ཟླ་5ཚེས་23ཉིན།2025ནས་2026ལོའི་ཧྥུའུ་ཏན་དངུལ་ཁང་ཡུན་ནན་ཞིང་ཆེན་གྲོང་ཁྱེར་རྐང་རྩེད་སྤོ་ལོའི་མཉམ་འབྲེལ་འགྲན་བསྡུར་གྱི་སྐོར་ཐེངས་བཅུ་བཞི་པའི་གནད་འགག་གི་འགྲན་བསྡུར་བསུས་ཡོང་ལ། བདེ་ཆེན་རུ་ཁག་གིས་འགྲུལ་ཕྱོགས་ནས་ཕུའུ་ཨར་རུ་ཁག་ལ་འགྲན་སློང་བྱས། ཐེངས་འདིའི་འགྲན་བསྡུར་ནི་དུས་རིམ་རྗེས་མའི་འགྲན་བསྡུར་ལ་ཞུགས་ཐུབ་མིན་གྱི་ཐག་གཅོད་རང་བཞིན་གྱི་འགྲན་བསྡུར་ཞིག་ཡིན་པས། བདེ་ཆེན་རུ་ཁག་གིས་ཞུམ་མེད་ཀྱི་བློ་སྟོབས་དང་ངོ་མཚར་གྱི་རྩལ་ནུས་ལ་བརྟེན་ནས་སྐར་མ་90ཡི་ཛ་དྲག་གི་འགྲན་བསྡུར་བརྒྱུད། མཐར་བསྡུར་གྲངས་2：1གི་ཐོག་ནས་འགྲན་ཡ་ལས་རྣམ་པར་རྒྱལ་ལ་རིན་ཐང་བྲལ་བའི་སྐར་མ་3བླངས་ཏེ་བདེ་ལེགས་ངང་འགྲན་རིམ་རྗེས་མའི་ནང་ཞུགས་ཐུབ་པ་བྱུང་།

འགྲན་སྟོད་དུ་རང་ཕྱོགས་ན་འགྲན་ཞུགས་བྱས་ཡོད་པའི་ཕུའུ་ཨར་རུ་ཁག་གིས་བཙན་རྒོལ་དྲག་པོ་བྱས་ཤིང་། ཕྱོགས་གཉིས་ནས་འཇབ་རྒོལ་དང་དཀྱིལ་རའི་ནང་འཕྲོག་བརྩོད་དྲག་པོ་བྱས་ནས་ཉེན་ཁ་མང་བོ་བཟོས། འོན་ཀྱང་བདེ་ཆེན་རུ་ཁག་གི་འགོག་སྲུང་མ་ལག་བརྟན་པོ་ཡིན་པ་དང་།རྒྱབ་ཕྱོགས་ཀྱི་འགོག་སྲུང་མཐུན་སྦྱོར་མ་གྲོས་གཅིག་མཐུན།སྒོ་སྲུང་བས་རྩལ་ནུས་གང་ཡོད་འདོན་པས་ཉེན་ཁའི་གནས་ཚུལ་ཐེངས་མང་སེལ་བས།ཕ་རོལ་བའི་ཚད་མཐོ་བའི་ཕར་རྒོལ་བཀག་ཐུབ་སོང་།འགྲན་བསྡུར་གྱི་སྐར་མ་34བར་བདེ་ཆེན་རུ་ཁག་གི་ལུའུ་ཀྲུན་ཡུའུ་ཡིས་གོ་སྐབས་བཟང་བོ་དམ་འཛིན་བྱས་ནས་སྤོ་ལོ་གཅིག་བསྡུས་ཤིང་། བདེ་ཆེན་རུ་ཁག་གིས་བསྡུར་ཚད་1:0གིས་སྔོན་ལ་ཤོར་ལ།ལེགས་ཆ་འགྲན་རིམ་དང་པོའི་བར་དུ་རྒྱུན་འཁྱོངས་བྱས།

འགྲན་རིམ་རྗེས་མ་འགོ་བརྩམས་རྗེས།ཕུའུ་ཨར་རུ་ཁག་གིས་མགྱོགས་མྱུར་གྱིས་འགྲན་བསྡུར་གྱི་བཀོད་སྒྲིག་ལེགས་སྒྲིག་བྱས་ཤིང་།ཕར་རྒོལ་དྲག་པོ་བྱས་པ་རྒྱུན་འཁྱོངས་བྱས་ནས།བདེ་བླག་ངང་སྤོ་ལོ་གཅིག་བསྡུས་ལ་སྤོ་ལོའི་བསྡུར་གྲངས་དེ་1：1བྱས་ནས་ཕྱིར་འདྲ་མཉམ་གྱི་ཚད་ཐིག་སྟེང་ཡོང་བ་བྱས་པས། འགྲན་རའི་གནས་བབ་ཡང་བསྐྱར་ཁྱོད་བརྒོལ་ང་འགོག་གི་ཛ་དྲག་གི་གནས་སུ་ལྷུང་།སྐར་མའི་བསྡུར་གྲངས་འདྲ་མཉམ་བྱུང་རྗེས།ཕྱོགས་གཉིས་ཀྱི་འགྲན་རྒོལ་ཤུགས་ཚད་མུ་མཐུད་དུ་ཇེ་ཆེར་ཇེ་དྲག་ཏུ་གྱུར་ལ།རྒོལ་འགོག་མྱུར་ཚད་ཇེ་མགྱོགས་སུ་བཏང་སྟེ།རུ་ཁག་གཉིས་ཀས་ནུས་ཤུགས་ཡོད་རྒུས་འགྲན་ཡའི་འགོག་སྲུང་འཛིང་རགས་གཏོས་ཐབས་བྱས་པ་རེད།

ཐེངས་འདིའི་འགྲན་བསྡུར་ལ་རྒྱལ་ཁ་ཐོབ་པར་རིན་ཐང་ཧ་ཅང་མཐོ་པོ་ཡོད་པ་དེ།བདེ་ཆེན་རུ་ཁག་གིས་ཛ་དྲག་གི་འགྲན་བསྡུར་ལ་གདོང་གཏད་ཕོད་པ་དང་བརྒོལ་ལན་དྲག་པོར་མི་སྐྲག་པའི་རྩལ་འགྲན་གྱི་རྣམ་པ་མངོན་ཡོད་ལ།སྤོ་ལོ་རུ་ཁག་ཡུན་ནན་ཚད་མཐོའི་དུས་རིམ་རྗེས་མའི་འགྲན་བསྡུར་ནང་བདེ་བླག་ངང་ཞུགས་རྒྱུར་གྲུབ་འབྲས་ཐོབ་པའི་ངང་རམ་འདེགས་ཐུབ་ནས་འགྲན་བསྡུར་གྱི་རྗེས་མཐུད་རྒྱང་སྐྱོད་ལམ་བུར་ངར་ཤུགས་དང་ཡིད་ཆེས་ཆེན་པོ་སྦྱིན་ཡོད།