ཉེ་བའི་ལོ་ཤས་རིང་།　བདེ་ཆེན་ཁུལ་གྱིས་སྐྱེ་ཁམས་སྲུང་སྐྱོང་ནན་མོ་བྱེད་པའི་སྔོན་འགྲོའི་ཆ་རྐྱེན་འོག　གང་ལེགས་སྒོས་ཕུན་སུམ་ཚོགས་པའི་ནགས་ཚལ་དང་ཕྱི་རོལ་གྱི་ཐོན་ཁུངས་ལ་བརྟེན་ནས།　རིར་འཛེག་ནས་རྐང་ཐང་མར་སྐྱོད་པ་དང་།　ཚན་རིག་རྟོག་དཔྱོད་དང་ཞིབ་འཇུག་སློབ་སྦྱོང་།　སོས་དལ་ལུས་གསོ་སོགས་ཀྱིས་མཚོན་པའི་ནགས་ཁྲོད་ལུས་གསོའི་ཡུལ་སྐོར་གྱི་ལས་རྣམ་གསར་པ་སྐྱེད་སྲིང་ཧུར་ཐག་བྱས་ཏེ་སྐྱེ་ཁམས་ཀྱི་ལེགས་ཆ་དེ་འཕེལ་རྒྱས་ཀྱི་ལེགས་ཆར་འགྱུར་རྒྱུར་སྐུལ་འདེད་བཏང་བ་དང་མང་ཚོགས་ལ་འབབ་འཕར་ཡོང་རྒྱུར་སྐུལ་ཁྲིད་བྱས་པས་སྐྱེ་ཁམས་སྲུང་སྐྱོང་དང་དཔལ་འབྱོར་འཕེལ་རྒྱས་གཉིས་ཁེ་བྱུང་བ་རེད།

ཉེ་བའི་ལོ་ཤས་རིང་།　བདེ་ཆེན་ཁུལ་གྱིས་ཐུན་མོང་མ་ཡིན་པའི་ཕྱི་རོལ་གྱི་ཡུལ་སྐོར་ཐོན་ཁུངས་ལ་བརྟེན་ནས་ནགས་ཁྲོད་ཡུལ་སྐོར་གྱི་ལས་རྣམ་གསར་པ་ཟམ་མི་ཆད་པར་འཕེལ་རྒྱས་བཏང་།　རྨང་གཞིའི་སྒྲིག་བཀོད་མུ་མཐུད་འཐུས་ཚང་གཏོང་བ་དང་།　སྲིད་ཇུས་མ་ལག་འཛུགས་པ་དང་འཐུས་ཚང་དུ་གཏོང་བ།　ཕྱི་རོལ་ལུས་རྩལ་ཚོགས་ཆེན་ཇུས་འགོད་ཞིབ་ཚགས་བྱེད་པ་སོགས་རིམ་པ་མཐོ་བ་དང་ཁྱབ་ཁོངས་ཆེ་བའི་སྤེལ་རེས་སྟེགས་བུ་སྐྲུན་ནས།བདེ་ཆེན་གྱི་ཕྱི་རོལ་ལུས་རྩལ་ཐོན་ཁུངས་ཕྱོགས་ཡོངས་ནས་འགྲེམས་སྟོན་བྱེད་པ་སོགས་ཁྱད་ལྡན་འགྲན་བསྡུར་གཏོད་ནས།　ནུས་ཤུགས་ཡོད་རྒུས་ཞབས་ཞུའི་འགན་ལེན་ལེགས་སུ་བཏང་སྟེ་འཕེལ་རྒྱས་ཀྱི་བར་མཐོངས་ཟམ་མི་ཆད་པར་ཆེ་རུ་བཏང་བ་རེད།

མཛེས་ལྗོངས་ཁུལ་གྱི་ཁོར་ཡུག་ལ་སྲུང་སྐྱོང་དང་།　ཚད་ལྡན་དོ་དམ་དང་རྒྱུན་མཐུད་འཕེལ་རྒྱས་མངོན་འགྱུར་བྱ་ཆེད།　བདེ་ཆེན་ཁུལ་གྱིས་དཀར་ནག་ཐལ་མདོག་ཅེས་པའི་མིང་ཐོ་དོ་དམ་ལག་བསྟར་བྱས་ཏེ།　སྟག་མཆོང་གྲོག་རོང་གི་རིམ་པ་མཐོ་བའི་གཞུང་ལམ་དང་།　ཨ་པུའུ་ཅི་མཚོ་སོགས་མིང་གྲགས་ཆེ་བའི་ཕྱི་རོལ་ལུས་རྩལ་ལམ་ཐིག་20ལྷག་ཚད་ལྡན་ཅན་དུ་འཛུགས་སྐྲུན་བྱེད་པའི་ཆུ་ཚད་མཐོར་འདེགས་ནུས་ལྡན་བཏང་བ་དང་།　ནགས་ཚལ་མཛེས་ལྗོངས་མུའུ་ཁྲི་50.67བེད་སྤྱོད་ནུས་ལྡན་བྱས་ཡོད།　ཁུལ་ཡོངས་ཀྱིས་སྡེ་ཁུལ་དང་མཉམ་སྐྲུན་མཉམ་དར་མཉམ་སྤྱོད་ཅེས་པའི་མཉམ་འདྲེས་འཕེལ་རྒྱས་གཏོང་སྟངས་རྒྱུན་འཁྱོངས་བྱས་ཏེ།　མཛེས་ལྗོངས་ཁུལ་དང་།　ཚོགས་སྤྱི།　ཞིང་དུད་བཅས་ཟུང་དུ་འབྲེལ་བའི་ཡུལ་སྐོར་ལ་བརྟེན་ནས་ཞིང་སྐྱོར་འབབ་འཕར་ལམ་སྲོལ་གསར་གཏོད་བྱས།

མིག་སྔར།　ལོ་ལྟར་བདེ་ཆེན་དུ་རྐང་ཐང་མར་སྐྱོད་པ་དང་།　རིར་འཛེག་པ།　པར་ལེན་པ་སོགས་ཕྱི་རོལ་གྱི་ལུས་རྩལ་ནང་ཞུགས་མཁན་མི་ཐེངས་ཁྲི་600ལས་བརྒལ་བ་དང་།　2024ལོར་ཁུལ་ཡོངས་སུ་ཞིབ་འཇུག་སློབ་སྦྱོང་ཡུལ་སྐོར་ཁག་ཐེངས་159ཡི་ཡུལ་སྐོར་བ་མི་ཐེངས་ཁྲི་1.37དང་ལེན་བྱས་ཡོད་པ་རེད།

གོམ་སྟབས་རྗེས་མར།　བདེ་ཆེན་ཁུལ་གྱིས་བདེ་ཆེན་གྱི་སྐྱེ་ཁམས་ཁོར་ཡུག་ལ་རྒྱུན་མཐུད་སྲུང་སྐྱོང་ཡག་པོ་བྱེད་པ་དང་ཆབས་ཅིག　རྐང་ཐང་མར་སྐྱོད་པའི་ལམ་ཐིག་རྩེ་གྲ་གསར་སྤེལ་དང་།　སྤུས་ཚད་མཐོ་བའི་ཕྱི་རོལ་ལུས་རྩལ་གྱི་དམིགས་ས་སྐྲུན་པ།　ནགས་ཁྲོད་ཡུལ་སྐོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ་ནགས་ཁྲོད་ཡུལ་སྐོར་གྱི་འཛད་སྤྱོད་དགོས་མཁོ་གསར་པ་ཟམ་མི་ཆད་པར་བསྐངས་ནས་མང་ཚོགས་ཀྱི་འཚོ་བ་ཉིན་རེ་ལས་ཉིན་རེར་ཇེ་ལེགས་ཇེ་བཟང་གཏོང་རྒྱུ་རེད།