་མཉམ་འཛིན་ཐུན་མོང་དོ་དམ་གྱི་བཅོས་སྐྱོང་རྣམ་པ་སྐྲུན་དགོས། “གཉེར་སྐྱོང་”གི་ལས་དོན་ཏན་ཏིག་བསྒྲུབས་ནས་ཁྲིམས་མཐུན་ལུགས་མཐུན་དང་། ཚན་རིག་དང་མཐུན་པའི་སྒོ་ནས་མཛེས་ལྗོངས་ཁུལ་གྱི་འཆར་འགོད་དང་གཉེར་སྐྱོང་དོ་དམ་གཅིག་གྱུར་འཆར་འགོད་བྱེད་པ་དང་། མང་ཚོགས་དང་གྲོང་ཚོ་མཉམ་སྡེབ་ཀྱི་ཡོང་འབབ་འཕར་བའི་ཐབས་ལམ་སྣ་མང་རྒྱ་ཆེར་གཏོང་བ། མ་འཇོག་དང་ཐོན་འབབ་ཀྱི་རྩིས་ཐོ་ཞིབ་རྩིས་རྒྱག་པ་བཅས་བྱས་ཏེ་སྐྱེ་ཁམས་ཀྱི་ཕན་འབྲས་དང་སྤྱི་ཚོགས་ཀྱི་ཕན་འབྲས། དཔལ་འབྱོར་གྱི་ཕན་འབྲས་བཅས་གཅིག་གྱུར་དམ་ཚགས་དང་མཐུན་སྦྱོར་བྱས་ནས་ཕན་འབྲས་ཆེ་རུ་གཏོང་བ་མངོན་འགྱུར་བྱེད་དགོས་ཞེས་ནན་གྱིས་བསྟན།

ཞུས་ཀོང་ཏེ་དང་ལི་ཐའོ། འཇོལ་རྫོང་ཨུ་དང་ཁུལ་རིམ་པའི་འབྲེལ་ཡོད་ལས་ཁུངས་ཀྱི་འགན་འཁུར་བློ་མཐུན་གཙོ་བོ་བརྟག་ཞིབ་ནང་ཞུགས།