ཟླ་8པའི་ཚེས་21ནས་23ཉིན་བར། རྒྱལ་ཡོངས་ཕུལ་བྱུང་གི་མང་ཚོགས་རིག་རྩལ་རོལ་དབྱངས་དཔེ་སྟོན་རང་བཞིན་གྱི་འགྲེམས་འཁྲབ་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་དུ་སྤེལ་ནས། སྐབས་ཉི་ཤུ་པའི་མང་ཚོགས་སྒྱུ་རྩལ་མཁས་པའི་བྱ་དགའ་ཐོབ་པའི་རོལ་དབྱངས་མཚོན་དུ་བྱས་པའི་ཕུལ་བྱུང་གི་མང་ཚོགས་རིག་རྩལ་རོལ་དབྱངས་འགྲེམས་སྟོན་བྱེད།

འགྲེམས་འཁྲབ་དེ་《ཀ་ཁྲེ་ན་ས》ཞབས་བྲོ་ཡིས་འཁྲབ་འགོ་ཚུགས་པ་དང་“སེམས་ཀྱི་ཉི་ཟླར་མཉམ་འཛོམས་བྱེད”དང་། “སེམས་ཀྱི་ཉི་ཟླར་རོལ་དབྱངས་འཁྲབ་སྟོན་བྱེད” “བརྗེད་དཀའ་བའི་སེམས་ཀྱི་ཉི་ཟླ”བཅས་ལེའུ་གསུམ་དུ་ཕྱེ་ཡོད། ཤིན་ཅང་དབྱི་ལི་ཁུལ་རིག་གནས་ཁང་གིས་སྒྲིག་འཛུགས་བྱས་པའི་ཏམྦུ་ར་དཀྲོལ་གཏོང་བྱས། ཀྲེ་ཅང་ཞིང་ཆེན་ཉིང་པོ་གྲོང་ཁྱེར་ཀྲེན་ཧའེ་ཆུས་རིག་གནས་ཁང་གིས་སྒྲིག་འཛུགས་བྱས་པའི་ཞབས་བྲོ། ཅང་སུའུ་ཞིང་ཆེན་ཡན་ཁྲེང་གྲོང་ཁྱེར་ཤང་ཧྲུའེ་རྫོང་རིག་གནས་ཁང་གིས་སྒྲིག་འཛུགས་བྱས་པའི་འཁྲབ་ཚན་ཆུང་བ། ཡུན་ནན་ཞིང་ཆེན་ཆུས་ཅིང་གྲོང་ཁྱེར་རིག་གནས་ཁང་གིས་སྒྲིག་འཛུགས་བྱས་པའི་གཞས་མ་གཏམ། བདེ་ཆེན་ཁུལ་རིག་གནས་ཁང་སོགས་ཀྱིས་སྒྲིག་འཛུགས་བྱས་པའི་ཐང་ཆེན་ཞབས་བྲོ་སོགས་འཁྲབ་སྟོན་བྱས་ནས་མི་རིགས་ཁག་གི་མང་ཚོགས་དང་ཕྱོགས་བཞི་མཚམས་བརྒྱད་ཀྱི་ཡུལ་སྐོར་བར་མང་ཚོགས་ཀྱི་རིག་རྩལ་སྟོན་མོ་གཟབ་རྒྱས་ཤིག་བསྟན་པ།

ད་ཐེངས་ཀྱི་འགྲེམས་འཁྲབ་ཐོག་དམངས་ཕན་བྱེད་སྒོ་ཐེངས་མང་སྤེལ་བ། མཚན་མོའི་མི་རིགས་ཐང་ཆེན་ཞབས་བྲོ་འཁྲབ་སྟོན། པོ་ཏ་མཚོའི་མཛེས་ལྗོངས་ཁུལ་སོགས་སུ་བསྐྱོད་དེ་གཞི་རིམ་གྱི་སྐོར་སྐྱོད་འཁྲབ་སྟོན་བྱེད། ས་གནས་དེ་གའི་རིག་རྩལ་རྐང་འཛིན་པ་དང་། མང་ཚོགས། ཡུལ་སྐོར་བ་བཅས་གདན་དྲངས་ནས་མཉམ་དུ་འཁྲབ་སྟོན་བྱས་ནས། ཕུལ་བྱུང་གི་རིག་རྩལ་རོལ་དབྱངས་སྤྱི་དམངས་དང་གཞི་རིམ་དུ་ཁྱབ་གདལ་བཏང་ཡོད།