ཐེངས་གཉིས་པར་ལེན་བྱེད་པའི་དུས་ཚོད་བར་ཐག་ནི་ལོ་གཅིག་ཡིན་པ་དང་། ཐེངས་དང་པོར་ཐོ་འགོད་བྱེད་པའི་དུས་ཚོད་ནི་2024ལོའི་ཟླ་9ཚེས་23ཉིན་ཡིན། ཐེངས་གཉིས་པའི་ཐོ་འགོད་བྱེད་པའི་དུས་ཚོད་ནི་2025ལོའི་ཟླ་9ཚེས་22ཉིན་ཡིན། ཐེངས་གཉིས་པར་པར་ལེན་ཐུབ་པའི་དོམ་འདི་སྟག་མ་ཤིང་སྡོང་ཡོད་སའི་ནགས་ཚལ་དུ་འཆམ་འཆམ་དུ་འགྲོ་བཞིན་པར་མཐོང་།

དོམ་ནི་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་གཙོ་བོ་བྱེད་པའི་རི་སྐྱེས་སྲོག་ཆགས་ཤིག་ཡིན་པ་དང་། སྐྱེ་ཁམས་མ་ལག་གི་འགག་རྩའི་སྲོག་ཆགས་རིགས་ཤིག་ཡིན་པས། འགུལ་སྐྱོད་གནས་ཚུལ་དེས་ས་ཁོངས་ཀྱི་སྐྱེ་ཁམས་སྤུས་ཚད་ཐད་ཀར་མཚོན་ཡོད་པ་དང་། བསྟུད་མར་ལོ་གཉིས་རིང་ཟིན་ཐོ་གསལ་པོ་འགོད་ཐུབ་པ་དེས་དོམ་དེ་ས་ཁོངས་དེར་བརྟན་པོའི་ངང་གནས་པ་ར་སྤྲོད་ཐུབ་པ་མ་ཟད། ས་གནས་དེ་གའི་དོམ་ལ་ལྟ་ཞིབ་ཚད་ལེན་བྱེད་པའི་སྟོང་ཆ་བསྐངས་ནས། སྐྱེ་དངོས་སྣ་མང་རང་བཞིན་སྲུང་སྐྱོང་དང་སྐྱེ་ཁམས་དཔྱད་དཔོག་ལ་འགག་རྩའི་དངོས་དཔང་མཁོ་འདོན་བྱས།

དཔག་སྨད་སྤྱི་ཕན་སྲུང་སྐྱོང་ཁུལ་དེ་ཡུན་ལིན་རི་རྒྱུད་ཀྱི་ལྷོ་ངོས་ཡུན་ནན་ཞིང་ཆེན་བདེ་ཆེན་ཁུལ་འཇོལ་རྫོང་ཧྥོ་ཧྲན་ཤང་དཔག་སྨད་གྲོང་ཚོ་རུ་གནས་ཡོད་པ། འདི་ནི་བདེ་ཆེན་ཁུལ་གྱི་སྤྱི་ཕན་སྲུང་སྐྱོང་ཁུལ་དང་པོ་ཡིན་པ་དང་སྤྱིའི་རྒྱ་ཁྱོན་སྤྱི་ལེ་ངོས་གྲུ་65ཟིན། ས་ཁོངས་འདིར་ཡུན་ནན་སྤྲེལ་ཁྲ་（དཔག་སྨད་ཁྱུ་ཚོགས）150ལྷག་ཡོད་པས། སྐྱེ་དངོས་སྣ་མང་རང་བཞིན་ཕུན་སུམ་ཚོགས་པོ་ཡོད། དེའི་སྔོན་ཡུན་ནན་སྤྲེལ་ཁྲ་དང་གསའ་སོགས་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོང་སྲོག་ཆགས་གཙོ་བོ་ལ་ལྟ་ཞིབ་ཚད་ལེན་ཐུབ་ཡོད། དུས་རིམ་རྗེས་མར། སྲུང་སྐྱོང་ཁུལ་གྱིས་དམར་ཕྱིའི་པར་ཆས་ཀྱི་ལྟ་ཞིབ་ཚད་ལེན་དང་སྐྱེ་ཁམས་སྲུང་སྐྱོང་བྱེད་ཤུགས་མུ་མཐུད་ཆེ་རུ་བཏང་སྟེ་ས་ཁོངས་ཀྱི་སྐྱེ་ཁམས་བདེ་འཇགས་སྲུང་སྐྱོང་བྱ་རྒྱུ་རེད།