ཉེ་བའི་ལོ་ཤས་རིང་། བདེ་ཆེན་ཁུལ་གྱིས་སྐྱེ་ཁམས་ཀྱི་ཁྱད་ཆོས་དང་མི་རིགས་རིག་གནས་ཀྱི་ལེགས་ཆ་ལ་གཞི་ཚུགས་ཏེ། གྲོང་གསེབ་ཀྱི་ཡུལ་སྐོར་རྣམ་པ་གསར་གཏོད་དང་ཐོན་རྫས་རིམ་སྤོར། ཞབས་ཞུ་ལེགས་བཅོས་བཅས་མུ་མཐུད་དུ་སྐུལ་འདེད་བཏང་ནས།  གྲོང་གསེབ་ཀྱི་ཡུལ་སྐོར་དེ་མང་ཚོགས་ཀྱི་འབབ་འཕར་ལ་སྐུལ་ཁྲིད་དང་གྲོང་གསེབ་དར་རྒྱས་ལ་རམ་འདེགས་བྱེད་པའི་སྒུལ་ཤུགས་གལ་ཆེན་ཞིག་ཏུ་འགྱུར།  

འབའ་ལུང་རྫོང་མཐའ་ཆུ་གྲོང་རྡལ་ཆི་པའེ་གྲོང་ཚོས་སྐྱེ་ཁམས་ཁོར་ཡུག་ཡག་པོ་དང་མི་རིགས་མང་པོའི་རིག་གནས་ཐོན་ཁུངས་ལ་བརྟེན་ནས།  ཏང་འཛུགས་སྐྱོང་དང་མཉམ་ལས་ཁང་།  ཁེ་ལས།  ཞིང་དུད་བཅས་ཟུང་དུ་འབྲེལ་བའི་འཕེལ་རྒྱས་ཀྱི་རྣམ་པ་གསར་གཏོད་བྱས་ཏེ།  སྤུས་ལེགས་ཚོང་རྟགས་ནང་འདྲེན་བྱས་ནས་སྤུས་ལེགས་ཀྱི་དམངས་སྲོལ་མགྲོན་ཁང་བཞེངས་སྐྲུན་བྱེད་ཅིང་། དམངས་ཀྱི་སྡོད་ཁང་བེད་སྤྱོད་གཏོང་བ་དང་གྲོང་གསེབ་ཀྱི་ཐོན་ཁུངས་བསྡུ་སྒྲིལ་བྱས་ཏེ།  གྲོང་མིས་སྡོད་ཁང་དང་ས་ཞིང་སོགས་ཐོན་ཁུངས་མ་རྐང་ནང་ཞུགས་པར་བརྟེན་ནས།  ཁེ་སྤོགས་བགོ་བ་བརྟན་པོ་ཡིན་པ་དང་ཉེ་འགྲམ་དུ་ལས་ཞུགས་ཐུབ།  མིག་སྔར་བར།  གྲོང་ཚོ་ཡོངས་ཀྱི་དམངས་སྲོལ་མགྲོན་ཁང་གི་ཐོན་ལས་བརྒྱུད་མི་ཆིག་སྟོང་ཙམ་ལས་ཞུགས་ཐུབ་ཏེ།  ལོ་རེའི་དཔལ་འབྱོར་ཡོང་འབབ་སྒོར་བྱེ་བ་གཅིག་ས་ཡ་བརྒྱད་ཙམ་ཟིན་པ་དང་། ལས་ཞུགས་ཞིང་དུད་ལ་ལོ་རེར་ཆ་སྙོམས་ཡོང་འབབ་སྒོར་ཁྲི་བདུན་ལྷག་ཙམ་བྱུང་ནས། མི་སེར་གྱི་སྡོད་ཁང་དེ་དམངས་སྲོལ་མགྲོན་ཁང་དུ་གྱུར་པ་དང་། ཐོན་ཁུངས་དེ་མ་རྩར་གྱུར་པ། གྲོང་མི་དེ་མ་རྐང་འཇོག་མཁན་དུ་གྱུར་པར་མངོན་འགྱུར་བྱུང་།

འཇོལ་རྫོང་ཐུང་ལེ་གྲོང་ཚོས་ལི་སུའུ་རིགས་ཀྱི་སྲོལ་རྒྱུན་གྱི་ཁང་པ་དང་མངོན་མིན་རིག་གནས་ཤུལ་བཞག་གི་རིག་གནས་སྲུང་སྐྱོང་བྱས་ནས།  གྲོང་ཚོ་དེས་གདོད་མའི་རིག་གནས་ལ་བརྟེན་ནས་མྱོང་རོལ་རྣམ་པའི་ཡུལ་སྐོར་ཐོན་རྫས་བཞེངས་སྐྲུན་བྱས་ཏེ།  ཡུལ་སྐོར་བར་ལི་སུའུ་རིགས་ཀྱི་སྲོལ་རྒྱུན་རིག་གནས་མྱོང་རོལ་བྱེད་དུ་བཅུག  དེ་དང་དུས་མཚུངས་སུ།  བདེ་ཆེན་ཁུལ་གྱིས་མངོན་མིན་རིག་གནས་ཤུལ་བཞག་གི་བཟོ་ཁང་རྟེན་གཞི་རུ་བྱས་ནས། གྲོང་གསེབ་ཀྱི་རིག་གནས་གསར་གཏོད་ཐོན་རྫས་གསར་སྤེལ་བྱས་ཏེ།  རོང་པའི་རྫ་ནག་སོགས་མངོན་མིན་རིག་གནས་ཤུལ་བཞག་གི་ལག་རྩལ་དང་ཡུལ་སྐོར་མཉམ་འདྲེས་གཏིང་ཟབ་བྱེད་པར་སྐུལ་འདེད་བཏང་སྟེ།  གྲོང་གསེབ་ཀྱི་ཡུལ་སྐོར་ཁྲོད་སྲོལ་རྒྱུན་རིག་གནས་ལ་གསོན་ཤུགས་རྒྱས་སུ་བཅུག 

འཇོལ་རྫོང་གིས་ཚ་སྐམ་ཆེ་བའི་ལུང་ཤུར་གྱི་ལེགས་ཆ་ལ་བརྟེན་ནས།  རྒུན་འབྲུམ་འདེབས་འཛུགས་ཐོན་ལས་རྨང་གཞིར་བྱས་ཏེ།  ཞིང་ལས་ཀྱི་མཛེས་ལྗོངས་དང་།  ཁྱད་ལྡན་ཞིང་ལས་དང་ཡུལ་སྐོར་མྱོང་རོལ་ཟུང་འབྲེལ་བྱས་ནས།  ལྟ་སྐོར་དང་འཐོག་པའི་ནུས་པའི་ཞིང་ལས་དང་ཡུལ་སྐོར་མཉམ་འདྲེས་ཀྱི་དཔེ་སྟོན་ས་ཚིགས་བཞེངས་སྐྲུན་བྱེད། འབའ་ལུང་རྫོང་ཕན་ཐན་གོ་ཤང་གི་འབྲས་ནག་འདེབས་འཛུགས་དང་རི་སྐྱེས་ཤ་མོ་སོགས་ཁྱད་ལྡན་ཐོན་ཁུངས་ལ་བརྟེན་ནས།  ཞིང་ལས་ཉམས་ལེན་དང་ཞིང་སྡེའི་ཡུལ་སྐོར་སོགས་ལས་རྣམ་འཕེལ་རྒྱས་བཏང་སྟེ་གྲོང་མིའི་འབབ་འཕར་ཡོང་དུ་བཅུག

པོ་ཏ་མཚོ་མཛེས་ལྗོངས་ཁུལ་ལམ་བཟང་གྲོང་ཚོ་དང་། སྨན་རི་གངས་རི་མཛེས་ལྗོངས་ཁུལ་གྱི་མཐའ་འཁོར་གྱི་གྲོང་ཚོས་མཛེས་ལྗོངས་ཁུལ་གཙོ་བོའི་འགྲུལ་པ་ཕར་ཚུར་འགྲོ་ཚད་ཀྱི་ལེགས་ཆ་ལ་བརྟེན་ནས།  ཞག་སྡོད་དང་བཟའ་བཏུང་། ལམ་ཁྲིད་ཞབས་ཞུ་སོགས་ཆ་ཚང་བའི་ཐོན་ལས་འཕེལ་རྒྱས་བཏང་སྟེ། གྲོང་མིར་ཡུལ་སྐོར་འཕེལ་རྒྱས་ཀྱི་ཁེ་ཕན་མཉམ་སྤྱོད་བྱེད་དུ་བཅུག དེ་དང་དུས་མཚུངས་སུ།  ཡུན་ནན་གྱི་འཚོ་བ་ཞེས་པའི་རིགས་ལྔའི་རྣམ་གྲངས་ཀྱི་བྱེད་སྒོ་གསར་གཏོད་བྱས་ནས་སྤེལ་ཏེ།  ཡུལ་སྐོར་བ་དང་མང་ཚོགས་རྩ་འཛུགས་བྱས་ནས་མཉམ་དུ་དམངས་གཞས་ལེན་པ་དང་ཞབས་བྲོ་འཁྲབ་པ། སྒྲུང་གཏམ་ཤོད་པ། མཛེས་ལྗོངས་ལ་ལྟ་བ། ཟས་མཆོག་ལ་རོལ་བ་བཅས་བྱས་ནས། མངོན་མིན་རིག་གནས་ཤུལ་བཞག་གི་བཟོ་ཁང་བཞེངས་སྐྲུན་བྱེད་པ་དང་གྲོང་གསེབ་ཀྱི་རིག་གནས་གསར་གཏོད་ཐོན་རྫས་གསར་སྤེལ་བྱས་པས།  གྲོང་གསེབ་ཡུལ་སྐོར་ནང་ཞུགས་པའི་བསམ་པ་དང་ཉམས་ལེན་བྱེད་སེམས་ཆེ་རུ་ཕྱིན།    

མིག་སྔར་བར།  བདེ་ཆེན་ཁུལ་དུ་ཞིང་ཆེན་རིམ་པའི་ཡུལ་སྐོར་གྲོང་རྡལ་གྲགས་ཅན་ལྔ་དང་། རྒྱལ་ཡོངས་ཀྱི་གྲོང་གསེབ་ཀྱི་ཡུལ་སྐོར་གྲོང་ཚོ་གཙོ་བོ་གསུམ། ཞིང་ཆེན་རིམ་པའི་གྲོང་གསེབ་ཡུལ་སྐོར་གྱི་གྲོང་རྡལ་གཙོ་བོ་གསུམ་བཅས་བསྐྲུན་ཏེ། རྒྱལ་ཡོངས་ཀྱི་གྲོང་གསེབ་རིག་གནས་དང་ཡུལ་སྐོར་གྱི་སྣེ་ཁྲིད་པ་བཅུ་གཉིས་གསོ་སྐྱོང་བྱས་པ་དང་། ཡུལ་སྐོར་དམངས་སྲོལ་མགྲོན་ཁང་ཉིས་སྟོང་སུམ་བརྒྱ་དོན་གཉིས་འཕེལ་རྒྱས་གཏོང་བ། ཐད་ཀར་ལས་ཞུགས་མི་སྣ་ཁྲི་ལྷག་ཡོད་པས། ཐོན་ལས་ཀྱི་སྣེ་ཁྲིད་ནུས་པ་མུ་མཐུད་མངོན་གསལ་དོད་པོ་ཕྱིན།