ཉེ་དུས། བདེ་ཆེན་ཁུལ་གྱི་ཞིབ་དཔྱད་ཚད་ལེན་ཁང་གིས་རེ་ཞུ་བྱས་པའི་གསོ་རིག་ཚད་འཇལ་ཚད་གཞི་ཁག་11ལ་བདེ་བླག་ངང་ཡུལ་དངོས་ཀྱི་དཔྱད་ཞིབ་ལེགས་འགྲུབ་བྱུང་སྟེ། བདེ་ཆེན་ཁུལ་གསོ་རིག་ཚད་འཇལ་ཚད་གཞི་ཁྱབ་ཁོངས་སུ་རྣམ་གྲངས་མང་པོ་མེད་པ་ནས་ཡོད་པའི་ཐོད་བརྒལ་བྱུང་བར་མཚོན། མཐོ་སྒང་ས་ཁུལ་གྱི་སྨན་སྤྱོད་སྒྲིག་ཆས་“ཞིབ་དཔྱད་བསྐྱལ་ས་རིང་བ་དང་། ཞིབ་དཔྱད་བྱེད་མི་ཐུབ་པ།  ཞིབ་དཔྱད་གནད་སྨིན་མིན་པའི་”དཀའ་གནད་ཐག་གཅོད་བྱས་པར་རྨང་གཞི་བརྟན་པོ་འདིང་བ་དང་འདེགས་སྐྱོར་མཁོ་འདོན་བྱས་ཡོད། 

དུས་ཡུན་རིང་པོའི་ནང་ས་ཁམས་ཆ་རྐྱེན་སོགས་ཚོད་འཛིན་ཕོག་པའི་རྐྱེན་གྱིས་བདེ་ཆེན་ཁུལ་གྱི་སྨན་སྤྱོད་ཚད་འཇལ་ཡོ་བྱད་མང་ཆེ་བ་ས་ཆ་གཞན་དུ་བསྐྱལ་ནས་ཞིབ་བཤེར་གཏན་འཁེལ་བྱེད་དགོས། དུས་ཡུན་རིང་བ་དང་མ་གནས་མཐོ་བའི་གནད་དོན་གནས་པ་མ་ཟད། རྙོག་འཛིང་ཆེ་བའི་སྒྲིག་ཆས་ཁག་གཅིག་ལ་“ཞིབ་བཤེར་བྱེད་ས་མེད་པའི་”དཀའ་ངལ་འཕྲད་ནས་སྨན་བཅོས་སྒྲིག་གཞིའི་རྒྱུན་གཏན་གྱི་གཉེར་སྐྱོང་དང་སྨན་བཅོས་ལས་དོན་ལ་སྟབས་མི་བདེ་བ་བཟོས་ཡོད། ཐེངས་འདིའི་དཔྱད་ཞིབ་བྱས་པའི་ཚད་གཞི་ཁག་11དེ་སྨན་སྤྱོད་ཚད་བརྒལ་སྒྲ་རླབས་བརྟག་དཔྱད་ཡོ་ཆས་དང་། ཁྲག་ཤེད་ལྟ་ཆས། གྲངས་གཞིའི་སྙིང་གློག་རླབས་རིས་འཕྲུལ་ཆས། སྨན་སྤྱོད་ཀྱི་དཔྱད་གྲངས་མང་བའི་ལྟ་སྐྱོང་ཡོ་བྱད།  Xའཕྲོ་འོད་ཁྱབ་འགྱེད་ཁུངས་སོགས་འགག་རྩའི་སྒྲིག་ཆས་ཁྱབ་ཁོངས་སུ་ཁྱབ་ཡོད། དེའི་ནང་སྨན་སྤྱོད་ཀྱི་དཔྱད་གྲངས་མང་བའི་ལྟ་སྐྱོང་ཡོ་བྱད་དང་གཤེར་འདྲེན་འཕྲུལ་ཆས་སོགས་ལག་རྩལ་མཐོ་བའི་བླང་བྱའི་རྣམ་གྲངས་དོན་འཁྱོལ་བྱས་པ་དེ་བདེ་ཆེན་ཁུལ་གྱི་གསོ་རིག་ཚད་འཇལ་ཁྱབ་ཁོངས་ཀྱི་ཞན་ཆར་གནད་སྨིན་ཁ་གསབ་བྱས་ཡོད། 

དཔྱད་ཞིབ་བྱེད་རིང་རིགས་གཅིག་མཁས་ཅན་ཚོགས་ཆུང་གིས་“མི་སྣ་དང་། འཕྲུལ་ཆས། རྒྱུ་ཆ། བྱེད་ཐབས། ཁོར་ཡུག ཚད་འཇལ་”བཅས་ཕྱོགས་དྲུག་ལ་དམིགས་ནས་དཔྱད་ཞིབ་བྱས་ཏེ། གཏན་འཁེལ་བྱས་པ་བརྒྱུད་བདེ་ཆེན་ཁུལ་ཞིབ་དཔྱད་ཚད་ལེན་ཁང་གི་ཚོད་ལྟ་ཁང་གི་ཁོར་ཡུག་དང་། སྒྲིག་ཆས་བཀོད་སྒྲིག མི་སྣའི་ཐོབ་ཐང་བཅས་ཚང་མ་རྒྱལ་ཁབ་ཀྱི་ཚད་ལྡན་བླང་བྱ་དང་མཐུན་པས་ཞིབ་དཔྱད་གཏན་འཁེལ་གྱི་གྲངས་གཞི་གནད་ལ་འཁེལ་བར་འགན་ལེན་གང་ལེགས་བྱས་ཐུབ། གྲུབ་འབྲས་འདི་དོན་འཁྱོལ་བྱུང་རྗེས་ཁུལ་ཡོངས་ཀྱི་རིམ་པ་ཁག་གི་སྨན་བཅོས་སྒྲིག་གཞིས་སླར་ཡང་ཡུལ་གཞན་དུ་བསྐྱོད་མི་དགོས་པ། འབྲེལ་ཡོད་སྒྲིག་ཆས་ཞིབ་བཤེར་གཏན་འཁེལ་ལས་དོན་ཐད་ཀར་ས་གནས་དེ་གར་ལེགས་གྲུབ་ཐུབ་ནས། ཞིབ་བཤེར་གཏན་འཁེལ་གྱི་དུས་འཁོར་ཐུང་དུ་གཏོང་བ་དང་གཉེར་སྐྱོང་གི་མ་གནས་དམའ་རུ་གཏོང་ཐུབ་པ་མ་ཟད།  ད་དུང་ནད་ཐོག་སྨན་བཅོས་ལ་བརྟན་པོ་དང་གནད་སྨིན་གྱི་སྒྲིག་ཆས་རྒྱབ་སྐྱོར་དེ་བས་མཁོ་འདོན་བྱས་ཐུབ།

བདེ་ཆེན་ཁུལ་ཞིབ་དཔྱད་ཚད་ལེན་ཁང་གི་ཚད་འཇལ་ལྟེ་གནས་ཀྱི་ཀྲུའུ་རེན་མ་ཡུས་ལིའང་གིས་ཐེངས་འདིའི་དཔྱད་ཞིབ་ལེགས་འགྲུབ་བྱུང་བ་དེས་མྱུར་སྐྱོབ་དང་ནད་ལྕིའི་ལྟ་སྐྱོང་ཁྱབ་ཁོངས་ཀྱི་གསོ་རིག་ཚད་འཇལ་གྱི་ཁུངས་འདེད་སྟོང་ཆ་བསྐོང་པ། མཐོ་སྒང་སྨན་བཅོས་ཞབས་ཞུ་རིམ་སྤར་ལ་ལག་རྩལ་གྱི་འགན་ལེན་གལ་ཆེན་མཁོ་འདོན་བྱས་ཡོད་ཅེས་ཟེར། སེམས་ཀྱི་ཉི་ཟླ་ཁྲེང་ཏེ་སྨན་ཁང་གི་ཀྲུའུ་རེན་གཞོན་པ་སྨན་པ་ཧོ་ཡུང་ཅན་གྱིས་སྔོན་མ་ཏ་ལི་དང་ཁུན་མིང་སོགས་སུ་བརྟག་དཔྱད་བྱེད་འགྲོ་དགོས་པས་དུས་ཚོད་དང་ནུས་ཤུགས་མང་པོ་དགོས་ཀྱི་འདུག ད་ལྟར་ས་གནས་དེ་གས་ནད་ཐོག་སྨན་བཅོས་ཀྱི་གྲངས་གཞི་ཡང་དག་དང་ནད་པའི་བདེ་འཇགས་ལ་འགོག་སྲུང་འཛིང་རགས་བརྟན་པོ་བསྐྲུན་ཡོད་ཅེས་བཤད།  

གོམ་སྟབས་རྗེས་མར། བདེ་ཆེན་ཁུལ་ཞིབ་དཔྱད་ཚད་ལེན་ཁང་གིས་བཅའ་ཁྲིམས་དང་ཁྲིམས་སྲོལ་ལ་ནན་པོར་གཞིགས་ནས་ཞིབ་དཔྱད་ཚད་ལེན་དང་གནད་སྨིན་ཞབས་ཞུ་བྱས་ཏེ། ཁུལ་ཡོངས་ཀྱི་རིམ་པ་ཁག་གི་སྨན་བཅོས་སྒྲིག་གཞིའི་སྨན་སྤྱོད་སྒྲིག་ཆས་ཀྱི་གྲངས་འབོར་གནད་ལ་འཁེལ་བར་འགན་ལེན་བྱས་ནས། ཆེད་ལས་ནུས་པར་བརྟེན་ནས་མཐོ་སྒང་གི་སྨན་བཅོས་སྤུས་ཚད་བདེ་འཇགས་སྲུང་སྐྱོང་བྱས་ཏེ་ཁུལ་ཡོངས་ཀྱི་མང་ཚོགས་ཀྱི་ལུས་པོ་བདེ་ཐང་ལ་འགན་ལེན་ཏན་ཏིག་བྱས།