ཀྲུང་དབྱང་དང་ཞིང་ཨུའི་བཀོད་སྒྲིག་དང་ཁུལ་ཨུའི་གཅིག་གྱུར་བཀོད་སྒྲིག་ལྟར། ཟླ་2པའི་ཚེས་11ཉིན་གྱི་དགོང་མོར། ཁུལ་སྲིད་གཞུང་གི་ཏང་ཙུའུ་འགོ་ཁྲིད་ཚན་ཁག་གིས་2025ལོའི་ལོ་འཁོར་གྱི་དམངས་གཙོ་འཚོ་བའི་ཚོགས་འདུ་འཚོགས་ནས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་གཏིང་ཟབ་བྱེད་པ་དང་། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་ཀྱི་གྲོས་ཚོགས་ཐེངས་བཞི་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཡུན་ནན་དུ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད། ཆབ་སྲིད་ཐད་ལྷག་བསམ་དག་པ་དང་། སྒྲིག་ཁྲིམས་ཀྱི་གཅུན་སྡོམ་བྱེད་ཤུགས་ཆེ་རུ་གཏོང་བ། སྤྱོད་ཚུལ་བཟང་པོ་དར་སྤེལ་གཏོང་བ་བཅས་བྱས་ནས། སློབ་སྦྱོང་གི་གྲུབ་འབྲས་དང་སྤྱོད་ཚུལ་འཛུགས་སྐྱོང་གི་ཕན་འབྲས་དེ་དངོས་སྒྲུབ་སྒུལ་ཤུགས་སུ་བསྒྱུར་ནས་ཀྲུང་གོའི་ལུགས་ཀྱི་དེང་རབས་ཅན་གྱི་བདེ་ཆེན་གྱི་ལེའུ་གསར་པ་ཧུར་ཐག་ངང་རྩོམ་ཡོད།

   ཁུལ་སྲིད་གཞུང་གི་ཏང་ཙུའུ་ཧྲུའུ་ཅི། ཁུལ་དཔོན་ཀྲང་ཝེ་ཏུང་གིས་ཚོགས་འདུ་གཙོ་སྐྱོང་གནང་བ་དང་གསུང་བཤད་ཀྱང་གནང་བ། ཁུལ་ཨུའི་ལྟ་སྐུལ་མཛུབ་ཁྲིད་ཚོགས་ཆུང་གཉིས་པའི་འབྲེལ་ཡོད་བློ་མཐུན་ཚོགས་འདུར་མཛུབ་ཁྲིད་གནང་བར་ཕེབས།

   ཚོགས་འདུ་མ་འཚོགས་གོང་། ཁུལ་སྲིད་གཞུང་ཏང་ཙུའུ་ཡིས་རིགས་པའི་གཞུང་ལུགས་སློབ་སྦྱོང་བྱེད་ཤུགས་ཆེ་རུ་བཏང་བ་དང་། བསམ་འཆར་རྒྱ་ཁྱབ་ངང་བསྡུ་ལེན་བྱས་པ། སྙིང་གཏམ་ཤོད་རེས་དང་གླེང་མོལ་གཏིང་ཟབ་བྱས་པ། ཞིབ་བསྡུར་དབྱེ་ཞིབ་ནན་ཏན་བྱས་པ། ཞིབ་བཤེར་གོ་རིམ་ལག་བསྟར་ནན་པོ་བྱས་ནས། གྲ་སྒྲིག་ལས་དོན་ཁག་ཏན་ཏིག་ངང་ཡག་པོ་བསྒྲུབས་ཡོད། ཚོགས་འདུའི་ཐོག་ཁུལ་སྲིད་གཞུང་གི་ཏང་ཙུའུ་འགོ་ཁྲིད་ཚན་ཁག་གིས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་སློབ་སྦྱོང་དང་། སློབ་གསོ། བཅོས་སྒྲིག་བཅས་ཀྱི་གནས་ཚུལ། 2024ལོའི་ལོ་འཁོར་གྱི་དམངས་གཙོའི་འཚོ་བའི་ཚོགས་འདུ་དང་གྱོད་གཞིར་བརྟེན་ནས་བཅོས་སྒྲིག་ལ་སྐུལ་འདེད་གཏོང་བའི་ཆེད་དོན་དམངས་གཙོ་འཚོ་བའི་ཚོགས་འདུའི་བཅོས་སྒྲིག་དོན་འཁྱོལ་བྱས་ཚུལ་བརྡ་ཁྱབ་བཏང་བ། ཀྲང་ཝེ་ཏུང་གིས་ཁུལ་སྲིད་གཞུང་གི་ཏང་ཙུའུ་ཡི་ཚབ་ཞུས་ནས་ཞིབ་བསྡུར་སྐྱོན་བཤེར་དང་སྣེ་ཁྲིད་དེ་མི་སྒེར་གྱི་དབྱེ་ཞིབ་བྱས། ཏང་ཙུའི་ཁོངས་མི་གཞན་དག་གིས་རེ་རེ་བཞིན་ཞིབ་བསྡུར་སྐྱོན་བཤེར་བྱས་ནས་སྐྱོན་བརྗོད་དང་རང་སྐྱོན་རང་བརྗོད་ནན་ཏན་བྱས། ཀྲང་ཝེ་ཏུང་གིས་ཕྱོགས་བསྡོམས་གནང་སྐབས ད་ཐེངས་ཀྱི་དམངས་གཙོ་འཚོ་བའི་ཚོགས་འདུར་ཚང་མས་དངོས་ཐོག་བདེན་འཚོལ་དང་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱས་ནས། ཚོགས་འདུའི་བརྗོད་དོན་གཙོ་བོ་དམ་པོར་དམིགས་པ་དང་གནད་དོན་མི་འདང་བར་གནད་འཕིགས་ཞིབ་བཤེར་བྱས་ཏེ། བསམ་བློ་གཅིག་གྱུར་དང་། མཐུན་སྒྲིལ་ཟབ་གཏོང་། ལས་དོན་ལེགས་གཏོང་བཅས་ཀྱི་སྔོན་དཔག་དམིགས་ཚད་མངོན་འགྱུར་བྱུང་ཡོད།

ཀྲང་ཝེ་ཏུང་གིས་དམངས་གཙོ་འཚོ་བ་ཚོགས་འདུའི་གྲུབ་འབྲས་བེད་སྤྱོད་ཡག་པོ་བྱས་ནས་ཆབ་སྲིད་ཀྱི་ཁ་ཕྱོགས་བརྟན་དུ་གཏོང་བ། ཐོག་མཐའ་བར་གསུམ་དུ་ཏང་གི་ཆབ་སྲིད་འཛུགས་སྐྱོང་ཨང་དང་པོར་འཇོག་པ། “གྲོས་གཞི་ཨང་དང་པོའི”ལམ་ལུགས་ལག་བསྟར་ནན་པོ་བྱེད་པ། “དོན་ཆེན་བཞི”ལ་དམ་པོར་དམིགས་པ། “ཆབ་སྲིད་ཀྱི་ནུས་པ་གསུམ་”རྒྱུན་ཆད་མེད་པས་མཐོ་རུ་གཏོང་བ་བཅས་བྱས་ནས་ཁུལ་ཡོངས་ཀྱི་ལས་དོན་ཁག་ཐོག་མཐའ་བར་གསུམ་དུ་ཏང་ཀྲུང་དབྱང་གི་བཀོད་སྒྲིག་ཁ་ཕྱོགས་སུ་མདུན་སྐྱོད་ཐུབ་པའི་འགན་ལེན་བྱེད་དགོས། ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་བ་དང་། དཀའ་གནད་དག་ཐེར་དང་སེལ་རྒྱུར་དམ་འཛིན་ནན་པོ་བྱེད། རང་འགུལ་ངང་ལས་བྱེད་པ་དང་མང་ཚོགས་ཀྱི་ལྟ་སྐུལ་དང་ལེན་བྱེད་པ། དག་ཐེར་གྱི་ཕན་འབྲས་དངོས་ལ་བརྟེན་ནས་མང་ཚོགས་ཀྱི་དོ་ཁུར་ལ་ལན་བཏབ་སྟེ་སྲིད་གཞུང་ལ་ཀུན་གྱིས་ཡིད་ཆེས་བྱེད་ཚད་མཐོ་རུ་གཏོང་དགོས། སྤུས་ཚད་མཐོ་བའི་འཕེལ་རྒྱས་ལ་དམིགས་པ་དང་། འགན་འཁྲི་འཁུར་ཏེ་འགག་སྒྲོལ་དཀའ་སེལ་བྱེད་པ། སྒྱུར་བཅོས་གསར་གཏོད་བྱེད་ཕོད་པ། འགན་འཁྲི་སྒྲུབ་པའི་ཕན་ནུས་ཆེ་རུ་གཏོང་བ། ཡང་དག་པའི་སྲིད་སྐྱོང་བྱས་རྗེས་ཀྱི་ལྟ་བ་བརྟན་པོ་འཛུགས་པ་དང་ལག་ལེན་བསྟར་བ། སེམས་ནུས་ཡོད་རྒུས་བྱ་བ་བཟང་པོ་དངོས་སུ་སྒྲུབ་པ་དང་། བྱ་བ་དངོས་ཡག་པོ་སྒྲུབ་པ། དཀའ་གནད་ཆེ་བའི་བྱ་བ་སྒྲུབ་པ་བཅས་བྱེད་དགོས། ཏང་དོ་དམ་དང་ཏང་བཅོས་སྐྱོང་གི་འགན་འཁྲི་བློ་བརྟན་འགྱུར་མེད་ངང་འཁུར་བ། སྣེ་ཁྲིད་དེ་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་བྱེད། ཏང་ནང་གི་ཆབ་སྲིད་འཚོ་བ་ནན་དུ་གཏོང་བ། སྣེ་ཁྲིད་དེ་ཧུར་བསྲི་གྲོན་ཆུང་དང་ཡ་རབས་སྤྱོད་གཙང་ངང་དུས་ཆེན་གཏོང་བ། སྤྱོད་གཙང་གཞུང་དྲང་གི་ཆབ་སྲིད་རང་གཤིས་ནམ་ཡང་རྒྱུན་འཁྱོངས་བཅས་བྱས་ནས་སྤྱོད་གཙང་གཞུང་དྲང་གི་ཆབ་སྲིད་ཀྱི་ཁོར་ཡུག་བཟང་པོ་རྒྱུན་མཐུད་གཏོད་དགོས་པའི་ནན་བཤད་གནང་།

   ཀྲུང་གུང་ཏང་ཡོན་མིན་པའི་ཁུལ་དཔོན་གཞོན་པ་ཚོགས་འདུར་ཟུར་ཞུགས་བྱས།