ཡར་ཀླུང་གཙང་པོའི་ལུང་གཞུང་དུ་ཁམ་བུའི་མེ་ཏོག་རབ་ཏུ་བཞད་ཅིང་། ཡུལ་སྐོར་བ་མང་པོས་ས་མཐོའི་བསྐྱར་དར་རྟགས་ཅན་གྱི་མེ་འཁོར་ལ་བསྡད་ནས་བོད་ཀྱི་ཉིང་ཁྲིར་མེ་ཏོག་གི་མཛེས་ལྗོངས་ལ་ལྟ་བར་བསྐྱོད།

ལོ་རེའི་ཟླ་3པའི་ཟླ་མཇུག་ནས་ཟླ་4པའི་ཟླ་འགོར། ལམ་ཐིག་དེར་ཡུལ་སྐོར་བ་མང་ཤོས་ཀྱི་དུས་སྐབས་ཡིན་ཞིང་། ཉིང་ཁྲིའི་ཁམ་བུའི་མེ་ཏོག་གི་སྙན་པ་མི་མང་པོའི་རྣ་བར་ཐོས་ནས“མེ་འཁོར་ལ་བསྡད་དེ་ཁམ་བུའི་མེ་ཏོག་ལ་ལྟ་བར” ཡོང་གི་ཡོད།

མེ་འཁོར་གྱི་ཁ་ལོ་བ་བསོད་ནམས་དབང་གྲགས་ཀྱི་ངོས་ནས་བརྗོད་ན། ཁོང་གིས་མཐོང་བ་ནི་རང་བྱུང་གི་མཛེས་ལྗོངས་རྐྱང་པ་ཙམ་ཞིག་མིན་པར། ལྕགས་ལམ་ལས་གྲྭའི་འཛུགས་སྐྲུན་གྱི་ངོ་མཚར་རེད། ལྷ་ས་ནས་ཉིང་ཁྲིའི་བར་རི་མཐོ་གཡང་གཟར་དང་གཙང་པོ་དང་ཆུ་བོ་མང་པོ་ཡོད་པ་དང་། 2003ལོར་བསོད་ནམས་དབང་གྲགས་ཕ་ཡུལ་ཆབ་མདོ་ནས་ཁ་བྲལ་ཏེ་ཀན་སུའུ་ལན་ཀྲོའུ་རུ་སློབ་སྦྱོང་བྱེད་པར་བསྐྱོད་པ་རེད། དེ་ནི་ཁོང་མེ་འཁོར་ལ་སྡོད་ཐེངས་དང་པོ་རེད། ཁོང་མེ་འཁོར་ནང་སྡོད་སྐབས“ངའི་ཕ་ཡུལ་ལ་མེ་འཁོར་ག་དུས་ཤར་གཏོང་ཐུབ་བམ”སྙམ།

2021ལོའི་ཟླ་6ཚེས་25ཉིན། ལྷ་ས་ནས་ཉིང་ཁྲི་བར་གྱི་ལྕགས་ལམ་དངོས་སུ་ཤར་གཏོང་ཐུབ་སྟེ་བོད་དུ་གློག་ཤུགས་ཅན་གྱི་ལྕགས་ལམ་ཐོག་མ་དེ་ཐོན་ཞིང་། ནང་འབར་དང་གློག་ཤུགས་ནུས་རྒྱུ་གཉིས་ལྡན་གྱི་ཤུགས་འགྲེམས་མེ་འཁོར་དུས་གཅིག་ཏུ་ལས་གཉེར་བྱེད་འགོ་ཚུགས་པ་དང་། ལྷ་ས་ནས་ཉིང་ཁྲི་བར་མགྱོགས་ཤོས་སུ་ཆུ་ཚོད་3དང་སྐར་མ་49ལས་འགོར་གྱི་མེད། ལོ་རྒྱུས་རང་བཞིན་གྱི་སྒོ་ནས་བསྐྱར་དར་རྟགས་ཅན་དེ་ཞིང་ཆེན(རང་སྐྱོང་ལྗོངས་དང་གྲོང་ཁྱེར)31ལ་ཁྱབ་ཡོད། ལྕགས་ལམ་དེས་བོད་ཤར་ལྷོའི་རྒྱུད་དུ་ལྕགས་ལམ་ཤར་གཏོང་མི་ཐུབ་པའི་ལོ་རྒྱུས་མཇུག་འགྲིལ་བ་མ་ཟད། ལྷ་ས་དང་། ལྷོ་ཁ། ཉིང་ཁྲི་བཅས་ས་ཁུལ་གསུམ་གྱི་ཕུན་སུམ་ཚོགས་པའི་རིག་གནས་ཡུལ་སྐོར་ཐོན་ཁུངས་སྦྲེལ་མཐུད་ཐུབ་ནས། ས་ཁོངས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་དང་། མི་རིགས་མཐུན་སྒྲིལ་ལ་སྐུལ་འདེད། དམངས་འཚོ་ལེགས་སུ་གཏོང་བ་བཅས་ཀྱི་སྒུལ་ཤུགས་ཆེན་པོར་གྱུར་ཡོད། ན་ནིང་ལོ་མཇུག་བར། ལྷ་ཉིང་ལྕགས་ལམ་གྱིས་འགྲུལ་པ་མི་ཐེངས་ཁྲི་575ལྷག་ཙམ་སྐྱེལ་འདྲེན་བྱས་པ་དང་དངོས་ཟོག་དབོར་འདྲེན་བྱེད་ཚད་ཏུན་ཁྲི་173.8ལས་བརྒལ་ཡོད་པ་རེད།

ལམ་ཐག་ཧྲིལ་པོར་སྤྱི་ལེ་435.48ཟིན་པ་དང་ཆུ་ཚོད་རེའི་མྱུར་ཚད་སྤྱི་ལེ་160ཟིན་པའི་ལྕགས་ལམ་དེ་མཚོ་བོད་ས་མཐོའི་གངས་ཏི་སེ་དང་ཧི་མ་ལ་ཡའི་བར་གྱི་བོད་ཤར་ལྷོའི་ལུང་གཞུང་དུ་བསྲིངས་ཡོད་པ་དང་། 90%ཡན་གྱི་ལམ་ཐིག་ས་བབ་སྨི་3000ཡན་དུ་ཡོད་པ། ཡར་ཀླུང་གཙང་པོ་ཐེངས་16བརྒལ་བ། ལམ་རྒྱུད་དུ་རི་མཐོ་གཡང་གཟར་གྱི་མཐོ་ཚད་ཧེ་བག་2500ཡོད་པ་བཅས་རེད།