ཉེ་ཆར། རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《ཁེ་ལས་འབྲིང་ཆུང་གི་དངུལ་ལེན་དཀའ་བའི་གནད་དོན་བཅོས་སྒྲིག་ལ་ཤུགས་སྣོན་རྒྱག་པའི་འབྲེལ་ཡོད་ལས་དོན་སྐོར་གྱི་བརྡ་ཐོ》(གཤམ་དུ《བརྡ་ཐོ》ཞེས་བསྡུ་རྒྱུ)བཀྲམ་ནས་ཁེ་ལས་འབྲིང་ཆུང་གི་དངུལ་ལེན་དཀའ་བའི་གནད་དོན་ཁྲིམས་ལྟར་བཅོས་སྒྲིག་བྱེད་པའི་བཀོད་སྒྲིག་བྱས་པ་རེད།

གཅིག་ནས་ལས་རིགས་ཀྱི་རྩིས་དངུལ་གཏོང་སྤྲོད་སྒྲིག་སྲོལ་འཐུས་སྒོ་ཚང་དུ་གཏོང་དགོས་ཤིང་། ལས་རིགས་ཁག་གི་གཙོ་གཉེར་སྡེ་ཚན་གྱིས་དུས་ཐོག་ཏུ་གཏོང་སྤྲོད་རྩིས་དངུལ་གྱི་བླང་བྱ་དེ་ལས་རིགས་དོ་དམ་ནང་འཇུག་པ་མ་ཟད་དོན་འཁྱོལ་ལ་ཤུགས་སྣོན་རྒྱག་དགོས། ལས་རིགས་དེ་གའི་ཁྱབ་ཁོངས་ཀྱི་བསྡོམས་རྩིས་དང་གཏོང་སྤྲོད་དོ་དམ་གྱི་གཏན་འབེབས་བཟོས་ནས་འཐུས་སྒོ་ཚང་དུ་བཏང་སྟེ་རྩིས་རྒྱག་འགོ་ཚུགས་པའི་དུས་ཚོད་དང་། རྩིས་དངུལ་གཏོང་སྤྲོད་བྱེད་སྟངས་དང་དེ་བཞིན་བརྒྱུད་རིམ། དངོས་ཟོག་དང་ཞབས་ཞུ་ཞིབ་བཤེར་རྩིས་ལེན(ཡང་ན་ལས་མཇུག་འགྲིལ་ནས་བསྡོམས་རྩིས་རྒྱག་པ)གྱི་ཚད་གཞི་དང་དུས་ཚད། དངུལ་སྤྲོད་དུས་བཀག་རིང་ཤོས་སོགས་ཀྱི་འགག་རྩའི་རྒྱུ་རྐྱེན་ཁ་གསལ་བཟོ་དགོས།

གཉིས་ནས་ཁེ་ལས་ཆེ་གྲས་ཀྱི་གཏོང་སྤྲོད་བྱ་སྤྱོད་ལ་ལྟ་འདོམས་བྱེད་ཤུགས་ཆེ་རུ་གཏོང་དགོས་ཤིང་། ཁེ་ལས་ཆེ་གྲས་ཀྱི་རྩིས་དངུལ་ལྟ་ཞིབ་ཚད་ལེན་བྱེད་པའི་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་དགོས། རྐང་བཙུགས་ནས་རྩིས་ཡུན་རིང་དུ་གཏོང་མཁན་ཁེ་ལས་ཆེ་གྲས་རིགས་ལ་སྡེ་ཚན་མང་པོས་མཉམ་དུ་སྐོང་འདྲི་བྱེད་པ་མ་ཟད་དག་ཐེར་བྱེད་པར་ལྟ་སྐུལ་ཡང་བྱེད་དགོས། ཚུལ་མིན་འགྲན་རྩོད་ལ་ངོ་རྒོལ་བྱེད་པའི་ཐད་ཁྲིམས་སྒྱུར་ནན་པོ་བྱས་ཏེ། ཁེ་ལས་ཆེ་གྲས་ཀྱིས་ལེགས་ཆའི་གནས་བབ་གང་བྱུང་དུ་སྤྱད་དེ་རྐང་བཙུགས་ནས་རྩིས་ཡུན་རིང་དུ་གཏོང་བའི་བྱེད་སྤྱོད་ངན་པར་རྩད་ཆོད་མཐའ་གསལ་བྱུང་རྗེས་བཅའ་ཁྲིམས་དང་སྒྲིག་སྲོལ་ལྟར་ཆད་པ་གཅོད་དགོས།

གསུམ་ནས་དངུལ་སྨར་མིན་པའི་དངུལ་གཏོང་སྤྲོད་བྱེད་སྟངས་ལ་དོ་དམ་ཚད་ལྡན་བྱེད་དགོས་ཤིང་། གློག་རྡུལ་དཔང་འཛིན་གྱི་དངུལ་སྤྲོད་དུས་ཚད་རིང་ཤོས་ཟླ་6བར་ཐུང་དུ་གཏོང་དགོས་པ་དང་། གློག་རྡུལ་དཔང་འཛིན་ཞབས་ཞུའི་ལས་སྟེགས་ཀྱིས་དངུལ་སྤྲོད་དུས་ཚད་ཟླ་6ལས་བརྒལ་བའི་གློག་རྡུལ་དཔང་འཛིན་གསར་དུ་སྤྲོད་མི་ཆོག་པ། ཚོང་ལས་དངུལ་ཁང་དང་ཚོང་ལས་འགན་ལེན་ཀུང་སིས་དངུལ་སྤྲོད་དུས་ཚད་ཟླ་6ལས་བརྒལ་བའི་གློག་རྡུལ་དཔང་འཛིན་ལ་མ་དངུལ་བསྡུ་སྒྲིལ་མཁོ་འདོན་བྱེད་མི་ཆོག

བཞི་ནས་མ་དངུལ་བརྒྱུད་འདྲེན་གྱི་ནུས་ཕྱོད་དང་དངུལ་རྩའི་རྒྱབ་སྐྱོར་བྱེད་ཤུགས་ཆེ་རུ་གཏོང་དགོས་ཤིང་། སྲིད་གཞུང་གི་ཉོ་སྒྲུབ་རྣམ་གྲངས་ཚང་མར་དངུལ་སྨར་གཏོང་སྤྲོད་བྱེད་ཐབས་སྤྱོད་དགོས་པ་མ་ཟད། གཏོང་སྤྲོད་གནས་ཚུལ་དུས་ཐོག་ཏུ་སྲིད་གཞུང་གི་ཉོ་སྒྲུབ་རྣམ་གྲངས་ཀྱི་ལྟ་འདོམས་ཁྱབ་ཁོངས་ནང་འཇུག་དགོས། སྲིད་གཞུང་གིས་མ་འཇོག་རྣམ་གྲངས་ཀྱི་མ་དངུལ་ལ་ལྟ་འདོམས་བྱེད་ཤུགས་ཆེ་རུ་གཏོང་དགོས་པ་དང་། དོ་བདག་ཚན་པས་དངུལ་སྨར་གཏོང་སྤྲོད་བྱེད་ཐབས་སྔོན་ལ་སྤྱོད་དགོས་པ་མ་ཟད་རྣམ་གྲངས་སྤྱིའི་སྒྲུབ་འགན་གཙང་ལེན་བྱེད་མཁན་ཚན་པས་དུས་ཐོག་ཏུ་ཁག་བགོས་འགན་གཙང་ཚན་པར་བསྡུར་ཚད་གཅིག་མཚུངས་ལས་མི་དམའ་བའི་དངུལ་སྨར་གཏོང་སྤྲོད་ལ་སྐུལ་འདེད་གཏོང་དགོས།

《བརྡ་ཐོའི》ནང་ནན་བཤད་བྱས་དོན། ས་ཁུལ་ཁག་དང་འབྲེལ་ཡོད་སྡེ་ཚན་ཁག་གིས་ལས་ཀར་གཞོགས་འདེགས་བྱེད་ཤུགས་ཆེ་རུ་གཏོང་བ་དང་། གོང་འོག་མཉམ་འགུལ་ལ་ཤུགས་སྣོན་རྒྱག་པ། འགན་འཁྲི་ནན་དུ་གཏོང་བར་རྒྱུན་མཐུད་སྐུལ་འདེད་གཏོང་བ། ཡོ་བསྲང་ལ་ཁྲིད་སྟོན་དང་ཁྲིམས་སྒྱུར་འགན་འཁྲི་བདའ་འདེད་གལ་ཆེ་མཉམ་འཛིན་མཐའ་འཁྱོངས་བྱས་ནས། ཁེ་ལས་འབྲིང་ཆུང་གི་དངུལ་ལེན་དཀའ་བའི་གནད་དོན་སྤྱི་ཡོངས་ནས་ལེགས་སུ་འགྲོ་བར་སྐུལ་འདེད་དང་། ཁེ་ལས་འབྲིང་ཆུང་གི་རྒྱུན་འཁོར་འཕེལ་རྒྱས་དང་གཉིས་ཁེ་གཉིས་ཕན་གྱི་ཁོར་ཡུག་བཟང་པོ་ཞིག་སྐྲུན་དགོས།