ཟླ་8པའི་ཚེས་19ཉིན། རང་ཁུལ་གྱིས་2026ལོར་རྒྱུན་རྣམ་ཅན་གྱི་རོགས་སྐྱོར་ལ་སྐུལ་འདེད་བཏང་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་དང་རྒྱ་སྐྱེད་གཏོང་བའི་ལས་དོན་གྱི་ཚོགས་འདུ་འཚོགས།  ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་“ཞིང་གསུམ”ལས་དོན་སྐོར་གྱི་རྣམ་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན། དེ་བཞིན་ཡུན་ནན་ལ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་དེ། ཏང་ཀྲུང་དབྱང་གི་རྒྱུན་རྣམ་ཅན་གྱི་རོགས་སྐྱོར་ལ་སྐུལ་འདེད་བཏང་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་དང་རྒྱ་སྐྱེད་གཏོང་རྒྱུའི་སྐོར་གྱི་ལས་ཀའི་བཀོད་སྒྲིག་དང་དེ་བཞིན་ཞིང་ཨུའི་ལས་ཀའི་བླང་བྱ་ལག་བསྟར་དོན་འཁྱོལ་ནན་ཏན་བྱས་ནས། མིག་སྔར་གྱི་གནས་བབ་ལ་དབྱེ་ཞིབ་དང་དུས་རིམ་རྗེས་མའི་ལས་ཀའི་ལས་འགན་བཀོད་སྒྲིག་བྱས་ཏེ། རང་ཁུལ་གྱི་དབུལ་སྒྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་དང་རྒྱ་སྐྱེད་བཏང་ནས་ཕྱོགས་ཡོངས་ནས་གྲོང་གསེབ་དར་རྒྱས་ལ་སྐུལ་འདེད་མགྱོགས་པོ་གཏོང་དགོས་ཞེས་ནན་གསུང་གནང་།

ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་ཚོགས་འདུར་ཞུགས་པ་མ་ཟད་གསུང་བཤད་གནང་། ཁུལ་ཨུའི་ཧྲུའུ་ཅི་གཞོན་པ། ལས་ཚབ་ཁུལ་དཔོན་ལི་ཡན་ལན་གྱིས་ཚོགས་འདུ་གཙོ་སྐྱོང་གནང་བ་མ་ཟད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་དང་དེ་བཞིན་ཙུང་ལི་གཞོན་པ་ལིའུ་གོ་ཀྲུང་གིས་ཡུན་ནན་དུ་བརྟག་ཞིབ་གནང་བར་ཕེབས་པའི་འབྲེལ་ཡོད་མཛུབ་སྟོན་གྱི་བླང་བྱ་བརྒྱུད་བསྒྲགས་བྱས།  ཁུལ་ཨུའི་ཧྲུའུ་ཅི་གཞོན་པ་ཞུས་སི་སིས་རྒྱལ་ཡོངས་དང་དེ་བཞིན་ཞིང་ཆེན་ཡོངས་ཀྱི་ཚོགས་འདུའི་དགོངས་དོན་བརྒྱུད་བསྒྲགས་བྱས་པ་དང་ཞིང་ཆེན་རིམ་པའི་2025ལོ་འཁོར་གྱི་དཔྱད་ཞིབ་དཔྱད་དཔོག་གནས་ཚུལ་བརྡ་ཁྱབ་བཏང་བ་རེད།

ཚོགས་འདུའི་ཐོག་ད་ལོ་ནི་རྒྱུན་རྣམ་ཅན་གྱི་དབུལ་པོ་བསྐྱར་ལོག་དང་དབུལ་པོར་འགྱུར་བ་སྔོན་འགོག་བྱེད་པའི་རོགས་སྐྱོར་ལས་དོན་སྤེལ་བའི་ལོ་དང་པོ་ཡིན་པས། བསམ་བློ་དང་བྱ་སྤྱོད་དེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་དེ་བཞིན་ཞིང་ཨུའི་ལས་ཀའི་བླང་བྱའི་ཐོག་གཅིག་གྱུར་ཡོང་བ་བྱེད་དེ། རྒྱུན་རྣམ་ཅན་གྱི་རོགས་སྐྱོར་ལས་འགན་ཁག་ལ་ལྷོད་གཡེང་སྤུ་ཙམ་ཡང་མི་གཏོང་བར་དམ་འཛིན་ཏན་ཏིག་བྱས་ནས། དུས་ཐོག་ཏུ་ལས་ཀའི་བསམ་ཕྱོགས་ལེགས་སྒྲིག་བྱེད་པ་དང་། ལས་ཀ་ལས་སྟངས་ལེགས་སུ་གཏོང་བ། ལས་ཀའི་ཞན་ཆ་ཁ་གསབ་བཅས་བྱས་ཏེ། རྒྱུན་རྣམ་ཅན་གྱི་རོགས་སྐྱོར་དེ་གྲོང་གསེབ་དར་རྒྱས་ལས་དོན་གྱི་སྤྱི་ཡོངས་དང་མཉམ་འདྲེས་གཏིང་ཟབ་བྱས་ནས་དངོས་སྒྲུབ་དངོས་འབྲས་ཀྱི་ཐོག་ནས་“གཏན་འཁེལ་གཉིས”ལ་བརྩི་བཀུར་ཞུ་བ་དང་“སྲུང་སྐྱོང་གཉིས”ཡག་པོ་སྒྲུབ་ཐུབ་པ་བྱེད་དགོས་ཞེས་ནན་གསུང་གནང་།

ཚོགས་འདུའི་ཐོག་དུས་ཚོད་དམ་འཛིན་བྱས་ནས་ཞིབ་འཇུག་དང་སྲིད་ཇུས་ཁོང་དུ་ཆུད་པ་བྱས་ཏེ། བདེ་ཆེན་གྱི་དོན་དངོས་དང་ཟུང་འབྲེལ་བྱས་ནས་གནད་སྨིན་སྲིད་ཇུས་ལག་བསྟར་བྱས་ཏེ། རྒྱུན་རྣམ་ཅན་གྱི་རོགས་སྐྱོར་ལས་དོན་ཁག་དོན་ཐོག་ཏུ་འཁྱོལ་བ་བྱེད་དགོས། རོགས་སྐྱོར་བྱ་ཡུལ་གནད་སྨིན་གཏན་འཁེལ་བྱེད་པ་དང་། ངོས་འཛིན་བྱེད་སྟངས་ལེགས་སུ་གཏོང་བ། ལས་ཀའི་གོ་རིམ་ཚད་ལྡན་དུ་གཏོང་བ་བཅས་བྱས་ནས་དབུལ་པོ་བསྐྱར་ལོག་པ་དང་དབུལ་པོར་འགྱུར་རྒྱུ་སྔོན་འགོག་བྱེད་པའི་ལྟ་ཞིབ་ཚད་ལེན་དང་རོགས་སྐྱོར་ཏན་ཏིག་བྱེད་དགོས། སློབ་གྲྭར་འགྲོ་མཚམས་མི་ཆད་པ་བྱས་ནས་སློབ་གྲྭར་ཞུགས་ཚད་འགན་ལེན་བྱེད་པའི་ལས་དོན་ལ་དམ་འཛིན་ཡག་པོ་བྱས་ཏེ།  རིམ་པ་མང་བའི་སྨན་བཅོས་འགན་ལེན་མ་ལག་རྒྱུན་མཐུད་ངང་འཐུས་སྒོ་ཚང་དུ་གཏོང་བ་དང་། སྡོད་ཁང་བདེ་འཇགས་ཀྱི་གནས་ཚུལ་ལ་ལྟ་ཞིབ་ཚད་ལེན་ཡག་པོ་བྱེད་པ། གྲོང་གསེབ་ཀྱི་འཐུང་ཆུའི་ཆུ་ཚད་དང་ཆུའི་སྤུས་ཚད། ཆུ་སྤྱོད་སྟབས་བདེ་ཚད། ཆུ་མཁོ་འདོན་འགན་ལེན་བྱེད་ཚད་བཅས་སྲ་བརྟན་དུ་བཏང་ནས། “འགན་ལེན་གསུམ”དང་འཐུང་ཆུའི་བདེ་འཇགས་གནད་དོན་ཐག་གཅོད་བྱེད་པར་སྐུལ་འདེད་གཏོང་དགོས། ཧུར་ཐག་ངང་གྲོང་གསེབ་ཀྱི་དམངས་ཕྱུག་ཐོན་ལས་འཕེལ་རྒྱས་གཏོང་བ་དང་། ཐོན་ལས་རོགས་སྐྱོར་སྲིད་ཇུས་ཡག་པོ་སྤྱོད་པ། རྣམ་གྲངས་མ་དངུལ་དོ་དམ་ལ་ཤུགས་སྣོན་རྒྱག་པ་བཅས་བྱས་ནས་ནུས་ཤུགས་ཡོད་རྒུས་ཐོན་ལས་རོགས་སྐྱོར་གྱི་ཕན་འབྲས་ཆེ་རུ་གཏོང་དགོས། ས་ཁོངས་ཀྱི་ངལ་ནུས་མཉམ་ལས་ལམ་སྲོལ་གཏིང་ཟབ་ཏུ་བཏང་ནས་ཐག་ཉེ་སར་ལས་ཞུགས་ཐུབ་རྒྱུར་སྐུལ་འདེད་གཏོང་བ་དང་། སྤྱོད་གོ་ཆོད་པའི་རྩལ་ནུས་གསོ་སྦྱོང་ལ་དམ་འཛིན་ཡག་པོ་བྱེད་པ། ཐབས་ལམ་མང་པོའི་ཐོག་ནས་ལས་ཞུགས་རོགས་སྐྱོར་ཡག་པོ་བྱེད་དགོས། གནད་དོན་དག་ཐེར་ལ་དམ་འཛིན་ནན་པོ་བྱེད་པ་དང་། ཆབ་སྲིད་ཀྱི་འགན་འཁྲི་ནན་པོ་འཁུར་བ། དག་ཐེར་བྱེད་ཐབས་ཁག་དོན་འཁྱོལ་ཞིབ་ཚགས་བྱེད་པ་བཅས་བྱས་ཏེ་གནད་དོན་དག་ཐེར་གྱི་ཕན་འབྲས་དངོས་ལ་བརྟེན་ནས་རྒྱུན་རྣམ་ཅན་གྱི་རོགས་སྐྱོར་ལས་དོན་གྱི་སྤུས་ཚད་དང་ཕན་འབྲས་མཐོ་རུ་གཏོང་དགོས་པའི་བླང་བྱ་བཏོན།

ཚོགས་འདུའི་ཐོག་“རིམ་པ་ལྔ་པའི་ཧྲུའུ་ཅིས་རོགས་སྐྱོར་ལ་དམ་འཛིན་བྱེད་པའི”ལས་ཀའི་བླང་བྱ་དོན་འཁྱོལ་ཡག་པོ་བྱས་ཏེ། རྒྱུན་རྣམ་ཅན་གྱི་རོགས་སྐྱོར་ལས་དོན་སེམས་ནང་འཇོག་པ་དང་དམ་འཛིན་ཡག་པོ་བྱས་ནས་ཡང་དག་པའི་སྲིད་དོན་ལས་རྗེས་ལྟ་བ་དེ་ལས་དོན་གྱི་བརྒྱུད་རིམ་ཧྲིལ་པོར་ཁྱབ་པ་བྱས་ཏེ། རིམ་པ་བཞིན་དམ་འཛིན་དང་རིམ་པ་བཞིན་དོན་འཁྱོལ་ལ་དམ་འཛིན་བྱེད་དགོས། གསར་དུ་བསྐོ་གཞག་བྱས་པའི་ལས་བྱེད་པའི་རོགས་སྐྱོར་ལས་སྒོའི་སྲིད་ཇུས་གསོ་སྦྱོང་ལ་དམ་འཛིན་ཡག་པོ་བྱེད་པ་དང་། དྲིལ་བསྒྲགས་ཁྲིད་སྟོན་ལ་ཤུགས་སྣོན་རྒྱག་པ། རྒྱུན་གཏན་གྱི་ལྟ་སྐུལ་ཞིབ་བཤེར་ལ་ཤུགས་སྣོན་རྒྱག་པ། ཧུར་ཐག་ངང་སྤྱོད་ཚུལ་གསར་བརྗེ་དང་ཕན་ནུས་གསར་བརྗེའི་“མཐོར་གཏོང་10”ཡི་བྱ་སྤྱོད་ལག་ལེན་བསྟར་བ་བཅས་བྱས་ཏེ་ཉམས་སད་ཐེག་ཐུབ་པའི་སྤྱོད་ཚུལ་ལ་བརྟེན་ནས་རོགས་སྐྱོར་ལས་འགན་ཁག་དམ་འཛིན་ནན་པོ་དང་ཏན་ཏིག་བྱེད་དགོས་ཞེས་ནན་གསུང་གནང་།

     ཞུས་ཀོང་ཏེ་དང་ལིན་ཧའོ་ཚོགས་ར་གཙོ་བོར་ཞུགས་པ་དང་ཧོང་ལུང་ཞིན་ཡན་ལག་ཚོགས་རར་ཞུགས་པ་རེད། ཁུལ་རིམ་པའི་འབྲེལ་ཡོད་ལས་ཁུངས་ཀྱི་འགན་འཁུར་བློ་མཐུན་གཙོ་བོ་ཚོགས་འདུར་ཞུགས། ཚོགས་འདུ་དེ་བརྙན་ལམ་གྱི་རྣམ་པའི་ཐོག་ནས་རྫོང་(གྲོང་ཁྱེར)དང་ཤང་(གྲོང་རྡལ)རིམ་པ་གཉིས་པར་འཚོགས་པ་རེད།