བདེ་ཆེན་ཁུལ་ཧུའུ་ནན་ཚོང་ཚོགས་དང་། པའོ་ཧྲན་ཚོང་ཚོགས། ཧོ་ནན་ཚོང་ཚོགས། ཧྥུ་ཅན་ཚོང་ཚོགས། བུད་མེད་ཁེ་ལས་པའི་ཚོང་ཚོགས། ཞིང་ལས་ཁྱད་ལྡན་ཐོན་ལས་ཚོང་ཚོགས།རིག་གནས་ཡུལ་སྐོར་ཚོང་ཚོགས།རྡོ་མཁར་རྫོང་ཚོང་ཚོགས། གཞོན་ནུའི་ལས་གཏོད་ལས་ཞུགས་མཐུན་ཚོགས་བཅས་ཁུལ་ཁོངས་གཏོགས་ཀྱི་ཚོང་ཚོགས་དང་མཐུན་ཚོགས་9ཡི་འབྲེལ་ཡོད་འགན་འཁུར་བས་སྔ་རྗེས་སུ་གཏམ་བཤད་བྱས་ནས་རྣམ་གྲངས་འཛུགས་སྐྲུན་གཉེར་སྐྱོང་དང་།ལས་རིགས་འཕེལ་རྒྱས།ཁེ་ལས་གཉེར་སྐྱོང་སོགས་ཀྱི་གནས་ཚུལ་ངོ་སྤྲོད་ཞིབ་ཕྲ་བྱས་པ་དང་འབྲེལ་ཐོན་ལས་སྤུས་ཚད་མཐོར་གཏོང་དང་།ལས་རྣམ་གསར་གཏོད།ཞབས་ཞུ་ལེགས་གཏོང་སོགས་ལ་དམིགས་ནས་དགེ་མཚན་ལྡན་པའི་བསམ་འཆར་དང་གྲོས་འགོ་བཏོན་པ་རེད། ལུའོ་ཁྲའོ་ཧྥེང་གིས་ནན་ཏན་གྱིས་ཉན་ཞིང་ཞིབ་ཕྲའི་ཟིན་བྲིས་བཀོད་པ་དང་།སྐབས་འགར་ཚང་མ་དང་མཉམ་དུ་བགྲོ་གླེང་བྱས་ནས། ཁེ་ལས་ཀྱིས་ཚུར་སྣང་བྱས་པའི་དཀའ་ངལ་གནད་དོན་དང་རེ་བ་དང་བསམ་འཆར་བཏོན་རིགས་ལ་རེ་རེ་བཞིན་བརྡ་ལན་སྤྲོད་པ་དངཡུལ་དངོས་སུ་སྒྲུབ་འགན་སྤྲོད་པ་མ་ཟད།ཁུལ་རིམ་པའི་འབྲེལ་ཡོད་སྡེ་ཁག་གིས་ནན་ཏན་སྒོས་གསལ་ཐོ་བཟོ་བ་དང་།དོན་ཚན་རེ་རེ་བཞིན་ཞིབ་འཇུག་བྱེད་པ། རྣམ་གྲངས་རེ་རེ་བཞིན་སྐུལ་སྒྲུབ་དང་།འཁོར་རྒྱུག་མེད་པར་དོན་འཁྱོལ་བཅས་བྱས་ཏེ།ཁེ་ལས་ཀྱི་རེ་འདུན་དག་ལས་ཀ་ལེགས་བཅོས་དང་འཕེལ་རྒྱས་ལ་རོགས་རམ་བྱེད་པའི་དོན་དངོས་ཀྱི་བྱེད་ཐབས་སུ་བསྒྱུར་བ་དང་།ནུས་ཤུགས་ཡོད་རྒུས་ཁྲོམ་རའི་གཙོ་གཞི་སྣ་ཚོགས་སྐྱོན་བྲལ་ངང་འཕེལ་རྒྱས་ཡོང་བར་འགན་སྲུང་བྱེད་དགོས་པའི་བླང་བྱ་བཏོན།

     ལུའོ་ཁྲའོ་ཧྥེང་གིས་ཁུལ་ཨུ་དང་ཁུལ་སྲིད་གཞུང་གི་ཚབ་ཞུས་ནས་ཚོང་ཚོགས་དང་མཐུན་ཚོགས་ཁག་གིས་དུས་ཡུན་རིང་པོའི་ནང་བདེ་ཆེན་དུ་གཞི་ཚུགས་པ་དང་།ལས་གནས་གཙོ་བོ་གཏིང་ཟབ་བཟུང་བ།ཞབས་ཞུ་འཕེལ་རྒྱས་བཏང་བ་བཅས་ལ་སྙིང་དབུས་ནས་ཐུགས་རྗེ་ཆེ་ཞུས་པ་རེད།ཁོང་གིས་ཁེ་ལས་པ་ཁྲོམ་རའི་འཐབ་ཕྱོགས་དང་པོར་གནས་ཡོད་པས།ལས་རིགས་ཀྱི་འཕེལ་ཕྱོགས་དང་ཁྲོམ་རའི་འགྱུར་ལྡོག་ལ་ཚོར་བ་སྐྱེན་ཤོས་དང་བསམ་གཞིག་གཏིང་ཟབ་བྱེད་ཀྱི་ཡོད།རྒྱ་ཆེའི་ཁེ་ལས་པས་ཐབས་དང་ཇུས་མུ་མཐུད་འདོན་པ་དང་ཐུན་མོང་མ་ཡིན་པའི་ལྟ་ཚུལ་བརྗོད་དེ་བདེ་ཆེན་འཕེལ་རྒྱས་ལ་ཐབས་དང་ཇུས་འདོན་རྒྱུའི་རེ་བ་ཡོད།ཚོང་ཚོགས་དང་མཐུན་ཚོགས་ཁག་གིས་སྲིད་ཁེ་འབྲེལ་མཐུད་ཀྱི་འབྲེལ་ཟམ་ནུས་པ་མུ་མཐུད་འདོན་སྤེལ་བྱེད་པ་དང་ནུས་ཆེའི་འབྲེལ་མཐུད་སྟེགས་བུ་བསྐྲུན་ནས་སྲིད་ཁེ་མཉམ་འགུལ་ཡག་པོའི་ཁྲོད་འཕེལ་རྒྱས་ཀྱི་ཐུན་མོང་ངོས་འཛིན་གཅིག་སྡུད་དང་མཐུན་སྦྱོར་ཤུགས་འདོན་ཁྲོད་གཉིས་ཕན་མཉམ་ཁེ་ཡོང་བར་སྐུལ་འདེད་གཏོང་རྒྱུའི་རེ་བ་ཡོད་ཅེས་བཤད་པ།

    ལུའོ་ཁྲའོ་ཧྥེང་གིས་ནན་གྱིས་བསྟན་དོན།རིམ་ཁག་སྡེ་ཚན་ཁག་གིས་ཚོང་གཉེར་ཁོར་ཡུག་མུ་མཐུད་ལེགས་སུ་གཏོང་བ་དང་།ཕན་ཡོད་ཁྲོམ་ར་དང་ནུས་ལྡན་སྲིད་གཞུང་ཟུང་འབྲེལ་བྱ་རྒྱུ་མཐའ་འཁྱོངས་བྱས་ཏེ“སྲིད་གཞུང་གིས་གཉེར་ཁུངས་བཙུགས་པ་དང་ཁེ་ལས་ཀྱིས་ལས་གཉེར་བྱེད་པའི”ཞབས་ཞུ་མུ་མཐུད་ཡག་པོ་བསྒྲུབ་དགོས།“ཁེ་ལས་པའི་མཚན་གཏམ”སོགས་ངོ་འཕྲད་སྤེལ་རེས་ཀྱི་ལམ་སྲོལ་རྒྱུན་གཏན་ཅན་དང་ལམ་ལུགས་ཅན་དུ་བསྒྱུར་བ་དང་། ཁེ་ལས་ཀྱི་དགོས་མཁོ་གནད་སྨིན་འབྲེལ་མཐུད་བྱེད་པ།“སྲིད་གཞུང་གིས་སྒྲུབ་ཐུབ་པར”གཞི་ཚུགས་པ་དང་“ཁེ་ལས་ཀྱི་དགོས་མཁོར”རོགས་རམ་བྱས་ནས་ཁྲིམས་དང་སྒྲིག་སྲོལ་ལྟར་ཁེ་ལས་ཀྱི་ལུགས་མཐུན་རེ་བ་ཐག་གཅོད་ནུས་ལྡན་བྱེད་དགོས།“ཕྱི་ནས་ནང་འདྲེན་”དང་“ནང་ནས་གསོ་སྐྱོང་”གཉིས་ལ་དམ་པོར་དམིགས་ནས་སྒོ་འབྱེད་རྣམ་པ་དང་བསྟུན་པ་དང་།བསྟུན་མཁས་ཀྱི་རྣམ་འགྱུར་ཐོག་ནས་ཁྲོམ་རའི་གྲུབ་ཆ་གཙོ་བོ་ཁག་འཕེལ་རྒྱས་དང་སྟོབས་ཆེར་འགྲོ་བ་དང་ལེགས་པོ་འཁྱོངས་པར་རྒྱབ་སྐྱོར་བྱེད་དགོས།དོ་དམ་དང་།ཚད་ལྡན།ཞབས་ཞུ་བཅས་ཀྱི་འགན་འཁྲི་ལག་བསྟར་ཏན་ཏིག་བྱེད་པ་དང་།རྩ་དོན་རང་བཞིན་དང་བབ་བསྟུན་རང་བཞིན་གཅིག་གྱུར་རྒྱུན་འཁྱོངས་བྱས་ཏེ།ཚོང་རའི་གྲུབ་ཆ་གཙོ་བོ་སྣ་ཚོགས་ཀྱི་ནང་སྐྱེའི་སྒུལ་ཤུགས་དང་གསར་གཏོད་ཀྱི་གསོན་ཤུགས་རྒྱུན་མཐུད་ངང་སྐུལ་སློང་བྱེད་དགོས།ཁེ་ལས་ཀྱིས་བདེ་ཆེན་གྱི་ཐོན་ཁུངས་ཀྱི་འབྱུང་ཁུངས་ལ་གཞི་ཚུགས་ནས་ཐོན་རྫས་མཁོ་སྤྲོད་རྒྱུན་མཐུད་ལེགས་སུ་གཏོང་བ་དང་།རིག་གནས་ཡུལ་སྐོར་འཛད་སྤྱོད་ཀྱི་ལས་རྣམ་གསར་པ་ཕུན་སུམ་ཚོགས་སུ་གཏོང་བ།ཐོན་ལས་འཕེལ་རྒྱས་ཀྱི་འབྲེལ་ཐག་རྒྱུན་མཐུད་ངང་རིང་དུ་གཏོང་བ།ཡུལ་སྐོར་བའི་འགྲུལ་རྒྱུན་དེ་འཛད་སྤྱོད་འཕར་ཚད་དུ་བསྒྱུར་རྒྱུར་ཕན་ནུས་ལྡན་པའི་ངང་སྐུལ་འདེད་གཏོང་བ་བཅས་བྱས་ཏེ་ཁུལ་ཡོངས་ཀྱི་རིག་གནས་ཡུལ་སྐོར་ཐོན་ལས་ཀྱི་འཁོར་འབྲེལ་ཧྲིལ་པོ་སྤུས་ཚད་མཐོ་རུ་དང་།ས་ཁོངས་ཧྲིལ་པོ་རིམ་སྤོར།སྤུས་ཚད་མཐོ་པོའི་ངང་འཕེལ་རྒྱས་འགྲོ་རྒྱུར་རོགས་རམ་བྱེད་དགོས་ཞེས་ནན་གྱིས་བསྟན།

    ཞུས་ཀོང་ཏེ་དང་དབྱང་ཞུའེ་ཝུན།ཡུས་ཡུང་ཧུང་།ཕན་ཞུའེ་དབྱིན་བཅས་དང་ཁུལ་རིམ་པའི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་ཞུགས་ཡོད་པ་རེད།