སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།ཟླ་8ཚེས་7ཉིན།ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་པད་མ་རི་བོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་ཆུ་འཛོམས་སྒང་སྣོད་བཅུད་ངེས་གནས་ལྟ་ཞིབ་ཚད་ལེན་ས་ཚིགས་སུ་སྲུང་སྐྱོང་ཁུལ་གྱི་དོ་དམ་སྲུང་སྐྱོང་ལས་དོན་དང་དེ་བཞིན་སྣོད་བཅུད་ཡུལ་སྐོར་ཇུས་གཞི་བཟོ་བའི་གནས་ཚུལ་ལ་བརྟག་ཞིབ་གནང་བ་དང་འབྲེལ་ཁོང་གིས་ཞིབ་ཅིང་ནན་ཏན་གྱིས་ཞི་ཅིན་ཕིང་གི་སྣོད་བཅུད་ཤེས་དཔལ་གྱི་དགོངས་པ་སློབ་སྦྱོང་གཏིང་ཟབ་བྱས་ཏེ་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་ལ་འཕྱུགས་མེད་ཀྱི་སྒོ་ནས་ཕྱོགས་ཡོངས་ནས་ལག་བསྟར་བྱས་ཏེ་བློ་བརྟན་འགྱུར་མེད་ངང་སྣོད་བཅུད་སྔོན་འཛིན་དང་ལྗང་མདོག་འཕེལ་རྒྱས་ཀྱི་ལམ་བུའི་ཐོག་སྐྱོད་པ་དང་།ཚན་ཞིབ་གྲུབ་འབྲས་གཞན་སྒྱུར་བཀོལ་སྤྱོད་ལ་མུ་མཐུད་ཤུགས་སྣོན་རྒྱག་པ།“རི་བོ་གཉིས”ཀྱི་རིགས་པའི་གཞུང་ལུགས་གཞན་སྒྱུར་གྱི་ཐབས་ལམ་གསར་པ་འཚོལ་ཞིབ་ཧུར་ཐག་བཅས་བྱས་ཏེ་སྣོད་བཅུད་ཐོན་ཁུངས་ཀྱི་ལེགས་ཆ་དེ་དཔལ་འབྱོར་འཕེལ་རྒྱས་ཀྱི་ལེགས་ཆར་འགྱུར་གང་ཐུབ་བྱེད་དགོས་ཞེས་ནན་གྱིས་བསྟན།

      ཆུ་འཛོམས་སྒང་སྣོད་བཅུད་ངེས་གནས་ལྟ་ཞིབ་ཚད་ལེན་ས་ཚིགས་དེ་ས་བབ་མཐོ་ཚད་སྨི་3910ཙམ་གྱི་མཐོ་གྲང་རི་ཁུལ་དུ་གནས་པ་དང་དེའི་ལས་ཀའི་ཁྱབ་ཁོངས་མང་ཆེ་བ་ས་བབ་སྨི་4000ཡན་ཡིན་པ་དེ་མིག་སྔར་ཞིང་ཆེན་ཡོངས་ཀྱི་ས་བབ་མཐོ་ཤོས་ཀྱི་ཚན་ཞིབ་ལས་དོན་ས་ཚིགས་ཤིག་ཡིན་པ་རེད།བརྟག་ཞིབ་བྱེད་རིང་ལུའོ་ཁྲའོ་ཧྥེང་གིས་འཐབ་ས་དང་པོར་ཡུན་རིང་འབད་འཐབ་བྱེད་མཁན་ས་ཚིགས་ཀྱི་ལས་དོན་པར་གཟིགས་པ་དང་འབྲེལ་ཉལ་ཁང་དང་གཞུང་ལས་ཁང་དུ་ཕེབས་ནས་ཚང་མའི་སྡོད་གནས་ཁོར་ཡུག་དང་གཞུང་ལས་ཆ་རྐྱེན་ལ་གཟིགས་ཞིབ་གནང་བ་མ་ཟད།འཐབ་ས་དང་པོར་ཡུན་རིང་བརྟན་སྲུང་བྱས་ནས་དཀའ་ཚེགས་ཆེ་བའི་ས་བབ་མཐོ་གྲང་ས་ཁུལ་དུ་སྣོད་བཅུད་སྲུང་སྐྱོང་དང་ཚན་ཞིབ་ལས་དོན་སྤེལ་བའི་སྙིང་སྟོབས་ལ་གདེང་འཇོག་གང་ལེགས་གནང་བ་དང་ཁོང་ཚོས་ཁུལ་ཡོངས་ཀྱི་སྣོད་བཅུད་བདེ་འཇགས་སྲུང་ཡོལ་སྲུང་སྐྱོང་བྱེད་ཆེད་འབད་བརྩོན་ཧུར་ཐག་དང་ལེགས་སྐྱེས་ཧུར་ཐག་ཕུལ་བར་ཁས་ལེན་གང་ལེགས་གནང་བ་རེད།

      ལྟ་ཞིབ་ཚད་ལེན་ས་ཚིགས་སུ་ལུའོ་ཁྲའོ་ཧྥེང་གིས“མཁའ་དབྱིངས་དང་ས་གཞི་གཅིག་གྱུར་ཅན་”གྱི་རིག་ལྡན་ལྟ་ཞིབ་ཚད་ལེན་མ་ལག་འཛུགས་སྐྲུན་གནས་ཚུལ་ལ་ལྟ་ཞིབ་དང་ཤེས་རྟོགས་གནང་། སྲུང་སྐྱོང་ཁུལ་གྱི་རྒྱུན་གཏན་ཐོན་ཁུངས་དོ་དམ་སྲུང་སྐྱོང་དང་《ཡུན་ནན་པད་མ་རི་བོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་བདེ་ཆེན་ཡུག་ཁུལ་གྱི་སྣོད་བཅུད་ཡུལ་སྐོར་ཇུས་གཞི་》རྩོམ་སྒྲིག་སོགས་ལས་དོན་གནས་ཚུལ་སྐོར་གྱི་སྙན་སེང་ལ་གསན། ཁོང་གིས་ས་ཚིགས་ཀྱི་ལས་དོན་པའི་རྒྱུན་གཏན་གྱི་སྐོར་སྲུང་ལམ་ཐིག་བརྒྱུད་གདོད་མའི་ནགས་ཁུལ་དུ་ཕེབས་ཏེ་དམར་ཕྱིའི་པར་ཆས་སྒྲིག་སྦྱོར་དང་བརྙན་ལམ་ལྟ་སྐུལ་ཚོད་འཛིན་ཁྱབ་ཚུལ་ལ་གཟིགས་པ་དང་འབྲེལ་སྲུང་སྐྱོང་ཁུལ་གྱི་སྣོད་བཅུད་ཤེས་དཔལ་འཛུགས་སྐྱོང་གི་ཕན་འབྲས་མྱོང་ཚོར་ཟབ་མོ་གནང་བ་རེད།

    ལུའོ་ཁྲའོ་ཧྥེང་གིས་བསྟན་དོན། སྣོད་བཅུད་སྲུང་སྐྱོང་ནི་བདེ་ཆེན་གྱིས་ངེས་པར་དུ་དམ་འཛིན་ནན་པོ་བྱེད་དགོས་པའི“དོན་ཆེན་བཞི”ཡི་གྲས་ཤིག་ཡིན། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། ཞིང་ཨུ། ཞིང་ཆེན་སྲིད་གཞུང་བཅས་ཀྱིས་བདེ་ཆེན་ལ་སྤྲད་པའི་ཆབ་སྲིད་ཀྱི་འགན་འཁྲི་གལ་ཆེན་ཞིག་ཡིན།“ལོ་ལྔ་ཚན་བཅུ་བཞི་པའི”རིང་།རང་ཁུལ་གྱིས་རྒྱལ་ཡོངས་ཀྱི་སྣོད་བཅུད་དཔལ་ཡོན་འཛུགས་སྐྲུན་གྱི་དཔེ་སྟོན་ཁུལ་དུ་ལེགས་གྲུབ་བྱུང་ཞིང་། ལྗང་མདོག་གི་རྨང་གཞི་སྔར་བས་བརྟན་པོ་བྱུང་ཡོད།“ལོ་ལྔ་ཚན་བཅོ་ལྔ་པའི”རིང་།ཁུལ་ཨུས་སྣོད་བཅུད་ཤེས་དཔལ་འཛུགས་སྐྱོང་གི་དཔེ་སྟོན་ཁུལ་གཏོད་རྒྱུའི་དམིགས་ཚད་གསལ་པོ་བཏོན་པ་དང་།པད་མ་རི་བོ་ནི་རང་ཁུལ་གྱི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གཅིག་པུ་ཡིན་པའི་རྐྱེན་གྱིས་ཁུལ་ཡོངས་ཀྱི་སྣོད་བཅུད་ཤེས་དཔལ་འཛུགས་སྐྱོང་གི་ཁྱོན་ཡོངས་ནས་གནས་བབ་དམིགས་བསལ་དང་དོན་སྙིང་གལ་ཆེན་ལྡན་པས་འཁྲི་འགན་སྒྲུབ་སེམས་དང་འགན་འཁྲི་ཁུར་སེམས་ཆེ་རུ་ཏན་ཏིག་བཏང་ནས་སྣོད་བཅུད་སྲུང་སྐྱོང་གི་དུས་རབས་ཀྱི་ལས་འགན་ལྕི་པོ་འཁུར་བ་དང་ལེགས་ཆ་དང་མི་མངོན་པའི་སྟོབས་ཤུགས་འདོན་སྤེལ་གང་ལེགས་བྱས་ནས་སྤུས་ཚད་མཐོ་བའི་འཕེལ་རྒྱས་ཀྱི་སྣོད་བཅུད་ཀྱི་རྨང་གཞི་རྒྱུན་ཆད་མེད་པར་བརྟན་དུ་གཏོང་དགོས།

      ལུའོ་ཁྲའོ་ཧྥེང་གིས་ནན་གྱིས་བསྟན་དོན། འཇོལ་རྫོང་དང་པད་མ་རི་བོ་དོ་དམ་སྲུང་སྐྱོང་ཅུས་ཀྱིས་མཉམ་འགུལ་མཉམ་ལས་ལ་ཤུགས་སྣོན་བརྒྱབ་སྟེ་སྲུང་སྐྱོང་དང་འཕེལ་རྒྱས་ཀྱི་འབྲེལ་བ་གཅིག་འདོམས་བྱེད་པ་དང་།སྲུང་སྐྱོང་ནན་པོ་བྱེད་པའི་སྔོན་འགྲོའི་འོག་ཚན་རིག་དང་མཐུན་པའི་ངང་སྣོད་བཅུད་ཡུལ་སྐོར་གྱི་ཐབས་ལམ་གསར་པ་འཆར་འགོད་བྱེད་པ།རང་བྱུང་ཉམས་ལེན་དང་ཚན་རིག་རྟོག་ཞིབ་ཀྱི་ལས་རིགས་གསར་པ་སྐྱེད་སྲིང་ཧུར་ཐག་བྱེད་པ།རྒྱ་ཆེའི་ཡུལ་སྐོར་བར་ཕྱོགས་མང་དང་ཟུར་ཚད་མང་པོའི་ཐོག་ནས་བདེ་ཆེན་གྱི་སྣོད་བཅུད་ཤེས་དཔལ་འཛུགས་སྐྱོང་གི་གྲུབ་འབྲས་མངོན་པར་བྱེད་པ་བཅས་བྱེད་དགོས།“ཐེ་ཇུས་ཆུང་བ་དང་བསྒྱུར་བཅོས་ཆུང་བའི”རྩ་དོན་མཐའ་འཁྱོངས་ཀྱིས་ཐོག་མའི་སྣོད་བཅུད་རྣམ་པ་གང་མང་སོར་འཇོག་བྱེད་པ་དང་།སྣོད་བཅུད་སྲུང་སྐྱོང་གི་དམར་ཐིག་དང་བཅའ་ཁྲིམས་ཁྲིམས་སྲོལ་གྱི་མ་མཐའི་མཚམས་ཐིག་ནན་སྲུང་བྱེད་པ།གསར་སྤེལ་རང་བཞིན་དང་འཛུགས་སྐྲུན་རང་བཞིན་གྱི་གཏོར་བཤིག་བཀག་འགོག་མཐའ་གཅིག་ཏུ་བྱེད་པ་བཅས་བྱེད་དགོས་པ་དང་།སེམས་རྣལ་དུ་ཕབ་ནས་གཞི་རིམ་གྱི་འཐབ་ཕྱོགས་དང་པོའི་ལས་བྱེད་ལས་བཟོར་གཅེས་སྐྱོང་བྱེད་པ།ཚན་རིག་དང་མཐུན་པའི་རེས་འཁོར་ངལ་གསོའི་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་སྟེ་ལྟ་ཞིབ་ས་ཚིགས་ཀྱི་ལས་དོན་མི་སྣའི་ལུས་སེམས་བདེ་ཐང་འགན་ལེན་ཏན་ཏིག་བྱེད་དགོས་ཞེས་ནན་གྱིས་བསྟན།

      ཞུས་ཀོང་ཏེ།དབྱང་ཞུའེ་ཝུན་བརྟག་ཞིབ་ནང་ཞུགས་ཡོད་པ་རེད།