འདི་ནི་འཛམ་གླིང་རྩལ་ནུས་འགྲན་བསྡུར་ཆེ་མོ་སྐབས་48པའི་འགོ་ཚུགས་མཛད་སྒོ་འཚོག་ཡུལ་ཡིན་པ།

འདི་ནི་བདམས་ཐོན་པས་མེ་ཏོག་བཟོ་སྟངས་འགྲན་བསྡུར་བྱེད་བཞིན་པ།

འདི་ནི་བདམས་ཐོན་པས་དཀར་གཅལ་སྦྱོར་སྟངས་འགྲན་བསྡུར་བྱེད་བཞིན་པ།

ཟླ་9ཚེས་22ནས་27ཉིན་བར། འཛམ་གླིང་རྩལ་ནུས་འགྲན་བསྡུར་ཆེ་མོ་སྐབས་48པ་ཧྲང་ཧའེ་རུ་གཉེར་བ་རེད། འཛམ་གླིང་རྩལ་ནུས་འགྲན་བསྡུར་ཆེ་མོ་ནི་གོ་ལ་ཧྲིལ་པོའི་རིམ་པ་མཐོ་ཤོས་དང་། གཞི་ཁྱོན་ཆེ་ཤོས། ཤུགས་རྐྱེན་ཐེབས་ནུས་ཆེ་ཤོས་བཅས་ཀྱི་རྒྱལ་སྤྱིའི་རང་བཞིན་གྱི་ལས་རིགས་རྩལ་ནུས་འགྲན་བསྡུར་ཞིག་རེད། སྐབས་འདིའི་འཛམ་གླིང་འགྲན་བསྡུར་ལ་ཁྱོན་འགྲན་བསྡུར་རྣམ་གྲངས་64བཀོད་སྒྲིག་བྱས་པ་དང་། རྒྱལ་ཁབ་དང་ས་ཁུལ་68ནས་ཡོང་བའི་བདམས་ཐོན་པ་1385ཡིས་འགྲན་ར་གཅིག་ཏུ་རྩལ་ནུས་འགྲན་པས་འགྲན་བསྡུར་ལ་ཞུགས་མཁན་རྒྱལ་ཁབ་དང་ས་ཁུལ་གྱི་གྲངས་འབོར་དང་མི་གྲངས་ཚང་མ་སྐབས་རིམ་བྱུང་གི་མང་ཤོས་ཟིན་ཡོད་པ་རེད། ཀྲུང་གོའི་འཐུས་མི་ཚོགས་པ་རྣམ་གྲངས་64ཚང་མར་ཞུགས་ནས་གསེར་གྱི་རྟགས་མ་41དང་། དངུལ་གྱི་རྟགས་མ་11 ཟངས་ཀྱི་རྟགས་མ་4 ཕུལ་བྱུང་བྱ་དགའ་6བཅས་བླངས་ཤིང་། གསེར་གྱི་རྟགས་མའི་མིང་གྲལ་དང་། བྱ་དགའི་མིང་གྲལ། ཚོགས་པའི་སྤྱིའི་སྐར་གྲངས་བཅས་ཀྱི་ཨང་དང་པོར་སླེབས་ནས་རང་རྒྱལ་འཛམ་གླིང་རྩལ་ནུས་འགྲན་བསྡུར་ཆེ་མོར་ཞུགས་ཚུན་གྱི་གྲུབ་འབྲས་ཡག་ཤོས་གཏོད་ཡོད་པ་རེད།

འགྲན་བསྡུར་བྱེད་རིང་། འཛམ་གླིང་རྩལ་ནུས་ཚོགས་ཆེན་དང་འཛམ་གླིང་རྩལ་ནུས་དངོས་མང་སྟོན་ཚོགས་དུས་གཅིག་ལ་གཉེར་བ་རེད། ཚོགས་ཞུགས་མི་སྣས་རྩལ་ནུས་འཕེལ་རྒྱས་ཀྱི་མདུན་ལམ་སྐོར་མཉམ་དུ་གླེང་མོལ་དང་། རྩལ་ནུས་ཁྱབ་ཁོངས་ཀྱི་མཉམ་ལས་ལ་མཉམ་དུ་སྐུལ་འདེད་གཏོང་བ། རྩལ་ནུས་ཤེས་ལྡན་པའི་འབད་འཐབ་གཏམ་རྒྱུད་ཤེས་རྟོགས། རྩལ་ནུས་འཕེལ་རྒྱས་ཀྱི་གསོན་ཉམས་ལྡན་པའི་རྣམ་པར་མྱོང་རོལ་བཅས་བྱས་པ་རེད།