ཟླ་མཆོད་གུང་གསེང་སྐབས།  སེམས་ཀྱི་ཉི་ཟླ་གྲོང་ཁྱེར་ཡང་ཐང་གྲོང་རྡལ་གྱི་རི་ཀླུང་ཀུན་ཏུ་རེ་ལྕག་མེ་ཏོག་རབ་ཏུ་བཞད་དེ།  མེ་ཏོག་དགའ་ཚལ་མཐོ་སྒང་གི་རྩྭ་ཐང་ཐོག་བཀྲམ་ཞིང་། གནམ་སྔོན་པོ་དང་སྤྲིན་དཀར་པོ།  གངས་རི་བཅས་དང་ཕན་ཚུན་འོད་མདངས་འཕྲོ་ནས་བརྗིད་ཆགས་ཡིད་དུ་འོང་བའི་མཐོ་སྒང་གི་སྟོན་ཁ་ཞིག་མངོན། ཉེ་ཆར། གསར་འགོད་པ་ཡང་ཐང་གྲོང་རྡལ་དུ་ཡུལ་དངོས་སུ་སྟོན་དུས་ཀྱི་མཛེས་ལྗོངས་ལ་ལྟ་བར་བསྐྱོད། 

 མཚོ་འཕགས་སྨི་སུམ་སྟོང་ལྷག་གི་རྩྭ་ཐང་ཐོག  རེ་ལྕག་མེ་ཏོག་རབ་ཏུ་བཞད་དེ། བསིལ་རླུང་ལྡང་བ་དང་བསྟུན་མེ་ཏོག་དལ་བུར་གཡོ་པ་དང་ནོར་ལུག་དལ་བུའི་མེ་ཏོག་ཁྲོད་དུ་བསྐྱོད་ནས།  མཐོ་སྒང་གི་ཁྱད་ཆོས་ལྡན་པའི་མཛེས་ལྗོངས་མངོན། མཛེས་སྡུག་ལྡན་པའི་མེ་ཏོག་དགའ་ཚལ་དེ་ཞིང་ཆེན་ཕྱི་ནང་གི་ཡུལ་སྐོར་བ་མང་པོ་དང་པར་རྒྱག་དགའ་མཁན་རྣམས་ལྟ་སྐོར་བྱས་ཡོང་བར་ཡིད་དབང་བཀུག་པ་དང་། ཚང་མས་འཆམ་འཆམ་དུ་བསྐྱོད་དེ་པར་ཆས་ཀྱིས་མཐོ་སྒང་གི་སྟོན་ཁ་ཐོ་འགོད་བྱེད། 

“དུས་རྒྱུན་དུ་སེམས་ཀྱི་ཉི་ཟླའི་སྟོན་ཁ་ཧ་ཅང་མཛེས་པོ་ཡོད་པ་གོ་བྱུང་། དེ་རིང་ཡང་ཐང་དུ་རེ་ལྕག་མེ་ཏོག་གི་དགའ་ཚལ་དངོས་སུ་མཐོང་སྐབས་ཧང་སངས་བྱུང་། རྩྭ་ཐང་ཡོངས་ནི་དམར་མདངས་བཀྲ་བའི་མེ་ཏོག་དགའ་ཚལ་ཡིན་པ་དང་མཐོང་རྒྱ་ཧ་ཅང་ཡངས་པ།  ལག་ཞོར་དུ་པར་བརྒྱབ་པ་ཚང་མ་མཛེས་པོ་འདུག ”དེ་གར་ཡུལ་སྐོར་བྱས་ཡོང་བའི་ཅང་སུའུ་ཡུལ་སྐོར་བ་མཁྱེན་ལྡན་མ་མའོ་ལགས་ཀྱིས་དགའ་ཚོར་ཆེན་པོས་གསར་འགོད་པར་བཤད། 

ཤེས་རྟོགས་བྱུང་བར་གཞིགས་ན།  ཡང་ཐང་གི་རེ་ལྕག་མེ་ཏོག་བཞད་པའི་དུས་ཚོད་དེ་ཟླ་བཅུ་པའི་ཟླ་དཀྱིལ་དང་ཟླ་སྨད་བར་ཡིན་ཏེ།  ཡངས་ཤིང་རྒྱ་ཆེ་བའི་མཐོ་སྒང་གི་སྟོན་དུས་མཛེས་ལྗོངས་ཚད་བཀག་བྱས་ནས།  ཕྱོགས་བཞི་མཚམས་བརྒྱད་ཀྱི་ཡུལ་སྐོར་བ་ཡོང་བར་སྒུག་བཞིན་ཡོད།