ཟླ་3ཚེས་14ཉིན། ཁུལ་ཨུ་ཧྲུའུ་ཅི་ལུའོ་ཁྲའོ་ཧྥེང་གིས“མི་བྱེད་པ་བཞི་དང་ཐད་སྐྱོད་གཉིས”ཀྱི་བྱེད་ཐབས་ལ་བརྟེན་ནས་སྔ་རྗེས་སུ་ཁུལ་སྤྱི་བདེ་ཅུས་དང་ཁུལ་ཨུའི་དྲ་འཕྲིན་གཞུང་དོན་ཁང་། ཡུན་ནན་ཞིང་ཆེན་རླུང་འཕྲིན་བརྙན་འཕྲིན་ཅུས་བདེ་ཆེན་ཚོད་ལྟ་ཁང་། བདེ་ཆེན་ཁུལ་རྒྱལ་ཁབ་སློབ་གསོ་རྒྱུགས་ལེན་ལས་དོན་བཀོད་འདོམས་ལྟེ་གནས་བཅས་སུ་བརྟག་ཞིབ་གནང་བ་མ་ཟད། བརྟན་བརླིང་སྲུང་སྐྱོང་གི་ཆེད་དོན་ལས་ཀའི་བཀོད་གཏོང་ཚོགས་འདུ་གཙོ་སྐྱོང་གནང་སྟེ་མིག་སྔར་དང་དུས་རིམ་རྗེས་མར་ཁུལ་ཡོངས་ཀྱི་བདེ་འཇགས་བརྟན་བརླིང་གི་ལས་དོན་ཁག་བཀོད་སྒྲིག་གནང་།  

  ཁུལ་ཨུ་ཧྲུའུ་ཅི་གཞོན་པ་ཀྲུའུ་པའོ་ཧྥུ་ཚོགས་འདུར་ཞུགས།

  ཁུལ་སྤྱི་བདེ་ཅུས་དང་ཁུལ་ཨུའི་དྲ་འཕྲིན་གཞུང་དོན་ཁང་། བདེ་ཆེན་ཚོད་ལྟ་ཁང་བཅས་སུ་ལུའོ་ཁྲའོ་ཧྥེང་གིས་ཡུལ་དངོས་སུ་ལས་རེས་བརྟན་སྲུང་དང་འཕྲལ་སྡོམ་ཐག་གཅོད། དྲ་རྒྱའི་བདེ་འཇགས། གླེང་ཕྱོགས་ཁྲིད་སྟོན་སོགས་ལས་དོན་གནས་ཚུལ་ལ་གཟིགས་ཞིབ་གནང་བ་མ་ཟད། ཉེན་ཁ་སྔོན་འགོག་དང་མངོན་མེད་རྐྱེན་ངན་གྲལ་བཤེར། མཉམ་འགུལ་ཐག་གཅོད་སོགས་ཀྱི་ལམ་སྲོལ་འཁོར་རྒྱུག་བྱེད་ཚུལ་རྒྱུས་ལོན་ཞིབ་ཕྲ་གནང་།   ཁོང་གིས།  ཆབ་སྲིད་ཀྱི་འགན་འཁྲི་མཐའ་གཅིག་ཏུ་འཁུར་བ་དང་། མཐའ་ཚད་འཛིན་སེམས་བྱེད་ཤུགས་ཆེ་རུ་གཏོང་བ། ཉེན་ཁ་སྣ་ཚོགས་སྔོན་འགོག་ཐག་གཅོད་ནན་མོ་བྱེད་པ། བདེ་འཇགས་དང་བརྟན་བརླིང་གི་འགོག་སྲུང་འཛིང་རགས་བརྟན་པོར་འཛུགས་པ། ནུས་ཤུགས་ཡོད་རྒུས་གངས་ལྗོངས་མཐོ་སྒང་གི་དུས་བདེ་ཞི་མཐུན་ལ་སྲུང་སྐྱོང་གང་ཐུབ་བྱེད་དགོས་ཞེས་ནན་གསུང་གནང་།

  ཁུལ་རྒྱལ་ཁབ་སློབ་གསོའི་རྒྱུགས་ལེན་ལས་དོན་བཀོད་འདོམས་ལྟེ་གནས་སུ། ལུའོ་ཁྲའོ་ཧྥེང་གིས་ཡུན་ནན་ཞིང་ཆེན་གྱི་2026ལོའི་ལོ་འཁོར་གྱི་རྒྱུགས་ལེན་གཞུང་ཞབས་པ་བསྡུ་བའི་ཡིག་རྒྱུགས་བདེ་ཆེན་རྒྱུགས་ཁུལ་གྱི་ལས་དོན་ལ་ཞིབ་བཤེར་མཛུབ་ཁྲིད་གནང་།  ཁོང་གིས།  རྒྱུགས་ལེན་ལས་དོན་གྱི་ལམ་ལུགས་ཁག་དོན་འཁྱོལ་ནན་པོ་དང་ཞིབ་ཚགས་བྱས་ནས།  རྒྱུགས་ལེན་གྱི་སྒྲིག་ཁྲིམས་ནན་པོ་སྲུང་བ་དང་བདེ་འཇགས་ཀྱི་འགག་སྒོ་ནན་པོ་བསྲུངས་ཏེ།  ནུས་ཤུགས་ཡོད་རྒུས་དྲང་སྙོམས་དྲང་གཞག་དང་བདེ་འཇགས་གོ་རིམ་ལྡན་པའི་རྒྱུགས་ལེན་ཁོར་ཡུག་བཞེངས་སྐྲུན་བྱས་ཏེ། གཞུང་ཞབས་པའི་ཡིག་རྒྱུགས་ལས་དོན་བརྟན་པོ་དང་བདེ་བླག་ངང་ལེགས་སྒྲུབ་བྱེད་པར་འགན་ལེན་བྱེད་དགོས་པའི་བླང་བྱ་བཏོན།

  དེའི་རྗེས་སུ།   ལུའོ་ཁྲའོ་ཧྥེང་གིས་བརྟན་བརླིང་སྲུང་སྐྱོང་གི་ཆེད་དོན་ལས་ཀའི་བཀོད་གཏོང་ཚོགས་འདུ་གཙོ་སྐྱོང་གནང་ནས།  རྫོང་དང་གྲོང་ཁྱེར་གསུམ་དང་དེ་བཞིན་ཁུལ་རིམ་པའི་འབྲེལ་ཡོད་སྡེ་ཚན་གྱི་ལས་དོན་གནས་ཚུལ་གྱི་སྙན་ཞུ་གསན་རྗེས།   ཁོང་གིས།  སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་ལག་བསྟར་གཏིང་ཟབ་བྱས་ཏེ།  ཕྱོགས་ཁག་གི་འགན་འཁྲི་ནན་དུ་གཏོང་བ་དང་།  སྡེ་ཚན་མཉམ་སྒྲུབ་མཉམ་འགུལ་ལ་ཤུགས་སྣོན་རྒྱག་པ།  འགན་འཁྲི་ནན་པོ་འཁུར་བ་བཅས་ཀྱི་ཐོག་ནས་ལས་འགན་ཁག་དམ་འཛིན་ཞིབ་ཚགས་བྱས་ཏེ།  ནུས་ཤུགས་ཡོད་རྒུས་ཁུལ་ཡོངས་ཀྱི་ཆབ་སྲིད་བདེ་འཇགས་དང་སྤྱི་ཚོགས་བརྟན་བརླིང་།  མི་དམངས་བདེ་འཇགས་བཅས་ལ་སྲུང་སྐྱོང་བྱེད་དགོས།  ངོས་འཛིན་བྱེད་ཤུགས་ཆེ་རུ་གཏོང་བ་དང་མིག་སྔར་གྱི་བརྟན་བརླིང་སྲུང་སྐྱོང་གི་ལས་ཀ་ཡག་པོ་སྒྲུབ་པའི་གལ་ཆེའི་རང་བཞིན་ངོས་འཛིན་བྱེད་ཤུགས་ཆེ་རུ་བཏང་ནས། བདེ་འཇགས་བརྟན་བརླིང་གི་རྩ་བ་དེ་དམ་པོར་འཛིན་དགོས། ཐབས་ལམ་སྣ་མང་ཅན་དུ་གཏོང་སྟེ། ཆེད་ལས་སྡེ་ཚན་དང་གཞི་རིམ་རྩ་འཛུགས།  དྲ་མིག་ཅན་སོགས་ཀྱི་ནུས་པ་འདོན་སྤེལ་གང་ལེགས་བྱེད་པ། ཆ་འཕྲིན་བསྡུ་རུབ་དང་ཞིབ་དཔྱད་ཀྱི་ཐབས་ལམ་རྒྱ་སྐྱེད་གཏོང་བ།  ཉེན་ཁ་དང་མངོན་མེད་རྐྱེན་ངན་སྣ་ཚོགས་དུས་ཐོག་ཏུ་གྲལ་བཤེར་ཐག་གཅོད་བྱེད་པ།  སྔོན་ལ་འགོ་འཛུགས་པ་དང་རང་འགུལ་ངང་ཐག་གཅོད་བྱེད་དགོས།  གྲ་སྒྲིག་ཐད་ཞིབ་ཚགས་ཅན་ཡོང་བ་བྱས་ནས་ཕྱོགས་ཁག་གི་སྟོབས་ཤུགས་བསྡུ་སྒྲིལ་གྱིས་ལས་ཀའི་མཉམ་ཤུགས་ཆགས་དགོས།  ཐག་གཅོད་ཐད་ནུས་པ་ཆེ་རུ་གཏོང་སྟེ།  མྱུར་དུ་བརྡ་ལན་སྤྲོད་པ་དང་མགྱོགས་དུ་ཞིབ་དཔྱད་བྱེད་པ།  མྱུར་དུ་ཐག་གཅོད་བྱེད་པ་བཅས་ཀྱི་ལམ་སྲོལ་ཆེ་རུ་བཏང་ནས། བརྒྱུད་རིམ་སྟབས་བདེར་གཏོང་བ་དང་ཕན་ནུས་ཆེ་རུ་གཏོང་བ་བཅས་བྱས་ནས་ཉེན་ཁ་དང་མངོན་མེད་རྐྱེན་ངན་སྣ་ཚོགས་སྔ་ཙམ་ཤེས་རྟོགས་ཐུབ་པ་དང་ཆུང་ཙམ་ནས་སེལ་ཐུབ་པར་འགན་ལེན་བྱེད་དགོས།  བཀོད་འདོམས་ཐད་སྙོམས་ངོས་ཅན་དུ་འགྱུར་བ་བྱས་ཏེ།  སྙོམས་ངོས་ཅན་དུ་འགྱུར་བའི་བཀོད་འདོམས་མ་ལག་སྔར་ལས་འཛུགས་པ་དང་འཐུས་ཚང་དུ་བཏང་ནས། རིམ་པ་ཉུང་དུ་གཏོང་བ་དང་འགན་འཁྲི་དོན་འཁྱོལ་བྱེད་དེ། གཅིག་གྱུར་མཐུན་སྦྱོར་དང་ཡུལ་དངོས་ཀྱི་ཐག་གཅོད་ནུས་པ་ཆེ་རུ་གཏོང་བ་བཅས་བྱེད་དགོས་ཞེས་ནན་གསུང་གནང་།  
 ཚོགས་འདུ་དེ་བརྙན་ལམ་བརྒྱུད་རྫོང་དང་གྲོང་ཁྱེར་ཁག་ཏུ་འཚོགས། ལེའོ་ཝུན་ཚའེ་དང་ལུའུ་ཀྲེ་ཅུན། ཞུང་ཝུན་པིན། པའོ་ཡུས་ཏུང་། མོང་གོ་པིན། ཁུལ་རིམ་པའི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་ཚོགས་ར་གཙོ་བོར་ཞུགས།  ཧོང་ལུང་ཤིན་སེམས་ཀྱི་ཉི་ཟླ་གྲོང་ཁྱེར་ཡན་ལག་ཚོགས་རར་ཞུགས།