ཁུལ་ཡོངས་ཀྱི་རྒྱ་ཆེའི་ལས་བྱེད་པ་དང་མང་ཚོགས་རྣམ་ལ།

    ཀྲུང་ཧྭ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་བྱེད་པ་དང་། ལྗང་མདོག་ཐཱན་ཉུང་གི་འཕེལ་རྒྱས་འདུ་ཤེས་ལག་བསྟར་བྱེད་པ། དུར་མཆོད་ཀྱི་བདེ་འཇགས་འགོག་སྲུང་འཛིང་རགས་བརྟན་དུ་གཏོང་བ། ཤེས་དཔལ་དང་། བདེ་འཇགས། འཆམ་མཐུན་བཅས་ཀྱི་དུར་མཆོད་ཀྱི་རྣམ་པ་གཏོད་པ། ཤེས་དཔལ་གྱི་པུར་འཇུག་གི་དར་སྲོལ་གསར་པ་འཛུགས་པ་བཅས་བྱ་ཆེད། ང་ཚོས་ཚང་མར་གཤམ་གསལ་གྱི་གྲོས་གཞི་འདོན་རྒྱུ་སྟེ།

    ཡ་རབས་ངང་དུར་མཆོད་བྱེད་པ་དང་སྲོལ་བཟང་རྒྱུན་འཛིན་བྱེད་དགོས།  ཤོག་དངུལ་མེར་སྲེག་གཏོང་བ་དང་ཤོག་སྦག་སྤོར་བ་སོགས་སྲོལ་རྒྱུན་གྱི་དུར་མཆོད་བྱེད་སྟངས་དོར་ནས། མེ་ཏོག་འབུལ་བ་སོགས་ཡ་རབས་དང་སྟབས་བདེའི་རྣམ་པས་ལྗང་མདོག་ཁོར་ཡུག་སྲུང་སྐྱོང་གི་དུར་མཆོད་བྱེད་དགོས།

    དུར་མཆོད་བདེ་འཇགས་མཐའ་འཁྱོངས་བྱས་ནས་ལྗང་མདོག་ཁྱིམ་གཞིས་སྲུང་སྐྱོང་བྱེད་དགོས། དྭངས་གསལ་དུས་ཚིགས་སུ་སྐམ་ཤས་ཆེ་བས། མེ་སྐྱོན་གྱི་མངོན་མེད་རྐྱེན་ངན་མངོན་གསལ་དོད་པ། ནགས་ཚལ་གྱི་མེ་འགོག་དང་འབར་གས་བཀག་འགོག་གི་གཏན་འབེབས་ལ་བརྩི་སྲུང་ནན་པོ་བྱས་ཏེ་ནགས་རི་དང་། རྩྭ་ཐང་། སྤྱི་པའི་བང་སོ་སོགས་ས་ཁོངས་སུ་མེ་མི་སྤྱོད་པ་དང་། འབར་གས་སླ་བའི་དངོས་རྫས་འཁྱེར་ནས་དུར་མཆོད་མི་བྱེད་པ། སྒྲིག་འགལ་ངང་མཆོད་རྫས་མེར་སྲེག་མི་གཏོང་བ་བཅས་བྱེད་དགོས། ཡ་རབས་ངང་ཕྱིར་སྐྱོད་དར་སྤེལ་གཏོང་བ་དང་འགྲིམ་འགྲུལ་སྒྲིག་སྲོལ་ལ་རང་རྟོགས་ངང་བརྩི་སྲུང་བྱས་ནས་དུར་མཆོད་གོ་རིམ་ལྡན་པ་ཡོང་བར་འགན་ལེན་བྱེད་དགོས།

    “རྒན་བཀུར་གཉེན་གཅེས”ཀྱི་སྲོལ་རྒྱུན་སྤྱོད་བཟང་རྒྱུན་འཛིན་བྱེད་དགོས། རྒན་རབས་འཚོ་བཞུགས་སྐབས་སྲི་ཞུ་དང་བྱམས་སྐྱོང་མང་ཙམ་བྱས་ནས་རྒན་རྒོན་ཚེ་མཇུག་སྐྱིད་པོ་ཡོང་བ་དང་། བྱ་སྤྱོད་དངོས་ཀྱི་ཐོག་ནས་སྲི་ཞུ་སྒྲུབ་པ། བསམ་པའི་ཉམས་འགྱུར་བཟང་པོར་བརྟེན་ནས་ཁྱིམ་རྒྱུད་ཀྱི་སྤྱོད་བཟང་རྒྱུན་འཛིན་བྱེད་པ། དུས་རབས་ཀྱི་སྲོལ་བཟང་དར་སྤེལ་གཏོང་བ་བཅས་བྱེད་དགོས།

    སྣོད་བཅུད་པུར་འཇུག་ཁྱབ་གདལ་བཏང་ནས་པུར་འཇུག་གི་སྲོལ་གསར་གཏོད་དགོས། ལྗང་མདོག་གི་པུར་འཇུག་བྱེད་ཐབས་སྤྱད་དེས་ས་ཞིང་མི་བཟུང་བའམ་ས་ཞིང་ཉུང་འཛིན་བྱེད་པའི་སྐྱེ་ཁམས་ཀྱི་པུར་འཇུག་བྱེད་ཐབས་སྤྱོད་དགོས།  ལྗང་མདོག་སྣོད་བཅུད་དང་ཤེས་དཔལ་གྲོན་ཆུང་གི་པུར་འཇུག་བྱེད་སྟངས་ཁྱབ་གདལ་གཏོང་དགོས།

    གསར་བརྗེའི་སྔོན་གཤེགས་དཔའ་བོར་དྲན་གསོ་ཞུས་ནས་མདུན་སྐྱོད་ཀྱི་སྟོབས་ཤུགས་བསྡུ་ལེན་བྱེད་དགོས།  ང་ཚོས་རྒྱ་ཆེའི་ལས་བྱེད་པ་དང་མང་ཚོགས་ལྷག་པར་དུ་གཞོན་ནུ་ལོ་ཆུང་ཚོར་སྔོན་གཤེགས་དཔའ་བོའི་བང་སོ་མཇལ་བ་དང་། སྔོན་གཤེགས་དཔའ་བོར་དྲན་གསོ་ཞུ་བ། བདེ་ཆེན་དམར་དམག་རྒྱང་སྐྱོད་རྟེན་རྫས་བཤམས་མཛོད་ཁང་ལ་ལྟ་སྐོར་བྱེད་པ་སོགས་ཀྱི་བྱ་ཐབས་བརྒྱུད། དྲན་གསོ་དེ་ལས་སྒྲུབ་ལས་གཏོད་དང་དཔའ་ངར་ཆེན་པོས་སྔོན་ཐོན་བརྩོན་ལེན་བྱེད་པའི་སྒུལ་ཤུགས་ཆེན་པོར་འགྱུར་བ་བྱེད་དགོས་པའི་གྲོས་འགོ་བཏོན།

    ཏང་ཡོན་ལས་བྱེད་པས་སྣེ་ཁྲིད་དེ་དུས་རབས་ཀྱི་དར་སྲོལ་གསར་པར་སྣེ་ཁྲིད་བྱེད་དགོས། ཁུལ་ཡོངས་ཀྱི་རྒྱ་ཆེའི་ཏང་ཡོན་ལས་བྱེད་པ་དང་གཞུང་ལས་པས་སྣེ་ཁྲིད་དཔེ་སྟོན་དང་། སྣེ་ཁྲིད་དེ་ཡ་རབས་གྲོན་ཆུང་ངང་འདས་མཆོད་གཉེར་བ། སྣེ་ཁྲིད་དེ་ཡ་རབས་ཐཱན་ཉུང་དུར་མཆོད་བྱེད་པ། སྣེ་ཁྲིད་དེ་པུར་འཇུག་སྒྱུར་བཅོས་དང་གོམས་སྲོལ་སྒྱུར་བཅོས་དྲིལ་བསྒྲགས་བྱེད་པ། བྱ་སྤྱོད་དངོས་ཀྱི་ཐོག་ནས་དཔེ་སྟོན་སྣེ་ཁྲིད་བྱེད་པ་བཅས་བྱས་ཏེ་སྤྱི་ཚོགས་ཡོངས་སུ་ཡ་རབས་ངང་དུར་མཆོད་གི་དར་སྲོལ་བཟང་པོ་ཞིག་ཆགས་རྒྱུར་སྣེ་ཁྲིད་བྱེད་དགོས།

    ང་ཚོས་ལག་གདང་སྦྲེལ་བ་དང་། རང་ངོས་ནས་འགོ་འཛུགས་པ། ད་ལྟ་ནས་འགོ་འཛུགས་པ་བཅས་བྱས་ཏེ་ལུགས་རྙིང་སྲོལ་ངན་རང་རྟོགས་ངང་བཀག་འགོག་བྱེད་པ་དང་། ཡ་རབས་སྲོལ་གསར་གྱི་དར་སྤེལ་གཏོང་མཁན་དང་། བརྒྱུད་སྤེལ་བྱེད་མཁན། ལག་ལེན་བསྟར་མཁན་བཅས་བརྩོན་ལེན་བྱེད་པ། ཡ་རབས་ཀྱི་བྱ་སྤྱོད་དང་། བདེ་འཇགས་ཀྱི་བྱ་སྤྱོད། ལྗང་མདོག་གི་འདུ་ཤེས་བཅས་ལ་བརྟེན་ནས་ཡ་རབས་དང་། བདེ་འཇགས། ཐཱན་ཉུང་། འཆམ་མཐུན་བཅས་ཀྱི་དྭངས་གསལ་དུས་ཚིགས་ཤིག་མཉམ་དུ་གཏོང་དགོས།

ཀྲུང་གུང་བདེ་ཆེན་ཁུལ་ཨུའི་བསམ་པའི་དཔལ་ཡོན་འཛུགས་སྐྲུན་གཞུང་ལས་ཁང་།

བདེ་ཆེན་ཁུལ་དམངས་སྲིད་ཅུས།

2026ལོའི་ཟླ་3པའི་ཚེས་27ཉིན།