རྡོ་མཁར་གནའ་གྲོང་གི་ཟླ་འོད་ཐང་ཆེན་དུ་མུན་རུབ་པ་དང་བསྟུན། ཟླ་8ཚེས་23ཉིན་གྱི་དགོང་མོ། སྐབས་འདིའི་རིག་གནས་ཡུལ་སྐོར་དུས་ཆེན་གྱི་མཇུག་བསྡུའི་བྱེད་སྒོའི་གྲས་ཤིག་ཡིན་པའི་འཛམ་གླིང་གི་“སེམས་ཀྱི་ཉི་ཟླའི”རིག་གནས་ཡུལ་སྐོར་དུས་ཆེན་སྐབས་བཞི་པའི་མང་ཚོགས་སྒྱུ་རྩལ་མཁས་པའི་གླུ་ལེན་ཆེད་ཚོགས་གངས་ལྗོངས་ཀྱི་རང་བྱུང་སྐད་སྒྲ་འཛམ་གླིང་གི་“སེམས་ཀྱི་ཉི་ཟླ”ལེན་པ་དེ་རྡོ་མཁར་གནའ་གྲོང་གི་ཟླ་འོད་ཐང་ཆེན་དུ་ངོ་མཚར་ཆེ་བའི་ངང་འཁྲབ་སྟོན་བྱས་ནས། གྲོང་མི་དང་ཡུལ་སྐོར་བ་རྣམས་དྲ་ཐོག་གི་དྲ་གྲོགས་དང་མཉམ་དུ་མཐོ་སྒང་གི་རོལ་དབྱངས་འདུ་ཚོགས་གཟབ་རྒྱས་ཤིག་མྱོངས་བཅུག 

དགོང་ཚོགས་འགོ་ཚུགས་པ་དང་བསྟུན།  གངས་ཀྱི་ནོར་བུ་ཚན་སྡེབ་གིས་སྔོན་ལ་འཁྲབ་སྟོན་བྱས་ཏེ། 《སེམས་ཀྱི་ཉི་ཟླ》དང་《སྤྲོ་སྣང་ལྡན་པའི་གཞས།》བཅས་རོལ་དབྱངས་གཉིས་ཀྱིས་ཡུལ་དངོས་རྣམ་པ་འཁྲུག་ཏུ་བཅུག  སྐལ་བཟང་གཡུ་སྒྲོན་གྱིས་《རྩྭ་ཐང་གི་བརྩེ་སེམས།》ལེན་པ་དང་། སྐལ་བཟང་དབང་འདུས་ཀྱིས་《བདེ་སྐྱིད་ཀྱི་བདེ་ཆེན།》ཕུལ་ནས་མཐོ་སྒང་གི་ཕ་ཡུལ་ལ་བསྟོད་གླུ་ཕུལ།ལི་སུའུ་ཞོན་གྱིས་《ཇེ་བཟང་ནས་ཇེ་བཟང་།》དེ་མང་ཚོགས་ཀྱིས་མཛེས་སྡུག་ལྡན་པའི་འཚོ་བར་བཅངས་པའི་རེ་འདུན་མཚོན། ཡུས་ཤའོ་ཡི་གླུ་གཞས་《སྨན་རིར་ཡོད།》ཀྱིས་ཁ་བ་དཀར་པོའི་བརྗིད་ཉམས་དེ་གླུ་དབྱངས་དང་མཉམ་འདྲེས་བྱས་ཡོད། སྐལ་བཟང་ལྷ་མཚོ་ཡིས་《བུ་མོ་རྒྱན་ཆ།》དང་།  ཉི་མ་ལྷ་མོ་དང་གཡག་ཁེ་བཟའ་ཚང་གཉིས་ཀྱི་《བཀྲ་ཤིས་ནོར་བུ།》སྒྲོལ་མ་ལ་ཚན་སྡེབ་ཀྱི་《ངའི་ཁྱིམ་དུ་ཡོང་བ།》བསོད་ནམས་ལྷུན་འགྲུབ་ཀྱི《ཕ་མའི་ཁ་ཏ།》བཅས་གཅིག་རྗེས་གཉིས་མཐུད་ངང་འཁྲབ་སྟོན་བྱས་ནས།  བོད་ཀྱི་དམངས་སྲོལ་གོམས་གཤིས་ཟབ་མོ་ངང་མངོན།   ཞིས་ཏུང་མའེ་ཡི་《དགའ་སྤྲོའི་གླུ་དབྱངས》དང་ཨ་གོ་ཁྲང་ཤིང་གི་《ལུག་རྫི་བུ་མོ》 ཧོ་ཡིང་ཁྲུན་གྱི་《མནའ་མ་འགྲོ་གྲབས་ཡོད་པའི་བུ་མོ》བཅས་ཀྱིས་ཕུན་སུམ་ཚོགས་པའི་མི་རིགས་ཀྱི་འཚོ་བའི་རྣམ་པ་མངོན་ཡོད། འཁྲབ་སྟོན་མཇུག་འགྲིལ་རྗེས་སེམས་ཀྱི་ཉི་ཟླ་ཚན་སྡེབ་གིས་གར་སྟེགས་ཐོག་བསྐྱོད་དེ་《སེམས་ནང་གི་གངས་རི》དང་ 《དུས་རབས་གསར་པར་ཁ་བཏགས་ཕུལ》ཞེས་པ་བླངས་ནས་དགོང་ཚོགས་ཡུལ་དངོས་སུ་ཚ་རླབས་འཕྱུར། 

ཡུལ་དངོས་སུ་ཐལ་མོའི་རྡེབ་སྒྲ་རྒྱུན་ཆད་མེད་པར་གྲགས་ཏེ།  དྲ་གྲོགས་མང་པོས་དྲ་ཐོག་ཐད་གཏོང་ཁང་བརྒྱུད་ནས་འཁྲབ་སྟོན་ལྟ་ཞིང་། ས་ཁོངས་ཀྱི་དབྱེ་མཚམས་གཏོར་ནས།  གངས་ལྗོངས་ཀྱི་རིག་གནས་སྟོན་མོ་མཉམ་སྤྱོད་བྱས། ཆུ་ཚོད་གཉིས་ཀྱི་འཁྲབ་སྟོན་ནང་བདེ་ཆེན་རང་ས་གནས་ཀྱི་གླུ་མ་དང་རིག་རྩལ་ཚན་སྡེབ་མཉམ་འཛོམས་བྱས་ཏེ།ལེན་ཚན་དེ་སྲོལ་རྒྱུན་གྱི་མི་རིགས་ཉམས་འགྱུར་དང་དུས་རབས་གསར་པའི་སྙིང་སྟོབས་ཀྱི་ནང་དོན་ལ་ལྟ་རྟོག་བྱས་ཏེ། སྨན་རི་གངས་རི་དང་ནགས་ཕག་མཚོ། རྡོ་མཁར་གནའ་གྲོང་བཅས་ཀྱི་ཡུལ་སྲོལ་གོམས་གཤིས་ཉམས་སུ་མྱོང་རྒྱུ། གླུ་ལེན་ཆེད་ཚོགས་ཀྱིས་རོལ་དབྱངས་འབྲེལ་ཟམ་དུ་བྱས་ཏེ།  ཕྱོགས་ཡོངས་སུ་བདེ་ཆེན་གྱི་མི་རིགས་མང་པོའི་རིག་གནས་མཉམ་འདྲེས་མཉམ་གནས་བྱས་པའི་ཁྱད་ལྡན་རྣམ་པ་སྟོན་ནས། འཛམ་གླིང་གི་“སེམས་ཀྱི་ཉི་ཟླའི”རིག་གནས་ཡུལ་སྐོར་མིང་རྟགས་སྔར་བས་ཇེ་གྲགས་སུ་གཏོང་། ས་གནས་དེ་གའི་རིག་རྩལ་སྟོབས་ཤུགས་སྔོག་འདོན་བྱས་པ་བརྒྱུད།   རིག་རྩལ་ལ་བརྟེན་ནས་རིག་གནས་ཡུལ་སྐོར་ཐོན་ལས་ནུས་པ་སྤྲོད་དེ། རྒྱལ་ཡོངས་སྤྱི་དམངས་ལ་གངས་ལྗོངས་མཐོ་སྒང་གི་ཉམས་འགྱུར་ཚད་མེད་མངོན་ནས།  ཕྱོགས་བཞི་མཚམས་བརྒྱད་ཀྱི་སྐུ་མགྲོན་“སེམས་ཀྱི་ཉི་ཟླ”རུ་མྱོང་རོལ་བྱེད་པར་གདན་འདྲེན་བྱེད།