ཉེ་སྔོན།བདེ་ཆེན་ཁུལ་ཁྲོམ་ར་ལྟ་སྐུལ་དོ་དམ་ཅུས་ཀྱིས་དབྱར་གསེང་རིང་གི་ཡུལ་སྐོར་ཁྲོམ་རའི་ཆེད་དོན་བཅོས་སྒྲིག་བྱ་སྤྱོད་ཕྱོགས་ཡོངས་ནས་སྤེལ་འགོ་ཚུགས་པ།རྡོ་མཁར་རྫོང་དང་།སུམ་རྩེན་གླིང་།སྟག་མཆོང་གྲོག་རོང་སོགས་ལྟེ་བའི་མཛེས་ལྗོངས་ཁུལ་དང་མཐའ་འཁོར་གྱི་ཡུལ་སྐོར་བ་འདུ་འགྲེམས་ལྟེ་གནས་གཙོ་བོར་བྱས་ཏེ་ཡུལ་སྐོར་དང་འབྲེལ་བའི་ཁྲིམས་འགལ་སྒྲིག་འགལ་གྱི་བྱ་སྤྱོད་སྣ་ཚོགས་ཞིབ་བཤེར་ནན་པོ་བྱས་ནས་ཡུལ་སྐོར་བའི་ཁྲིམས་མཐུན་ཁེ་དབང་ནུས་ཤུགས་ཡོད་རྒུས་འགན་ལེན་བྱེད་པ།

ད་ཐེངས་ཀྱི་བཅོས་སྒྲིག་ནང་དབྱར་ཁའི་གུང་གསེང་རིང་གི་ཡུལ་སྐོར་ཞུ་གཏུག་དང་ལྟ་སྐུལ་དོ་དམ་གྱི་དཀའ་གནད་ལ་དམིགས་ནས་བཟའ་བཏུང་ཞག་སྡོད་དང་།ཁྱད་ལྡན་ཐོན་རྫས་ཚོང་ཁང་དང་སྒོ་རྩིས་ཚོང་ཁང་སོགས་ཀྱི་ལས་རྣམ་གཙོ་གནད་གྲལ་བཤེར་ཁྱབ་ཁོངས་ནང་འཇུག་པ།ཕྱོགས་གསུམ་ཐད་ཀྱི་གནད་དོན་བཅོས་སྒྲིག་ནན་པོ་བྱེད་དེ།རིན་གོང་གི་སྒྲིག་ལམ་ཐད་རིན་གོང་གི་ཆ་འཕྲིན་ཁ་གསལ་མེད་པ་དང་།ཟོག་གོང་ཧམ་སྤོར་བྱེད་པ།རིན་གོང་ཁ་བསླུས་རྒྱག་པ།བཙན་ཤེད་ངང་འཛད་སྤྱོད་བྱེད་དུ་འཇུག་པ་སོགས་ཀྱི་སྣང་ཚུལ་ལ་ཞིབ་བཤེར་ནན་པོ་བྱས།གཉེར་སྐྱོང་བྱ་སྤྱོད་ཐད་དྲིལ་བསྒྲགས་རྫུས་མ་དང་།ཉོ་སྒྲུབ་འཇམ་ཁྲིད།འཛད་སྤྱོད་བསྡམས་བཀྱིགས་སོགས་སྒྲིག་འགལ་བྱ་སྤྱོད་ལ་རྡུང་རྡེག་ཚ་ནན་བཏང་བ།བཟའ་བཅའི་བདེ་འཇགས་ཐད་དུས་ཚོད་ཡོལ་བ་དང་། “གསུམ་མེད་”རྫུས་ལྷད་ཞན་གསུམ་གྱི་བཟའ་བཅའ་བཅས་ལ་ཕྱོགས་ཡོངས་ནས་གཙང་བཤེར་བྱས་ཏེ་འབྱུང་རྩ་ནས་ཡུལ་སྐོར་འཛད་སྤྱོད་ཁོར་ཡུག་གཙང་བཟོ་བྱས།

ཁྲིམས་འཛིན་བྱེད་སྟངས་ཐད།ཁུལ་ཁྲོམ་ར་ལྟ་སྐུལ་དོ་དམ་ཅུས་ཀྱིས་རྒྱུན་གཏན་གྱི་སྐོར་ཞིབ་དང་འཕྲལ་སྡོམ་འཐེན་བཤེར་ཟུང་འབྲེལ་གྱི་བྱ་ཐབས་སྤྱད་དེ་ཡུལ་སྐོར་དང་འབྲེལ་བ་ཡོད་པའི་བྱེད་པོ་ཚང་མར་མཐིལ་རྟོགས་བྱས་པ།རིན་གོང་ཡོངས་བསྒྲགས་ཚད་ལྡན་མེད་པ་དང་ཐབ་ཚང་གི་འཕྲོད་བསྟེན་ཚད་གཞི་མ་ལོན་པ་སོགས་ཀྱི་གནད་དོན་ཆུང་གྲས་ལ་འཕྲལ་དུ་བཅོས་སྒྲིག་བྱེད་དགོས་པའི་བཀའ་བཏང་བ་དང་ཁྲིམས་ལུགས་ཁྱབ་གདལ་སློབ་གསོ་ཡང་ཞོར་དུ་བྱས།ཡུལ་སྐོར་བར་མགོ་སྐོར་གཏོང་བ་དང་ཚོང་ཟོག་རྫུས་མ་དང་སྤུས་ཞན་འཚོང་བ་སོགས་ཀྱི་ཁྲིམས་འགལ་བྱ་སྤྱོད་ཚབས་ཆེན་ལ་ཁྲིམས་ལྟར་ཞིབ་བཤེར་ཐག་གཅོད་ནན་པོ་བྱེད་པ་དང་དཔེ་མཚོན་གྱོད་གཞི་དམར་འདོན་བྱས་པ་བརྒྱུད་ཟིལ་གནོན་ནུས་ལྡན་ཐུབ་པ་བྱས།

ཁེ་དབང་སྲུང་སྐྱོང་གི་ལས་ཕྱོད་ཆེ་རུ་གཏོང་ཆེད།ཅུས་འདིས་“12315”ཡི་ཞུ་གཏུག་ཐེར་འདོན་གྱི་ཐབས་ལམ་སྔར་བས་ཤར་གཏོང་བྱས་པ་མ་ཟད།“ལག་ཐོགས་ཁ་པར་གཅིག་ལ་བརྟེན་ནས་ཡུན་ནན་དུ་ཡུལ་སྐོར་བྱེད་པ”སོགས་བློ་རིག་ལས་སྟེགས་ཐོག་མགྱོགས་མྱུར་དང་ལེན་གྱི་ཟླུམ་འཁོར་ལམ་སྲོལ་བཙུགས་ཏེ་ཡུལ་སྐོར་འཛད་སྤྱོད་རྩོད་གཞི་འཕྲལ་མར་ཐག་གཅོད་ཐུབ་པའི་འགན་ལེན་བྱས་ནས་ཡུལ་སྐོར་བར་བློ་བདེ་བའི་ཡུལ་སྐོར་ཁོར་ཡུག་ཅིག་མཁོ་འདོན་བྱས།

ཁུལ་ཁྲོམ་ར་ལྟ་སྐུལ་དོ་དམ་ཅུས་ཀྱིས་འབྲེལ་ཡོད་འགན་འཁུར་བས་གོམ་སྟབས་རྗེས་མར་དབྱར་གསེང་བཅོས་སྒྲིག་གི་དམ་བསྒྲགས་རྣམ་པ་མུ་མཐུད་རྒྱུན་འཁྱོངས་བྱས་ནས།གཙོ་གནད་ས་ཁོངས་དང་འཚང་ཁ་ཆེ་བའི་དུས་མཚམས་སུ་སྐོར་ཞིབ་ཐེངས་གྲངས་མང་དུ་གཏོང་རྒྱུ་དང་།དེ་དང་ཆབས་ཅིག་རིག་གནས་ཡུལ་སྐོར་དང་སྤྱི་བདེ་སོགས་སྡེ་ཚན་གྱི་ཁྲིམས་འཛིན་མཉམ་འགུལ་དང་ཁུངས་སྣེ་མཉམ་སྤྱོད་གཏིང་ཟབ་ཏུ་གཏོང་བ།ལས་རིགས་ཀྱི་རང་གཅུན་དང་ཡིད་རྟོན་ལྟ་སྐུལ་དོ་དམ་ལ་ཤུགས་སྣོན་རྒྱག་པ།བཅོས་སྒྲིག་དང་ཁྲིད་སྟོན་མཉམ་དུ་བྱ་རྒྱུ་མཐའ་འཁྱོངས་བཅས་བྱས་ནས་ཡུལ་སྐོར་གཉེར་སྐྱོང་གི་སྒྲིག་ལམ་རྒྱུན་མཐུད་དང་ཚད་ལྡན་དུ་གཏོང་རྒྱུ་ཞེས་བཤད།