ཤང་དེའི་ཀྲེན་ཕུའོ་གྲོང་ཚོའི་ཀུའུ་པུའུ་གྲོང་མིའི་ཚོ་ཆུང་གི་དགོང་ལོ་73ལོན་པའི་རྒན་མོ་ཡུས་ཞུའེ་ལན་ཁྲག་ཤེད་མཐོ་བ་དང་ཁྲག་ཚིལ་མཐོ་བ།  ཁྲག་མངར་ཚད་མང་བ་བཅས་ཀྱི་ནད་ཕོག་ནས་ལོ་མང་སོང་ཞིང་། གྲོང་ཚོའི་འཕྲོད་བསྟེན་ཁང་གི་སྨན་པ་ཁྲེན་ཧན་གྱིས་རྟག་ཏུ་ཁོང་ལ་སྨན་བཅོས་བྱེད་པར་ཡོང་གི་ཡོད། རྒན་མོས་མི་དང་འཕྲད་དུས་སྨན་པ་ཁྲེན་ཧན་ནི་ངའི་བུ་མོ་ཞིག་དང་འདྲ་བར་ཁ་པར་གཅིག་རྒྱག་ན་ཡོང་གི་ཡོད། ཉིན་གཅིག་ལ་སྨན་ག་ཚོད་འཐུང་དགོས་ཡང་ང་ལ་ཁ་བྲལ་ནས་བླུགས་རོགས་བྱེད་ཀྱི་ཡོད་ཅེས་ཟེར། ཀྲེན་ཕུའོ་གྲོང་ཚོར་ཡུས་ཞུའེ་ལན་ལྟ་བུའི་དུས་བཀག་ལྟར་སྒོར་བཅར་ཞབས་ཞུ་དང་ལེན་བྱེད་མཁན་རྒན་རྒོན་ད་དུང་མི་ཉུང་བ་ཞིག་ཡོད།

གྲོང་ཚོའི་འཕྲོད་བསྟེན་ཁང་དུ་ད་ལྟར་སྨན་པ་ཁྲེན་ཧན་དང་ཁྲེན་ཅིང་ཡུས་གཉིས་ཡོད་པ་དང་ཁོང་གཉིས་ཀྱིས་ལས་ཀ་ལོ་10བྱས་པ་མ་ཟད་སྨན་པའི་ཐོབ་ཐང་ལག་ཁྱེར་ཡང་ཐོབ་ཡོད། འཕྲོད་བསྟེན་ཁང་གི་ཞབས་ཞུ་བྱ་ཡུལ་ནི་ཉེ་འཁོར་གྱི་རྒན་རྒོན་དང་བྱིས་པ་གཙོ་བོ་ཡིན་པ་དང་། རྒྱུན་མཐོང་གི་ནད་མང་ཆེ་བ་ནི་ཆམ་ནད་ཡིན། དུས་མཚུངས་སུ་བྱིས་པའི་འཕུར་མཉེད་དང་གསང་མིག་འཕུར་མཉེད་བྱེད་བཞིན་ཡོད།  རྒན་རྒོན་ལ་གཅོང་ནད་ཀྱི་རྗེས་འདེད་འཚམས་འདྲི་བྱ་རྒྱུ་གཙོ་བོར་འཛིན་གྱི་ཡོད་པ་དེའི་ནང་ཁྲག་མངར་ཚད་ལེན་དང་། ཁྲག་ཤེད་ཚད་འཇལ་སོགས་ཚུད་ཡོད་པ་དང་གཟའ་འཁོར་རེར་མི་ཐེངས་40ལྷག་ཙམ་ལ་ཞབས་འདེགས་ཞུ་ཡོད། འགུལ་སྐྱོད་སྟབས་མི་བདེ་བའི་ཡུལ་མི་དང་འཕྲད་སྐབས་སྨན་པ་གཉིས་ཀྱིས་སྨན་བཅོས་སྒམ་ཁུར་ཏེ་སྦག་སྦག་བཞོན་ནས་སྨན་བཅོས་བྱེད་པར་བསྐྱོད་པ་རེད།

ད་ལྟར་འབའ་སྡེ་ཤང་ཀྲེན་ཕུའོ་གྲོང་ཚོའི་མང་ཚོགས་ཀྱི་ནད་གཞི་ཚབས་ཆེན་ཤང་གི་འཕྲོད་བསྟེན་ཁང་དུ་སྐྱོད་པ་དང་། ནད་གཞི་ཆུང་བ་གྲོང་ཚོའི་ནང་སྨན་བཅོས་བྱེད་ཆོག་པས་སོ་སོར་ལས་བགོས་ཡོད་པ་དང་ཕན་ཚུན་ཁ་གསབ་བྱེད་ཀྱི་ཡོད་པས་གྲོང་མིའི་ཐག་ཉེ་སར་སྨན་བཅོས་བྱེད་པའི་དགོས་མཁོ་སྤྱིར་ན་སྐོང་ཐུབ་པ་བྱུང་ཡོད།

ཤང་དེའི་ཀྲེན་ཕུའོ་གྲོང་ཚོའི་ཀུའུ་པུའུ་གྲོང་མིའི་ཚོ་ཆུང་དང་། ལུའོ་དབྱི་གྲོང་ཚོའི་ལུའོ་ཏ་གྲོང་མི་ཚོ་ཆུང་དང་ནན་ཀན་ཐུང་གྲོང་མི་ཚོ་ཆུང་གི་གྲོང་མི་ཁག་གཅིག་ཆུ་མཛོད་ཁུལ་གྱི་གནས་སྤོ་བྱས་པའི་དབང་གིས་གྲོང་རྡལ་གསར་པ་ཞིག་ཏུ་གཅིག་སྡུད་ཐོག་བཀོད་སྒྲིག་བྱས་ཡོད་པ་རེད། དེང་སང་འདི་གར་འཕྲོད་བསྟེན་ཁང་དང་། ཚལ་ཁྲོམ་ར། རིག་གནས་ཐང་ཆེན་སོགས་ཀྱི་སྒྲིག་བཀོད་ཆ་ཚང་ཡོད་པ་དང་འཚོ་བའི་ཆ་རྐྱེན་ལེགས་སུ་ཆེས་ཆེར་ཕྱིན་ཡོད་པ་རེད།

མང་ཚོགས་ཀྱི་རིག་གནས་འཚོ་བ་ཕུན་སུམ་ཚོགས་པོར་གཏོང་བ་དང་ས་གནས་དེ་གའི་འཛད་སྤྱོད་ནུས་པ་སྐུལ་སློང་བྱེད་པའི་ཆེད་དུ། ཤང་ཏང་ཨུ་དང་སྲིད་གཞུང་གིས་གླུ་གཞས་འགྲན་བསྡུར་སོགས་ཀྱི་བྱེད་སྒོ་སྒྲིག་འཛུགས་བྱས་ནས་ཁུལ་ཡོངས་དང་མཐའ་འཁོར་ཁུལ་དང་གྲོང་ཁྱེར་གྱི་དམངས་ཁྲོད་གླུ་བ་དང་མང་ཚོགས་འགུགས་ནས་ཞུགས་པ་དང་།  བཟའ་བཏུང་དང་ཞག་སྡོད་སོགས་ཀྱི་ལས་རྣམ་འཕེལ་རྒྱས་སྐུལ་ཁྲིད་བྱས་ཡོད། 

གཟའ་སྤེན་པའི་ཚོང་འདུས་ཉིན་ནི་འབའ་སྡེ་ཤང་གི་ཁྱད་ཆོས་ལྡན་པའི་དངོས་རྫས་སྤེལ་རེས་བྱེད་སྒོ་ཞིག་རེད། ཚོང་འདུས་ཉིན་མོ་སླེབས་སྐབས་མི་རིགས་སོ་སོའི་བྲོ་བ་ལྡན་པའི་ཟས་རིགས་དང་། སྔོ་ཚལ་སོས་པ། ཡུལ་ཕག་དང་བྱ་ཤ་སོགས་ཞིང་ལས་ཀྱི་ཁྱད་ལྡན་ཐོན་རྫས་གཅིག་སྡུད་ཐོག་ཚོང་རར་འདོན་པ་དང་། ས་ཆ་གཞན་གྱི་ཚོང་པས་ཀྱང་ཚོང་ཟོག་སྣ་ཚོགས་འཁྱེར་ཡོང་བས་ཉོ་ཚོང་གཉིས་ཀ་དར་རྒྱས་ཕྱིན་པས་ཞིང་ལས་ཐོན་རྫས་གྱི་འཚོང་ལམ་རྒྱ་ཆེར་ཕྱིན་པ་མ་ཟད། ཡུལ་མིའི་ཡོང་འབབ་ཀྱང་འཕར་ཡོད།

ལུའོ་དབྱི་གྲོང་ཚོ་ལུའོ་ཏ་གྲོང་མི་ཚོ་ཆུང་གི་དུག་སེལ་གསོལ་ཆས་སྡེབ་སྐྱེལ་ལྟེ་གནས་ནི་གྲོང་ཚོའི་གཞི་ཁྱོན་ཆེ་བའི་མཉམ་སྡེབ་དཔལ་འབྱོར་གྱི་རྣམ་གྲངས་ཞིག་ཡིན། ལུའོ་དབྱི་གྲོང་ཚོའི་ཏང་སྤྱི་ཁྱབ་ཀྲི་པུའུ་ཡི་ཧྲུའུ་ཅི་ཧོ་ཅན་པིན་གྱིས་ངོ་སྤྲོད་བྱས་པར་གཞིགས་ན། རྣམ་གྲངས་དེ་ཏང་སྤྱི་ཁྱབ་ཀྲི་པུའུ་ཡིས་སྣེ་ཁྲིད་པ་དང་ཧྲང་ཧའེ་དང་ཡུན་ནན་གྱི་རོགས་སྐྱོར་མ་དངུལ་སྒོར་ཁྲི་50བཏང་ནས་བསྐྲུན་པ། 2023ལོར་སྤྱོད་འགོ་ཚུགས་པ་དང་གཙོ་བོ་གསོལ་ཆས་གཙང་འཁྲུད་དུག་སེལ་གྱི་ལས་སྒོ་འགན་ལེན་བྱས་ཡོད། 

སྡེབ་སྐྱེལ་ལྟེ་གནས་སུ་ལས་མི་གཏན་འཇགས་མེད་པར་ཡུལ་མི་རེས་མོས་ཀྱིས་ལས་གནས་སུ་ཞུགས་པ་དང་རྒྱུན་གཏན་གྱི་དོ་དམ་དེ་ཚོ་ཆུང་གི་ཏང་ཀྲི་པུའུ་ཧྲུའུ་ཅི་ཡིས་འགན་འཁུར་ཡོད། ལུའོ་ཏ་ཡུལ་མིའི་ཚོ་ཆུང་གི་ཡུལ་མི་ལི་ལི་ཧྭ་ཡིས“དཀར་ཡོལ་འཁྲུ་སའི་བཟོ་གྲྭ་ཁྱིམ་གྱི་སྒོ་ཁར་ཡོད། གྲོང་ཚོའི་ནང་ལས་ཀ་བྱེད་ཐུབ་པ་མ་ཟད། ད་དུང་ཡོང་འབབ་ཀྱང་ཡོད་པས་ང་ཧ་ཅང་དགའ་པོ་བྱུང་”ཞེས་བཤད།

སྡེབ་སྐྱེལ་ལྟེ་གནས་ཀྱིས་འབའ་སྡེ་ཤང་གི་ས་གནས་དེ་གའི་བཟའ་བཏུང་ཚོང་ཁང་ལ་ཞབས་འདེགས་ཞུ་བ་མ་ཟད། ད་དུང་ཉེ་འགྲམ་གྱི་ཡན་མོན་ཤང་དང་ཡེ་ཀྲི་གྲོང་རྡལ་ལ་ཞབས་འདེགས་ཞུ་ཡོད། ཧོ་ཅན་པིན་གྱིས“འཁོར་ཁང་གིས་ལོ་རེར་སྒོར་ཁྲི་10ལྷག་བཏོད་ཡོད”ཅེས་བཤད། ལས་གཉེར་བྱས་པ་ནས་བཟུང་ལྟེ་གནས་དེས་ལོ་ལྟར་མི་480ལྷག་ཙམ་ལ་ལས་ཞུགས་གོ་སྐབས་མཁོ་འདོན་བྱས་པས་གྲོང་མི་ལ་བརྟན་ལྷིང་གི་ཡོང་འབབ་ཡོད་པ་མ་ཟད། གྲོང་ཚོའི་མཉམ་སྡེབ་དཔལ་འབྱོར་ལ་ལོ་རེར་སྒོར་ཁྲི་1འཕར་ནས་ས་གནས་དེ་གའི་བེད་མེད་དུ་ལུས་པའི་ངལ་རྩོལ་ནུས་ཤུགས་ཕན་སྒྱུར་ནུས་ལྡན་བྱས་པ་དང་གནས་སྤོས་མང་ཚོགས་ཀྱི་ཐག་ཉེ་སར་ལས་ཞུགས་བྱེད་པའི་དཀའ་གནད་ཐག་གཅོད་བྱས་ཡོད།

གྲོང་ཚོའི་འཕྲོད་བསྟེན་ཁང་ནས་དཀར་ཡོལ་འཁྲུ་གྲྭ་བར་དང་། གྲོང་རྡལ་གྱི་སྒྲིག་བཀོད་ལེ་ལག་ནས་རིག་གནས་བྱེད་སྒོ་དང་དངོས་རྫས་ཉོ་ཚོང་བར་འབའ་སྡེ་ཤང་གིས་དམངས་འཚོའི་བྱ་བ་ཆུང་ཆུང་རེ་རེ་ལ་བརྟེན་ནས་མང་ཚོགས་ཀྱི་ཐོབ་སྣང་དངོས་གནས་འདེགས་སྐྱོར་བྱས་ཡོད།