དུས་ཡུན་རིང་པོའི་ནང་བདེ་ཆེན་ཁུལ་གྱི་ས་གནས་དེ་གའི་ཞོག་ཁོག་ཐོན་ཚད་དམའ་བ་དང་། ལྡོག་འགོག་རང་བཞིན་ཞན་པ། ཚོང་ཟོག་ཐོན་རྫས་སྤུས་ཀ་མི་ལེགས་པ་སོགས་ཀྱི་ཐོན་ལས་ན་ཟུག་ཆེ་ཙམ་ཡོད་པས་ཞོག་ཁོག་ཐོན་ལས་ཀྱི་སྤུས་ཚད་དང་ཕན་འབྲས་མཐོ་རུ་གཏོང་བར་ཚོད་འཛིན་ཐེབས་ཡོད། འཕེལ་རྒྱས་ཀྱི་འཇུར་མིག་དེ་སེལ་ཆེད་2008ལོ་ནས་བཟུང་ཁུལ་ཞིང་ལས་ཚན་རིག་ཁང་གིས་ཞིང་ཆེན་རིམ་པའི་སོན་གསོའི་རིགས་གཅིག་མཁས་ཅན་དང་ལག་གདང་སྦྲེལ་ནས་ཆེད་དོན་ཞིབ་འཇུག་གསར་སྤེལ་ཚོགས་པ་བཙུགས་ཏེ་ས་མཐོར་གཞི་ཚུགས་ནས་སོན་བཟང་འགག་སྒྲོལ་བྱས་པ་རེད། ཚན་ཞིབ་ཚོགས་པས་ས་མཐོའི་ཁོར་ཡུག་དང་འཚམ་པའི་གཉེན་ཉེའི་རྒྱུ་ཆ་གནད་ལ་འཁེལ་བའི་སྒོ་ནས་ལེགས་འདེམས་བྱས་ཏེ་མ་ཤིང་“S03-2412”དང་ཕ་ཤིང་“395112.36”བདམས་ནས་རྒྱུད་འདྲེས་དངོས་སྐྱེས་ས་བོན་670གྲུབ་འབྲས་ཐོབ་པའི་སྒོ་ནས་གསོ་སྤེལ་བྱས་པར་བརྟེན་“སེམས་ཀྱི་ཉི་ཟླ་ཞོག་ཁོག་3301”གི་ཡུན་རིང་འདེམས་གསོའི་ལམ་བུ་བཏོད་པ་རེད།

    ལོ་བཅུ་ལྷག་ཙམ་རིང་དཀའ་སྤྱད་གསོ་སྐྱོང་དང་རིམ་པ་སྟར་ཆགས་ཀྱིས་ལེགས་འདེམས་བྱས་པ་བརྒྱུད་“སེམས་ཀྱི་ཉི་ཟླ་ཞོག་ཁོག་3301”དེ་སྡོང་རྐང་670ཡི་ཁྲོད་ནས་འབུར་དུ་ཐོན་ཏེ་སྔ་རྗེས་སུ་གྲ་སྒྲིག་ཚོད་ལྟ་དང་། སྣ་ཁ་ཞིབ་བསྡུར་ཚོད་ལྟ། རྒྱ་ཁྱོན་ཆུང་བའི་དཔེ་སྟོན་སོགས་ལྷུ་ཚིགས་མང་པོ་ལེགས་གྲུབ་བྱུང་ནས་མཐར་རྒྱལ་ཁབ་ཀྱིས་ཞིབ་བཤེར་གཏན་འབེབས་བྱས་པ་རེད། ཤེས་རྟོགས་བྱུང་བར་གཞིགས་ན། སྣ་ཁ་དེ་སྨིན་འཕྱི་བ་དང་སྐྱེ་བའི་དུས་ཚོད་ཉིན་123་ཙམ་ཡིན་པ་དང་བདེ་ཆེན་ཁུལ་གྱི་ས་བབ་མཐོ་ཚད་སྨི་2200་ཡན་ཟིན་པའི་ས་ཁོངས་སུ་འདེབས་འཛུགས་བྱ་རྒྱུར་འཚམ་པ་དང་ས་མཐོའི་ཞིང་ལས་ཀྱི་ཆོས་ཉིད་དང་མཐུན་ཡོད། “སེམས་ཀྱི་ཉི་ཟླ་ཞོག་ཁོག་3301”ཐོན་ལེགས་རང་བཞིན་གྱི་མངོན་ཚུལ་གསལ་པོ་ཡོད། ཞིང་ཁ་ཆེན་པོ་ཐོན་སྐྱེད་བྱེད་རིང་མུའུ་རེའི་ཐོན་ཚད་བསྡུར་བའི་སྣ་ཁ་“མཉམ་ལས་88”ཐོན་འཕར་བྱུང་ཚད་100%་ལས་བརྒལ་བ་དང་མུའུ་རེའི་ཐོན་ཚད་མཐོ་ཤོས་སྤྱི་རྒྱ་2580་ཟིན་གྱི་ཡོད་པ་རེད། ཚོང་ཟོག་གི་ངོ་བོ་བཟང་བ། ཞོག་ཁོག་ཆེ་འབྲིང་གི་ཚད་90.00%ཟིན་པ་དང་། ཞོག་ཁོག་ལེབ་མོའི་པགས་པ་སེར་པོ་དང་ནང་དཀར་པོ། མྱུ་གུའི་མིག་གཏིང་ཐུང་བ། ཕྱི་དབྱིབས་མཛེས་ཤིང་ལྟ་ན་སྡུག་པ་བཅས་རེད། དུས་མཚུངས་སུ་དེའི་སྐམ་རྫས་དང་སིང་ཕྱེ་སོགས་འཚོ་བཅུད་ཀྱི་གྲུབ་ཆ་འདུས་ཚད་མཐོ་བ་དང་། བཟའ་བྱའི་བྲོ་བ་ལེགས་པ། དྲོད་ཚད་དམའ་བའི་གསོག་ཉར་ཐུབ་པ། སྐྱེལ་འདྲེན་བྱེད་བདེ་བ་བཅས་ཡིན། ནད་འགོག་ནུས་པའི་ཐད་རིགས་དེའི་ཚད་མཐོའི་ཞོག་ཁོག་ཕྱི་རིམས་དང་འབྲིང་རིམས་PVYནད་དུག་དང་ཞོག་ཁོག་གས་ཚད་1.5%ལས་མེད་པས་ནད་འབུའི་གནོད་འཚེ་སྔོན་འགོག་ཚོད་འཛིན་གྱི་མ་གནས་དང་འདེབས་འཛུགས་ཟད་གྲོན་ནུས་ལྡན་ངང་ཆུང་དུ་གཏོང་ཐུབ་པ་དང་ཞིང་དུད་ཀྱི་འདེབས་འཛུགས་ཉེན་ཁ་ཆེས་ཆེར་ཆུང་དུ་གཏོང་ཐུབ།

    གོམ་སྟབས་རྗེས་མར་ཁུལ་ཞིང་ལས་ཚན་རིག་ཁང་གིས་“སེམས་ཀྱི་ཉི་ཟླ་ཞོག་ཁོག་3301”ཁྱབ་གདལ་གཏོང་ཤུགས་ཆེ་རུ་བཏང་ནས་དེ་ཉིད་ལྷོ་ནུབ་ཀྱི་ས་བབ་མཐོ་བའི་ས་ཁུལ་གྱི་ཐོན་རྫས་གཙོ་བོ་ཞོག་ཁོག་གི་སྣ་ཁ་ཞིག་ཏུ་འགྱུར་རྒྱུར་སྐུལ་འདེད་གཏོང་རྒྱུ་རེད། དེ་དང་ཆབས་ཅིག་“1+4+N”ས་མཐོའི་ཁྱད་ལྡན་ཞིང་ལས་ཐོན་ལས་ཀྱི་དགོས་མཁོར་རྒྱུན་མཐུད་ངང་དམིགས་ནས་ཞིང་དུད་ལ་ཕན་པའི་སོན་བཟང་དེ་བས་མང་བ་སྐྱེད་སྲིང་བྱས་ཏེ་གྲོང་གསེབ་དར་རྒྱས་ལ་ཚན་རྩལ་གྱི་སྒུལ་ཤུགས་བསྣན་རྒྱུ།