སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཉེ་ཆར། བདེ་ཆེན་ཁུལ་གྱི་2025ལོ་འཁོར་གྱི་གཞོན་ནུ་ཡིས་ལས་གཏོད་བྱས་ནས་ཕ་ཡུལ་དར་རྒྱས་གཏོང་བ་དང་བདེ་ཆེན་གྱི་གསར་གཏོད་ལས་གཏོད་མཁས་ཅན་ཞེས་པའི་འགྲན་བསྡུར་ཆེན་པོའི་བྱ་དགའ་སྤྲོད་པའི་མཛད་སྒོ་དེ་སེམས་ཀྱི་ཉི་ཟླ་མགྲོན་ཁང་ཆེན་པོར་སྤེལ། ཁུལ་ཨུ་ཧྲུའུ་ཅི་གཞོན་པ། ཁུལ་དཔོན་ཀྲང་ཝེ་ཏུང་གིས་བྱ་དགའ་ཐོབ་པའི་ལས་གཏོད་པར་བྱ་དགའ་སྤྲོད་པ་མ་ཟད། ཁུལ་ཡོངས་ཀྱི་གཞོན་ནུ་ལས་གཏོད་ལ་རྒྱབ་སྐྱོར་ལས་དོན་བཀོད་སྒྲིག་བྱས། གུང་གཞོན་ཚོགས་པ་ཡུན་ནན་ཞིང་ཨུའི་ཧྲུའུ་ཅི་གཞོན་པ་ལི་ཡུང་ཝེ་དང་བདེ་ཆེན་ཁུལ་ཨུའི་ཧྲུའུ་ཅི་གཞོན་པ་ཞུས་སི་སི་བྱེད་སྒོར་ཞུགས།

ཀྲང་ཝེ་ཏུང་གིས་གསུང་བཤད་གནང་སྐབས། རྒྱ་ཆེའི་གཞོན་ནུ་ལས་གཏོད་པས་ཕ་ཡུལ་གྱི་ས་ཆའི་ཐོག་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་དང་། ཁོ་ཚོའི་ལག་ལེན་ནི་བདེ་ཆེན་འཕེལ་རྒྱས་ཁྲོད་མེད་དུ་མི་རུང་བའི་གསར་གཏོད་ཆུང་ངུ་ཞེས་པ་དང་གྲོང་གསེབ་དར་རྒྱས་ཀྱི་སྟོབས་ཤུགས་བརྟན་པོ་ཞིག་ཡིན་བཏོན་ཞིང་། ཁུལ་ཡོངས་ཀྱི་གཞོན་ནུ་ལས་གཏོད་པར་རེ་བ་གསུམ་བཏོན་ཏེ་གཅིག་ནི་གསར་གཏོད་ལས་གཏོད་ཀྱི་གདོང་ལེན་པར་བརྩོན་ལེན་བྱས་ནས་ས་གནས་འཕེལ་རྒྱས་ཀྱི་ཁྱོན་ཡོངས་ལ་ཞབས་ཞུ་བྱས། མི་སྒེར་གྱི་འཚར་ལོངས་དེ་ས་ཁོངས་དར་རྒྱས་དང་མཉམ་འདྲེས་བྱེད། གཉིས་ནི་ལས་གཏོད་ཕྱུག་འགྱུར་གྱི་མི་འཇོན་མོ་ཞིག་བརྩོན་ལེན་བྱེད་པ་དང་སྣ་མང་གི་ནུས་པ་སྦྱོང་བརྡར་བྱེད་དེ་སྤྱི་ཚོགས་ཀྱི་འགན་འཁྲི་ཤུགས་ཆེ་རུ་གཏོང་ཞིང་མང་ཚོགས་ཐུན་མོང་ཐོག་ཕྱུག་འགྱུར་ཡོང་བར་སྐུལ་ཁྲིད་བྱེད། གསུམ་ནི་སྤོབས་པ་ཆེན་པོས་སྤུས་ཚད་མཐོ་བའི་འཕེལ་རྒྱས་ཀྱི་དཔེ་ལྟ་ས་བྱས་ནས་མཐུན་སྦྱོར་ཤུགས་ཆེན་བྱེད་ཅིང་ཐུན་མོང་ཐོག་འཛམ་གླིང་གི་སེམས་ཀྱི་ཉི་ཟླ་ཞེས་པའི་སྤུས་རྟགས་སྟོབས་ཆེ་རུ་གཏོང་དགོས་ཞེས་བཅས་ཡིན། 

ཀྲུང་ཝེ་ཏུང་གིས་ཁུལ་ཡོངས་རིམ་པ་ཁག་གི་ལས་ཁུངས་སོ་སོས་འགན་འཁྲི་ཏན་ཏིག་སྒྲུབ་དགོས་པ་དང་དུས་ཡུན་ཡོངས་ཀྱི་ལས་གཏོད་ཞབས་ཞུའི་མ་ལག་འཛུགས་པ། སྒྲིག་སྲོལ་ལམ་སྲོལ་གྱི་འགོག་རྐྱེན་མེད་པར་བཟོས་ནས་ཚོང་གཉེར་ཁོར་ཡུག་རྩེ་གྲ་གཏོད་པ། གཞོན་ནུ་རྣམས་རིག་གནས་ཡུལ་སྐོར་དང་མཐོ་སྒང་གི་ཁྱད་ཆོས་ལྡན་པའི་ཞིང་ལས་སོགས་དགེ་མཚན་ལྡན་པའི་ཐོན་ལས་ལ་དམིགས་པ་དང་། སྐྱེ་ཁམས་དང་རིག་གནས་ཀྱིས་གཞན་དང་ཟུང་འབྲེལ་བྱེད་པའི་མཉམ་འདྲེས་ཀྱི་ལས་རྣམ་གསར་པ་འཚོལ་ཞིབ་བྱས་ནས་གཞོན་ནུ་རྣམས་ཕ་ཡུལ་དུ་རྩ་བ་ཚུགས་ནས་ཕ་ཡུལ་ལ་དྲིན་ལན་འཇལ་བའི་སྤྲོ་སེམས་དང་ནུས་ཤུགས་སྐུལ་སློང་གང་ཐུབ་བྱེད་དགོས་པའི་བླང་བྱ་བཏོན།