སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཁམས་ཀྱི་ཡུལ་ལྗོངས་ཆེན་པོའི་ཀློང་ན་གངས་རི་དང་ནགས་རི། རྫ་རི་སྟོང་གི་རྩེ་མོ་ནི་གཅིག་ལ་གཅིག་འགྲན་གྱིས་སྤྲིན་གྱི་བང་རིམ་བརྟོལ་ནས་དབུ་འཕང་མཐོ་བའི་མཐོ་སྒང་གི་མཛེས་པ་ཨེ་མ་རྨད། དེ་ལས་ཀྱང་གངས་རིའི་མུ་ཁྱུད་ཀྱི་ཁྲོད་ན་སྨུན་སྤྲིན་གྱི་འདབ་མ་མགུལ་དུ་བཅིངས་ཤིང་། རྔམ་བརྗིད་ལྡན་པའི་རང་མདངས་གསལ་འཁྱུག་སེར་འདྲེན་བྱེད་ཡུལ་དུ་མཐོང་བ་ཙམ་གྱིས་ཀྱང་དད་འདུན་གྱི་སེམས་པ་འགོག་མེད་དུ་སྐྱེ་བ། སུམ་རྩེན་གནས་ཀྱི་བཀོད་པ་ལ་ཅིག་ཅར་དུ་དོགས་འདྲི་བའི་རང་བྱུང་ཁམས་ཀྱི་མཛེས་པ་མ་ལུས་གཅིག་ཏུ་བསྡུས་འདྲའི་ཞིང་མཆོག འཛམ་གླིང་སྐྱེ་བོ་ཀུན་གྱིས་ཞབས་ཀྱིས་གཅོག་མ་ནུས་ལ་གཅོག་ཀྱང་མི་རུང་བའི་དྭངས་གཙང་གི་སྲིད་པ་ཆགས་པའི་གངས་རྒན་འདི་གཞན་ཅི་སྟེ། འདི་ནི་ངོ་མཚར་སྣོད་བཅུད་ཀྱིས་རང་བཞིན་གྱིས་བཞེངས་པའི་རོང་བཙན་ཁ་བ་དཀར་པོ་ལགས། ཞོགས་པའི་ཉི་མ་གཞོན་ནུའི་བརྩེ་བའི་ཉི་འོད་འཇམ་པོ་གངས་རིའི་རྩེ་ལ་ཤར་བ་ན། དཀར་དཀར་གངས་ཀྱི་འཇིག་རྟེན་ནི་ས་ལེ་སྦྲམ་གྱིས་ཁུ་བ་བྱུག་པའི་ཡུལ་ལྗོངས་ཤིག་ཏུ་གྱུར་བའི་སྐད་ཅིག་མའི་སྣང་བརྙན་ལ་བསྟོད་པའི་སྙན་ཚིག་མི་འབུལ་ག་མེད་བྱུང་།