ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་27ཉིན་གློག་འཕྲིན་འབྱོར་གསལ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཞི་ཅིན་ཕིང་གི་དམག་དཔུང་སྟོབས་ཆེའི་དགོངས་པ་བསླབ་གཞིར་འགོད་པ་དང་། སློབ་ཁང་ནང་ཁྲིད་པ། སེམས་ལ་ཟུག་པ་བཅས་ལ་དེ་བས་སྐུལ་འདེད་གཏོང་བ། སྤྱོད་བཟང་ལ་བརྟེན་ནས་མི་གསོ་སྐྱོང་དང་དམག་རྒྱག་ལ་དམག་མི་གསོ་སྐྱོང་ཡག་པོ་བྱ་ཆེད། ཀྲུང་དབྱང་དམག་ཨུད་ཆབ་སྲིད་ལས་དོན་པུས《ཞི་ཅིན་ཕིང་གི་དམག་དཔུང་སྟོབས་ཆེའི་དགོངས་པ་རགས་བཤད》（གཤམ་དུ《རགས་བཤད》ཅེས་བསྡུ་རྒྱུ）སྒྲིག་འཛུགས་བྱས་ནས་རྩོམ་སྒྲིག་བྱས་པ་དེ་བཅིངས་འགྲོལ་དམག་དཔེ་སྐྲུན་ཁང་གིས་དཔེ་སྐྲུན་འགྲེམས་སྤེལ་བྱས་པ་རེད།

  《རགས་བཤད》ནི་ཞི་ཅིན་ཕིང་གི་དམག་དཔུང་སྟོབས་ཆེའི་དགོངས་པ་ཕྱོགས་ཡོངས་དང་བརྒྱུད་རིམ་ལྡན་པའི་ངང་འཆད་འགྲེལ་བྱས་པའི་གཅིག་གྱུར་རྩོམ་སྒྲིག་གི་བསླབ་གཞི་ཞིག་དང་། དམག་དཔུང་སློབ་གླིང་དང་སློབ་གྲྭའི་ཆབ་སྲིད་རིགས་པའི་གཞུང་ལུགས་སློབ་ཚན་གྱི་དབང་གྲགས་ལྡན་པའི་དཔེ་དེབ་ཅིག དུས་རབས་གསར་པའི་ཏང་གི་དམག་དོན་མཛུབ་ཁྲིད་རིགས་པའི་གཞུང་ལུགས་མ་ལག་ཅན་དང་རིགས་ལམ་ཅན་གྱི་ཞིབ་འཇུག་ལ་སྐུལ་འདེད་གཏོང་བའི་གྲུབ་འབྲས་གལ་ཆེན་ཞིག་བཅས་རེད།

  《རགས་བཤད》རྩོམ་འབྲི་དང་། དཔེ་སྐྲུན། བེད་སྤྱོད་བཅས་བྱེད་པ་ནི་ཞི་ཅིན་ཕིང་གི་དམག་དཔུང་སྟོབས་ཆེའི་དགོངས་པར་དེ་བས་ལེགས་པར་བརྟེན་ནས་བློ་སྦྱོང་བསླབ་སྐྱོང་དང་གཞོན་ནུ་དཔོན་དམག་ཚོར“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པར་ཁྲིད་སྟོན། ཏང་གི་བཀོད་འདོམས་ལ་ཉན་པ་དང་འབད་འཐབ་ཆེན་པོས་དམག་དཔུང་སྟོབས་ཆེར་གཏོང་བའི་བསམ་བློ་ཆབ་སྲིད་ཀྱི་རྨང་གཞི་བརྟན་དུ་བཏང་སྟེ། དམག་དཔུང་སྟོབས་ཆེར་གཏོང་བའི་འགན་འཁྲི་ལྕི་པོ་འཁུར་བའི་དུས་རབས་ཀྱི་མི་གསར་ཞིག་ཏུ་ཧུར་ཐག་འགྱུར་བར་བྱེད་པའི་ངོས་ནས་བརྗོད་ན་དོན་སྙིང་གལ་ཆེན་ལྡན་ཡོད།  《རགས་བཤད》ནི་གླེང་གཞི་དང་། ལེའུ་15ཡོད་པའི་ནང་དོན་གཙོ་བོ། མཇུག་བསྡུའི་གཏམ་བཅས་ལས་གྲུབ་ཅིང་། དེའི་ནང་ཏང་གི་དམག་དོན་མཛུབ་ཁྲིད་ཀྱི་རིགས་པའི་གཞུང་ལུགས་གསར་གཏོད་དང་འཕེལ་རྒྱས་ཀྱི་གྲུབ་འབྲས་གསར་ཤོས་དང་། ལྷག་པར་དུ་མར་ཁེ་སི་རིང་ལུགས་ཀྱི་དམག་དོན་རིགས་པའི་གཞུང་ལུགས་འཕེལ་རྒྱས་གཏོང་བར་གསར་རྩོམ་རང་བཞིན་གྱི་ལེགས་སྐྱེས་ཕུལ་བ་ཕྱོགས་ཡོངས་ནས་མཚོན་པར་བྱས་པ་དང་། ཞི་ཅིན་ཕིང་གི་དམག་དཔུང་སྟོབས་ཆེའི་དགོངས་པས་དམག་དཔུང་སྟོབས་ཆེར་གཏོང་བའི་ལག་ལེན་ལ་ཁྲིད་སྟོན་བྱས་པར་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་དང་ལོ་རྒྱུས་རང་བཞིན་གྱི་འཕོ་འགྱུར་མཚོན་པར་བྱས་ཡོད། 《རགས་བཤད》དེ་མ་རྩོམ་དང་། མ་ཡིག མ་དོན་བཅས་དང་མཐུན་པ་དང་། སློབ་ཁྲིད་ཀྱི་ཕྱོགས་སྟོན་དང་ལག་ལེན་གྱི་སྟོན་ཕྱོགས་འབུར་དུ་ཐོན་པ། རྒྱུ་མཚན་དང་། རིགས་ལམ། གནས་ལུགས་བཅས་ལ་འགྲེལ་བཤད་གཏིང་ཟབ་བརྒྱབ་པ། དུས་རབས་གསར་པའི་ཏང་གི་དམག་དཔུང་སྟོབས་ཆེའི་དམིགས་ཚད་མངོན་འགྱུར་དང་མི་དམངས་དམག་དཔུང་དེ་ཉིད་ཕྱོགས་ཡོངས་ནས་འཛམ་གླིང་གི་དམག་དཔུང་རྩེ་གྲར་སྐྲུན་དགོས་པའི་བཀོད་སྒྲིག་བླང་བྱ་གསལ་བཤད་བྱས་ཡོད་པས། ཞི་ཅིན་ཕིང་གི་དམག་དཔུང་སྟོབས་ཆེའི་དགོངས་པ་གང་དེ་དམག་དཔུང་འཛུགས་སྐྱོང་གི་ལོ་བརྒྱའི་འབད་འཐབ་དམིགས་ཚད་ཀྱི་འགག་སྒྲོལ་དམག་འཐབ་ཡག་པོ་རྒྱག་པ་དང་དུས་རབས་གསར་པའི་དམག་དཔུང་སྟོབས་ཆེའི་བྱ་གཞག་ལ་སྐུལ་འདེད་གཏོང་བའི་སྟོབས་ཤུགས་ཆེན་པོར་འགྱུར་བར་ཕན་ཐོགས་ཆེན་པོ་ཡོད།