སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། འཇོལ་རྫོང་ཀོང་རྩེད་ར་གྲོང་རྡལ་ལ་ལུང་གྲོང་ཚོའི་ཧ་ཚང་གྲོང་མི་ཚོ་ཆུང་གི་གནས་སྤོ་དུད་ཚང་བསོད་ནམས་སྒྲོལ་མས་པང་ཁེབས་བཅིང་ནས་ཙུའེ་ཧྲེང་མེང་ཆང་གཞིས་ཀྱི་ཐབ་ཚང་དུ་འཛུལ་རྗེས། ཇ་བསྲུབས་མའི་དྲི་ཞིམ་མྱུར་དུ་སྒོ་རའི་ནང་དུ་ཁྱབ། བཀོལ་སྤྱོད་སྟེགས་བུའི་ཐོག་གི་ཆུ་དྲེག་ཕྱིས་སྐབས་མོས་ཁང་པ་རྙིང་པ་སྟོང་པ་བཞག་ན་འཕྲོ་བརླག་རེད། ད་ལྟ་ལོ་རེར་ཁང་གླ་སྒོར་ཁྲི་2བསྡུ་ཐུབ་པ་མ་ཟད། ང་ལ་ད་དུང་ཟླ་རེར་གླ་ཕོགས་སྒོར་5000ལྷག་ཡོད་པས་འཚོ་བ་བརྟན་པོ་དང་དར་རྒྱས་ཆེན་པོ་ཡོད་ཅེས་བཤད།

ཆང་གཞིས་བརྟན་པོའི་ངང་འཕེལ་རྒྱས་གཏོང་ཆེད་གྲོང་ཚོས་ས་ཞིང་གླ་བར་མཐུན་སྦྱོར་དང་རྨང་གཞིའི་སྒྲིག་བཀོད་འཐུས་ཚང་དུ་བཏང་བ་མ་ཟད། ད་དུང་མཉམ་ལས་ཁང་བརྒྱུད་ནས་ཡུལ་མི་ལ་རྩལ་ནུས་གསོ་སྦྱོང་བྱས། 2023ལོ་ནས་མིག་སྔའི་བར། བསོད་ནམས་སྒྲོལ་མས་ཆང་གཞིས་སུ་ཟ་མ་བཟོ་བ་དང་འཕྲོད་བསྟེན་གཙང་སྦྲ་བྱེད་པ་ནས་ཡུལ་སྐོར་བ་སྣེ་ལེན་བྱེད་པའི་བར་དུ་སྤྱི་སྐད་རྒྱུས་མངའ་ཡོད་པ་མ་ཟད། ཡུལ་སྐོར་བ་དང་སྤེལ་རེས་བྱེད་པའི་ཁྲོད་ཕྱིའི་འཇིག་རྟེན་ཡང་མཐོང་ཐུབ་པ་རེད། ད་ལོར། གྲོང་ཚོ་གཅིག་པའི་བུ་མོ་ཆོས་འཛོམས་ཚོགས་པ་དེའི་ནང་ཞུགས་པས་ཡུལ་སྐོར་བ་མང་དུས་ཀྱི་ལས་ཕྱོད་ལྡབ་འཕར་ལ་སྣེ་ལེན་བྱེད་དུ་བཅུག་པ་དང་།  སྐབས་འགར་ཁོམ་པ་ཡོད་ཚེ་ཁོང་ཚོ་ཉེ་འགྲམ་གྱི་རྒུན་འབྲུམ་ཞིང་དུ་རོགས་རམ་བྱེད་པར་འགྲོ་གི་ཡོད།   

བསོད་ནམས་སྒྲོལ་མའི་བདེ་སྐྱིད་ཀྱི་འཚོ་བ་ནི་ལ་ལུང་གྲོང་ཚོས་ཏང་འཛུགས་སྐྱོང་གིས་ཐོན་ལས་འཕེལ་རྒྱས་ལ་སྣེ་ཁྲིད་བྱེད་པའི་འཕེལ་རྒྱས་དཔེ་དབྱིབས་ཀྱི་གསོན་ཉམས་ལྡན་པའི་བསྡུས་རིས་ཤིག་ཡིན། མཉམ་ལས་ཁང་གིས་གཅིག་གྱུར་འཆར་འགོད་འོག་གྲོང་ཚོས་ཞིང་དུད་དང་ཁེ་ལས་མཉམ་འབྲེལ་མཉམ་ལས་བྱེད་པའི་དཔེ་དབྱིབས་སྤྱོད་དེ་ཆང་གཞིས་གསུམ་དང་ཡུན་རིང་གི་མཉམ་ལས་ལམ་སྲོལ་བཙུགས་ཏེ་རྒུན་འབྲུམ་འདེབས་འཛུགས་དང་དོ་དམ་ནས་རྒུན་འབྲུམ་བཏོག་བ་དང་ཆང་སྙོལ་བ་བར་འཐུས་སྒོ་ཚང་བའི་ཐོན་ལས་འབྲེལ་ཐག་ཆགས་སུ་བཅུག་སྟེ་མུ་འབྲེལ་གྱི་ཁྲི་ཞ་ཀྲུའུ་རྒུན་འབྲུམ་དགུན་ཁར་ཤེད་ལེན་སྤུ་སྐྱེས་བྱེད་པ་དང་ཆབས་ཅིག་ཡུལ་མིར་བརྟན་ལྷིང་གི་ཁེ་བཟང་ཡང་གསོ་སྐྱོང་བྱས་ཡོད་དེ་མུའུ་རེའི་ཆ་སྙོམས་ཡོང་འབབ་སྒོར་ཁྲི་1ཡན་རག ལྕོག་སྐྱ་གྲོང་མི་ཚོ་ཆུང་གི་རྒུན་འབྲུམ་གཞིས་ཀར་དགུན་དུས་བཏོག་པའི་དབྱང་ཀོང་མེ་ཀུའེ་རྒུན་འབྲུམ་མཉམ་ལས་ཁང་གིས་གཅིག་གྱུར་ངང་ཕྱིར་ཚོང་བྱས་ནས་མུའུ་རེར་ཆ་སྙོམས་ཡོང་འབབ་སྒོར་ཁྲི་4ཡས་མས་ཟིན།  

གྲོང་མིའི་ཡོང་འབབ་དེ་བས་མང་བའི་ཆེད་དུ། མཉམ་ལས་ཁང་གིས་ཧུར་ཐག་སྒོས་ཞིང་དུད་ཀྱི་ཞིང་ལས་ཐོན་རྫས་ཉོ་སྒྲུབ་བྱས་ནས་སྤྱིའི་བཙོང་འབོར་སྒོར་ཁྲི་15ལས་བརྒལ་ནས་ཡུལ་མི་དུད་ཚང་40ལྷག་ཙམ་གྱི་ཡོང་འབབ་འཕར་བར་སྐུལ་ཁྲིད་བྱས། སྲོལ་རྒྱུན་གྱི་འདེབས་ལས་དང་གསོ་སྤེལ་ལས་རིགས་སོར་འཇོག་བྱེད་པའི་རྨང་གཞིའི་ཐོག་རྒུན་འབྲུམ་དང་སྦྲང་རྩི་སོགས་ཀྱི་ཁྱད་ལྡན་ཐོན་ལས་ཡུལ་མིའི་ཡོང་འབབ་འཕར་བའི་གསེར་གྱི་ལྡེ་མིག་དུ་གྱུར། མིག་སྔར། མཉམ་ལས་ཁང་གིས་དབྱང་ཀོང་མེ་ཀུའེ་རྒུན་འབྲུམ་ལ་སྐྱེ་ལྡན་ཁས་ལེན་དཔང་འདོན་ཞུ་བཞིན་ཡོད་དེ་མཐོ་སྒང་གི་རྣམ་ཤེས་ལྡན་པའི་ཁྱད་ལྡན་ཞིང་ལས་ཐོན་རྫས་དེ་དག་ཡུལ་སྐོར་བ་ཁ་བྲལ་སྐབས་ངེས་པར་དུ་འཁྱེར་དགོས་པའི་ལག་རྟགས་ཤིག་ཏུ་གྱུར་བཅུག

ཉི་མ་ནུབ་ཁར་བསོད་ནམས་སྒྲོལ་མས་མཇུག་མཐའི་མགྲོན་ཁང་ཞིག་གཙང་སྦྲ་བྱས་ཚར་སོང་། ལག་ཁྱེར་ཁ་པར་ནས་དེ་རིང་སླར་ཡང་སྐུ་མགྲོན་སྐོར་འགའ་སྔོན་མངག་ཡོད་པས་མྱུར་དུ་བཟའ་རྒྱུ་གྲ་སྒྲིག་བྱེད་དགོས་ཞེས་པའི་དྲན་སྐུལ་གྱི་སྒྲ་གསར་བ་གྲགས་བྱུང་། ཐག་རིང་གི་མཉམ་ལས་ཁང་གི་སྐྱེལ་འདྲེན་རླངས་འཁོར་དུ་ཞིང་ལས་ཐོན་རྫས་བྱུར་བུར་གང་བླུགས་ནས་རྫོང་གྲོང་དུ་བསྐྱོད་བཞིན་ཡོད།

ལ་ལུང་གྲོང་ཚོའི་ཏང་གི་སྤྱི་ཁྱབ་ཡན་ལག་ཧྲུའུ་ཅི་སྐལ་བཟང་སྒྲོལ་མས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག་ཞིང་ལས་དང་གྲོང་གསེབ་དེང་རབས་ཅན་མྱུར་དུ་གཏོང་བ་དང་ཏན་ཏིག་ངང་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བའི་ཐད་བཀོད་སྒྲིག་བྱས་ཡོད་པས། ལ་ལུང་གྲོང་ཚོའི་འཕེལ་རྒྱས་ལ་ཁ་ཕྱོགས་གསལ་པོ་སྟོན་ཡོད་པ་དང་སྒུལ་ཤུགས་སྟོབས་ལྡན་སྣོན་ཡོད། ལ་ལུང་གྲོང་ཚོས་བློ་བརྟན་འགྱུར་མེད་ངང་ཚང་འཛོམས་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་བྱ་རྒྱུ་ཡིན་པ་དང་། སྤུས་ཚད་མཐོ་བའི་ཏང་འཛུགས་སྐྱོང་གིས་གྲོང་གསེབ་ཐོན་ལས་འཕེལ་རྒྱས་སྣེ་ཁྲིད་རྒྱུན་འཁྱོངས་བྱ་སྟེ། ཏང་འཛུགས་སྐྱོང་གིས་ཐོན་ལས་འཕེལ་རྒྱས་ལ་སྣེ་ཁྲིད་བྱེད་པའི་དཔེ་དབྱིབས་རྒྱུན་མཐུད་ངང་གཏིང་ཟབ་ཏུ་བཏང་ནས་གྲོང་མི་དེ་བས་མང་པོར་སྒོ་ཁ་ནས་ལས་ཞུགས་ཐུབ་པ་དང་རྒྱུན་མཐུད་ངང་འབབ་འཕར་ཡོང་བར་སྐུལ་ཁྲིད་བྱས་ནས་མཐོ་སྒང་གི་ཁྱད་ཆོས་ལྡན་པའི་གྲོང་གསེབ་དར་རྒྱས་ཀྱི་ལམ་བུ་ཞིག་བཏོད་རྒྱུ་ཡིན་ཞེས་བསྟན།