ཟླ་8ཚེས་21ཉིན་འཛམ་གླིང་གི་“སེམས་ཀྱི་ཉི་ཟླའི”རིག་གནས་ཡུལ་སྐོར་དུས་ཆེན་སྐབས་བཞི་པ་སེམས་ཀྱི་ཉི་ཟླར་གཟབ་རྒྱས་ངང་འགོ་ཚུགས་ཤིང་། བྱེད་སྒོ་དེར་“ཡུན་ནན་གྱི་འཚོ་བ་ཟེར་སྟངས་ཤིག་ཡོད་པ་སྟེ། སྣ་མང་མཉམ་འདྲེས། གསང་ཡུལ་སེམས་ཀྱི་ཉི་ཟླའི་དུས་ཆད”ཅེས་པ་བརྗོད་དོན་གཙོ་བོར་བྱས་ནས་བདེ་ཆེན་གྱི་རང་བྱུང་སྐྱེ་ཁམས་དང་། མི་རིགས་ཀྱི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས། ཐོན་ལས་འཕེལ་རྒྱས་བཅས་ཀྱི་ཐུན་མོང་མ་ཡིན་པའི་ལེགས་ཆ་ཕྱོགས་ཡོངས་ནས་མངོན་པར་བྱས་པ་དང་། བདེ་ཆེན་གྱི་རིག་གནས་ཡུལ་སྐོར་དེ་ས་ཁོངས་ཧྲིལ་པོ་དང་། དུས་སྐབས་ཧྲིལ་པོ། རྒྱུ་རྐྱེན་གཙོ་བོ་བཅས་ཀྱི་ཕྱོགས་སུ་རིམ་སྤོར་ཕྱོགས་སྒྱུར་བྱ་རྒྱུར་སྐུལ་འདེད་བཏང་ཡོད།“ཡུན་ནན་གྱི་འཚོ་བ་ཟེར་སྟངས་ཤིག་ཡོད་པ་སྟེ། འཛམ་གླིང་གི་‘སེམས་ཀྱི་ཉི་ཟླ’” ཡི་སྣང་ལྡན་ལག་ལེན་རྒྱུན་མཐུད་ནས་སྐུལ་སྤེལ་བཏང་ཡོད།

     ལི་ཡན་ལན་གྱིས་བདེ་ཆེན་ཁུལ་ཨུ་དང་ཁུལ་མི་དམངས་སྲིད་གཞུང་གི་ཚབ་ཞུས་ནས་ཚང་མ་ཕེབས་པར་སྤྲོ་སེམས་འཁོལ་བའི་དགའ་བསུ་ཞུས་པ་རེད། ཁོ་མོས་བདེ་ཆེན་ལ་“གཙང་གསུམ་མཉམ་རྒྱུག”གི་འཛམ་གླིང་རིམ་པའི་སྐྱེ་ཁམས་ཐོན་ཁུངས་ཡོད་པས་ཇ་རྟའི་ཚོང་ལམ་གྱི་མི་རིགས་མང་པོ་མཉམ་འདྲེས་མཉམ་གནས་ཀྱི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་ནང་དོན་ཟབ་མོ་རྒྱུན་འཛིན་ཐུབ་ཡོད། 2023ལོར་བདེ་ཆེན་གྱིས་ཡུན་ནན་ནུབ་བྱང་གི་རིག་གནས་ཡུལ་སྐོར་མཉམ་ལས་ལམ་སྲོལ་སྔོན་ལ་དར་སྤེལ་བཏང་བ་དང་འབྲེལ་སྐུལ་འདེད་བཏང་བ་མ་ཟད། རིག་གནས་ཡུལ་སྐོར་དུས་ཆེན་སྐབས་དང་པོའང་གཉེར་བ་རེད། དུས་ཚིགས་བཞི་པར་བདེ་ཆེན་དུ་ཡུལ་སྐོར་བྱེད་པའི་ལས་རྣམ་མུ་མཐུད་ལེགས་གྲུབ་བྱུང་བ་དང་། སེམས་ཀྱི་ཉི་ཟླ་ནི་རྒྱལ་ཁབ་ཀྱི་ཁྱད་ལྡན་ཡུལ་སྐོར་ས་ཁུལ་དུ་བཅུག་ཡོད། དུས་ཆེན་གྱི་སྐུལ་ཁྲིད་ནུས་པ་འདོན་སྤེལ་གང་ལེགས་ཐུབ་པ་སྟེ།རིམ་རྩིས་བྱས་ན་སྒོར་དུང་ཕྱུར་60ལས་བརྒལ་བའི་ཐད་ཀའི་དཔལ་འབྱོར་བསྡོམས་འབོར་ཆགས་ཡོད། ས་ཁོངས་ཧྲིལ་པོའི་འཛད་སྤྱོད་སྒོར་དུང་ཕྱུར་220ལས་བརྒལ་བར་ཁྱབ་འགྱེད་སྐུལ་ཁྲིད་ཐུབ་པ་དང་། རིག་གནས་ཡུལ་སྐོར་ཐོན་ལས་དེ་དམངས་ཕྱུག་ཐོན་ལས་སུ་དངོས་འབྲེལ་འགྱུར་བ་བྱས་ནས་སྐྱེ་ཁམས་དང་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་ལེགས་ཆ་དེ་སྤུས་ཚད་མཐོ་བའི་འཕེལ་རྒྱས་ཀྱི་སྒུལ་ཤུགས་བརྟན་པོར་འགྱུར་བ་བྱས་ཡོད། སྐབས་འདིའི་རིག་གནས་ཡུལ་སྐོར་དུས་ཆེན་གྱིས་རིག་གནས་སྤུས་ལེགས་འགྲེམས་འཁྲབ་ལ་བརྟེན་ནས་ལྟ་ཉན་མྱོང་རོལ་ཕུན་སུམ་ཚོགས་སུ་གཏོང་བ་དང་། གསར་བརྗེའི་ས་བོན་ལ་བརྟེན་ནས་སྙིང་སྟོབས་ཀྱི་སྙིང་པོ་བརྟན་པོ་འཛུགས་པ། ཁྱད་ལྡན་IPལ་བརྟེན་ནས་ས་ཁོངས་ཧྲིལ་པོར་ཕྱིར་སྐྱོད་ཐུབ་པ།ས་ཁོངས་ཧྲིལ་པོའི་ཐོན་ལས་མཉམ་འགུལ་ལ་བརྟེན་ནས་དམངས་ཕྱུག་ཕན་ནུས་འདོན་པ་བཅས་བྱས་ཏེ་མི་རིགས་ཁག་གི་མང་ཚོགས་ལ་རིག་གནས་ཡུལ་སྐོར་ཐོན་ལས་འཕེལ་རྒྱས་ཀྱི་གྲུབ་འབྲས་ལོངས་སུ་སྤྱོད་དུ་འཇུག་རྒྱུ་ཡིན་ཞེས་གསུངས་ཡོད།

    འགོ་ཚུགས་མཛད་སྒོའི་ཐོག་འགྲིམ་འགྲུལ་སྐྱེལ་འདྲེན་པུའུ་ཡི་ཚན་རིག་ཞིབ་འཇུག་ཁང་གི་རིགས་གཅིག་མཁས་ཅན་གྱིས་“གཞུང་ལམ་ཡུལ་སྐོར་དང་བདེ་ཆེན་རིག་གནས་ཡུལ་སྐོར་སྤུས་ཚད་མཐོ་བའི་འཕེལ་རྒྱས”ཞེས་པའི་བརྗོད་དོན་གཙོ་བོ་མཉམ་སྤྱོད་བྱས་པ་རེད། “ཞི་བདེ་དང་། མཛེས་སྡུག་ལྡན་པའི་བདེ་ཆེན། རིག་གནས་ཡུལ་སྐོར་གྱི་འཚོ་བ་གསར་པ”ཞེས་པའི་རིག་རྩལ་གྱི་སྟོན་མོ་གཟབ་རྒྱས་དེ་“གངས་ལྗོངས་ཀྱི་བསྐལ་བ་ཟང་བོ། མི་རིགས་ཁག་མཉམ་འདྲེས། གནའ་ལམ་གྱི་དབྱངས་རྟ་འཚོལ་བ། བློ་སེམས་གཅིག་ཏུ་མཐུན་ཞིང་མཛེས་སྡུག་ལྡན་པ”བཅས་ཀྱི་ལེའུ་བཞི་ལ་བརྟེན་ནས་མི་རིགས་ཀྱི་གླུ་གར་དང་། རོལ་ཆ་དཀྲོལ་གཏོང་། མངོན་མིན་རིག་གནས་ཤུལ་བཞག་གི་འཁྲབ་ཚན། ཁྱད་ལྡན་གྱོན་ཆས་ངོམ་སྟོན་སོགས་ངོ་མཚར་ཆེ་བའི་ལེ་ཚན་རིམ་གྱིས་མངོན་པར་བྱས་པ་དང་།ལྟད་མོ་བའི་སྣེ་ཁྲིད་དེ་བདེ་ཆེན་གྱི་རི་ཆུའི་མཛེས་སྡུག་དང་། སྤྱི་ཚོགས་ཀྱི་སྣང་བརྙན། མ་འོངས་པའི་རེ་བ་བཅས་ཉམས་སུ་མྱོང་བར་སྐུལ་ཁྲིད་བྱས་ཡོད། “འཛམ་གླིང་གི་སེམས་ཀྱི་ཉི་ཟླའི་མི་རིགས་མཐུན་སྒྲིལ་གྱི་ཁྱིམ་གཞིས”ཞེས་པའི་དྲ་རྒྱའི་དྲིལ་བསྒྲགས་བྱེད་སྒོའང་དུས་མཉམ་ངང་སྤེལ་ཡོད།