ད་ལོའི་སྲིད་གཞུང་ལས་དོན་གྱི་སྙན་སྒྲོན་ནང་མི་དམངས་མང་ཚོགས་ཆེད་དུ་དོན་དངོས་མང་ཙམ་སྒྲུབ་དགོས་ཞེས་བཏོན་ཡོད།  ལོ་ལྔའི་འཆར་གཞི་ཨང་བཅོ་ལྔ་པའི་རྩ་གནད་ནང་གཙོ་གནད་ལས་གྲྭ་རྣམ་གྲངས་བརྒྱ་དང་དགུའི་ཁྲོད་དམངས་འཚོ་ལས་གྲྭ་ཉེར་ལྔ་ཚུད་ཡོད།  དོན་དངོས་སྒྲུབ་པར་དངོས་གནས་ཡིན་མིན་དང་ལས་གྲྭ་འཛུགས་སྐྲུན་ཡག་མི་ཡག་ལ།  ཚད་གཞི་གལ་ཆེན་ཞིག་ནི་མི་སེར་གྱི་སེམས་ནང་གི་བསྔགས་བརྗོད་འོས་པའི་ལས་གྲྭ་ཞིག་ཏུ་འགྱུར་ཐུབ་མིན་དེ་ཡིན་པ་ལས། མི་དམངས་དང་རྒྱུ་ནོར་ལ་གནོ་པའི་འབོད་ཚིག་ལྟ་བུའི་ལས་གྲྭ་ཞིག་མིན།

ཉེ་བའི་ལོ་ཤས་རིང་།  ས་གནས་ཁ་ཤས་ཀྱི་ལྕགས་ལམ་གློག་འཁོར་དང་ཟོག་འགྲེམས་གྲོང་ཁྱེར་གསར་པ། གནའ་བོའི་འདྲ་བཟོའི་གྲོང་རྡལ་ཆུང་གྲས་སོགས་རྣམ་གྲངས་ཀྱིས་ཐབས་ཇུས་དོན་དངོས་དང་ཁ་བྲལ་པའི་རྐྱེན་གྱིས་བཤིག་ཉར་གཉིས་ཀ་དཀའ་བ་དང་ཕུགས་སྐྱོན་རྫོགས་མཐའ་མེད་པའི་གནས་སུ་གྱར་ཡོད།  འབོད་ཚིག་ལྟ་བུའི་ལས་གྲྭ་འདི་དག་ཨར་གཞུག་མ་འཁྱོལ་བའི་ལས་གྲྭར་གྱུར་བ་ལས་ཏང་ཡོན་ལས་བྱེད་པ་ཁག་ཅིག་གི་སྲིད་དོན་ལས་རྗེས་ལྟ་བ་ཡོ་ཁྱད་བྱུང་ཡོད་པའི་གནད་དོན་མཚོན་ཡོད།

གནམ་སའི་བར་དུ་ཚད་ཅིག་ཡོད།  ཚད་འདི་ནི་མི་སེར་ཡིན་ཞེས་པ་ལྟར་སྲིད་དོན་ལས་རྗེས་ཀྱི་ལྗིད་ཚད་འདང་ཡོད་མེད་ཚད་འདིའི་ཐོག་འཇལ་དགོས།

 ཏང་ནང་དུ་ཞུགས་དོན་ཅི་ཡིན་ནམ། དཔོན་པོ་བྱས་ནས་ཅི་བྱེད། རྗེས་སུ་ཅི་ཞིག་འཇོག་དགོས་ཞེས་པའི་གནད་དོན་འདི་ཏང་ཡོན་ལས་བྱེད་པ་ཚང་མས་རྒྱུན་དུ་བསམ་བློ་གཏོང་དགོས།  གཟེངས་བསྟོད་ངོ་ངམ་ནི་ཡིག་ཆ་དང་རེའུ་མིག་ནང་མེད་ལ་མི་སེར་གྱི་སེམས་ནང་ཡོད།  ལས་གཡོལ་བྱས་ནས་ལོ་མང་པོ་སོང་ཡང་མི་སེར་རྣམས་ཀྱིས་ལོ་དེ་དག་དང་ལས་བྱེད་པ་དེ་དག་སྐོར་གླེང་སྐབས། ད་དུང་སྙིང་ཐག་པ་ནས་སྐབས་དེའི་ཚན་ཁག་གིས་དོན་དངོས་བསྒྲུབས་པ་ཞེས་བརྗོད་པ་དེ་ནི་གཟེངས་བསྟོད་ཆེན་པོ་ཡིན།  རྨང་གཞི་བཏིང་བ་དང་ཕུགས་ལ་ཕན་ཐོགས་པའི་ལས་ཀ་མི་ཉུང་བ་ཞིག་ལ་ཏང་ཡོན་ལས་བྱེད་པའི་འགན་འཛིན་དུས་ཡུན་ནང་དུ་ཚ་ཚ་འུར་འུར་གྱི་ཕན་འབྲས་མཐོང་མི་ཐུབ་ཀྱང་། ལོ་མང་སོང་རྗེས་གཞི་ནས་རིམ་བཞིན་ཤུགས་རྐྱེན་འབྱུང་སྲིད།  དེ་དུས་བཙུགས་པའི་སྡོང་མྱུག་རིམ་བཞིན་གྲིབ་བསིལ་དུ་གྱུར་པ་དང་། འཆར་འགོད་བྱས་པའི་རྣམ་གྲངས་ལས་མང་ཚོགས་ལ་དངོས་ཕན་ཐོབ་པ། གསོ་སྐྱོང་བྱས་པའི་ཤེས་ལྡན་མི་སྣ་རྐང་འཛིན་དུ་གྱུར་ཡོད་སོགས་འདི་དག་ནི་ཡང་དག་པའི་སྲིད་དོན་ལས་རྗེས་ལྟ་བ་འཛུགས་པ་དང་ལག་ལེན་བསྟར་བའི་གསོན་ཉམས་ལྡན་པའི་མཆན་འགྲེལ་ཡིན།  

 བསྔགས་བརྗོད་ཇི་འདྲ་ཡིན་ཡང་མི་སེར་གྱི་གཟེངས་བསྟོད་ལས་མེད།  ཏང་ཡོན་ལས་བྱེད་པ་ཚང་མས་གནས་ལུགས་འདི་ཤེས་བའི་སྐབས་སུ་མིག་མདུན་གྱི་ཁེ་ཕན་ཁོ་ནར་བརྔམ་པའི་འབོད་ཚིག་ལྟ་བུའི་ལས་གྲྭ་དེ་དག་གིས་ཁྲོམ་ར་ཤོར་ངེས་ཡིན་པ་དང་།   ཕུགས་ལ་ཕན་པ་ཐོབ་པའི་བསྔགས་བརྗོད་འོས་པའི་ལས་གྲྭ་ནི་མི་སེར་གྱི་སེམས་ནང་འོད་འཚེར་ཐུབ་ངེས་རེད།