“ལོ་ལྔ་ཚན་བཅོ་ལྔ་པའི”འཆར་འགོད་ཞིབ་འཇུག་དང་གཏན་འབེབས་ཡག་པོ་བྱས་ན་བདེ་ཆེན་གྱི་ཡུན་རིང་བདེ་འགོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་།  ཀྲུང་གོའི་ལུགས་ཀྱི་དེང་རབས་ཅན་གྱི་བདེ་ཆེན་གྱི་ལེའུ་གསར་པ་རྩོམ་རྒྱུ་ལ་དོན་སྙིང་གལ་ཆེན་ལྡན། 

    དགུན་ཁ་འདིར། བདེ་ཆེན་གྱི་མ་འོངས་པའི་ལོ་ལྔའི་རིང་གི་འཕེལ་རྒྱས་གཏོང་རྒྱུ་དང་འབྲེལ་བ་ཡོད་པའི་གལ་ཆེའི་གྲོས་བསྡུར་གངས་ལྗོངས་མཐོ་སྒང་དུ་སྤྲོ་སེམས་འཁོལ་བའི་ངང་སྤེལ་བ་དང་། ཁུལ་ཨུའི་གྲོས་ཚོགས་ཁང་ནས་རྫོང་དང་ཤང་གི་གཞི་རིམ་བར། ས་གནས་དེ་གའི་བརྟག་ཞིབ་ནས་ས་གནས་གཞན་དུ་རྩིས་ཆས་འདྲི་བར།   ཕྱོགས་ཁག་གི་བསམ་འཆར་གྲོས་འཆར་ཀྱིས་ཁུལ་ཡོངས་མི་རིགས་ཁག་གི་མང་ཚོགས་ཐུན་མོང་འབད་འཐབ་བྱེད་པའི་སྟོབས་ཤུགས་ཆེན་པོ་གཅིག་སྒྲིལ་བྱས་ཡོད།

    ཁུལ་ཨུའི་གཅིག་འགྱུར་བཀོད་སྒྲིག་འོག རང་ཁུལ་གྱིས་དུས་ཐོག་ཏུ་ཁུལ་ཨུའི་“ལོ་ལྔ་ཚན་བཅོ་ལྔ་པའི”འཆར་འགོད་གྲོས་འཆར་གྱི་ཡིག་ཆ་འཆར་ཟིན་འགོད་པའི་ཚོ་ཆུང་བཙུགས་པ་དང་། སྟོབས་ཤུགས་སྐོང་འཐེན་བྱས་ནས་ལས་དོན་ཆེད་སྒྲུབ་ཚོ་ཆུང་བཙུགས་པ། ཁུལ་ཨུའི་རྒྱུན་ལས་ཨུ་ལྷན་གྱི་འགོ་ཁྲིད་འོག་འཆར་ཟིན་འགོད་པའི་ལས་དོན་ལ་གཅིག་གྱུར་གྱིས་སྐུལ་འདེད་བཏང་བ་དང་། དམངས་གཙོ་དར་སྤེལ་གཏོང་བ་དང་བློ་གྲོས་གཅིག་སྒྲིལ་འཆར་ཟིན་འགོད་པའི་ལས་དོན་གྱི་བརྒྱུད་རིམ་ཧྲིལ་པོར་ཁྱབ་པ། ཁུལ་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་གཏོང་བའི་ཁྲོད་ཀྱི་གནད་དོན་གལ་ཆེན་དང་དཀའ་གནད་ལ་དམིགས་ནས་བརྟག་དཔྱད་དང་ཞིབ་འཇུག་བྱས་ཏེ་ཕྱོགས་ཁག་གི་བསམ་འཆར་རྒྱ་ཁྱབ་ཏུ་བསྡུ་ལེན་བྱས་པ་རེད།

    “ལོ་ལྔ་ཚན་བཅོ་ལྔ་པའི”འཆར་འགོད་ཀྱི་འཆར་གཞི་མངོན་འགྱུར་བྱུང་དགོས་ན་ཁུལ་ཡོངས་མི་རིགས་སོ་སོའི་མང་ཚོགས་ཀྱི་བློ་རིག་དང་སྟོབས་ཤུགས་གཅིག་སྒྲིལ་བྱེད་དགོས་ཞེས་ཟླ་12པའི་ཚེས་4ཉིན་འཚོགས་པའི་ཁུལ་ཨུའི་“ལོ་ལྔ་ཚན་བཅོ་ལྔ་པའི”འཆར་འགོད་གྲོས་འཆར་བཟོ་བའི་བཞུགས་མོལ་ཚོགས་འདུའི་ཡུལ་དངོས་སུ།  ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་ཆེད་ལས་མཁས་པ་དང་ཁེ་ལས་ཀྱི་འཐུས་མི།  གཞི་རིམ་གྱི་འཐུས་མི།   ཏང་ཕྱིའི་མི་སྣ་སོགས་ལས་རིགས་ཁག་གི་འཐུས་མི་དང་ངོ་ཐུག་གདོང་འཕྲད་ཀྱིས་མཐུན་སྦྱོར་དང་སྤེལ་རེས་བྱས།   《གྲོས་འཆར་》ཀྱི་མ་ཟིན་སྐོར་གྱི་བསམ་འཆར་ཉན་པ།  ཚོགས་ཞུགས་འཐུས་མི་ཡིས་བརྟན་ལྷིང་སྲུང་སྐྱོང་དང་ཐོན་ལས་འཕེལ་རྒྱས།  དམངས་འཚོ་ལེགས་བཅོས།   སྐྱེ་ཁམས་སྲུང་སྐྱོང་།   ཕྱི་ཕྱོགས་ལ་སྒོ་འབྱེད་པ།  གཞི་རིམ་བཅོས་སྐྱོང་སོགས་གཙོ་གནད་ཁྱབ་ཁོངས་ལ་དམིགས་ནས་ཧུར་བརྩོན་གྱིས་གཏམ་བཤད་བྱས་པ་དང་། དམིགས་ས་རང་བཞིན་དང་དགེ་མཚན་ལྡན་པའི་བསམ་འཆར་དང་གྲོས་འཆར་རབ་དང་རིམ་པ་བཏོན་པ་རེད།

    ལྷག་བསམ་ཟོལ་མེད་ཀྱི་བསམ་འཆར་འདོན་པའི་ཚ་རླབས་དེ་རྫོང་དང་གྲོང་ཁྱེར་ཁག་གི་ཚོགས་རར་གཅིག་མཚུངས་སུ་འཕྱུར་ཡོད།ཁུལ་ཨུའི་གཅིག་གྱུར་བཀོད་སྒྲིག་ལྟར་ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན་ཀྲང་ཝེ་ཏུང་དང་།  ཁུལ་ཨུའི་ཧྲུའུ་ཅི་གཞོན་པ་ཕེང་ཧྲན་དང་ཞུས་སི་སི་སོ་སོར་རུ་ཁག་སྣེ་ཁྲིད་ནས་སེམས་ཀྱི་ཉི་ཟླ་གྲོང་ཁྱེར་དང་། འཇོལ་རྫོང་། འབའ་ལུང་རྫོང་བཅས་སུ་བསམ་འཆར་བསྡུ་ལེན་བཞུགས་མོལ་ཚོགས་འདུ་གཙོ་སྐྱོང་བྱས་པ་དང་།   རྫོང་དང་གྲོང་ཁྱེར་ཁག་གི་ཏང་ཨུད་དང་།  དམངས་ཆེན།  སྲིད་གཞུང་།  སྲིད་གྲོས་བཅས་ཀྱི་འགོ་ཁྲིད་གཙོ་བོ་དང་དེ་བཞིན་སྡེ་ཚན་གྱི་འགན་འཁུར་བློ་མཐུན།  ཤང་དང་གྲོང་རྡལ་གྱི་ཏང་ཨུའི་ཧྲུའུ་ཅིའི་འཐུས་མི་བཅས་ཀྱིས་ལས་དོན་དོན་དངོས་དང་ཟུང་འབྲེལ་བྱས་ནས་བདེན་གཏམ་བཤད་པ་དང་། གནས་ཚུལ་དངོས་བཤད། གཏམ་བཤད་བཟང་པོ་བཅས་བྱས་པས་བསམ་འཆར་བསྡུ་ལེན་བརྒྱུད་རིམ་ཀྱང་གཅིག་མཐུན་གཅིག་སྒྲིལ་དང་སྡོམ་ཤུགས་གཅིག་སྒྲིལ་གྱི་བརྒྱུད་རིམ་དུ་གྱུར་ཡོད།

《གྲོས་འཆར་》འཆར་ཟིན་འགོད་པའི་གོ་རིམ་ཁྲོད།  བསམ་འཆར་བསྡུ་ལེན་ཁྱབ་ཁོངས་དེ་ཁུལ་ཨུ་དང་ཁུལ་སྲིད་གཞུང་།  ཁུལ་དམངས་ཆེན།  ཁུལ་སྲིད་གྲོས་ཀྱི་ཚན་པའི་ཁོངས་མི་ཡོངས་སུ་ཁྱབ་པར་མངོན་འགྱུར་བྱུང་།  ཁུལ་རིམ་པའི་སྡེ་ཚན་ཁག་དང་ཤང་དང་གྲོང་རྡལ་29ཡི་ཏང་ཨུ་ཚང་མ་བསྡུ་ལེན་ཁྱབ་ཁོངས་ནང་བཅུག་ནས་སྲིད་བཀའ་བདེ་བགྲོད་དང་སྒྲ་གཞི་རིམ་དུ་ཐད་ཀར་བསྐྱོད་རྒྱུའི་འགན་ལེན་བྱས་པ།  སྒོ་ཕྱེ་ནས་ཐབས་ཇུས་འདྲི་རྒྱུ་མཐའ་འཁྱོངས་བྱས་ཏེ། དམངས་གཉེར་ཁེ་ལས་པ་དང་ཏང་ཕྱིའི་མི་སྣ་སོགས་རྒྱ་ཁྱབ་ཏུ་གདན་འདྲེན་ཞུས་ནས་བསམ་འཆར་དང་ཐབས་ཇུས་འདོན་རྒྱུ་དང་། སྤྱི་ཚོགས་ལས་རིགས་ཁག་གི་བློ་གྲོས་བསྡུ་ལེན་གང་ལེགས་བྱས་ཡོད།  གཞན་ཡང་། ད་དུང་ཚོགས་འདུ་དང་ཁ་པར།  ཡིག་ཐོག་སོགས་ཀྱི་རྣམ་པ་བརྒྱུད་ནས་རྒྱལ་ཁོངས་བདེ་ཆེན་ནས་ཡིན་པའི་ཞིང་ཆེན་རིམ་པའི་འགོ་ཁྲིད་དང་། ཁུན་མིང་དུ་ཡོད་པའི་བདེ་ཆེན་གྱི་འགོ་ཁྲིད། ཁུན་མིང་དུ་བཅའ་སྡོད་བྱས་ཡོད་པའི་ལས་བྲལ་ལས་འཁྱུར་ངལ་གསོའི་ཏང་ཡོན་དང་ལས་བྱེད་པ་བཅས་ལ་བསམ་འཆར་བསྡུ་ལེན་་བྱས་ནས་བསམ་འཆར་བསྡུ་ལེན་གྱི་རྒྱ་ཁྱོན་དང་གཏིང་ཟབ་ཚད་སྔར་བས་ཆེ་རུ་ཕྱིན་ཡོད་པ་རེད།