ཟླ་8པའི་ཚེས་20ཉིན། ཁུལ་ཨུའི་ཧྲུའུ་ཅི་གཞོན་པ། ལས་ཚབ་ཁུལ་དཔོན་ལི་ཡན་ལན་གྱིས་ཁུལ་སྲིད་གཞུང་གི་ཏང་ཙུའི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་2026ལོའི་གཅིག་སྡུད་སློབ་སྦྱོང་ཐེངས་བདུན་པ་གཙོ་སྐྱོང་གནང་ནས་སྤེལ། ཚོགས་འདུའི་ཐོག་ཞི་ཅིན་ཕིང་གི་དཔལ་འབྱོར་དགོངས་པ་དང་ཀྲུང་དབྱང་དཔལ་འབྱོར་ལས་དོན་ཚོགས་འདུའི་དགོངས་དོན་སློབ་སྦྱོང་གཏིང་ཟབ་བྱས་ཏེ་རང་ཁུལ་གྱི་ལག་བསྟར་བསམ་འཆར་ལ་ཞིབ་འཇུག་བྱས།

ཚོགས་འདུའི་ཐོག་ཞི་ཅིན་ཕིང་གི་དཔལ་འབྱོར་དགོངས་པ་ནི་དུས་རབས་གསར་པར་དཔལ་འབྱོར་ལས་དོན་ཡག་པོ་སྒྲུབ་པའི་རྩ་བའི་གཞི་འཛིན་ས་དང་བྱ་སྤྱོད་ཀྱི་ཕྱོགས་སྟོན་ཞིག་ཡིན་པ། ལྷག་པར་དུ་ཀྲུང་དབྱང་དཔལ་འབྱོར་ལས་དོན་ཚོགས་འདུའི་ཐོག་བཏོན་པའི་“ངེས་པར་ལྔ”ནི་ཞི་ཅིན་ཕིང་གི་དཔལ་འབྱོར་དགོངས་པའི་འཕེལ་རྒྱས་གསར་ཤོས་ཤིག་ཡིན་ལ་རྙོག་འཛིང་ཆེ་བའི་གནས་བབ་ལ་ཁ་གཏད་འཇལ་བ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བྱ་སྤྱོད་ཀྱི་ཕྱོགས་སྟོན་ཞིག་ཀྱང་ཡིན། “ངེས་པར་ལྔ”ནི་དཀྱུས་གཅིག་ཏུ་འབྲེལ་བའི་གོང་བུ་ཞིག་ཡིན་པས་དུས་རབས་གསར་པའི་དཔལ་འབྱོར་ལས་དོན་གྱི་ནང་གནས་གཏན་ཚིགས་དང་རྩ་བའི་ཁ་ཕྱོགས་གསལ་སྟོན་གཏིང་ཟབ་བྱས་ཡོད། “ངེས་པར་ལྔ”སློབ་སྦྱོང་བྱ་རྒྱུ་དེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཡུན་ནན་དུ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་དང་ཟུང་འབྲེལ་བྱེད་དེ། བདེ་ཆེན་འཕེལ་རྒྱས་ཀྱི་དོན་དངོས་དང་ཟུང་འབྲེལ་བྱས་ནས་སློབ་སྦྱོང་དང་བསམ་གཞིགས། བེད་སྤྱོད་བཅས་འབྲེལ་མཐུད་བྱེད་པ་དང་། ཤེས་ཡོན་དང་ཡིད་རྟོན། བྱ་སྤྱོད་བཅས་གཅིག་གྱུར་ཡོང་བ་བྱས་ནས་བདེ་ཆེན་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས་ཞེས་སྟོན།

ཚོགས་འདུའི་ཐོག་གནས་བབ་ལ་ངོས་འཛིན་གསལ་པོ་དང་ཡིད་ཆེས་སྲ་བརྟན་དུ་བཏང་ནས། དཔལ་འབྱོར་ལས་དོན་ལ་དམ་འཛིན་བྱེད་པའི་འགན་འཁྲིའི་འདུ་ཤེས་དང་བྲེལ་འཚབ་ཆེ་བའི་འདུ་ཤེས་ཆེ་རུ་ཏན་ཏིག་བཏང་སྟེ། དཔལ་འབྱོར་ལས་དོན་ལ་དམ་འཛིན་ནན་པོ་བྱས་ནས་རང་ཉིད་ཀྱིས་བཀོད་གཏོང་དང་རང་ཉིད་ཀྱིས་མཐུན་སྦྱོར་བྱེད་པ་ལས་“སྒུག་ཙམ་བྱེད་པ་དང་ལྟ་ཙམ་བྱེད་པའི་”སྒྱིད་ལུག་གི་བསམ་པ་གཏན་ནས་ཡོད་མི་རུང་། གཙོ་གནད་ལ་དམིགས་པ་དང་གནད་སྨིན་ཤུགས་འདོན་བྱས་ནས། རྣམ་གྲངས་འཛུགས་སྐྲུན་ལ་དམ་འཛིན་ནན་པོ་བྱེད་པ་དང་འཛད་སྤྱོད་ཀྱི་མི་མངོན་པའི་སྟོབས་ཤུགས་སྔོག་འདོན་གཏིང་ཟབ་བྱེད་པ། ཐོན་ལས་ཀྱི་འདེགས་སྐྱོར་བྱེད་ཤུགས་ཆེ་རུ་གཏོང་བ་བཅས་བྱས་ཏེ། ནུས་ཤུགས་ཡོད་རྒུས་དཔལ་འབྱོར་གྱི་རྨང་གཞི་སྲ་བརྟན་དུ་གཏོང་དགོས། ཁོར་ཡུག་ལེགས་སུ་གཏོང་བ་དང་གསོན་ཤུགས་སྐུལ་སློང་བྱེད་དེ། ཚོང་གཉེར་ཁོར་ཡུག་ལེགས་སུ་གཏོང་བའི་“དྲོ་སྐྱིད་ལྡན་པའི་བྱ་སྤྱོད”ལག་བསྟར་གཏིང་ཟབ་བྱེད་ཅིང་། སྲིད་གཞུང་དང་ཁེ་ལས་ཀྱི་རྒྱུན་རྣམ་ཅན་གྱི་འབྲེལ་གཏུག་ལམ་སྲོལ་འཛུགས་ནས། ནུས་ཤུགས་ཡོད་རྒུས“ཁེ་གཉེར་ཚོང་པ་ཁེ་ལས་སུ་བསྒྱུར་བ་དང་ཁེ་ལས་ཆུང་གྲས་གཞི་ཁྱོན་ཅན་དུ་འགྱུར་བ་”སྐུལ་འདེད་གཏོང་སྟེ། ཁྲོམ་རའི་བྱེད་པོ་སྐྱེད་སྲིང་དང་སྟོབས་ཆེར་གཏོང་དགོས། མཐའ་ཚད་ནན་པོ་སྲུང་བ་དང་ཉེན་ཁར་དོགས་ཟོན་བྱེད་དེ། འཕེལ་རྒྱས་དང་བདེ་འཇགས་ལ་སྤྱི་འདོམས་ཡག་པོ་བྱེད་པ་དང་། བདེ་འཇགས་ཐོན་སྐྱེད་ལ་དམ་འཛིན་ཡག་པོ་བྱེད་པ། དམངས་འཚོར་འགན་ལེན་ཡག་པོ་བཅས་བྱས་ཏེ། ལས་ཞུགས་དང་སློབ་གསོ། སྨན་བཅོས་སོགས་གཞི་རྩའི་སྤྱི་པའི་ཞབས་ཞུའི་མཁོ་སྤྲོད་འགན་ལེན་བྱས་ནས། འཕེལ་རྒྱས་བརྟན་པོ་དང་ཡུན་རིང་བརྟན་པོ་ཡོང་བར་འགན་ལེན་བྱེད་དགོས། སྤྱོད་ཚུལ་ལེགས་སུ་གཏོང་བ་དང་འགན་འཁྲི་འཁུར་ནས་བྱས་རྗེས་འཇོག་སྟེ། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཡོ་བསྲང་མཐའ་གཅིག་ཏུ་བྱས་ནས། རྒྱལ་ཁབ་དང་ཞིང་ཆེན་གྱི་སྲིད་ཇུས་སྟོན་ཕྱོགས་སུ་འཛིན་པའི་སློབ་སྦྱོང་ལ་ཤུགས་སྣོན་རྒྱག་པ་དང་བཀོད་གཏོང་ལམ་སྲོལ་འཐུས་སྒོ་ཚང་དུ་གཏོང་སྟེ། ཟླ་རེའི་གྲུབ་འབྲས་ཀྱིས་དུས་ཚིགས་རེའི་གྲུབ་འབྲས་ལ་ཁག་ཐེག་བྱེད་པ་དང་།  དུས་ཚིགས་རེའི་གྲུབ་འབྲས་ཀྱིས་ལོ་རེའི་གྲུབ་འབྲས་ལ་ཁག་ཐེག་བྱེད་པ། བྱས་རྗེས་དངོས་ལ་བརྟེན་ནས་ཡང་དག་པའི་སྲིད་དོན་ལས་རྗེས་ལྟ་བ་འཛུགས་པ་དང་ལག་བསྟར་བྱས་ནས་སློབ་སྦྱོང་སློབ་གསོའི་ཕན་འབྲས་ལ་ཞིབ་བཤེར་བྱེད་དགོས་ཞེས་ནན་བཤད་གནང་།

ཚོགས་འདུའི་ཐོག་ཐེངས་འདིའི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་སློབ་སྦྱོང་གོ་སྐབས་སུ་འཛིན་ཏེ།བསམ་བློ་སྔར་བས་གཅིག་གྱུར་དང་སྙིང་སྟོབས་ཆེར་སྐྱེད་ཀྱིས་སློབ་སྦྱོང་གི་གྲུབ་འབྲས་དེ་འཕེལ་རྒྱས་ལ་སྐུལ་འདེད་གཏོང་བའི་བྱ་སྤྱོད་དངོས་སུ་འགྱུར་ཏེ། ལོ་ཧྲིལ་པོར་གཏན་འཁེལ་བྱས་པའི་དམིགས་ཡུལ་ལ་དམིགས་ནས། ལས་འགན་གྱི་རྩིས་ཐོ་ནན་དུ་གཏོང་བར་འགན་ལེན་བྱེད་དགོས་པའི་བླང་བྱ་བཏོན།

ཚོགས་འདུའི་ཐོག་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་ཁོངས་མི་ཁག་གཅིག་གིས་སྤེལ་རེས་གཏམ་བཤད་བྱས་པ་རེད།