2025/2026ལོའི་ཧྥུ་ཏེན་དངུལ་ཁང་ཡུན་ནན་ཞིང་ཆེན་གྱི་གྲོང་ཁྱེར་རྐང་རྩེད་སྤོ་ལོའི་མཉམ་འགྲན་（ཡུན་ནན་ཚད་མཐོའི་རྐང་རྩེད་སྤོ་ལོ་མཉམ་འགྲན་）གྱི་བདེ་ཆེན་འགྲན་ཁུལ་གྱི་འགྲན་བསྡུར་རིང་།ཁུལ་ཡོངས་ཀྱི་འཕྲོད་བསྟེན་བདེ་ཐང་མ་ལག་གིས་ཆེད་ལས་ནུས་ཆེའི་སྨན་བཅོས་ཞབས་ཞུ་བྱས་ཏེ།འགྲན་བསྡུར་འགན་སྲུང་ལ་འགོར་འགྱངས་མི་བྱེད་པ་དང་།ཆག་སྒོ་གཅིག་ཀྱང་མི་འབྱུང་བ།ཞུ་གཏུག་གཅིག་ཀྱང་མི་བྱེད་པ་བཅས་མངོན་འགྱུར་བྱུང་སྟེ།སྨན་བཅོས་འགན་སྲུང་གི་རྒྱུགས་ཤོག་གསལ་བོ་ཞིག་ཕུལ་བ་རེད།
ཞབས་ཞུ་ཞིབ་ཚགས་དང་། གཅེས་སེམས་འགན་སྲུང་གིས་ཁས་ལེན་གང་ལེགས་ཐོབ་པ།
ཐེངས་འདིའི་མཉམ་འགྲན་རིང་།ས་བབ་དམའ་བའི་ས་ཁུལ་ནས་རང་ཁུལ་གྱི་འགྲན་བསྡུར་ནང་ཞུགས་མཁན་ས་གནས་གཞན་གྱི་རུ་ཁག་མང་པོ་ཡོད་པ་དང་ས་བབ་མཐོ་བའི་ཁོར་ཡུག་ལ་འཕྲོད་རྒྱུ་དེ་རུ་མིའི་བདེ་འཇགས་འགན་ལེན་གྱི་གལ་ཆེའི་ནང་གི་འགངས་ཆེར་གྱུར་ཡོད་པ་རེད།ས་མཐོའི་འགྲན་བསྡུར་གྱི་དོན་དངོས་དང་ཟུང་འབྲེལ་བྱས་ནས་ཁུལ་ཡོངས་ཀྱི་འཕྲོད་བསྟེན་བདེ་ཐང་ཁོངས་གཏོགས་ཀྱིས་སྔོན་འགོག་བྱ་རྒྱུ་གཙོ་བོར་བྱེད་པ་དང་འགག་སྒོ་སྔ་སྣུར་རྒྱག་རྒྱུ་མཐའ་འཁྱོངས་བྱས་ཏེ་འགྲན་ཞུགས་རུ་ཁག་ཁག་རང་ཁུལ་དུ་འབྱོར་རྗེས་ཆེད་མངགས་སྨན་བཅོས་ཚོགས་པར་འཕྲལ་མར་འབྲེལ་མཐུད་ཞབས་ཞུ་བཀོད་སྒྲིག་བྱས་པ་དང་འབྲེལ། རང་འགུལ་ངང《ས་མཐོའི་འགྲན་ཞུགས་བདེ་ཐང་གི་ཤེས་བྱ》སྤྲད་དེ་གཅིག་གཏད་གཅིག་གིས་བདེ་ཐང་ལ་ཚོད་སྐོར་བྱས་ཏེ“མི་རེར་ཡིག་ཚགས་རེ”ཁྱོན་ཡོངས་ལ་ཁྱབ་པར་བྱས་ཡོད།
ཉེན་ཁ་ཆེ་བའི་མི་སྣར་སྔ་སྣུར་དུ་ཐེ་ཇུས་བྱེད་པ།བདེ་ཐང་དཔྱད་དཔོག་ཁྲོད་གྲལ་བཤེར་ཐུབ་པའི་ས་མཐོའི་འཕྲོད་ནུས་ཞན་པ་དང་གཟུགས་པོ་ཐང་པོ་མེད་པའི་རུ་མིར་སྨན་དོན་མི་སྣས་འཕྲལ་དུ་རང་གཤིས་ཅན་གྱི་ཐེ་ཇུས་བྱེད་ཐབས་བཟོས་པ་དང་འབྲེལ་རུ་ཁག་ཁག་གི་སྨན་པས་གཙོ་གནད་ཐོག་རྗེས་འདེད་ལྟ་ཞིབ་བྱ་རྒྱུར་དུས་གཅིག་ཏུ་བརྡ་ཐོ་བཏང་ནས་བདེ་འཇགས་ཀྱི་མངོན་མེད་རྐྱེན་ངན་སྔ་སྣུར་དུ་སེལ་ཡོད་པ་རེད།
འགྲུལ་ཡུལ་རུ་ཁག་ལ་ཆེད་དོན་གཟིགས་སྐྱོང་ཞབས་ཞུ་སྤེལ་བ།འགྲན་བསྡུར་མ་བྱས་གོང་རང་འགུལ་ངང་འགྲན་ཞུགས་རུ་ཁག་གི་རྩལ་འཁྲིད་པ་དང་འབྲེལ་མཐུད་བྱས་ནས་རུ་མི་ས་མཐོར་འཕྲོད་མིན་གྱི་གནས་ཚུལ་ལ་གཟིགས་ཞིབ་གནང་བ་དང་འབྲེལ་གཞི་གྲངས་གསལ་པོ་དང་མི་མངོན་པའི་རྐྱེན་ངན་མེད་པ་བྱས་ནས་འགྲན་བསྡུར་བདེ་འཇགས་དང་གོ་རིམ་ལྡན་པའི་ངང་སྤེལ་ཆེད་འགོག་སྲུང་སྔོན་འཇོག་བྱས་པ་རེད།
ལངས་གཟུགས་འགོག་སྲུང་བྱས་ནས་བདེ་ཐང་ལ་སྲུང་སྐྱོང་བྱས་པ།
ས་བབ་མཐོ་བའི་ས་ཁུལ་དུ་འགྲན་བསྡུར་བྱེད་སྐབས་སྤོ་ལོ་རྒྱག་མཁན་ལ་གློ་བུར་དུ་ལུས་རྩལ་གྱི་རྨས་སྐྱོན་ཕོག་པ་ནི་སྤོ་ལོའི་ཐང་དུ་རྒྱུན་དུ་འཕྲད་པའི་གནས་ཚུལ་ཞིག་རེད། འགྲན་ཞུགས་རུ་མིའི་ཚེ་སྲོག་བདེ་ཐང་ལ་ཁག་ཐེག་བྱེད་ཆེད།རང་ཁུལ་གྱིས་རིམ་པ་བཞི་ཅན་གྱི་ལངས་གཟུགས་སྨན་བཅོས་འགན་སྲུང་འཛིང་རགས་བསྐྲུན་ཏེ།འགྲན་བསྡུར་སྐབས་ཐོལ་བྱུང་གནས་ཚུལ་མྱུར་དུ་ཁ་གཏད་འཇལ་བ་དང་ཐག་གཅོད་ནུས་ལྡན་བྱེད་པར་ཁག་ཐེག་བྱས་པ་རེད།
འགོ་ནས་མཇུག་བར་འགོག་སྲུང་འཛིང་རགས་དང་པོ་བརྟན་པོ་བསྐྲུན་པ།ཁུལ་མི་དམངས་སྨན་ཁང་དང་ཁུལ་བོད་སྨན་ཁང་གི་རྐང་འཛིན་སྟོབས་ཤུགས་སྤྱི་འདོམས་བྱས་ཏེ་རེས་མོས་མངགས་སྡོད་དང་བརྒྱུད་རིམ་ཧྲིལ་པོའི་རྗེས་འདེད་ལམ་སྲོལ་ལག་ལེན་བསྟར་བ་དང་།ཆེད་ལས་རུ་ཁག་གི་སྨན་པས་སྦྱོང་བརྡར་དང་འགྲན་བསྡུར་བྱེད་པའི་བརྒྱུད་རིམ་ཧྲིལ་པོར་བརྟན་སྲུང་བྱས་པ་རེད།
ཡུལ་དངོས་ཀྱི་སྨན་བཅོས་འགན་ལེན་གྱིས་འགོག་སྲུང་འཛིང་རགས་གཉིས་པ་བརྟན་པོ་བསྐྲུན་པ།འགྲན་རའི་ནང་ཆེད་ལས་ཅན་དང་ཚད་ལྡན་ཅན་གྱི་སྨན་དོན་ཁང་བཙུགས་ཏེ་ལུས་རྩལ་པ་རྨས་པ་དང་གློ་བུར་དུ་ལུས་པོ་མི་བདེ་བ་སོགས་ཀྱི་གནས་ཚུལ་ཐོན་ཚེ་མྱུར་དུ་འགྲན་རར་སྐྱོད་དེ་འཕྲལ་མྱུར་ཚོད་སྐོར་དང་ཡུལ་དངོས་ཀྱི་མྱུར་སྐྱོབ་བྱེད་པ་སོགས་བྱས་ནས། དུས་ཐོག་ཏུ་སྨན་བཅོས་སྲོག་སྐྱོབ་རླངས་འཁོར་གཅིག་གྱུར་མཐུན་སྦྱོར་བྱས་ནས་སྐྱེལ་འདྲེན་དང་སྨན་བཅོས་བྱས་ཏེ་ཐག་གཅོད་བྱེད་ཡུན་ཐུང་དུ་བཏང་བ།
རྨས་མ་མྱུར་སྐྱེལ་བྱས་ནས་འགོག་སྲུང་འཛིང་རགས་གསུམ་པ་བརྟན་པོ་བསྐྲུན་པ། ཚན་རིག་དང་མཐུན་པའི་སྒོ་ནས་སྨན་བཅོས་སྲུང་སྐྱོང་སྟོབས་ཤུགས་ཀྱི་འགོག་སྲུང་བཀོད་སྒྲིག་བྱས་ཏེ།འགྲན་རའི་གནད་འགག་ཆེ་སར་ཆེད་ལས་ལྟ་སྐྱོང་ཅན་གྱི་མྱུར་སྐྱོབ་རླངས་འཁོར་3བཀོད་སྒྲིག་བྱས་པ་དང་།རླངས་འཁོར་རེར་སྨན་པ་1དང་སྨན་གཡོག་1 རླངས་འཁོར་ཁ་ལོ་བ་1རེ་བཀོད་སྒྲིག་ནན་པོ་བྱས་ཡོད།
བཅའ་སྡོད་བྱ་ཡུལ་ཕྱིའི་མཐའ་སྲུང་ལས་དོན་ཡག་པོ་བསྒྲུབས་ཏེ་འགོག་སྲུང་འཛིང་རགས་བཞི་པ་བརྟན་པོ་བསྐྲུན་པ།འགྲན་རའི་ལྟེ་བའི་འགན་ལེན་བྱས་པ་ཕུད།ད་ཐེངས་ཀྱི་འགྲན་བསྡུར་སྨན་བཅོས་ཞབས་ཞུ་ད་དུང་བཅའ་སྡོད་བྱ་ཡུལ་དང་འགྲན་རའི་མཐའ་སྐོར་དུ་སྤེལ་ནས་འགྲན་ཞུགས་མི་སྣ་དང་འགྲན་བསྡུར་ལ་ལྟ་མཁན་མང་ཚོགས་ཀྱི་བདེ་ཐང་བདེ་འཇགས་ལ་ཕྱོགས་ཡོངས་ནས་སྲུང་སྐྱོང་བྱས་ཡོད།
ཞིང་ཆེན་དང་ས་གནས་མཉམ་འགུལ་བྱས་ནས། འགྲན་བསྡུར་ལ་འགན་སྲུང་བརྟན་པོ་བྱས་པ།
འགྲན་བསྡུར་བྱེད་རིང་།ཞིང་ཆེན་རིམ་པའི་སྡེ་ཚན་གྱིས་རིགས་གཅིག་མཁས་ཅན་ཚོགས་པ་ཁྱོན་10བདམས་ནས་འགྲན་རར་བཅའ་སྡོད་བྱས་ཏེ་བརྒྱུད་རིམ་ཧྲིལ་པོར་མཛུབ་ཁྲིད་དང་འགན་ལེན་བྱས་པ་དང་།ཞིང་ཆེན་རིམ་པའི་སྤུས་ལེགས་སྨན་བཅོས་ཐོན་ཁུངས་ལ་བརྟེན་ནས་བདེ་ཆེན་གྱི་ས་མཐོའི་འགྲན་བསྡུར་གྱི་འཕྲལ་སྡོམ་འགན་ལེན་གྱི་དངོས་ཤུགས་ཆེ་རུ་བཏང་བ་རེད།རང་ཁུལ་གྱི་སྨན་བཅོས་སྲུང་སྐྱོང་ཚོགས་པས་བརྒྱུད་རིམ་ཧྲིལ་པོར་སློབ་སྦྱོང་དང་།བརྒྱུད་རིམ་ཧྲིལ་པོར་སྦྱོང་བརྡར།ཉམས་མྱོང་བསགས་པ་བཅས་བྱས་ཏེ་ས་མཐོའི་འགྲན་བསྡུར་གྱི་སྨན་བཅོས་འགན་སྲུང་གི་ལྟེ་བའི་རྩལ་ནུས་གང་མགྱོགས་ཁོང་དུ་ཆུད་པ་བྱས་ཡོད།
འགྲན་དུས་འདིར།རང་ཁུལ་གྱིས་སྨན་བཅོས་འགན་སྲུང་མི་སྣ་བསྡོམས་པས་མི་ཐེངས་250་ལྷག་བཏང་ནས།མི་སྣ་ཡོངས་ཀྱི་བདེ་ཐང་ལྟ་ཞིབ་ཚད་ལེན་དང་འགྲན་རར་སྐོར་སྐྱོད་སྨན་བཅོས་མི་ཐེངས་350ལྷག་ལེགས་གྲུབ་བྱུང་།ས་མཐོར་མ་འཕྲོད་པའི་ནད་གཞི་དང་ལུས་རྩལ་རྨས་སྐྱོན་རིགས་ཁག་གི་ནད་པ་50ལྷག་ཙམ་ནུས་ལྡན་ངང་སྨན་བཅོས་བྱས་པ།རྨས་མ་དང་ནད་པ་ཚང་མར་དུས་ཐོག་ཏུ་སྐྱོབ་བཅོས་བྱུང་བ་དང་ནད་གཞི་ཇེ་སྡུག་ཏུ་སོང་བ་གཅིག་ཀྱང་མེད་ལ་ནད་པ་སྨན་ཁང་གཞན་དུ་སྐྱེལ་བའི་གནས་ཚུལ་གཅིག་ཀྱང་མེད་པས་འགྲན་བསྡུར་གྱི་སྨན་བཅོས་འགན་ལེན་ལ་ཕན་འབྲས་མངོན་གསལ་དོད་པོ་ཐོབ་ཡོད་པ་རེད།
ཡུན་ནན་སྤྱི་བདེ་དྲ་རྒྱ་བདེ་འཇགས་ཐོ་འགོད་ཨང་རྟགས། 53340002000108
