ཞུགས་མོལ་ཚོགས་འདུའི་ཐོག ལུའོ་ཁྲའོ་ཧྥེང་གིས་བདེ་ཆེན་ཁུལ་ཨུ་དང་ཁུལ་སྲིད་གཞུང་གི་ཚབ་ཞུས་ནས།ཡུན་ནན་སློབ་ཆེན་གྱིས་དུས་ཡུན་རིང་པོའི་ནང་བདེ་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་རེད། ཁོང་གིས། ཕྱོགས་གཉིས་ཀས་འཐབ་ཇུས་མཉམ་ལས་ཀྱི་གྲོས་མཐུན་བཞག་པ་ནས་བཟུང་། སློབ་གྲྭ་དང་ས་གནས་ཀྱིས་ལག་གདང་སྦྲེལ་ནས་མཉམ་ལས་དམ་ཟབ་བྱས་ཏེ། སློབ་གསོའི་རོགས་སྐྱོར་དང་སྨན་བཅོས་ཞབས་ཞུ། སྐྱེ་ཁམས་སྲུང་སྐྱོང་། ལས་བྱེད་པའི་སློབ་གསོ་གསོ་སྦྱོང་སོགས་ཁྱབ་ཁོངས་ཀྱི་མཉམ་ལས་ལ་གཡུར་དུ་ཟ་བའི་གྲུབ་འབྲས་ཐོབ་པ་མ་ཟད་ཀུན་ལ་ངོ་མཚར་བསྟན་ཡོད་ཅེས་སྟོན། ཁོང་གིས། ཕྱོགས་གཉིས་ཀས་མུ་མཐུད་ལག་གདང་སྦྲེལ་ནས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དང་། སྐྱེ་ཁམས་དཔལ་ཡོན་འཛུགས་སྐྱོང་། འཛམ་གླིང་གི་“སེམས་ཀྱི་ཉི་ཟླ་”ཞེས་པའི་ཡུལ་སྐོར་དམིགས་ས་འཛུགས་སྐྲུན་དང་དེ་བཞིན་དམངས་འཚོའི་ཁྱབ་ཁོངས་ཐད་དངོས་སྒྲུབ་མཉམ་ལས་གཏིང་ཟབ་ཏུ་གཏོང་བ་དང་ལྷག་པར་དུ་བདེ་ཆེན་གྱི་རྨང་གཞིའི་སློབ་གསོ་དང་ལས་རིགས་སློབ་གསོ། གཞི་རིམ་སྨན་བཅོས་ཞབས་ཞུ་བཅས་ཀྱི་རོགས་སྐྱོར་བྱེད་ཤུགས་སྔར་བས་ཆེ་རུ་གཏོང་དགོས། བདེ་ཆེན་ཁུལ་གྱིས་ནུས་ཤུགས་ཡོད་རྒུས་ཞབས་ཞུའི་འགན་ལེན་ལས་དོན་ཡག་པོ་སྒྲུབ་སྟེ། རང་འགུལ་ངང་དགོས་མཁོ་དང་སྦྲེལ་མཐུད་བྱེད་པ་དང་ལས་ཀའི་འགན་འཁྲི་ནན་དུ་བཏང་ནས། ནུས་ཤུགས་ཡོད་རྒུས་མཉམ་ལས་བྱེད་པའི་དོན་ཚན་ཁག་དོན་འཁྱོལ་བྱེད་པར་སྐུལ་འདེད་གཏོང་རྒྱུ་ཡིན་ཞེས་སྟོན། ཕྱོགས་གཉིས་ཀས་ཐེངས་འདིའི་བཞུགས་མོལ་དེ་འགོ་འཛུགས་ས་གསར་པར་བརྩིས་ནས།རང་ཉིད་ཀྱི་ལེགས་ཆ་འདོན་སྤེལ་དང་གཉིས་ཁེ་གཉིས་ཕན་ཡོང་བ་བྱས་ཏེ། ལག་གདང་སྦྲེལ་ནས་སློབ་གྲྭ་དང་ས་གནས་བར་གྱི་མཉམ་ལས་ལ་གྲུབ་འབྲས་སྔར་ལས་ཆེན་པོ་ཐོབ་པར་སྐུལ་འདེད་བཏང་ནས། བདེ་ཆེན་ཡུན་རིང་བདེ་འགོད་དང་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱེད་དགོས་པའི་རེ་བ་བཏོན།

ཀྲོའུ་ཞུའེ་པིན་གྱིས་ལུའོ་ཁྲའོ་ཧྥེང་དང་བཅས་པ་ཕེབས་པར་སྤྲོ་སེམས་འཁོལ་བའི་དགའ་བསུ་ཞུས་པ་དང་བདེ་ཆེན་ཁུལ་གྱིས་དུས་ཡུན་རིང་པོའི་ནང་ཡུན་ནན་སློབ་ཆེན་གྱི་“རྩེ་གྲས་གཉིས་”འཛུགས་སྐྲུན་དང་སྤུས་ཚད་མཐོ་བའི་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར། རོགས་རམ་བྱེད་པར་ཐུགས་རྗེ་ཆེ་ཞུས། ཁོང་གིས། མཐའ་མཚམས་མི་རིགས་ས་ཁུལ་གྱི་འཕེལ་རྒྱས་ལ་ཞབས་འདེགས་ཞུ་བ་ནི་ཡུན་ནན་སློབ་ཆེན་གྱི་ཆབ་སྲིད་ཀྱི་འགན་འཁྲི་ཡིན་པས། ཕྱོགས་གཉིས་ཀའི་མཛའ་གྲོགས་ཀྱི་ལོ་རྒྱུས་ཡུན་རིང་ལྡན་པ་དང་མཉམ་ལས་ཀྱི་རྨང་གཞི་བརྟན་པོ་ལྡན། ཡུན་ནན་སློབ་ཆེན་གྱིས་མཉམ་ལས་ལམ་སྲོལ་སྔར་བས་འཐུས་སྒོ་ཚང་དུ་གཏོང་བ་དང་། ལོ་འཁོར་གྱི་ལས་ཀའི་འཆར་གཞི་ཞིབ་ཚགས་སུ་བཏང་ནས། མཉམ་ལས་ཀྱི་ཕན་འབྲས་ཆེ་རུ་གཏོང་རྒྱུ། མི་རིགས་མཐུན་སྒྲིལ་ཡར་ཐོན་དང་སྐྱེ་ཁམས་དཔལ་ཡོན་འཛུགས་སྐྱོང་། ཡུལ་སྐོར་འཕེལ་རྒྱས། སློབ་གསོ་སྨན་བཅོས་སོགས་ཁྱབ་ཁོངས་སུ་གནད་སྨིན་ཤུགས་འདོན་བྱས་ཏེ། ཚན་རིག་ཞིབ་འཇུག་གི་གྲུབ་འབྲས་བདེ་ཆེན་དུ་དོན་འཁྱོལ་བྱེད་པར་སྐུལ་འདེད་མགྱོགས་སུ་གཏོང་སྟེ། བྱ་སྤྱོད་དངོས་ཀྱི་ཐོག་ནས་བདེ་ཆེན་གྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱས་ཡོད་ཅེས་བསྟན།

ཚོགས་འདུ་མ་འཚོགས་སྔོན། ལུའོ་ཁྲའོ་ཧྥེང་དང་བཅས་པས་ཡུན་ནན་སློབ་ཆེན་གྱི་སློབ་གྲྭའི་ལོ་རྒྱུས་ཁང་དུ་ལྟ་སྐོར་བྱས་ཏེ། ཡུན་ནན་སློབ་ཆེན་གྱི་ལོ་བརྒྱའི་སློབ་གཉེར་ལོ་རྒྱུས་དང་རིག་ཚན་འཛུགས་སྐྱོང་། ཚན་ཞིབ་གྲུབ་འབྲས། ཤེས་ལྡན་མི་སྣ་གསོ་སྐྱོང་སོགས་ཀྱི་གནས་ཚུལ་ཤེས་རྟོགས་ཞིབ་ཕྲ་བྱས།

ཁུལ་གྱི་འགོ་ཁྲིད་ཀྲུའུ་ཧུང་དང་ཞུས་ཀོང་ཏེ། ཡུན་ནན་སློབ་ཆེན་གྱི་འགོ་ཁྲིད་ཀྲང་ཝེ། ཝུའུ་ཅན་ཏེ། ཝང་ཨའེ་ཕིང་། ཏོན་ཤིན་ཝུའུ། ཕེང་ཡུན་ཀྲུའུ་བཅས་ཚོགས་འདུར་ཞུགས།