ཟླ་9པའི་ཚེས་5ཉིན། ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་ཡུལ་དངོས་སུ་སེམས་ཀྱི་ཉི་ཟླའི་རྒྱལ་ཁབ་སྤྱི་གླིང་གཏོད་པའི་ལས་དོན་ལ་བརྟག་ཞིབ་དང་ལྟ་སྐུལ་གནང་། ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པ་ལག་ལེན་གཏིང་ཟབ་བསྟར་ནས་ཆུ་ཚད་མཐོ་བའི་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་གལ་ཆེར་མཉམ་འཛིན་རྒྱུན་འཁྱོངས་བྱས་ཏེ་ཚད་གཞི་སྔར་བས་མཐོ་བ་དང་བྱ་ཐབས་སྔར་བས་ཏན་ཏིག་ལ་བརྟེན་ནས་རྒྱལ་ཁབ་སྤྱི་གླིང་གཏོད་པའི་ལས་འགན་ཁག་དོན་འཁྱོལ་དང་ཕན་འབྲས་ཐོན་པར་སྐུལ་འདེད་གཏོང་དགོས་ཞེས་ནན་གྱིས་བསྟན།

བརྟག་ཞིབ་བྱེད་རིང་། ལུའོ་ཁྲའོ་ཧྥེང་གིས་སེམས་ཀྱི་ཉི་ཟླའི་རྒྱལ་ཁབ་སྤྱི་གླིང་གི་ནུས་པའི་དབྱེ་ཁུལ་དང་སྐྱེ་ཁམས་ཁོར་ཡུག་སྲུང་སྐྱོང་། སྡེ་ཁུལ་མཉམ་སྐྲུན། དེ་བཞིན་གཏེར་ལས་དབང་ཆ་ཕྱིར་འཐེན་དང་མང་ཚོགས་ཀྱི་ཐོན་སྐྱེད་འཚོ་བ་སོགས་ཀྱི་འགལ་བ་དང་གདོང་ཐུག་ཐག་གཅོད་བྱས་ཚུལ་ལ་ཤེས་རྟོགས་ཞིབ་ཕྲ་གནང་།

ལུའོ་ཁྲའོ་ཧྥེང་གིས་སེམས་ཀྱི་ཉི་ཟླའི་རྒྱལ་ཁབ་སྤྱི་གླིང་གསར་གཏོད་བྱེད་པ་ནི་ཡུན་ནན་ནུབ་བྱང་གི་སྐྱེ་ཁམས་བདེ་འཇགས་སྲུང་ཡོལ་བརྟན་པོ་སྐྲུན་པའི་དམ་འཛིན་བྱེད་ས་གལ་ཆེན་ཞིག་ཡིན་པས་རིམ་པ་ཁག་གི་སྡེ་ཚན་སོ་སོས་ཆབ་སྲིད་ཚུགས་གནས་མཐོ་རུ་གཏོང་བ་དང་འགན་འཁྲི་འཁུར་སེམས་དང་དུས་གཏུག་གི་བསམ་པ་ཆེ་རུ་གཏོང་བ། གསར་གཏོད་བྱེད་པའི་ཚད་གཞི་དང་དུས་ཚོད་ཀྱི་མཚམས་ཚིགས་དམ་པོར་བཟུང་བ་བཅས་བྱས་ནས་ལས་ཡུན་ལྡོག་བཀོད་དང་འགལ་རིས་འཐབ་རྩོད་བྱས་ཏེ་གསར་གཏོད་ལས་དོན་ནུས་ལྡན་དང་གོ་རིམ་ལྡན་པའི་སྒོ་ནས་སྐུལ་འདེད་གཏོང་བར་འགན་ལེན་བྱེད་དགོས་ཞེས་བསྟན།

ལུའོ་ཁྲའོ་ཧྥེང་གིས་སེམས་ཀྱི་ཉི་ཟླའི་རྒྱལ་ཁབ་སྤྱི་གླིང་ཚད་ལྡན་ཅན་དུ་འགྱུར་བའི་འཛུགས་སྐྲུན་ལ་མུ་མཐུད་དེ་ཤུགས་སྣོན་རྒྱག་པ་དང་ཕུགས་ཕན་དོ་དམ་སྲུང་སྐྱོང་ལམ་སྲོལ་འཐུས་ཚང་དུ་གཏོང་བ། སྒེར་སྐྲུན་གང་བྱུང་དུ་སྐྲུན་པའི་ཆེད་དོན་བཅོས་སྒྲིག་གི་གྲུབ་འབྲས་སྲ་བརྟན་དུ་གཏོང་བ། གནད་དོན་བསྐྱར་དུ་ཐོན་པར་སྔོན་འགོག་མཐའ་གཅིག་ཏུ་བྱ་དགོས། བཅའ་ཁྲིམས་དང་སྒྲིག་སྲོལ་ལྟར་བརྟན་བརླིང་དང་གོ་རིམ་ལྡན་པའི་སྒོ་ནས་རྒྱལ་ཁབ་སྤྱི་གླིང་ཁྱབ་ཁོངས་ནང་གི་གཏེར་ལས་དབང་ཆ་ཕྱིར་འཐེན་གྱི་མཇུག་གི་ལས་དོན་ལ་སྐུལ་འདེད་གཏོང་ནས་སྐྱེ་ཁམས་སྲུང་སྐྱོང་དང་དམངས་འཚོ་འགན་ལེན་གཉིས་གཅིག་གྱུར་འཆར་འགོད་དང་ཕན་ཚུན་ལྟ་རྟོག་བྱེད་ཐུབ་དགོས། རྗེས་འདེད་ལྟ་སྐུལ་སྒྲུབ་པར་ཤུགས་སྣོན་རྒྱག་པ་དང་སྡེ་ཚན་མཉམ་འགུལ་ལ་ཤུགས་སྣོན་བརྒྱབ་སྟེ་ལས་འགན་གཙོ་བོ་ལ་རྩིས་ཐོ་ཅན་གྱི་དོ་དམ་དང་རྣམ་གྲངས་ཅན་གྱི་སྐུལ་འདེད་ལག་བསྟར་བྱས་ནས་ལས་དོན་ཚང་མར་དམ་འཛིན་བྱེད་མཁན་ཡོད་པ་དང་དོ་དམ་བྱེད་མཁན་ཡོད་པ། དོན་ཐོག་ཏུ་འཁྱོལ་ཐུབ་པར་འགན་ལེན་བྱེད་དགོས་ཞེས་བླང་བྱ་བཏོན།

ལུའོ་ཁྲའོ་ཧྥེང་གིས་ཁུལ་རིམ་པའི་འབྲེལ་ཡོད་ལས་ཁུངས་དང་སེམས་ཀྱི་ཉི་ཟླ་གྲོང་ཁྱེར་གྱིས་རང་འགུལ་ངང་བྱ་སྤྱོད་སྤེལ་བ་དང་མཐུན་སྦྱོར་གཞོགས་འདེགས་བྱེད་པ། དུས་ཐོག་ཏུ་གོང་ལ་འབྲེལ་གཏུག་དང་སྦྲེལ་མཐུད་བྱེད་པ། སྲིད་ཇུས་ཀྱི་བླང་བྱ་གནད་སྨིད་ཁོང་དུ་ཆུད་པ་བཅས་བྱས་ནས་ཚན་རིག་ཁྱབ་གདལ་དྲིལ་བསྒྲགས་སློབ་གསོ་དང་། སྡེ་ཁུལ་ཐུན་མོང་དོ་དམ། སྐྱེ་ཁམས་ཁ་གསབ་སོགས་ཀྱི་ལས་དོན་དུས་གཅིག་ཏུ་ཡག་པོ་བསྒྲུབས་ཏེ་གསར་གཏོད་ཀྱི་མཉམ་ཤུགས་རྒྱ་ཁྱབ་ཏུ་གཅིག་ཏུ་སྒྲིལ་དགོས་ཞེས་ནན་གྱིས་བསྟན།

ཁུལ་གྱི་འགོ་ཁྲིད་ཞུས་ཀོང་ཏེ་དང་དབྱང་ཞུའེ་ཝུན། ལི་ཐའོ། ཁུལ་རིམ་པའི་འབྲེལ་ཡོད་ལས་ཁུངས་ཀྱི་འགན་འཁུར་བློ་མཐུན་བརྟག་ཞིབ་ནང་ཞུགས།