ཟླ་8པའི་ཚེས་23ཉིན་གྱི་ཕྱི་དྲོར། འཛམ་གླིང་གི་“སེམས་ཀྱི་ཉི་ཟླའི”རིག་གནས་ཡུལ་སྐོར་དུས་ཆེན་སྐབས་བཞི་པའི་བྱེད་སྒོ་གལ་ཆེན་ཞིག་ཡིན་པའི་“མཐོ་སྒང་གི་སྤུས་ལེགས་ཐོན་རྫས། ས་ཁོངས་ཡོངས་ཀྱི་བདེ་ཆེན་རིག་གནས་ཡུལ་སྐོར་གྱི་ཞིང་ཚོང་འོས་སྦྱོར་དང་གངས་ལྗོངས་ཀྱི་རྒྱན་གོན་འགྲེམས་སྟོན”བྱེད་སྒོ་དེ་རྡོ་མཁར་གནའ་གྲོང་ཟླ་འོད་ཐང་ཆེན་དུ་སྤེལ། 

བདེ་ཆེན་གྱི་ཐུན་མོང་མ་ཡིན་པའི་མཐོ་སྒང་གི་ས་ཁམས་ཁོར་ཡུག་དང་འདང་ངེས་ཀྱི་ཉི་འོད། ཉིན་མཚན་གྱི་དྲོད་ཚད་བར་ཁྱད་ཆེན་པོ་བཅས་ལྡན་པས་སྤུས་ལེགས་ཀྱི་མཐོ་སྒང་གི་ཁྱད་ལྡན་དངོས་རྫས་ཐོན་པ་དང་ཕུན་སུམ་ཚོགས་པའི་མི་རིགས་རིག་གནས་སྔོག་འདོན་བྱས་ཐུབ། ཐེངས་འདིའི་བྱེད་སྒོས་སྤུས་རྟགས་འགྲེམས་སྟོན་དང་སྤེལ་རེས་ཁྱབ་གདལ། ཐོན་འཚོང་སྦྲེལ་མཐུད་བཅས་ཀྱི་སྟེགས་བུ་གཙོ་བོ་ཞིག་བཞེངས་སྐྲུན་བྱས་ནས། ཡུལ་དངོས་སུ་བདེ་ཆེན་མཐོ་སྒང་གི་རྒུན་ཆང་དང་མཐོ་སྒང་གི་ཞིང་ལས་ཁྱད་ལྡན་ཐོན་རྫས་ཀྱི་ཆེད་དོན་འོས་སྦྱོར་ལས་རིམ་གཉིས་བཀོད་སྒྲིག་བྱས་ཏེ། འོས་སྦྱོར་མི་སྣས་ཡུལ་དངོས་འགྲེལ་བཤད་བྱས་པར་བརྒྱུད་གསོན་ཉམས་ལྡན་པའི་ངང་རང་ཡུལ་གྱི་རྒུན་ཆང་ཐོན་ལས་དང་སྐྱེ་ཁམས་ཞིང་ལས་ཁྱད་ལྡན་ཐོན་རྫས་ཀྱི་འཕེལ་རྒྱས་གྲུབ་འབྲས་མངོན་ནས། བྱེད་སྒོར་ཞུགས་མི་ཚང་མར་མཐོ་སྒང་གི་སྤུས་ལེགས་ཐོན་རྫས་ཀྱི་དམིགས་བསལ་རིན་ཐང་དང་འཕེལ་རྒྱས་ཀྱི་མི་མངོན་པའི་སྟོབས་ཤུགས་ལ་ཚོང་སྣང་གཏིང་ཟབ་བྱུང་བཅུག

བྱེད་སྒོའི་ཡུལ་དངོས་སུ། མི་རིགས་རིག་གནས་འགྲེམས་སྟོན་གཅིག་རྗེས་གཉིས་མཐུད་ངང་འཁྲབ་སྟོན་བྱས་ནས་ཡུལ་དངོས་ཀྱི་རྣམ་པ་མཐོ་རླབས་ཕྱོགས་སུ་སྐྱོད། དངོས་མིན་རིག་གནས་ཀྱི་ཞབས་བྲོའི་སྣང་ཚུལ་ཟློས་གར་དང་མཛེས་ལྗོངས་ཁུལ་གྱི་འཁྲབ་ཚན་ཐུང་ངུ་སྣང་ཚུལ་ཟློས་གར། ལག་རྩལ་རིག་རྩལ་ཟློས་གར་རིམ་བཞིན་འཁྲབ་སྟོན་བྱས། ཡུལ་དངོས་ཀྱི་བརྙན་ཤེལ་ཆེན་མོའི་ཐོག་གཅིག་སྡུད་ངང་བྲོ་དང་རས་པ་སོགས་ཀྱི་རྒྱལ་ཁབ་རིམ་པའི་དངོས་མིན་རིག་གནས་ཤུལ་བཞག་གི་རྣམ་གྲངས་འགྲེམས་སྟོན་བྱས། དམངས་སྲོལ་རིག་རྩལ་འཁྲབ་སྟོན་གྱིས་བདེ་ཆེན་བོད་རིགས་རང་ལ་ལྡན་པའི་འཚོ་བའི་རྣམ་པ་དང་དམངས་སྲོལ་གོམས་གཤིས་མངོན་ཞིང་། བདེ་ཆེན་མི་རིགས་མང་པོའི་ཁྱད་ལྡན་རྒྱན་གོན་འགྲེམས་སྟོན་གྱིས་ཀྱང་གཅིག་སྡུད་ངང་མངའ་ཁོངས་ནང་གི་མི་རིགས་ཁག་གི་རྒྱན་གོན་རིག་གནས་ཀྱི་ཡིད་དབང་འཕྲོག་ཤུགས་མངོན་ཡོད་པ་རེད།